1 Tole kana maiteya Kalili hanea kumala Kenae nehaya kumate nago kanomoa a aligahe higeno Yisasina itaamoa anima ama aligahema hia nopi umaine. 2 Umainegeya “Yisasiga kagaienema tokaeya nemaiya anagakaene eho.” huya ke hageya umainae. 3 Umaineya nenageno nofi alagamo tina hano higeno Yisasina itaamoa Yisasina mage huno hapaiye “Nofi alagamo tina hano hie.” huno hanepaiye. 4 Higeno Yisasia mage hie “Aoko ‘Naa maa huo.’ huka nahaopaiyo kagai yana omalene. nagaya tokiyania amavelisua kanaa falote ohune.” huno nehie. 5 Nehigeno Yisasina itaamoa kavema talo talama huya amamiya veanehe mage huno hama-paiye “Nago kema hinagetama agai ke akave maleho.” huno hama-nepaiye.

6 Yuta vayamogami mono kemoa mage humaine “Mukia kanalela mukia yana sese hutama ti faleho.” huno humaineane. Ani yafe sikisia (6) yafa ti keayola vani hataletia (100) lita hanea keayola anilela hane. 7 Hanegeno Yisasia kavema talo talama huya neamamiya veanehe mage huno hama-paiye “Mani li keayoyakafina hefitama havateho.” huno hama-paigeya hefi havate-mainae. 8 Havatageno “Kavetema kava yagai-mainea kanole osia hefitama alitama momiho.” huno higeya hefiliya umainae.

9 Hefiliya momigeno ani kavetema kava yagai-mainea kanomoa ani lina hagotenoa titafa haniamagi haenagaa eteno nofi alagamo ti hapaegeno neno akekeana higeno ani lina ea kamaa oageneamagi hefiyama aliyama aya veanemoyage havimainae. Kavetema kava kanomoa ama alia kanohe ke huno mage huno hapaiye. 10 “Mukia vayayaga hagote kanalela hagaage tina amamigeya mageno amamu higeya haviyama hia tina neamamiya yamagi kagaya hagote kanalela afa li tamiteka haenaga hagaage tina nelamine.” huno nehie.

11 Manima taloma hia tokiya avame yana Yisasia hagote kanale Kalili hanea kumala Kenae huya nehaya kumate ani kavala talo nehuno tusia ala tokiya hale yamaaene amaveligeya agaienema tokaeya nemaiya anagaamoya ageteya aliya amakupi maleya amametiti hu-mainae. 12 Naa hu-maletegeya Yisasiene itaamoene aganaamoyaene agaienema tokaeya nemaiya anagaamoyaene Kapaneamu laviya osi kanaa anile mainae.

13 Nago ala imua Anumaya Kotima Yuta veayamogami amakinagomogami amaugafama aligatimainea kanahe amakesa havi havi nehaya imu negiya kana evayi hugahe higeno Yisasia Yelusalemu haimaine. 14 Yisasia ala mono nopi haino mogeana vayayagamoya pulumaka afuma sipi sipi afuma namama malenageya veamoya miya hisaya yafe malenageno Yisasia mokemaine. magi nagoa vayamoya alu kotega nehanea monea nealiya ani kumatema nehanea monea anonaa amamisaya yafe folomole maleya mopale mainageno momakemaine. 15 Momaketeno nofiteti alifagagi maleneno mukia vayama sipi sipima pulumaka afuyakaene mono nopiti ali helafi neataleno monema ayeyahaema nehaya vayamogami folomoamiene moneamiene ali helafi-talene. 16 Namayagama miya nehaya vayafe mage huno hamapaiye “Alitama eviho. Mafina nenafa nona tamakaya alitama maketi kumala talo ohiho.” huno nehie. 17 Nehigeya agaiaenema tokaeya nemaiya anagaamoya avopima hanea kehe amakesa nehaviye. Ani kea mage huno haneane “Anumaya Koti nofena mukia kanale magesa havi havi huna nokaa kanaleya huno hanesia yafe aluya huna muse nehue.” huno kaemalenegeya havimainayane.

18 Havimainayamagiya Yuta vayamoya eteya havinegae “Aniama hana kavala ta tokiyaleti nehane? Tokiyakaa hane huta havisuna yafe nagola oagenona tokiya avame yana hugeta agamano.” huya nehae. 19 Nehageno Yisasia kenonaamia mage huno hama-paiye “Ma ala mono nona alitama lagape aitaletesagena talia (3) kanale etena ani nona alina hetigahue.” huno nehie. 20 Higeya Yuta vayamoya mage huya hapaiye “Kekamoa kanale ohia ke nehane talia (3) kanale ani nona alina hetigahue huka nehanamagi vayayagamoya foti sikisia (46) kafufi mani nona kimalenaya none.” huya nehae.

21 Huya hageno Yisasia ani avame kea hiamagi ani mono nofema hiana agaia augafahe nehie. 22 Yisasima falitenoma he-ti-mainea kanafina agaienema tokaeya nemaiya anagaamoya ani kema humainea kehena amakesa havimainae. Avopima hanea kene Yisasima humainea kene “Tamage humaineane.” huya amakupi maleya amametiti humainae.

23 Imuma negiya kanale Yisasia Yelusalemu maineno oagenaya tokiya avame yana higeya ageteya mukia veanemoya “Tamage nehie.” huya amakupi maleya amametiti humainae. 24 Hayamagi Yisasia mukia veanemogami amakua ago amakea yafe agua noamamie. 25 Naafene amakupima hanea yana ago age-mainea yafe Yisasia mukia veamogamife “Tamakupima hanea yana naha-paiyo.” huno ohune.