1 Anama haza knafina, amage nentaza disaipol nagamo'za ra hu'za ame'nanempi mareri'zageno, Griki kema nehaza Jiu vahe'mo'za, Hibru kema nehaza Jiu kuma agafa vahetmina kanive rezamante'za, mika zupa kave'ma fakoma hazana kento a'ne nagara antahi nozamize hu'za hu'naze. 2 Hage'za 12fu'a aposol nagamo'za ana mika amage'ma nentaza disaipol kevu zamasmizage'za emeritru hazage'za anage hu'naze. Ne'zama fakohu avu'avazamo'a, Anumzamofo nanekema hu'zampina tazeorigahie. 3 E'ina hu'negu tafuhete, tamagra amu'no tamifinti keso'e hutma 7ni'a vahema zamu'zmamo knare'ma hu'nesnia vahe'ma, Avamu'ene knare antahi'zamo'ma avitenesia vahe zamazeri otinke'za, esageta tagra ama erizana refako huta zamazampi antesune. 4 Hu'neanagi tagratia nunamu hu'zante'ene, Anumzamofo naneke'a huama huta veamofona zamasmita maka knafina vugahune. 5 Ana mika vahe kevumokizmia zamesige'za, ana hugahune nehu'za, ana 70ti'a vahe hampri'naze, mago ne'ma hampona amentintine ne' Ruotge Avamu'mo agu'afima avite'nea nera Stiveni huhampriza Filipinki Prokulusinki Nikenanki Taimoninki Pamenasima, mago Antioku ne' Nikolasi'a megi'a nagapinti ne'mo agu'a akrehe huno Jiu monopi amentinti nehia ne' huhampri'za zamaretru hu'naze. 6 Ana hute'za ana vene'ne zga zamare'za aposol nagate vazage'za zamaza ante'za, nunamu huzmante'naze.

7 Anumzamofo kemo'a mago'ane ra huno nevigeno, amagema nentaza disaipol nagamo'za Jerusalemi kumapina rama'a efore nehageno, ra'ma'a Jiu prisi vahe'mo'za zamentinti hu'za ke amage'anteme vu'naze.

8 Ana higeno, Stivenina Anumzamofo asunkuzamo'ene hihamumo avite'negeno, tusi'a kaguva zane, avame'zanena vahe'mokizmi amunompi erifore hu'ne. 9 Hianagi mago'a vene'nezga, Hibru osi mono nona (Sinagog) vahe zamazeri atre monore nehazafinti Sairini kumate'ene Aleksandria kumate'ene, mago'a Silisiane, Esia rankuma'mo kegva hu'nefinti (provins) vahe'mo'za oti'za Stiveni keha rente'naze. 10 Hianagi Stiveni'ma knare Avamupine, knare antahizampine kema hiazamofona, zamagra magore hu'za kea osu'naze. 11 Anante zamagra oku'a mago'a vahera anage hiho hu'za zamasmi'naze; Tagra nentahunkeno Mosesene, Anumzanena zanazeri havizahu kea hu'ne hutma hiho hu'naze. 12 Ana kema hazazamo vahera zamarimpa zamazeri otigeza, ranra vahe'mo'zane kasere ugagota hunaza vahe'mo'zanena oti'za Stivenina eme avazu hu'za kanisol (Senhitren) vahe zamure vu'naze. 13 Zamagra pusante havigema hunte vahe zamaretageno, ana vahe'mo'za hu'za ama ne'mo'a, ontagneno Mosese kasegegu'ene, ra mono nonku enena huhaviza hunte'ne hu'za hu'naze. 14 Na'ankure tagra nentahunkeno ama nemo'a amanage huno hu'ne, Nazareti Jisasi'a eri haviza ruotge mono nona nehuno, Mosesi'ma tami'nea avu'ava'zana, eriatreno kahefa avu'ava eri fore hunaku nehie. 15 Anankema huntaza fakohu'za kenaku nehu'za ana mika kva vahe'mo'za avugosafima kazana, avugosamo'a ankero vahe'mofo avugosamo msa hiaza hige'za ke'naze.