34
1 Elihu byakwa eyee ọnu
bya asụ-a:
2 Unu ngabẹkwa nchị l'opfu,
mu epfu; unubẹ ndu
maru iphe.
Unu ngabẹkwaru mu nchị;
unubẹ ndu nwụru
iphe anwụnwu;
3 kẹle ọo g'eedeje ọnu lẹ nri
g'a maru ụtso iya-a;
bụ g'aangajẹ nchị l'opfu.
4 G'anyi họtanu iphe,
pfụru nhamụnha l'onwanyi.
G'anyi tụkonu nwụa iphe,
dụ ree.
5 Mbụ lẹ Jiobu sụru l'iswi dụ
iya mma;
ọphu Chileke ekwedu iya
aharu enge.
6 L'ọ kalẹru iya; a sụkwapho lẹ
ya adzụ ụka.
L'ọ tọ dụdu iphe, ikpe iya
nmarụ iya; ọle ọ́nyá,
o gburu iya bụ agwọta
agwọta.
7 ?Unu hụmajeru onye ọphu
dụ gẹ Jiobu;
onye ọphu angụ ekwe une
g'onye angụ mini?
8 Ndu ẹphe l'iya achị idzu lanụ bụ
ndu eme ẹjo-ememe.
Ọ bụru ndu ẹjo-iphe bẹ ẹphe
l'iya aswị ọswi;
9 kẹle ọ sụru l'ọ tọ dụdu iphe,
nemadzụ erita l'eme iphe,
dụ Chileke ree.
10 Sụ-a; unu ngabẹkwaru mu
nchị; unubẹ ndu iphe
edoje ẹnya.
Tụswekwa! Chileke ta
abyakwa eme ẹjo-ememe!
Ọkalibe-kangokọtaru-nụ ta
abyakwa eme iphe,
adụdu ree!
11 Ọ kwa ụgwo bẹ ọopfuje
nemadzụ l'iphe, o meru.
Ọ nọdu ewotajẹru iya iphe,
gbaru umere, oome.
12 Mbụ-a; ọkpobe opfu kpọ
bụ lẹ Chileke te emejekwa iphe,
adụdu ree.
Ọkalibe-kangokọtaru-nụ ta
anmaswejekwa ikpe
anmaswe.
13 ?Bụ onye meru Chileke g'ọ
bụru onye eliphe-a
l'ophu dụ l'ẹka?
?Bụ onye bụ onye sụru iya g'o
lekọta mgboko-a gbaa
mgburugburu?
14 Ọ -bụru l'ọ bụ uche iya;
o seta ndzụ sephu azụ;
bya erwuta unme,
aatụje atụtu doberu onwiya;
15 nemadzụ l'ophu atụkoepho
bụru mkpurupyata
mgbo lanụ.
Nemadzụ anwụhu je abụru ẹja,
nọ l'alị.
16 Ọ -bụru l'iphe edoje ngu ẹnya;
ngabẹkwa nchị;
nụmakwa iphe-a,
mu abya epfupfu-a.
17 ?Bụ onye ono, ikpe pfụru ọto
dụ ashị a-bya abụru onye
bụ ishi?
?Ị sụru g'ịi-nma iya ikpe;
mbụ onye ono, pfụru ọto bya
abụru onye parụ ẹka ono?
18 Tọbudu iya bụ onye ono,
asụje ndu eze: Ọ tọ dụdu iphe,
unu bụ!
L'ọ sụ ndu nweru ẹnya:
Ẹjo-iphe parụ unu ẹka l'ẹhu!
19 Ọo ya bụ onye ono,
ta agbajẹduru nemadzụ ọdzori
opfu l'ọ bụ onye-ishi;
ọphu oo-wotadu iphe,
o gogo meru onye ụkpa
meeru onye eze opfu l'ọ bụ eze;
kẹle ẹphenebo tụkoru bụru
iya gude ẹka iya mee phẹ.
20 Ẹphe anwụhuje
buregedegengu l'echi abalị.
Ọonmaghukota igwe ọha anmaghu;
ẹphe anwụshihukota.
Ndu oke amadụ bẹ oowofujekwa;
ọle ọ tọ bụkwa nemadzụ
egudeje ẹka wofu phẹ.
21 “Sụ-a; ẹnya Chileke
tụkokwaru iphe, ndiphe eme
hụmakota;
tẹme ọ nọdu ahụmakotaje
ẹka ẹphe zọru ọkpa.
22 Ọ tọ dụdu ẹka agba ọchii,
dụ nụ; ọphu ọ dụdu ẹgube
dadishi, dụ nụ,
bụ ẹka ndu eme ẹjo-ememe
e-je edomia onwophẹ.
23 Ọ tọ dụdu Chileke mkpa
kẹ gẹ ya bya awata enyocha
nemadzụ ọzobaa;
mbụ kẹ g'ẹphe bya anọdu iya
l'iphu k'ikpe ọzobaa.
24 O too jejedu akpata ishi tẹme
l'ọ chikaa ndu oke amadụ;
bya ahọo ndu ọzo dochia
ẹnya phẹ.
25 Eshinu ọ makọtaru iphe,
ẹphe eme
bẹ oomekpeje phẹ l'ẹnyashi
gwee phẹ arakabya.
26 L'ọ hụa phẹ ahụ̀hù ẹjo-iphe,
ẹphe eme l'edzudzu-ọha;
ẹka onyemonye a-hụma phẹ;
27 opfu l'ẹphe harụ
etso Chileke;
ọphu ọ dụdu iphe,
ọ sụru g'e mee, dụru ọphu
ẹphe akpajẹ ishi ememe.
28 Ẹphe emeje; ndu akpa nri
echi mkpu, erwuje Chileke
lẹ nchị;
k'ọphu Chileke anụmaje
ẹkwa ndu adụdu g'ọ dụ phẹ.
29 Ọle ọ bụ; ọ -sụkwanu lẹ ya te
eyekpọdaa ọnu; ?bụ onye sụru
iya anma ikpe?
O -domia iphu iya;
?bụ onye bya adụ ike hụma iya?
Ọle ọ kwa iya nwe nemadzụ
bya enweru ọha l'ophu.
30 Oomeje g'onye te emedu ele
Chileke ta abụru onye-ishi;
k'ọphu ọ tọo watadu agbaru
ndiphe ọ́nyà.
31 Ọ -bụru kẹ gẹ nemadzụ
sụ Chileke:
‘O dekwaru mu; ọphu mu
alaphubaẹkwa azụ l'iphe-ẹji
ono ọzo;
32 Zinaa mu iphe,
mu taa dụdu ike ahụma.
Mu -mewaa ẹji;
mu tee emehẹdu iya ọzobaa.’
33 Sụ-a; ?bụ g'ọ dụ ngu ree
bụ g'i dobesụ lẹ Chileke
a-pfụ ngu ụgwo l'ẹka
i ti kwedu g'izimanụ lwa
ngu azụ?
Ọ kwa ngu e-pfukpọepho
l'onwongu; ọ tọ bụkwa
mbẹdua. Pfukwaa iphe,
ị maru.
34 Gẹ ndu iphe edoje ẹnya
yenaa ọnu.
Gẹ ndu mmamiphe,
l'anụ iphe-a, mu epfu-a
pfunaa sụ:
35 ‘Jiobu epfukwa opfu onye
enwedu egomunggo;
mbụ l'opfu iya ta adụkwa
omilomi.’
36 Ọ dụ g'a sụ lẹ Jiobu bẹ
aa-hụkpoepho ama hụ-rwua
ya l'ishi;
kẹle oopfu g'onye ẹjo-iphe.
37 O meru iphe-ẹji; tẹme ọ nọdu
eko Chileke ọkpa l'ishi.
Ọonoduje l'echilabọ anyi akụ
ẹka aja anyi ewenu;
tẹme ọ nọdu epfu ẹjo opfu
mpfụkwase ekpu Chileke.”