1 Nagaya Polonae Kalaisima humainea kava huna akave nehugi nagaila nenagetama nagayama nehua kavakeya nakave hutama maiho.

2 Kahegi malena tamahapaugetama tamakela okanitama kanale kava hutama akave nemalayafe “Kanale kava nehae.” huna musena hu nelamatoe. 3 Ma ma hisua kea havilama hiho. Anumaya Kotia Yisasina ala kanoa maiteno agenopa maigeno Yisasife haviya amakupi malenaya veamogamina ala kanoamia Yisasia maiteno amakenopaamia maigeya ania huya vemoya aneamimogamina ala kanoamia maiteya amakenopaamia mainae. 4 Nagoa vayamoya Anumaya Koti kema huhaleya nehuyao nunamuma nehuyao amanutela aiso ohisae. Aiso hisayana Yisasina, amakenopamona agaye hisifa kava huneatae. 5 Huneatagi nagoa anemoya Anumaya Koti kema huhaleya nehuyao nunamuma nehuyao hinuya amanutela nago yatetila aiso ohisayana amakenopamoa, anauamimona agaye hisifa kava huya amayolagefa mukia laga hu-talenaya anemoya nehaya augafa kava nehae. 6 Nagoa anemoya amanutema aiso ohisayana afaa amayolagefa mukia laga hu-talesae. Tagama huya aupa hisaya yamoa amakaye hisifa kavama hanesigeya neataleya amanutela aiso hisae. 7 Vemoya Anumaya Kotina amemaa “Anumayamo agi alisaga hisae.” huno vemogamina talo hu-maleneafe amanutela aiso ohisagi anemoya anauamimogami amaki alisaga hisayafe amanutela aiso hisae. 8 Anumaya Kotia anemogami amaugafaleti venenea talo ohunegi vemogami amaugafaleti anea talo humalene. 9 Anumaya Kotia anehe “Hamao.” huno venenea talo ohunegi vehe “Hamaesia yane.” huno anea talo hu-maleneane. 10 Talo hu-malenea yafeene ensole vayamoya neagaya yafeene anemoya “Anautimo amaiyaafi nemaune.” huya amanutela aiso hulisae huna nehue. 11 Nehuanagi Anumayamoene ailokaetama maisayana amoa haotela agaiagela omaisie. Vemoa ania huno haotela omaisie. Agaila aya nehisiana agaila aya nehisiana hutana maisae. 12 Hagoteno vefiti anea ali falote higeya mainayanagi menia anemoya venenea neamatayanagi Anumaya Kotipiti mukia yamoa falote hu-maineafe aepaa maine.

13 Tamakaya tamakaitami haya kavala fako hutama ageho. Anemoya amanutela aiso ohuneya nunamuma hisayana kanale nehio? 14 Tamakaitami haya yamoa tamaveli-maine vemoya amayolagefa kuma hanesiana amakaye hisaya yana hane. 15 Haneanagi “Anemogami amayolagefa kula muse hisaya konagali yaami hane.” hutama nehae. Anumaya Kotia amanute aiso hisaya yafe amayolagefa kula amamine. 16 Nagoa veamoya ani yafema kema vaisayana ani kenonaamihe mani kea nehue nagaiene mukia Yisasife havita tagupi malenona veanene alu auava kavala nohunagi nagoke kavakeya nehune huna nehue.

17 Menima tamahapaisua kea haviho tamakaya havi kava nehagena havina musena hu notamatoe. Yisasi agima alisaga hugahe melitalu hutama maifina kanale kavala nohagi havi kava nehagena nagainia onahaiye huna nehue. 18 Nagoa veamoya nahapaiyana tamakaya Yisasife havitama melitalu hutama maifina ke nevaitama tolefi ali fako nehae huya hayana tamage huya nehao? E, tamage nehae huna nagesa nehavue. 19 Tamakaiene mainaya veapina nagoa veala fatago huya Anumaya Kotina haiya kavala nehae. Ani veala agetama falote hisaya yafe tolefi ali fako nehae huna nehue. 20 Anumayamo kavema negahe melitalu hayanagi tolefima ali fako haya yatamia haneafe Anumayamo kave lama nonae. 21 Ani kavema negahema melitalu hayana nagoa veafena amakava nohagi tamahaote tamakaitami alitama aya kavela nenageya nagoa veala amakala nelegeya nagoa veamoya nofi alagamo tina ne hano huteya anegi vaya kana huya nemaiye. Naa havi kava nehutama Anumayamo kavemona aepaa havilama ohutama afaa nenae. 22 Naa higetama naa kavala nehae? Kavema lima nesaya notamia omaleo? Netetama eho. Anumaya Kotife haviya amakupi malenaya veafena “Afa vea kana nehae.” hutama nehutama kaveamima omalea veafena “Afa vea kana nehae.” hutama amakaye hisifa kavala nehao? Ani kavama hayana “Kanale kava nehae.” huna hisuo? Aao “Tusia havi kava nehae.” huna nehue.

23-24 Anumayamotegati ali-mainoa kegina ago tamahapai-mainoa kemoa maa humaine Yutasia Yisasina agesi huno avaleno kame vaya amayapi atenea kegela Alatimoa Yisasia kai hame kana maya alino Anumayamotega muse huno nunamu huteno aposino neamamino mage huno hie “Mamona nagaini naugafae. Tamakai tamaya hisiafene huna naugafa hakina nelamamugi nagaifena tamakesa havi havi nehutama nete nete hume hume haiho.” huno hamapaiye. 25 Higeya ani kavela netageno ania huno nofi alagamo keayola alino mage hie “Nagai kolama laki lavisia kanafina Anumaya Kotia haegafa alino hagelafi lamatesia kea ali fatago hisia yana havisaya yafe mukia kanafina mani keayopiti nofi alagamo tina nenetama nagaifena tamakesa havi havi hutama maiho. 26 Ani mayaene nofi alagamo tiene nenetamahena Anumayatimoa tagaife huno fali-mainea aepaa huhaletama hugahae. Ania hume nevisageno Anumayatimoa eteno esie.”

27 Nagoa veamoya kai hame kana mayaene nofi alagamo tifeenena amakua fakoa ohuya afaa nesayana Anumayamo augafaene kolamaaene alihaviya nehae. Anumayamo aufina kefo auava kava nehae. 28 Ani yafe mukia veamogatama Anumayamo mayaene nofi alagamo tiene nenutamahena hagotetama tamahaote tamahaote tamakua fako hutama agetetama “Kefo yana humaino?” hutama tamakesa havitetama tamakuamoma kanale hu-mainesigetamahena neho. 29 Nagoa veamoya kai hame mayaene nofi alagamo tiene neneya Yisasima tagaife huno augafa hakino fali-mainea aepaahema ohaviya afaa nenesaya veamogamina Anumaya Kotia kaiyekea humateno anonaamia amamigahie. 30 Naa kavama humainea yafenagiya tamakaipitila nagoa veala amaugafamoa fulu fulu higeya kalia aligeya nagoa veala ago fali-mainae. 31 Tagaya hagoteta tagua havita ali fako huteta noteasina Anumaya Kotia kaiyekea hulateno anonaa otamileasine. 32 Anumayamoa haenaga agai kema nohaviya veama kaiyekea humateno anonaa amamisia kavala tagaila otamisiafe menia tagaya kefo yama nehunagenoa fako hulateno mai fatago huta maisunafe kayona nelamie.

33 Nafunagana-gatama naa humaineafe Anumayamo kavema negahena melitalu hutetama kanaleya hutama nagoa veafena amakava mainegeya mukiamoya esagetama nagopi tamakoya aye-mainetama ani kavela neho. 34 Havigu kefo yama nehutama Anumayamo kavema nesayana Anumaya Kotia kaiyeke hulamateno fako hulamateyafenagi nagoa veamogamima tusia amakatesigeyahena noamifinagati neteya esae. Nagoa kea haneanagina tamakaitegama esua kanafina tamahapaigahue.