1 Zamentintifima hanavema otinesamokizmia tamagrarega zmavrenentetma, antahintahifina knare hu'ne haviza hu'ne hutma zmentinti zmimofona refko huozmanteho. 2 Na'ankure mago'amokizmi zamentintimo'a knare hu'neankita makazana amane negahune nehaze. Hianagi mago'amokizmi zamentintimo'a hanave'otineankiza, hozafi nezanke nenaze. 3 Hagi fatgo hune huno nehuno maka'zama ne'nesnimo'a, anama nosanimofoma kefenkami ote'no. Hagi mago'a nezama nonesnamo'za, maka'zama nenesnamokizmia refko huozamanteho. Na'ankure Anumzamo'a zmavrene. 4 Kagra izaga rumofo eri'za vahera refko hunezmantane? Agri'a kva'amo refko hunteno, kagra eriza ka'are otigahananki, kagra evuramigahananki huno huntegahie. Hu'negu Ramoke azeri otisigeno, otino manigahie.

5 Anahukna kante mago'mo mago zgegnamo ruotage huno ruga'a zgegna zmagaterene huno agesa nentahisigeno, ete rumo'a ana'maka zgegnamo'za mago'zanke hune huno agesa nentahie. Mago mago'mo'ma, mago knaguma knare hu'ne hunoma antahinemisia knagura, atrenkeno tamarimpamo'a fruhino. 6 Iza'o mago zge'gnamo ruotge hune nehuno, Anumzamofo mono huntesiana, agra e'i Anumzamofo mono hunente. Iza'o ruzahu ruzahu neza nenesimo'a, Anumzamofonku nentahiza negahaze. Na'ankure zamagra Anumzamofo susu huntete'za nenaze. 7 Na'ankure tagra tasimu erita mani'nonana tagra'a suzana omanene, nefruna zana tagri'a zana omanene. 8 Na'ankure tasimuma eritama mani'nonana, Ramofonte nemanune. Hagi frunana Ramofonte nefrune. E'ina hu'negu frisuno, tasimu erita manisunana Rantimofo'za me'ne. 9 E'i ama ana agafare, Kraisi'a friteno ete otino asimu erino manine. Hu'negu asimu erino mani'nea vahe'ene, fri'naza vahe'mokizmi Ra mani'ne.

10 Hu'negu, nahigenka mono negafu amentintigura knare osu'ne hunka refako hunantane? Hifi nahigenka mono negafuna hufenkami netrane? Na'ankure ana maka'mota Anumzamo refako hurantesia tratera otigahune. 11 Na'ankure Mono Avontafepi amanage huno krentene, Ramo'a amanage nehie, tamage nasimu erina maninesnuge'za maka vahe'mo'za Nagrite zmarena neresageno, anamiko vahe'mo'za, huama hu'za Anumzamofona ragi amigahaze hu'ne. (Ais 45:23)

12 Ana hu'neankita magoke magokemota Anumzamofona maka'zama nehuna zamofo kea asamigahune.

13 E'ina hu'negu rumokizmima refko hunezmantona zana atreho. Tamagra'ma antahintahitamima retroma hanazana, mono neramafu zamentintifi zmagigo zamino, zamazeri tanafahu havegna huta omanisune hiho. 14 Ranimo Jisasi'a eriama higena kena atahinama huana, mago'zamo'e huno agru osu'ne huta osugahune, magozamo agru osune hunkama antahisanana, e'i ana zamo'a kagritera agru osugahie. 15 Hagi mago'a zama nenesana zankuma mono negafuma antahi havizama nehanigenka, kagra mago'ane avesi zampina nomanine. Atrenkeno nezama nesasazamo'a Kraisi'ma zamagrikuma huno fri'neamokizmia zmarimpa zamazeri haviza osino. 16 Ana nehuta atrenke'za knare hune huta tamentinti nehanaza zankura, havizane hu'za osiho. 17 Na'ankure Anumzamofo Kumara, neza ne'zane, ti nezana omanene. Hianagi Ruotge Avamupi fatgo avu'avazane, arimpa fru'zane, musenkase hu'za me'ne. 18 Na'ankure iza'o Kraisima ama ana avu'avatetima avaririsimofona, Anumzamo'a muse hunetesigeno, vahe'mo'za nege'za hugnare huntegahaze. 19 E'ina hu'negu atrenketa musezama mono kevufima fore'ma hanea zanku nehuta, tagra'ragara ozeri hankaveti, azeri hanaveti huta tamentintifina hageta ra hanune. 20 Nezantekure huta Anumzamofo eri'zana eri haviza osiho, ana miko'zamo'a avusese hu'ne. Hianagi knarema osu'niana, mago'mo'ma nefu azeri tanafa hunaku'ma nesia zamo'e. 21 Ame'a onesuno, negi ti onesuno, mago'azama hanunazamo mono nerafu amentintia azeri tanafa osanunana knare hugahie. 22 Kamentintima hanana, kagra Anumzamofo hanave kamentinti hunemine. Iza'o amentintima nehania zanku'ma antahintahafima haviza nosue huno osnimo'a muse hino. 23 Hu'neanagi tare antahintahi nehuno, nesimo'a haviza hane huno agu'amo'a nesamie. Na'ankure amentinti huteno none, hagino ana miko'zama amentintima osu'neno hania zamo'a kumire.