1 Tagrama nehunazamofo agafa'a ama'ne, tagrira Ugagota Prisi ne'tia monafinka mreri agaterenea kini trate Anumzamofo azantamaga kaziga mani'ne. 2 Agra monafinka tamame seri mono nomofo agu'afi Prisi eri'za eri ne' manino, eri'zana e'nerie. Ana seri mono nona vahe'mo'za zamazantetira onki'nazanki, Ramo ki'ne. 3 Miko ugota prisi vahe'mo'za musezane, kresramana vu'za eri'za ome kre sramana nevazankino, tagri Ugagota Prisi Ne'mo kresramana vugahie. 4 Ama mopafima mani'neresina prisi nera omnisine, na'ankure kasegemoma hu'neaza hu'za ko rama'a ugagota prisi vahe mani'ne'za musezana eri'za Anumzamofontega kresramana vunentaze. 5 E'i ama mopafi mono nompi kresramana vu eri'zama enerizana, monafinkama tamazama me'nea zamofo avame'za me'ne. Na'ankure Mosese'ma seri mono noma kinakuma retro nehigeno'a, Anumzamo'a Mosesena hanave ke asamino, e'sema ama agonare mikozama kaveri hu'noa kante antenka, seri nona kio huno huntene. (Ekso-Uti 25:40)

6 Hianagi Jisasima eri'nea prisi eri'zamo'a mago'a prisi vahe'mo'zama e'neriza eri'zana agaterenegeno, Agra amuno ne' tagri'ene Anumzamofontera manino, koma huvempama hu'nea hagerafi, kea agatereno mani'ne. 7 Na'ankure kote hagerafi huvempa ke'mo'ma knare'zantfa huneresina, menina mago'ane henka hagerafi huvempa kea osiresine.

8 Hianagi vahepima Anumzamo hazenkema keno erifore nehuno'a, anage hu'ne, Ramo'a huno Antahiho mago kna ne'eankina, ana knarera kasefa huvempa keni'a Israeli vahete ene Jiu vahe'motarera hugahue. 9  Ama ana hagerafi huvempa kenimo'a korapama nezamagehoma zamazante zamavazuhuna Isipi mopafinti zmavrena atineramina hunte'noa hagerafi huvempa kegnara osugahie. Zamagra ana hagerafi huvempa kerera mani fatgo osu'nazagu, Nagra namage'na huzami'noe huno Ramo'a hu'ne. 10  Hianagi Israeli vahetera ama kasefa hagerafi huvempa ke Ramo huno, henka'a Nagra kasegea antahintahi zmifine zamagu'afine krenentena, Nagra zamagri Anumza maninenke'za zamagra nagri vahe manigahaze hu'ne. 11  Ana knazupa zamagra ko Ramofona ke'za antahiza hu'nazankiza, tava'o zamire'ma mani'nesaza vahema rempi huzami zankura osugahaze. Osi vahetetima vuno ra vahetema vaniana, magore hu'za rempi huzamiza tamagra Ramofona antahinazo hu'za osugahaze. 12  Na'ankure nasunku hunezmante'na, Nagra kumizamia atrenezamante'na henka'a ana kumizamigura nagesa ontahigosue hu'ne. (Jere 31:31-34)

13 Anumzamo'ma ama kasefa hagerafi huvempa kema nehuno'a kote hagerafi huvempa kegura huno, kna'amo'a vgarenkeno, ko'zama me'nesia zamofona eri'zama'a omanenkeno fanane hugahie hu'ne.