29
1 Ya innaynayun Job an himmapit an inalinay,
2 “Un ni' ahan tun atagu' ad ugwan
ya umat hidin hopapna an hi Apo Dios di nanalimun ay ha"in!
3 Ti binadangana' ay Hiyah din hopapna,
ya impapatalnay helong hinan pange'wa'!
4 Ya mibangngad ni' goh din a'unga' an amaphod di nitagua',
ya pa'ahhalimunana' ni' ay Hiyan nidugah di abalinana ti nahamad di nunligwaanmi!
5 Hidin ninidduman Apo Dios ay ha"in ya wadada goh din imbabaluy'un neheheggon ay ha"in,
6 ya do'ol di gatas an malpuh nan baka' ya nan gandeng'u,
ya do'ol goh di lanan ma'ala' hinan intanom'un olibon mumpunlutbu
an ta"on hi un hinan mabinatuy nitammanda.
7 Ya wa ay ta na'amung din nun'anomnoman an mumpangipangpangulu
ya immuya' an mi'yamung ay dida.
8 Ya wa ay goh ta tigona' hidin ungunga ya mun'ahligda ta wayaana',
ya ta"on un din nun'anomnoman ya mumpangata'dogda ta ipattigday pange'gonandan ha"in.
9 Ya wa ay goh ta tigona' hidin mumpangipangpanguluh nan tatagu ya timma'dogda,
ya dimminongdan mi'id ah humaphapit.
10 Ya ta"on un din u'upihyal hinan babluy an nun'abagtuy haadda
ya tuma'dogda ya unda didindinong an mi'id ah humaphapit.
11 An amin din nangngol hinan hinapit'u ya ene'gonana',
ya an amin din nannig hidin ina'inat'u ya maphod di nangul'ulgudandah aat'u.
12 Ti manu ay ya binadanga' nan nun'awotwot hinan mahapulda,
ya binadanga' goh nan nguhun mi'id ah mamadang ay dida.
13 Ya din mun'agadyuh an matoy ya binadanga' goh dida,
at ene'gonana' ay dida.
ya ta"on un din umu'utun ya binadanga' ta impa'amlong'u dida.
14 Ya nan ina'inat'u an nahamad di paddungnay lubung'u,
ya nan nahamad an panumalya' di paddungnay lubung'un magayad.
15 Ya binadanga' nan nun'abulaw ya nan nun'apilay
an paddungnay un ha"in di matada ya hu'ida.
16 Ya ha"in di paddungnay hi aman nan nun'awotwot,
ya ha"in goh nanalimun an nangipapto' hinan bunag hinan punhumalyaan.
17 Ya pinogpog'uy bi'ah nan tatagun mangamangat hi pumbaholan,
ya impadinong'u nan pangipaligligatandah nan tatagu.
18 Hay ninomnom'u ya matubayana',
ya hinahalimid'u an malenggopa' hi ataya' an wagwadaa' hinan pamilya'.
19 Ya umata' hinan ayiw ta nan lamut'u ya umatam hinan way danum
ti munnonong di dulnuh nan mahdom.
20 At nan ipabagtua' ya minaynayun,
ya umat goh hidin bi'ah'u.
21 Ti wa ay ta himmapita' an muntugun ya didindinongda nan tuguno'
an ihamaddan donglon nan itugun'u.
22 Ya wa ay ta lempah'un nuntugun ya mi'id ah mangdum
ti makulug an amin din intugun'un mi'id ah kudangna.
23 Hin'umu'udduman hehennodday humapita' goh ay dida
an umat hi punhoodandah umalian di udan hinan tiyalgaw.
24 Ya wa ay ta munlungdayada ya inimiha' dida
ya hay pannigandah nan ma'emeh an angah'uy mangipa'amlong ay dida.
25 Ha"in ya intudu' di maphod hi atondan paddungnay un ha"in di panguluda
an umat hi aton nan alin mangipangpanguluh nan tindalu,
ya umat hinan mangal'alu' hinan way munlungdaya.”