2 PIYTA
Piyta Minj Kisen Tikak
Minim Nind Niŋep
Piyta minj kisen tikak biy aŋgak, “Nimb Gor ker mindpim gok, aŋgip rek giy mindrep ginimimb. Pen Gor aŋgip rek aspun aŋgiy, minim yesek apay ak ma dinimimb; Jiysis Krays minim niŋind yimb aŋgñinuk anep direp giy, andkind winiŋgamb ñin ak kond mindenimimb aŋgak.”
Minim Ar Keykey Mindip Rek:
Minim nind aŋgak ak mindip, chapta 1:1-2.
Gor ker mindpim rek, mindrep ginimimb aŋgak minim ak mindip, chapta 1:3-21.
Biynimb Gor minim yesek apay gok, minim kuyip ak ma niŋnimimb aŋgak minim ak mindip, chapta 2:1-22.
Jiysis kisen andkind winiŋgamb aŋgak minim ak mindip, chapta 3:1-18.
1
1 Yand Saymon Piyta, Jiysis Krays nup woŋg giy, minim nup dand tapiyn. Minj tiksipiyn kun biy, nimbip biynimb Jiysis Krays Gor suŋ-tep chin ak gos tep ñiyiŋg, biynimb di Nop yip jimñiy ayip ak niŋiy, nup chiŋgem, jimñiy tep gakniŋ mindpun gok tiksipiyn. 2 Nimb Biyomb chin Gor apiymiŋay kuyip gosimb niŋmindem, nimbip kond minder, mindrep giniŋgambim.
Gor Nuk Key Chinup Niŋay Dak Ak, Nup Chiŋgrep Ginjun
3 Gor Biyomb tep yimb ak, biynimb yand mindeyaŋ aŋgiy, chinup niŋayak ak mey; nup gosimb niŋbun. Kun ak mindrep giniŋg nup chiŋgrep giy, tap siy tap timey ar ak kirgiy tiŋ nup diy, mindrep giniŋgambun. 4 Nuk gek mindrep giniŋgambun kun ak; tap timey, gos timey lum ar biy mindiy niŋbay ak kirginiŋgambun.
5-6 Pen kun giy mindrep giniŋg, Gor nup gosimb niŋbim rek nep niŋmindiy, monmon ma giy, gos niŋrep giy, mindrep ginimimb. Gos nimbip key wip rek ma giy, Krays nup chiŋgiy nep mindenimimb. 7 Mam ay gok kuyip direp giyiŋg, biynimb yikop gok sek wasemb aynimimb. 8 Pen Krays nup gosimb niŋbim rek, apiyn ar kun ak giy mey, Gor nup woŋg ak gem, amrep yimb giniŋgamb. 9 Pen nimb gunap minim aŋgiy tiksipiyn kun biy, ma niŋniŋgambim ak; biynimb windin koy gok mey, kun giniŋgambim. Biynimb kun gok rek, Gor kuyip tap siy tap timey geyak, gach wiykyokak ak sakiy giy, nup gosimb niŋnep ma mindpay.
10 Pen mam ay tep yand gok. Kun ak rek ma ginimimb. Gor gos nuk key niŋiy nimbip dip ak, kilis giy biynimb nuk mindenimimb. Apiyn rek giy mey, ma apyap pikniŋgambim. 11 Pen Ñinuk Jiysis Krays chinup aŋgiy kumak ak apiy, nimbip wasiw giyiŋg, di biynimb nuk per kond mindeniŋgamb namb ak ay, kond mindeniŋgamb.
12-14 Kun ak yand Piyta, nimbip minim kun ak, aŋgyiŋg nep mindeniŋgayn. Biyomb chin Jiysis Krays, yip kumniŋgamban aŋgiy ñin aŋgayak ak, maŋ wip ak mey; 15 mumbwak sek mindpiyn ñin biy, nimbip minim kun ak, aŋgyiŋg nep mindpiyn. Kun ak sakiy ma ginimimb; niŋyiŋg mindenimimb.
16 Nimbip Jiysis Krays Biyomb key yimb mindiy winiŋgamb aŋgnuk ak; minim nep ma aŋgnuk. Nind Biyomb kun ak key yimb ayek, windin chin key niŋiy, nimbip aŋgnuk. 17-18 Ñin kun ak, nuk yip am dum bap mindnukniŋ, Gor melik tep ak ap Ñinuk yip mindakniŋ, yimb nup dand aranyiŋg aŋgak, “Bi biy Ñi mapin tep yand; nup niŋen yip tep yimb gip aŋgak.”
19 Kun ak bi Gor minim aŋgep minim aŋgyak gok, yesek ma aŋgyak; minim pisnep dep gok nep aŋgyak. Minim aŋgyak kun ak, lam kisyimken daŋgiy ayey, chinup melik yomimb rek ak gip. Melik kun ak, niŋdand amiy, gap poŋglin miñmon yowniŋg gakniŋ arachakip rek ak, lim giniŋgamb gos namb nimbip biyaŋ. Lim gek mey, miñmon pisnep yowip rek ak giniŋgamb. 20 Pen minim nokom bap niŋrep ginjun. Biynimb gunap Gor minim ak yand nep niŋbiyn; nimb ma niŋbim aŋgiy, aŋgniŋgiy rek ma ayip. 21 Yenen: bi Gor minim aŋgep gok, Baybol buk minim ak tikniŋg, key niŋyak rek ma tikyak; Gor Kawnan ak kuyip gos ñakniŋ nep tikyak.