1 Nagaya nohavua kefiti huna mopale veamogami amakene Ensole vaya amakene aisuanagi veamogamife nahau nayamopafi onahaisigena yaveyaene veloene afaa aiko nelugeno kema ayeso nehia avamete huna afa kegefa nehue. 2 Anumayamoa avayafiti nahapaiya kea huhalena nehuna Anumaya Kotia falaki-malenea kemona aepaa mukia havilama humainoanagi veafe nahau nayamopafi onahaisiana afa ya kana huna mainoe. Anumayamofena havina nametitia hutena “Agoyamoga alule vuo.” hisugeno ani agoyamoa nagai ke havino visianagi veafena nahau nayamopafi onahaisiana afa ya kana huna mainoe. 3 Veafema nahau nayamopafi onahaisigena mone afenoami omalenesia veane mukia yania amamisuana ani yamoa naya ohugahie. Veafema nahau nayamopafi onahaisgena Anumayamo kema huhalena nehisugeya hamai vainateya navaleya atafi natalesageno naugafa leno asagalisia yamoa naya ohugahie. 4 Veafe hamau amayamopafi nehamaiya veamoya haviyama humatesageya mailava huya maineya anonaamia huoamateya kayoneage veane mainae. Alu kanomo yate age hamaye huya amaipamoa haviyana ohigeya amaugafa aliya ohai veane mainae. 5 Amakaiami amakia alisaga huya veganokanola nohae. Amakaiami yafekela amakesa havi havi nohae. Aupaa hamaiya novaiye. Havi kavama humataya veafena amakesa ohaviya afaa neatalae. 6 Veafe hamau amayamopafi nehamaiya veamoya nago kanomoa kefo yama hisia yafena muse ohugahagi tamage kelefe musena hugahae. 7 Veafe hamau amayamopafi nehamaiya veamoya haviya humatesaya veamogamina oamatalegahagi Anumayamo amaya hisiafe amametiti nehuya agava maineya mai lokiya vaiya nemaiye.

8 Ma ma hamau amayamopafima nehamaiya yana hanege hanege huno hanegahianagi Anumayamo amakupi humainea kema huhaleya hamapaiya kemoa hano hugahie. Amakesamoa nohaviya kema nehaya yamoa hano hugahie. Falaki-mainea kemo aepaama havilama nehaya yamoa fanane hugahianagi hamau amayamopafi nehamaiya yana agola hano ohugahie. 9 Hano ohugahigi havimainona yamoa nago kaiyagaa havilama ohunone. Anumayamoa lagupi humainea kea huhaleta nehunanagi nago kaiyagaa havilama ohunone. 10 Havilama ohunonagi fatago kavakeya nehisia kanomoa, Yisasia, mukia yafena havilama hulineanagino esigeta havilama ohuneta nehuna yamoa fanane hugahie.

11 Nagaya osi nafanema mainoa kanafina nafanemoma nehia kea nehuna nagesa havi havi humainoanagi ko hutena ala kanoma mauvana nafanemoya nehaya kavala ago atalenoe. 12 Meni kanafina tagaya hanikomako yapi maineta Anumaya Koti augosa galasifima tamema agona avamete kava nehuta agelama huta noagonanagi haenagaa Anumayamo augosa neageta agelama hugahune. Meni kanafina Anumayamo kea havilama nohunanagi Anumayamoa nagaila nagelama humainea kava huna haenagaa nagaya agaila agelama hugahue.

13 Anumayamofe havita lagupi maleta tametitima humainona yaene “Anumayamoa hulamategahue huno humainea yana hugahie.” huta lametiti nehuna yaene veafe tahau tayamopafi nelahaiya kavaene ani tagufa (3) yamoa hanege hanege huno hanegahianagi tahau tayamopafi nelahaiya yamoa uhagoteno mani tole yamona agaseno tama yatafa hane.