Abụ Ọma 38
Abụ Ọma Devid. Arịrịọ.
Arịrịọ nʼoge nsogbu
1 Biko, Onyenwe anyị, abarala m mba nʼiwe,
maọbụ taa m ahụhụ mgbe iwe gị dị ọkụ.
2 Nʼihi na àkụ gị niile amapuola m ahụ,
aka gị adakwasịkwala m, dịka ọ bụ ọkpọ.
3 Nʼihi oke iwe gị, ọ dịghị izuoke dị nʼime anụ ahụ;
enweghịkwa m udo nʼime ọkpụkpụ m niile nʼihi mmehie m.
4 Mmetụta ikpe ọmụma m na-adakwasị m
dịka ibu arọ nke dị arọ karịa m.
5 Ọnya m na-ere ure na-asọ oyi
nʼihi mmehie enweghị uche m.
6 Abụ m onye a nyidara ma kwatukwaa nʼala
ogologo ụbọchị niile, ana m agagharị nʼiru ụjụ.
7 Azụ na-egbu m mgbu nke ukwuu
ahụ adịghịkwa m.
8 Ume ọbụla adịghịkwa nʼime. Adị m ka onye e gwepịara egwepịa.
Ana m asụ ude nʼihi oke ihe mgbu nke obi.
9 O Onyenwe m, ị maara agụụ niile nke na-agụ obi m;
ịsụ ude m ezokwaghị ezo nʼebe ị nọ.
10 Obi na-alọ m mmiri, ike na-agwụkwa m,
ìhè esitekwala nʼanya m pụọ.
11 Ndị m hụrụ nʼanya na ndị enyi m na-asọ m oyi nʼihi ọnya m,
ndị agbataobi m na-anọ m ebe dị anya.
12 Ndị na-achọ igbu m na-esiri m ọnya,
ndị ahụ chọrọ imerụ m ahụ na-ekwu maka ihe dakwasịrị m;
ogologo ụbọchị niile ha na-agba izuzu aghụghọ.
13 Adị m ka onye ntị chiri, onye na-apụghị ịnụ ihe ọbụla,
dịka onye ogbu, onye na-apụghị imeghe ọnụ ya.
14 Adịla m dịka onye na-anaghị anụ ihe,
onye ọnụ ya apụghị ịsa okwu.
15 O Onyenwe anyị, ana m eche gị;
o Onyenwe m Chineke m, ị ga-aza.
16 Nʼihi na asịrị m, “Ekwela ka ha ṅụrịa ọṅụ nʼisi m;
maọbụ bulie onwe ha elu nʼebe m nọ mgbe ụkwụ m na-agbuchapụ.”
17 Nʼihi na lee, ana m achọ ịda ada.
Anọkwa m nʼọnọdụ oke mgbu.
18 Ana m ekwupụta mmehie m;
mmehie m na-ewute m.
19 Ndị iro m, ndị na-eme ihe ike dị ọtụtụ,
ndị na-akpọ m asị, na-enweghị ihe m mere, bara ụba.
20 Ndị na-eji ihe ọjọọ akwụghachi m ezi ihe,
na-ebo ebubo megide m
nʼagbanyeghị na m na-achọ ime naanị ezi ihe.
21 O Onyenwe anyị, ahapụkwala m;
O Chineke m, anọkwala m ebe dị anya.
22 Bịa ọsịịsọ inyere m aka
Onyenwe m na Onye nzọpụta m.