1 Mpìrká zyun-à má í fàu, abig wib àsàin lubá ma pìkyinn ńzyun, jirà kada mpìrká abig dang bai zìnn Shìdun ma bu tàgyí bàna. 2 Fàuká zyun-à ma shi sig ma àsàin lubá ká ri bàg Yesu, kada abig sa káníng yawari jirà káníng í wunzàbá á gbìb Yesu ni bàna. Bu-à bá sa bàna, abig wib àsàin lubá wàni, jir kai bàna àsàinká zyun-à má dìg bu áyau swàmbá big ri sa níng hi ni, í mpìrká ri bàg Yesu, ká zyun-à big ri zìm. Wàníng í buká mì ri zìm á dinya mpìrká ma á tàg big.

3 Mpìr-à ma tàg hing bu zyun kim, ma ngàng hing jír á shinn Shinn Luyí Yesu Kristi ni, wà zyun-à í jir àjai níng, ma zìm fig bu-à gbìbyí ri dang níng bàna, 4 mpìr-à níng hi í mpìr agbar dù shinn, kwá yì fig bu zyun bàna. Ku ri zìm aku sa yipyàr á shinn buká zyun-à bàna ma yìr. Ku ri zìm shùr gbìb, zyun-à ri gbar bi akyib, ma ngain, ma wà tìr ya mpìr jir átai, 5 má wà gbar wab kwonn mpìrká abig sa yipyàr, mpìrká shi sig ma pìkyinn-à bibai, ká zyun-à bàna rag ma jir gwangga á pìkyinnbá ni, big ri kyab rag gbìb Shìdun bàg í gbìb swàm bài.

6 Ama mpìr-à ma ri bàg Shìdun ma pìkyinn ńzyun, kwá fig àjwár ma bu-à ku shi sig ma kàhi. 7 Yi zìg bi fig bu zyun á dunyaru bàna, yá zìg kàng yag fig bu zyun bàna tìnn. 8 Wà ya shi sig ma buju ma jàká yá wìr, wàníng màg hing yi. 9 Ama mpìrká ma ri zìm abig shi mpìr bài, bá sa bu bibaiká kim kim. Bá wìm bu-à bibai kim kim. Bu-à bibaiká big ri wìm níng, má tonn kà big á gbìb ajànn, má sa bá kà á pyìr. 10 Bài zìm í bu-à ri sìnn kà mpìrká abig sa bu-à bibai kim kim. A jir shinn bài zìm, í bu-à sa mpìrká nìnànn nímá fim rìghing gbìb Shìdun, big sìnn kà rìghing shinnbá á shwìn.

11 Ama wù, Timoti, wù í mpìr Shìdun, á shàr bu bibai káníng. A shi á gbìb-à sìsàn. A wib Shìdun, ma á sa bu-à sìsàn ma á bir pìkyinnwú á byarwá ni, ma á zìm mpìr, ma á tib pìkyinnwú, ma á sa kó kai bidìm pár ádàn-à. 12 A kar ngang barà wá sar gbam á pìkyinn birwú ni. A pànn yonki zyun-à má vinn fig ávinn bàna. I dò jir yonki-à níng hi, í bu-à sa Shìdun bar sig wù, jir shinn pìkyinn birwú à bir sig, wà zyun-à mpìrká nìnànn nímá yì hing. 13 N kwonn hing wù ma Shìdun zyun-à ri ya kó kai bidìm pár yonki, ǹ kwonn hing wù ma Yesu Kristi, zyun-à rì dang byann sig jír àjai á pyànn Buntus Bilatus, 14 á sa vinn rìg kó kai bu-à Shìdun dang sig rag á sa, hár àyúnn-à Shinn Luyí Yesu Kristi má kàng bi áni, jirà kó ni aku dang bai wù bàna. 15 Kwá kàng bi á sai-à Shìdun sìnn sig rag kwá kàng bi. Shìdun zyun-à í kùr kó ni bidìm pár, Shìdun zyun-à mpìrká má swam yan ku, ku í Shinn Lu kó ni bidìm pár. 16 Ku shi síg nì àsàin-à má wu fig ki bàna, ku shi sig áyau àyar zyun-à mpìrká má bi fòr sar fig màhàn bàna. Kó mpìr ńzyun taba myàng fig ku bàna. Mpìr má myàng sar fig ku bàna. Mpìrká abig swam yan ku hár kinn kinn. Abig yì rag, ku í kùrbá wà ùwài. Aku shi àdòníng.

17 A dinya mpìrká shi sig ma bài abig gbar dù shinn bàna, kada abig sìnn pìkyinnbá á bàibá ni bàna, zyun-à má shi nonn fig bàna níng. Ama abig bir pìkyinnbá á byar Shìdun zyun-à ri ya yi kó kai, jirà ayi fig àjwár. 18 A dinya big abig sa bu-à sìsàn ma bàibá, ma abig sa swàm sìsàn, ma abig ya vù. 19 Ba sa hing àdòníng, big ri sìnn ya shinnbá ashìkáun mà wài, í bu shinn dìrbá hár kinn kinn. I wà bá dìg yonki zyun-à kinn kinn.

20 Wù Timoti, á pànn bu-à Shìdun ya sig wù àràg í amana níng, ma á zu rìg áyau mpìrká ri dang jír yipyàr ma jír zyun-à í jir gbìb Shìdun bàna. Big dang rag í jir yar, ama í jír-à bàna ma yìr. 21 Mpìrká káhi kyab rag big shi sig ma yar, í bu-à sa big fim rìghing wà bá bir pìkyinnbá á byar Shìdun.

Asàn Shìdun aku shi kwonn ma ning.