ABIDIYASI
TA KITABU
Kitabu faamucogo
Filisikaw tun nana ben Zeruzalɛmu dugu kan wagati min na, o wagati le ra Abidiyasi ka nin kumaw fɔ. Nin kitabu ye sura kelen dɔrɔn ye. O wagati ra Edɔmuka minw tun bɛ jamana woroduguyanfan na, olugu nana ka na fara Zeruzalɛmukaw juguw kan, ka Zeruzalɛmu kɛrɛ, ka dugumɔgɔw borofɛnw cɛ ka taga ni o ye, k’a sɔrɔ Edɔmukaw ni Izirayɛlimɔgɔw bɛɛ ta duruja bɔra o bɛmacɛ Isiyaka le ra.
Ala ka Abidiyasi ci ka na nin cirayakuma fɔ Edɔmukaw ye, ko Ala bɛna o ta kɛwalejuguw hakɛ bɔ o ra, sabu o ka siya wɛrɛw dɛmɛ ka Ala ta mɔgɔw kɛrɛ.
Nin kumaw b’a yira an na ko siya o siya bɛ Ala ta mɔgɔw kɛrɛ, ko Ala fana bɛna o siya kɛrɛ.
Kitabu kɔnɔkow
Edɔmukaw halakicogo (1.1-9)
Edɔmukaw ta kojuguw cayara (1.10-15)
Ala bɛna Izirayɛli sigi a juguw kunna (1.16-21)
1
Ala ka Edɔmukaw jaraki
1 Ala ka ko minw yira Abidiyasi ra:
Dunuɲatigi Ala ka kuma min fɔ Edɔmukaw kama, o le ye nin ye:
An ka kibaroya dɔ mɛn ka bɔ Matigi Ala fɛ;
ciraden dɔ cira ka taga siyaw fɛ.
A ko: «Aw ye wuri, an ye taga Edɔmukaw kama,
ka taga o kɛrɛ.»
2 «A flɛ, aw Edɔmukaw, ne bɛna aw baraka dɔgɔya ka tɛmɛ siya tɔw bɛɛ ta kan.
O bɛna aw mafiyɛnya kosɛbɛ.
3 Yɛrɛyira min tun bɛ aw jusu ra, o le ka aw lafiri;
aw sigiyɔrɔ dogonin bɛ faraw cɛ ra, yɔrɔ kɔrɔtaninw na minkɛ,
o kosɔn aw tun b’a fɔra ko:
‹Jɔn le bɛna se ka anw lajigi dugu ma?›
4 Ayiwa, hali ni aw ka yɛlɛn ka taga fɔ sankolo ra i ko bɔn,
hali ni aw ka aw ta ɲaga la fɔ lolow cɛ ra,
ne bɛna aw lajigi!
Matigi Ala ko ten.
5 «Ayiwa, ni sonw nana aw fɛ su fɛ,
walama ni benkannikɛbagaw nana,
o bɛna cɛnri kɛ aw fɛ dɛ!
Ni fɛn o fɛn ka o diya, o bɛ o bɛɛ ta.
Ni o nana aw ta rɛzɛnw sonya,
o bɛna rɛzɛnden dama dama le to aw ye.
6 O kɔni ka Esawu ta mɔgɔw ta fɛnw bɛɛ le cɛ;
o ka o ta fɛnmarayɔrɔw bɛɛ dayɛlɛ.
7 Aw jɛnɲɔgɔnw bɛɛ bɛna aw gbɛn ka taga se fɔ jamana dan le ra.
Aw teriw bɛna aw janfa, ka o fanga sigi aw kan.
Minw tun bɛ aw ta domuni kɛra, olugu bɛna jan la aw sen kɔrɔ,
nka aw tɛna se ka bɔ o kow kala ma.
8 Sigiya t’a ra, ne bɛna mɔgɔ hakirimanw halaki o lon le ra, ka bɔ Edɔmu;
ka faamurikɛbagaw halaki ka bɔ Esawu ta kuru kan.
Matigi Ala ko ten!
9 E! Teman, aw ta kɛrɛkɛcɛw ja bɛna tigɛ
fɔ ka Esawu ta kuruyɔrɔ mɔgɔw bɛɛ faga ka ban.»
Edɔmukaw ka Izirayɛlimɔgɔw minako juguya
10 «Aw juguyara aw balemaw ma,
minw ye Yakuba ta mɔgɔw ye.
O kosɔn maroyaba bɛna ben aw kan;
aw bɛna halaki ka ban pewu;
11 sabu lon min na siya wɛrɛ mɔgɔw tun tagara Yakuba ta mɔgɔw ta naforow cɛ,
lon min na mɔgɔ wɛrɛw tagara don o ta dugu kɔnɔ ka kara la janko ka Zeruzalɛmukaw ta borofɛnw taran ɲɔgɔn cɛ,
o lon na aw tun bɛ yi;
aw ni o siya wɛrɛ mɔgɔw bɛɛ le tun kɛra kelen ye.
12 Aw tun man kan ka lɔ ka aw balemaw flɛ
o ta bɔnɔ lon na;
Zuda ta mɔgɔw halaki lon na
aw tun man kan ka ɲagari.
Aw tun man kan ka o dabayakumaw fɔ
aw balemaw ta degu lon na.
13 Aw kɔni tun man kan ka don ne ta mɔgɔw ta dugu donda fɛ
o ta cɛnri lon na.
Aw fana tun man kan ka lɔ ka kojugu bentɔ flɛ Zuda ta mɔgɔw kan
o ta ɲani lon na.
Aw tun man kan ka o ta naforow cɛ
o ta cɛnri lon na.
14 Aw tun man kan ka taga lɔ sirafaran na
ka o ta mɔgɔ boribagaw faga.
O ta mɔgɔ minw bɔsira, aw tun man kan ka olugu mina ka o di o juguw ma,
o ta ɲani lon na.
15 Sabu Matigi Ala ta lon surunyara;
a bɛna wuri siyaw bɛɛ le kama.
Aw ka min kɛ, o ɲɔgɔn le bɛna kɛ aw ra.
Aw ta kojuguw sara bɛna sekɔ ka na ben aw yɛrɛ le kunna.
16 Ayiwa, aw ka minni kɛ ne ta kuru saninman kan cogo min na, ne ta dimi kosɔn,
siya tɔw bɛɛ bɛna minni kɛ ten le, dan tɛ minni min na;
o bɛna min fɔ ka ɲanamini,
fɔ ka na o bɛɛ latunu.
17 «Nka minw bɛ Siyɔn kuru kan, olugu bɛna kisi.
O yɔrɔ bɛna kɛ yɔrɔ saninman le ye.
Yakuba ta mɔgɔw bɛna sekɔ
ka na sigi o ta sigiyɔrɔ ra.
18 Yakuba ta somɔgɔw bɛna kɛ tasuma le ye,
Yusufu ta somɔgɔw bɛna kɛ tasumamana le ye;
nka Esawu ta somɔgɔw bɛna kɛ bin le ye.
O bɛna o bin jɛni k’a ban.
Mɔgɔ si tɛna bɔsi Esawu ta somɔgɔw ra,
sabu Matigi Ala kumana.
19 Jamana woroduguyanfan mɔgɔw bɛna na sigi Esawu ta kuruyɔrɔw ra.
Jamana dugumayanfan mɔgɔw, olugu bɛna sigi Filisikaw ta mara ra.
O bɛna sigi Efirayimu jamana ra, ani Samari jamana ra.
Boniyaminu ta mɔgɔw, olugu bɛna sigi Galadi mara ra.
20 Izirayɛlimɔgɔw ta mɔgɔ minaninw ta jɛnkuru min bɛ Kanaana,
olugu bɛna sigi o yɔrɔ mara ra ka taga se fɔ Sarɛpita.
Zeruzalɛmu ta mɔgɔ minanin minw bɛ Sefaradi,
olugu bɛna sigi jamana woroduguyanfan duguw kɔnɔ.
21 Olugu le bɛna se sɔrɔ, ka sigi Siyɔn kuru kan,
ka o ta fanga sigi Edɔmukaw kan.
O tuma masaya bɛna kɛ Ala ta ye.»