65
Egvu-ọma, Dévidi deru nụ onye ishi egvu
1 Nggụbe Nchileke;
ọ dụ mma t'ayi nọdu lẹ
Záyọnu jaa ngu ajaja!
Ayi e-medzukotaru ngu
iphe ayi riburu l'ayi e-meru ngu.
2 Nggụbe onye, anụje ekfukfu, ayi ekfu anụ ngu;
ọ bụ nggu bẹ madzụ
kpoo-gbaa; a-wụru wụ-kfuta.
3 Teke iphe dụ ẹji ayi shi kpapyabẹ ayi;
bẹ ịiguleru-a ayi nvụ.
4 Ọnu-ọma bụ kẹ ndu, ị fọtaru;
tẹ nggu l'ẹphe buru l'ogbodufu ngu.
Iphe dụ mma, nọ l'ẹke
i bu; ejije ayi ẹpho;
mbụ iphe dụ mma,
nọ l'eze-ụlo ngu ono,
dụ nsọ ono.
5 Nggụbe Nchileke;
ọ bụ nggu adzọje ayi.
Iigudeje iphe dụ biribiri,
ekoshi l'ị bụ onye doberu
ẹka ndoo zaa ayi oku.
Ndu bu l'ẹke igwe jeberu;
alị ejebe; mẹ ndu, bu lẹ
mgboro eze ẹnyimu,
kakọta ote-ẹnya; bẹ bụ nggu;
bẹ ẹphe chịru ụkfu kwẹe;
6 mbụ nggụbe onye bụ ike ngu; b'i gude
gvubetsua ugvu l'ẹke ẹphe gvutsuaru.
I keru onwongu
agburu-ẹhu ẹge eekeje
akpọ-buleti l'ukfu.
7 Iimeje tẹ ekiri eyii-mini
eze ẹnyimu tụ-buhu;
l'emeje tẹ oke phẹrephere,
tso iya nụ kfụshi.
Utsu, etsu l'iphe bụ mbakeshi;
bẹ iimeje t'o tsubuhu.
8 Ndu bu ote-ẹnya;
anọduje anma kwẹkwekwe;
mẹ ẹphe nụa k'iphe,
dụ biribiri, iimetsua.
Iphe iimeshi emeshi;
bẹ ndiphe lẹ mgboko
gbaa mgburumgburu
gude ẹhu-ọtso-ẹna agụru ngu egvu.
9 Ịigbaje mini lẹ mgboko-a
teke ị byaru iya agbaphe;
shi ẹge ono mee ya;
yọ bụru alị-ọsa.
Ẹnyimu nke ngu b'i meru
tẹ mini ji ejiji.
I meru t'iphe, ndiphe meberu l'alị mehu;
kẹ l'ọ bụ ẹge ono;
b'i meru iya t'ọ dụ.
10 Ị chịru mini;
yọ dọru adọru l'ẹnyoro.
Nggu abya ayọo tẹshiteshi
gude mee igbo; t'ọ dụ ruharuha;
shi ẹge ono gọru ọnu-ọma nụ iya;
mee iphe e meberu iya;
t'o vua evuvu.
11 I wotaru o-me-l'uko nke ngu
ye l'iphe e meberu emebe.
Iphe bụ ẹke, i shiru;
b'ẹ ta achọjedu nri achọcho.
12 Ẹgbudu abya efuchia
echi-ẹgu;
ẹhu awata ọtso iphe,
bụ ugvu ugvu ẹna.
13 Ẹgu ẹke eecheje iphe-edobe;
bẹ atụru kụru l'ata nri.
A bya lẹ nsụda nsụda;
iphe jiru iya nụ abụru iphe a kọberu akọbe.
Iphemiphe ọbule ono
chịkoru atụ ụzu;
l'agụ egvu ẹhu-ọtso-ẹna.

© 2014 WBT