14
Mkpọ-anwụ; ẹjo-ẹgu; mẹ ọgu
1 Ọwaa iphe Ojejoje kfuru
Jeremáya lẹ k'ẹjo mkpọ-anwụ:
2 “Ndu Júda agụkwa aphụ.
Mkpụkpu, nọkota l'alị iya l'anọdu anwụ kpaa.
Ẹphe akwa ẹkwa l'okfu ẹhu alị-a.
Tẹmanu bẹ mkpu
adakwaphu lẹ Jerúsalemu.
3 Ndu a maru ẹpha ẹphe ziru
ndu ozi ẹphe t'ẹphe je ekuta mini.
Ẹphe eje l'ogvu-mini;
tọ dụ mini, nọ iya nụ.
Ẹphe aparu ite ẹphe l'ophorokpo lata.
Iphere egude ẹphe;
meji atọfushia ẹphe;
ẹphe eworu iphe kpuchishia
ishi l'ẹke iphere dụ ẹphe.
4 Alị gbaakwaru ọru;
kẹ l'ẹ to nwehedu mini achịnu l'alị ono.
Iphere egude ndu akọ okfu;
ẹphe eworu ẹka kpubegbaa l'ifu.
5 Mbụ jeye lẹ nne ele,
bu l'ẹgbudu; ẹphebedua
agbaghashịtsuaru ụnwu,
ọ mụru k'ọphungu;
l'ẹke ẹ tọ phụdu ẹswa,
ọo-ta.
ọo-ta.
6 Nkakfụ-ịgara-ọswa
evudotsua l'ẹke alị gụru iphoro;
l'atụ phẹngu-phẹngu l'ọ bụ nkụta-ọswa.
Ẹnya agbahụkota iya ọchi;
kẹ l'ẹ tọ dụdu ẹke ẹphe
a-nọdu taa nri.”
a-nọdu taa nri.”
7 “A makwaru-a l'iphe dụ ẹji,
ayi meru agba ayi ekebe;
ọle; nggụbe Ojejoje;
menua iphe l'okfu ẹpha ngu;
kẹ l'ayi dafụwaru
dafụkpoo nshinu;
ayi emewaa iphe dụ
ẹji nshinu l'ẹke ịino.
8 Nggụbedua bụ nggu bụ
onye ndu Ízurẹlu tụru ẹnya yeeru;
nggụbe onye adzọfutaje
ẹphe mẹ ẹphe teke ẹphe eje iphe-ẹhuka.
?Nanụ ẹge e meru;
b'o gbe dụ l'ị byaru abyabya l'alị-a.
O gbe dụ l'ọ bụ onye ije,
anọje ẹnyashi lanụ nwẹnkinyi.
9 ?Nanu ẹge ọ dụ;
bẹ iigbe eme l'ọ bụ nwoke, a tụru l'ụkfu;
mbụ nwoke, ike kẹ ọgu dụ;
obenu l'ike ta dụdu iya kẹ
t'ọ dzọo madzụ ndzụ?
Nggụbe Ojejoje;
ayi lẹ nggu tụkonurua nọdu;
ayi l'aza ẹpha ngu;
ba agbadokwa ayi!”
10 Ọwaa iphe Ojejoje ekfu
l'okfu ẹhu ndu-a:
“Iphe adụje ẹphe mma
nshinu bụ aghaphe.
Ẹphe ta alọ-gudejedu ọkpa ẹphe.
Ọo ya bụ lẹ ya ta anatadu ẹphe.
Ọo nta-a; bẹ ya a-nyata iphe dụ ẹji ono,
ẹphe meshikotaru ono;
bya ahụ̀a ẹphe àhụ̀hù
k'ẹjo iphe ẹphe meshiru.”
11 Ya ndono; Ojejoje asụ mu: “Te mu be ekfukwa nụ Nchileke t'ọ dụru ndu-a lẹ mma. 12 A makwaru-a l'ẹphe aswịjeru Nchileke awịswi; obekwanu lẹ ya ta angadu nchị l'ẹkwa, ẹphe ara. A makwaru-a l'ẹphe egwojeru iya ngwẹja-ukfuru; bya egwooru iya ngwẹja-nri. Obenu lẹ ya ta anatadu iya. Iphe ya e-mechia bụ lẹ ya e-gude ọgu mebyishia ndu-a. Ya egude ẹjo-ẹgu; mẹ ẹjo iphe-ememe mebyishia ẹphe.”
13 Tọ dụ iya bụ; mu asụ: “Nggụbe Nnajiufu, bụ Ojejoje; ndu nkfuchiru Nchileke anọdujekwa l'ekfuru ẹphe l'ẹ to nwedu ọgu, ada nụ; ọphu ẹjo-ẹgu 'abyakwa. Lẹ nggụbe Nchileke e-mechia tẹ nchị dụ ẹphe ndoo l'alị-a; nọo ụlori.”
14 Tọ dụ iya bụ; Ojejoje abyakwa bya asụ mu: “Lẹ ndu nkfuchiru ono gudekwa ẹpha iya l'adzụ ẹjo-ire. L'ẹ tọ kwa yẹbedua ziru ẹphe t'ẹphe bya; ọphu ọ bụdu iya fọtaru ẹphe; ọphu ọ dụkwanu iphe ya kfuru nụ ẹphe. Ekfuchita, ẹphe ekfuchitaru iya dụ l'ọ bụ onye l'eze àphụ̀ ẹ tọ phụdu. Ẹphe agba ẹja, ẹ-tẹ nwedu iphe ọ bụ; l'ekfu iphe ẹphe rịtaru l'ọkpoma ẹphe. 15 Ọo ya bụ; ọwaa iphe Ojejoje ekfu l'okfu ẹhu ndu nkfuchiru ono, gude ẹpha iya ekfu ono; mbụ ndu ẹ-ta abụdu yẹbedua ziru ẹphe t'ẹphe je; ẹphe eje anọdu l'ekfu; sụ: ‘L'ẹ tọ dụkwa ọgu; m'ọ bụ ẹjo-ẹgu, byaru bya edenyi ndu alị-a ẹka.’ Ndu nkfuchiru ono l'onwẹphe; bẹ bụ-a ọgu; mẹ ẹjo-ẹgu e-gbushi ẹphe. 16 Ọdo abụru lẹ ndu ono, ẹphe ekfu anụ ono bẹ ee-mekochaa tufashia odzu ẹphe l'esu-ụzo Jerúsalemu; yọ bụru iphe e-gbushi ẹphe bụ ẹjo-ẹgu ono yẹle ọgu ono. Ọphu ọ dụdu onye a-phọdunu kẹ t'o lia ẹphe; mbụ tsube l'unyomu ẹphe; jeye lẹ ụnwu ẹphe unwoke mẹ ndu kẹ ụnwanyi. Aphụ, gbaberu ẹphe nụ bẹ ya a-wụru kpua ẹphe.”
17 Ọwaa iphe ii-kfuru nụ ẹphe ndọ-ọ:
T'ẹnya-mini wụkwaa mu
l'ẹnya: eswe l'ẹnyashi mkpụrumkpuru;
kẹle nwatibe mu,
yẹle nwoke ta zẹbua
bẹ ọnya, aba iya nụ ha nshinu.
Ọ kwa ndibe mu;
bẹ eekfu ẹge ono.
E chiru iya pyaapyaa.
18 Ọ -bụru lẹ mu bamiru
l'ime ime obodo ono;
bẹ mu a-phụ odzu ndu
e gude ogu-mbeke gbushia.
Mu -bahụ lẹ mkpụkpu ẹphe;
bẹ mu a-phụ iphe ẹjo-ẹgu ono meru.
Ndu achịjeru Nchileke ẹja;
mẹ ndu nkfuchiru Nchileke
tụkookwaru lashia alị ẹke ẹphe ta amadụ.
19 ?Ịijika-ghewaru Júda ajịka tọo?
?Tọ dụhedu iphe ị gụberu Záyọnu tọo?
?Nanụ ẹge e meru;
bẹ iphe i mekaru ayi te kwedu akpọhu?
Ayi leru ẹnya ẹhu-agu;
ọphu ọ dụdu iphe,
dụ mma byaru ayi.
Ayi elee ẹnya teke ee-me
t'ayi kọrohu; yọ bụlerua egvu;
bẹ eegbe eye ayi.
20 Nggụbe Ojejoje;
iphe dụ ẹji ayi emeebe
ruakwaru ayi l'ẹhu;
yẹle ikpe, nmaru nna ayi oche phẹ;
kẹ l'ayi meekwaru ngu iphe dụ ẹji.
21 Byiko; l'ọ̀gvù ẹpha ngu;
ba agbadokwa ayi.
Be ewokwaru aba-eze ngu ono,
dụ biribiri ono fua l'alị!
Nyatakwa ndzụ, ayi lẹ nggu gbaru!
Be mebyikwa iya!
22 ?O nweru agwa agwa ono,
nọgbaa l'ọhamoha ono,
nweru ọphu adụje ike chịa mini?
Mbụ; akpamigwe l'onwiya;
?omeje tẹ mini chịa.
Wawakwa. Ọo nggụbedua;
nggụbe Ojejoje, bụ Nchileke ayi.
Ọo ya bụ l'ọo nggụbedua;
bẹ ayi wotaru obu ziaru;
kẹ l'ọo nggụbedua emekota iphe ono l'ọ ha.