49
Ozi ẹhu ndu Amọnu
1 A bya l'opfu ẹhu ndu Amọnu; wakwa iphe, oopfu; mbụ Chipfu:
?Bụ lẹ Ízurẹlu te enwedu
ụnwegirima unwoke tọo?
?To nwedu onye e-ri iphe iya
tọo?
?Dẹnu g'o gude Molẹku gbẹ
nata alị ndu Gadu;
ọ bụru okiphe iya?
?Dẹnu g'o gude ndibe iya
bụru lẹ mkpụkpu iya
bẹ ẹphe bugbaa?
2 Ọo ya bụ lẹ-a; wakwa iphe,
Chipfu epfu baa:
Mu e-mechaa mee gẹ ndu
mkpụkpu Raba,
nọ l'alị ndu Amọnu nụma
mkpu ọgu.
O -rwua mbọku ono bẹ Raba
a-bụru ikpọzu;
tẹme ụnwu mkpụkpu,
nọ-pheru iya
mgburugburu
etsufukọta l'ọku.
Noo teke ndu Ízurẹlu a-chịfu
ndu shi chịfu phẹ nụ.
Nokwa iphe, Chipfu eepfu bụ
ono.
3 Unu tụa ụzu-ẹkwa;
unubẹ ndu Hẹshibonu;
kẹle mkpụkpu Eyayi bẹ
e mebyishiakwaru!
Unu chishikwaa mkpu ike;
unubẹ ndu bu lẹ Raba!
Unu yekwaa uwe-aphụ
wata ara ẹkwa.
Unu ekwoo gburugburu shia
ọwa-a yẹe ọphuu
l'ime npherenphere igbulọ
mkpụkpu unu ono;
kẹle Molẹku bẹ aa-kpụkwa
lẹ ndzụ lashịa alị ọzo;
yẹle ndu-uke,
agwajẹ iya nụ;
mẹ ndu-ishi iya.
4 ?Dẹnu g'o gude i gude
nsụda nsụda ngu eku
onwongu;
mbụ gụbe nwada e gudedu
ire ngu ẹka ono;
mbụ gụbe onye kpọru obu
ye l'ẹku ngu epfu sụ:
?Bụ onye sụru mu eme gụnu?
5 Lekwa; mu e-mechakwaa
mee gẹ ndzụ-agụgu
rwuta ngu.
Ọ kwa Nnajịuphu epfu iya;
mbụ Chipfu,
bụ Ọkalibe-Kakọta-Ike.
Ọ bụru ndu oo-shi l'ẹka
bụ ndu bupheru ngu
mgburugburu.
G'unu hakpọo l'onye l'onye
bẹ aa-chịfu achịfu.
Ọphu ọ dụdu onye
a-chị-phuta ndu
gbalawaru nụ azụ.
6 “Ọle mu e-mechakwaa
dophu ndu Amọnu azụ
l'ọnodu phẹ.
Nokwa iphe, Chipfu eepfu
bụ ono.”
Ozi ẹhu ndu Ẹdomu
7 A bya l'opfu ẹhu ndu Edọmu;
wakwa iphe, oopfu;
mbụ Chipfu,
bụ Ọkalibe-Kakọta-Ike:
“?Mmamiphe ta adụkpoedu
lẹ mkpụkpu Temanu
tọo?
?Ọkpobe idzu bvụwaru
l'ẹka ndu maru eye
ọnu l'opfu tọo?
Mmamiphe phẹ ?o rehuwaru
erehu tọo?
8 Unubẹ ndu bu lẹ Dedanu;
unu ghakọbe gbalaa!
Unu gbaba je edomia
onwunu l'ime ẹka dụ
omilomi;
kẹle mu gudekwa ọla-l'iswi
abyapfuta oshilọkpa
Ịso
lẹ teke mu abya iya anụ
aphụ-a.
9 Ọ -bụru lẹ ndu awọ akpụru
vayịnu byapfutaru
ngu;
?ẹphe ta awọ-phodojedu
nwọphu dụ
nwolemole?
Ndu-oshi -bya ibe ngu
l'ẹnyashi;
?tọ bụedupho iphe,
mkpa iya dụru phẹ bẹ
ẹphe e-wota kpoloko?
10 Obenu l'oshilọkpa Ịso bẹ
mu gbabẹwaru ọto.
Ẹka ono, ẹphe edomi edomi
ono bẹ mu kpuhawarụ
ghebe ọnu;
k'ọphu ẹphe tee
domikọtaedu onwophẹ.
Ụnwegirima phẹ;
mẹkpoo abụbu phẹ;
mẹkpoo obutobu phẹ;
lakọtaru l'iswi;
tẹme ẹphebedua
chịhukwapho.
11 Pakwarụ ụnwu ogbee unu
haa;
kẹle mu e-me-a g'ẹphe
nọdu ndzụ!
G'ụnwanyi unu, ji phẹ
nwụhuwaru chịru
ụpfu kwẹe l'ẹhu mu!”
12 Wakwa iphe, Chipfu epfu baa: “Ọ -bụru lẹ ndu agbadụru k'angụ iphe, shi l'okoro ono angụchaa iphe, shi iya nụ; ?bụ gụnu a-kpa g'a haa unu g'a ta nụ unu aphụ? A taa hakwa unu g'a ta nụ unu aphụ. Unu ngụfutajekwa iphe, shi l'okoro ono; 13 kẹle-a; wakwa iphe, Chipfu epfu baa: Mu gudeakwa onwomu ria angụ sụ lẹ mkpụkpu Bọzura e-mechaa bụru ikpọzu; bya abụru iphe, aakpọ-yiru ukuvu. Mbụ l'ọo-bụru ochobu; bya abụru iphe, eephu l'iphu. Tẹme iphe, bụ mkpụkpu ọzo, nọkota l'alị ndu Ẹdomu a-bụkotaru ikpọzu jasụ l'ojejoje.”
14 Mu nụmakwaru ozi,
Chipfu ziru.
Onye-ozi bẹ e ziru g'ẹphe
jepfu ọhamoha sụ
phẹ-a:
“Unu dzukọbekwa onwunu
bya etsoo phẹ ọgu!
Unu gbalihukwa jeshia ọgu!”
15 Kẹle-a; lekwa; mu mewaru;
ị ha nwanshịi l'echilabọ
ọhamoha;
ọphu ọ dụdu iphe,
ndiphe gụberu ngu.
16 Ọ kwa ebvu, i shi eyeje ndu
ọzo; yẹe eku-onwonye,
nọ ngu l'obu ono
dephuru ngu;
mbụ gụbe onye ono,
bu l'ime agbara-mkpuma
ono;
onye bu l'ẹka úbvú kakọta
l'eli.
Ọ tọ dụkwa m'obeta i je
akpaa epfụne ngu
l'ephekerephe
ephekerephe gẹ k'ugo;
bẹ mu e-shikwa l'ẹka ono
mekọta ngu l'ị daa.
Nokwa iphe, Chipfu eepfu
bụ ono.
17 Ndu Edọmu e-mechaa bụru
iphe,
aakpọ-yiru ukuvu.
Iphe, bụkpoo ndu ghataru
phẹ nụ bẹ ishi anyi
ẹdzu.
Ẹphe egude iya gbaahaa
mgbọnu; ọ bụru iphe,
a-kpa iya nụ bụ eze
iphe-ẹhuka ono,
a-dapfu phẹ nụ ono.
18 Ọo ẹgube ono, e mebyishiru
mkpụkpu Sọdomu yẹe
Gọmóra ono;
bya emebyishia mkpụkpu
lẹ mkpụkpu,
nọgbaa phẹ lẹ mgboru ono;
nokwa g'ọ tọ dụdu onye
e-bu l'alị ndu Ẹdomu;
ọphu ọ dụdu onye e-me
iya unuphu.
Nokwa iphe, Chipfu eepfu
bụ ono.
19 “Lekwa-a! Ọ kwa g'oduma
shi l'ọswa,
nọ l'agụga ẹnyimu Jiọ́danu
kwofuta;
bya adapfu atụru,
dọru l'ọdu atụru,
nri dụ shii bụkwapho
gẹ mu e-kwo
gburumu je achịfu
ndu Edọmu l'alị iya
l'ọtulupfu.
?Bụ onye bẹ mu họtaru g'ọ
bụru onye mu a-tụ ẹka
g'o mee iphe ono?
?Bụ onye dụ gẹ mu dụ?
?Bụ onye sụru mu eku ikpe?
?Bụ onye bụ onye eche atụru,
a-dụ ike pfụru gẹ mu
l'iya mee?”
20 Ọo ya bụ lẹ-a; unu nụmakwa
idzu,
Chipfu chịru lẹ ya e-me
ndu Edọmu; mbụ iphe,
ọ chịru lẹ ya e-me ndu
bu lẹ mkpụkpu Temanu.
Ọ tọ dụkwa iphe, a-kpọshi
g'a ta kpụta ụnwu
atụru iya mẹ ụnwu
eghu iya kpụfu;
ndzụ erwuta ndu ọphu
phọduru nụ.
21 Ọda, ọo-da teke ẹphe a-da
bẹ a-nmayichaa mgboko
anmayi.
L'a nọdu lẹ mgboru
Eze-ẹnyimu Uswe-uswe
nụmachaa olu-ẹkwa
phẹ.
22 Lenu! Ugo ephekwa raa
ephezeta l'alị.
O woru ǹkù iya jashịa l'eli
mkpụkpu Bọzura.
Lẹ mbọku ono bẹ obu ndu
Ojọgu ndu Edọmu
a-dụepho g'obu nwanyị,
ime eme.
Ozi ẹhu Damasụkosu
23 A -bya l'opfu ẹhu ndu
Damasụkosu;
“Ndu Hamatu yẹe ndu Apadu
bẹ e kpuakwarụ iphu
lẹ ntụ;
noo kẹle ẹphe nụmawaru
ẹjo nzi.
Meji tọfuwaru phẹ.
Ọkpoma aphụwaa phẹ
gbudugbudu
g'eze-ẹnyimu,
a swọngaru aswọnga.
24 Ndu Damasụkosu bẹ ẹka
tụlwahuru.
Ẹphe dakọbeakwaru
agbalawa agbala.
Meji tọfuakwaru phẹ atọfu.
Ẹjo iphe-ẹhuka gudeshiwaa
phẹ gẹ nwanyị,
ime eme.
25 ?Dẹnu g'o gude ọphu a
gwọbeduru mkpụkpu
ono,
a maru amaru ono?
Mbụ mkpụkpu ono,
tụbaru mu l'ẹnya ono?
26 Ọo ya bụ lẹ-a; ụnwokorobya
phẹ a-nọdu ada pọopoo
l'ọma gbororo.
Ndu Ojọgu phẹ l'ophu bẹ
ee-megbushibẹbe
mbọku ono.
Nokwa iphe, Chipfu,
bụ
Ọkalibe-Kakọta-Ike
eepfu bụ ono.
27 Mu a-tụ ọku l'igbulọ
Damasụkosu;
l'ootsukọta iphe, bụ ụlo,
Bẹnu-Hadadu kpụru
kpụshia ike.”
Ozi ẹhu Keda yẹe Hazọ
28 A -bya l'opfu ẹhu ndu Keda yẹe alị-eze ndu Hazọ, bụ ọphu Nebukadineza, bụ eze ndu Bábilọnu lwụ-kperu; wakwa iphe, oopfu; mbụ Chipfu, bụ Ọkalibe-Kakọta-Ike:
“Unu zelihu tsoo ndu Keda
ọgu!
Unu mebyishia ndu shi
ụzo ẹnyanwu-awawa!
29 Ụlo phẹ, bụ ụlo ọphu e meru
l'ẹkwa;
yẹe eghu yẹe atụru phẹ bẹ
aa-tụko rwuta.
L'aachịta ẹkwa phẹ;
yẹe iphemiphe,
ẹphe nweru enweru;
mẹkpoo ịnya-kamẹlu
phẹ.
Ndiphe echi mkpu ekpu
phẹ sụ phẹ:
‘Nggiri nọkwa l'ụzo
l'ẹkameka.’ ”
30 Wakwa iphe, Chipfu epfu
baa:
“Unu gbalakwaa agbala;
unu gbamihukwa
agbamihu!
Unu jekwa anọdugbaa l'ọgba,
dụ omilomi;
unubẹ ndu bu lẹ Hazọ.
Noo kẹle Nebukadineza,
bụ eze ndu Bábilọnu
chịakwaru idzu unu
k'ẹji;
bya epfubuwaa iphe,
oo-me unu.”
31 Wakwa iphe, Chipfu epfu baa:
“Unu zelihu tsoo ọha,
tụsaru ẹhu ọgu, bụ ọha,
bụ ọphu adụdu onye
ẹphe atsụ ebvu;
mbụ ọha,
ete nwedu ọguzo;
ọphu ọ kpọbeduru
mgbọrígwè;
tẹme ndibe iya buẹrupho
nọduru onwophẹ.
32 Ịnya-kamẹlu phẹ bẹ
aa-kwachaa l'ọkwata.
L'e rwutakwaphọ ikpoto eswi
phẹ l'ọgu.
Iphe, bụ ndu bugba l'ọha,
dụ ẹnya bẹ mu e-wojerurọ
tụkaa lẹ phẹrephere.
Mu eshi l'ụzo m'ụzo mee
g'oke iphe-ẹhuka
dapfu phẹ.
Nokwa iphe, Chipfu eepfu
bụ ono.
33 Mkpụkpu Hazọ l'e-mechaa
bụru ẹka nkụta-ọswa
a-dọjeru;
kẹle ọo-bụru ochobu
jasụ l'ojejoje.
Ọ tọ dụdu onye byaru eburu
l'ẹka ono.
Mbụ l'ọ tọ dụdu nwoke,
byaru akwabaa ya
unuphu buru.”
Ozi ẹhu ndu Elamu
34 Wakwa Opfu Chipfu, bụ ọphu rwuru Jieremaya onye mpfuchiru nchị l'opfu ẹhu ndu Elamu. Teke ọ nụmaru iya bụ lẹ ntsolọhu teke Zedekaya watarụ abụru eze ndu Jiuda.
35 Wakwa iphe, oopfu; mbụ Chipfu,
bụ Ọkalibe-Kakọta-Ike:
Lekwa; mu a-gbajikwa apfụ
ndu Elamu,
bụ iya bụ ẹka ike phẹ
kpajiru.
36 Iphe, mu e-me g'ọ dapfu
ndu Elamu bụ uzi
phẹrephere ẹno,
shigbaa lẹ mgburẹku
akpaminigwe uzi ẹno.
Mu a-tụka phẹ;
ẹphe edzuru
phẹrephere uzi ẹno.
Ọphu ọ dụkpodaa ọha,
nọnu bụ ẹka ndu
Elamu ataa gbachadaa
ọso ọgu laa.
37 Mu a-tụkashi ndu Elamu
nanụnanu l'iphu ndu
ọhogu phẹ;
mbụ l'iphu ndu achọ
ndzụ phẹ.
Mu e-me g'ẹjo-iphe dapfu
phẹ;
mbụ lẹ mu a-tụ-koshi
phẹ oke ẹhu-eghu mu.
Ọ kwa Chipfu epfu iya.
Mu e-me g'e gude ogu-echi
achị phẹ
jasụ teke mu e-me g'ẹphe
ta adụhe.
38 Ẹka mu e-je ebvube aba-eze
mu bụ l'alị ndu Elamu.
Mu emebyishia onye eze phẹ;
yẹe ndu-ishi phẹ.
Ọ kwa Chipfu epfu iya.
39 “Ọle mu e-mechakwaa
dophu ndu Elamu azụ
l'ọnodu phẹ l'atatiphu.
Nokwa iphe, Chipfu eepfu
bụ ono.”