1-3 Nnajuǿøyyäm hajxy jaduhṉ coo jaduhṉ yhahixøꞌøy coo jaꞌa Dios hajxy nägøx̱iä xyajcumädóow̱ämät jeꞌeguiøxpä coo hajxy nägøx̱iä haxøøg njatcǿøyyäm. Cab jaduhṉ yhahixøꞌøy coo højtsä jäyaꞌay nnänǿøm̱ämät coo hajxy hoy quiaꞌa hity, coo hajxy ween quiumädoy. Caj pues, haa caꞌa, jaduhṉ højts haxøøg nbajatcǿøyyämbä. Hix̱, ni pøṉ jaduhṉ hahixøøby quiaꞌa mänáꞌanät cooc tyijy hoy tiehm̱ yhity. Paady jaduhṉ yhahixøꞌøy coo jaꞌa Dios hajxy nägøx̱iä xyajcumädóow̱ämät, jeꞌeguiøxpä coo hajxy hoy ngaꞌa hoyhidáaṉäm. 4 Pero hojiootä Dios jiaanc̈h tehm̱ miøød, paady hajxy xquiaꞌa tsoj tsaac̈htiúuṉäm. Chojpiä jioot jaduhṉ coo howyiinmahñdy hajxy nbaduꞌubǿjcänät, coo jaꞌa nhaxøøgwiinmahñdy hajxy nnajtshixǿøyyänät. 5 Pero jii jäyaꞌayhajxy näjeꞌe, jaanc̈h tehm̱ xiex̱ä quiopcä tiaatsc‑hajxy. Cabä yhaxøøgwiinmahñdy hajxy ñajtshixøꞌøwaꞌañ. Y coo hajxy jaduhṉ tehṉgajnä quiaꞌa mäbǿgät, mänit hajxy hänajty hanax̱iä chaac̈hpøgaꞌañ coo yhabáadät coo jaꞌa Dios jaꞌa cahwiindøyhänaꞌc hänajty chaac̈htiunaꞌañ. 6-10 Pøṉä jioot nägøꞌø nädecypiä tsojp coo hoy yhídät, pøṉä jioot pädaacp coo jim̱ ñǿcxät Dioswiinduum, coo jaꞌa hoyhajtä weenhajt jim̱ piáadät, coo jim̱ quiumayǿøjät jaꞌa Diósäm, pues jeꞌedsä Dios jim̱ yajnøcxaam̱by. Mioꞌowaam̱biä Dios jeꞌe jaꞌa hoyhajtä weenhajt. Quiumayaam̱biä Dios jaduhṉ. Yaghidaam̱biä Dios jeꞌe jootcujc homiänaajä, hopiøṉä, hoy jia judíosä, hoy quiaꞌa jagä judíosä. Pero hoyhoyyä Dios chaac̈htiunaꞌañ pøṉ haxøøg jatcøøby, pøṉä Diosmädiaꞌagy caꞌa cudiunaam̱b, pøṉ caꞌa yajmägapx caꞌa yaghaneꞌemaam̱b waam̱batiä Dios hajxy jaduhṉ xjia hanéhm̱äm. Hopiøṉä jaduhṉ chaac̈hpøgaꞌañ, pønjaty jaduhṉ haxøøg jatcøøby, hoy hajxy jia judíospä, hoy hajxy quiaꞌa jagä judíospä.

11 Hix̱, cabä Dios miøjpädaꞌagy pø mjudío miic̈h, pø caj. Jeꞌe yajcopcøøby pø mhoyhänaꞌc, pø caj. 12-15 Højts judíoshajpä, jequiän højtsä Dios xyhanehm̱y neby højts hoy nguhdujthádät. Mänitä Moisés jaꞌa mädiaꞌagy jaduhṉ quiujahy nebiaty højts hoy nguhdujthádät. Hoorä, jaꞌa hänaꞌc‑hajxy caꞌa judíospä, cabä mädiaꞌagy hajxy miädoyyä nebiä Moisés jecy quiujahyyän. Pero hoy hajxy quiaꞌa jagä mädoyyä, coo hajxy hamdsoojoot hoy quiudiúnät nebiä Dios jioot jia tsoquiän, cähxǿꞌøgäp jaduhṉ coo hajxy yhawáaṉäxä jaꞌa Diósäm jaꞌa wyiinmahñdyhaamhajxy. Jaduhṉ hajxy hamdsoo ñajuøꞌøy pø hoy hajxy quiudiuṉ̃, pø caj. Jaduhṉ hajxy yajtuuṉgpaady néjjiäm hajxy häxøpy tøø miädoy jaꞌa mädiaꞌagy jaꞌa Moisés jecy quiujáhyyäbä. Y coo hajxy hoy quiaꞌa cudiúnät neby hajxy ñajuøꞌøy jaꞌa wyiinmahñdyhaamhajxy, mänit hajxy quiumädow̱aꞌañ. Jaanä jaduhṉ højtspä, højts judíospä, coo højts ngaꞌa cudiúnät neby højtsä Dios jecy xyhanehm̱iän, nebiä Moisés jaꞌa mädiaꞌagy jecy quiujahyyän, jaduhṉ højts ngumädow̱aam̱bä. Hix̱, pøṉ jaduhṉ cudiuum̱b nebiä Dios yhaneꞌemiän, jeꞌe jaꞌa Dios piädaꞌagaam̱by hawaꞌadstuum, hoyyä mädiaꞌagy tøø quiaꞌa jagä mädoy nebiä Moisés jecy quiujahyyän. Pero pøṉ jaduhṉ caꞌa cudiuum̱b, hoyyä mädiaꞌagy tøø jia mädoy nebiä Moisés jecy quiujahyyän, cab jeꞌeduhṉ hawaꞌadstuum piädaꞌagaꞌañii jaꞌa Diósäm. Jaduhṉds jeꞌe, nägøx̱iä jaꞌa cahwiindøyhänaꞌc‑hajxy quiumädow̱aꞌañ, hoy hajxy jia judíospä, hoy hajxy quiaꞌa jagä judíospä. 16 Mänit hajxy jaduhṉ quiumädow̱aꞌañ coo jaꞌa Dios jaꞌa Jesucristo hänajty yaa quiejxtägatsaꞌañ hädaa yaabä naax̱wiin. Mänitä jäyaꞌayhajxy yhixaꞌañii jaꞌa Jesucrístäm nebiaty hajxy hänajty yaa tøø jiatcøꞌøy. Mänit hajxy yagjahmiejtstaꞌagaꞌañii nebiaty hajxy hänajty tøø wyiinmahñdyhaty hameeꞌch. Jaduhṉä Diosmädiaꞌagy miänaꞌañ jaꞌa Jesucristocøxpä, jaꞌac̈h nyajwaꞌxypä.

17 Højts judíoshajpä, nax̱y højts nniguiumayii coo højts njudíoshaty, coo højtsä mädiaꞌagy nmäbøcy jaꞌa Moisés jecy quiujáhyyäbä. Jaduhṉ højts nniguiumáayyäbä coo højtsä Dios tøyhajt xquiuꞌughaty, højtsyähajtiä, højts judíoshajpä. 18 Nnajuøøby højts jaduhṉ nebiatiä Dios jioot chocy coo højts nhoyhänaꞌc‑hádät. Y jaꞌa mädiaꞌagy jaꞌa Moisés jecy quiujáhyyäbä, jeꞌe højts jaduhṉ xyhawáaṉäp neby højts nwiimbíwät tii hoy tii mäbaad. 19-20 Niyhajuǿøyyäp højts coo højts hänaꞌc hoy nyajnähixøꞌøwaꞌañ, jaꞌa hänaꞌcä Diosmädiaꞌagy hajxy caꞌa jajpä caꞌa najuøøbiä. Jim̱ højtsä tøyhajt nbaady maa jaꞌa mädiaꞌaguiän, jaꞌa Moisés jecy quiujáhyyäbä. 21 Hoorä, coo højts hänaꞌc jaduhṉ nyajnähixøꞌøy jaꞌa Diosmädiaꞌagy, hahixøøby jaduhṉ coo højtsä Diosmädiaꞌagy hoy ngudiúnät. Cábøc̈hä nmägunaax̱hajxy näjeꞌe hoy quiudiuṉ̃. Y coo højts hänaꞌc nmägapxy nhaneꞌemy coo hajxy quiaꞌa méedsät, hahixøøby jaduhṉ coo højts ngaꞌa méeꞌtspät. Jadúhṉhøc̈hä nmägunaax̱hajxy näjeꞌe jiatcøꞌøy. 22 Y coo højts hänaꞌc nmägapxy nhaneꞌemy coo wiinghänaꞌcä tioꞌoxiøjc hajxy quiaꞌa møødtsänáayyät, cab jaduhṉ yhahixøꞌøy coo højts jaduhṉ njatcǿøbiät. Jadúhṉhøc̈hä nmägunaax̱hajxy näjeꞌe jiatcøꞌøy. Cab højts quepychech naax̱poch nwiingudsähgøꞌøy. Pero cab jaduhṉ yhahixøꞌøy coo højts xädøꞌøñ nméedsät tsajtøgooty maa jaꞌa quepychech naax̱poch yhitiän. Jadúhṉhøc̈hä nmägunaax̱hajxy näjeꞌe jiatcøꞌøy. 23 Niguiumáayyäp højts jaduhṉ coo højtsä mädiaꞌagy nmäbøcy jaꞌa Moisés jecy quiujáhyyäbä. Pero näjeꞌec̈hä nmägunaax̱hajxy, cab hajxy hoy quiudiuṉ̃. Jaduhṉ hajxy yajcähxøꞌøgy coo jaꞌa Dios hajxy tøyhajt quiaꞌa wiingudsähgøꞌøy. 24 Jaduhṉ jim̱ myiṉ̃ cujaay maa jaꞌa Diosmädiaꞌaguiän: “mijts judíoshajpä, coo jaꞌa Diosmädiaꞌagy hajxy hoy mgaꞌa cudiuṉ̃, paadiä Dios haxøøgjaty ñähojyii jaꞌa hänaꞌc‑hajxy caꞌa judíospä.” Tøyhajt jaduhṉ.

25 Højts, judíos højts nmäminøꞌøy nmägaꞌawøꞌøy. Mänit højtsä Dios xquiumáyät coo højtsä mädiaꞌagy hoy ngudiúnät, jaꞌa Moisés jecy quiujáhyyäbä. Pero coo højts jaduhṉ hoy ngaꞌa cudiúnät, cab højtsä Dios jaduhṉ xquiumayaꞌañ. 26 Hoorä, jaꞌa hänaꞌc‑hajxy caꞌa judíospä, coo hajxy hoy quiudiúnät nebiä Dios yhaneꞌemiän, mänit hajxy quiumayaꞌañii jaꞌa Diósäm. 27 Näjeꞌec̈hä nmägunaax̱hajxy, cab hajxy hoy quiudiuṉ̃ nebiä Dios yhaneꞌemiän, hoy hajxy judíos jia mäminøꞌøy jia mägaꞌawøꞌøy, hoyyä mädiaꞌagy hajxy jia mädoyyä, jaꞌa Moisés jecy quiujáhyyäbä. Jeꞌehajxy mäbøcypiä caꞌa cumayáaṉäp jaꞌa Diósäm. 28 Pønjaty hoy cudiuum̱b nebiä Dios yhaneꞌemiän, jeꞌedsä Dios quiuꞌughajpy, hoy hajxy judíos quiaꞌa jagä mäminøꞌøy quiaꞌa jagä mägaꞌawøꞌøy, hoyyä hijxtahṉd hajxy quiaꞌa jagä møødä maa jaꞌa ñiꞌxcøxphajxiän neby højts judíos nmøødän. 29 Hix̱, coo pøṉ hoy quiudiúnät hamuumduꞌjoot nebiä Dios choquiän, mänit hajxy quiuꞌughadaꞌañii jaꞌa Diósäm, hoyyä judíoshajxy näjeꞌe quiaꞌa ja mänaꞌañ cooc tyijy hajxy jaduhṉ quiaꞌa cuꞌughadyii jaꞌa Diósäm. Hix̱, quiumaabiä Dios jaduhṉ pøṉ jaduhṉ cudiuum̱b hamuumduꞌjoot.