7
Fugagieta nopi maineya imu negiya kanale Yisasia mogegahe umaine.
1 Ani kanafina Yutia kotega vayamoya haesaya amakesa haviya yafe Yisasia Yutia vai-oayeno Kalili kotega ute ete huno maine. 2 Ala kana, fugagieta nopi maineya imu negiya kana aupa nehie. 3 Aupa higeya Yisasina aganaamoya mage huya hapaiye “Ma kumala neataleka Yutia kotega ugeya kakavema nehaya veala kagayama tokiyakaletima alina aliyana ageho. 4 Nago kanomoa ‘Mukia veamoya nagesae.’ huno kesi aliyana noalia yane. Kagaya ani tokiya aliyana mukia ma mopale veamogami amaufi aligeya ani aliyakaa ageho.” huya hae. 5 Hayanagi ani aganaamoya agaifena haviya amakupi maleya amametitia ohunaya yafe ani kea hu-mainae. 6 Yisasia mage hie “Aliyania amave-lisua kanania falote ohunegi tamakaya mukia kanalela tamakaima tamahaisia kavala hisaya kanatamilelagi afaa haiho. 7 Nagai ke nohaviya veamoya tamakaifena musetami nehagi nagaya ‘Ase ohu kava nehae.’ huna hama-pauva yateti nagaila amaipa kafa he-nenatae. 8 Tamakaya Yelusalemu imulega viho. Nagaya aliya kanania falote ohuneanagina ani yafe menia imulega ougahue.” huno hie. 9 Ani kea hama-paiteno ouno afaa Kalili kotega maine.
Yisasia imulega umaine.
10 Aganaamoya imulega ago utageno Yisasia haenaga anilega hai-maine. Vaya amaulela ounegi kesi fala-kino umaine. 11-12 Falakino umainegeya Yuta vayamoya agayama imulema esiafene huya moge mege hugetayana higeya mage huya hae “Ani kanoa hanate maine?” huya hamavi-gageya anifima alitalu hu-mainaya veamoya Yisasifena sumi sumi huya nagoamoya “Kanale kanoe.” huya nehageya nagoamoya “Vaya aye-mavataga hugeno omai kanoe.” nehageya huya hae. 13 Hayanagi Yuta vayamogamife koli haya yafe ani kea ala kea ohunagi osi kefiti sumi sumi huya hu-mainae.
14 Ani imu kanamo amunopinaga Yisasia ala mono nopi haino hu-mave-li-maine. 15 Hu-mave-neligeya Yuta veamoya tusia amamayo neaiya mage huya hae “Mani kanoa hana avo nopi uno age-mainea kanomo avopitila taha-nepaiye? Avo nopina ounea kanomoa hanateti ani kea haviline?” huya hae. 16 Hageno Yisasia kenonaamia mage huno hama-paiye “Hu-mave-nelua yana nagesafiti tamaha-nopaugi nevayama hu-na-tegena emainoa kanomo naha-pai-mainea ke tamaha-nepauve. 17 Nagoa veamoya ‘Anumaya Kotina haisia kava hugahune.’ huyama hisaya veamoya ma ma hu-lamave-nelua kea nagesafiti tamaha-nepaufi Anumaya Kotia naha-pai-mainea ke tamaha-nepaufi havigahae. 18 Havigahayanagi nago kanomoa agaia agesafiti kema hisia kanomoa ‘Nagai nagi alisaga hisae.’ huno nehianagi nago kanomoma ‘Nevayama hu-na-tenea kanomo agi alisaga hisae.’ huno hisia kanoa kanale agu agesaene kano mainea yafe havigea ohugahie. 19 Mosesea kahegi kea ago tamaha-pai-mainea ke tamakaitamifina nago kanomoga ani kemona akavela nomalane. Naa higetama menia nagaila nahaegahena nehae?” huno hie. 20 Higeya melitalu hu-mainaya veamoya mage huya hae “Kefo avamumo kagaila kagusafina maineno kavale-liteno nehie. Taya kahaegahena nehageka nehane?” huya hae. 21 Hageno Yisasia mage huno hama-paiye “Nagaya nago tokiya aliyama Sapati kanalema alua aliyafe tamamayoa neaiye. 22 Mosesea nayona ‘Nafanetamimona agoya amega augafaa taga hu-taleho.’ huno hama-pai-maine. Ani kavala agaia alino aepa ohenegi Mosesena aginagomoya ani yana aliya aepa he-mainae. Nemoma agoya anoyaa tagama hayana Sapati kanale taga hu-mainae. 23 Tamakaya Mosesema kahegi kema oatagaesaya yafe Sapati kanalela nemo agoya anoyaa taga nehayanagi naa higetama nagayama Sapati kanalema nago kanoma mukia augafama alina hilatoma hua yafena tamahaiya vai-nena-tae? 24 Havigu ke nehae. Afaa amega yate agetetama ‘Kefo kava nehane.’ hutama nehagi tama kava hisigetama agetetama kaiyekea hu-teho.” huno nehie.
Veamoya “Yisasia hanaa augafa kano maine?” huya havigahe hu-mainae.
25 Nagoa Yelusalemu mainaya veamoya Yisasima hia ya ageteya mage hae “Ma kanoa ala vayamoyama haegahunema haya kanofi? 26 Ageho vaya amaulagafina kea nehianagi nago yana hu noatae. Kava vayamoya ma kanomofe Anumaya Kotia veamogati taugafa ali-gatigahie huno hu-tegeno emainea kanoa mainea yafe havimainafi? 27 Anumaya Kotia taugafama ali-gatigahema hu-tegeno emainea kanomofena ‘Hana kumateti emaine?’ huya hugahayanagi ma kanoma ea kumala ago age-mainone.” huya hae.
28 Hageno Yisasia ala mono nopi haino maineno hu-mave-nelino ala kefiti mage huno hie “Tamakaya nagaifena ago havilama hutama nage-mainafi? Nagayama emainoa kumaenefe havimainafi? Nagaya nagaini nagesafiti omenogi nagaima hu-natenea kanomoa tokiyaage kano maineanagitama tamakaya agaila oagenae. 29 Oagenayanagi nagaya agaiene mainoleti hu-nategena emainoafenagina ago age-mainoe.” huno hie. 30 Higeya agaila atafa hugahe hayanagi falisia kanaa yaufa falote ohunea yafe augafalela nago kanomoa atafa ohune. 31 Ohunayanagi mukia anifima mainaya veamoya agaifena haviya amakupi maleya mage hae “Anumaya Kotima taugafa ali-gatigahema hu-tenea kanoma esiana ma mainea kanomoma tokiya avame yama hu-mainea kavala agasesifi? Aao oagasegahie. Ma kanoa Anumaya Kotima taugafa ali-gatigahema hu-tegeno emainea kano maine.” huya hae.
Ati vayala hu-ma-tageya Yisasina atafa hugahe neae.
32 Nehageya Falasia vayamoya agaifema sumi sumima haya kea haviteya mono note kava vayaene Falasia vayaene ati vayamogamina hu-ma-tageya Yisasina me haesaya malesaya kava huya avalegahe neae. 33 Neageno Yisasia mage huno hie “Osi kana kanoa tamakaienena maitena hu-nategena emainoa kanolega ugahue. 34 Tamakaya nagaifena natiyegahayanagi nagaila onagegahae. Visua kumatela tamakaya ougahae.” huno hie. 35 Higeya Yuta vayamoya amakaiamifi huge havige huya mage hae “Agayama ‘Nagaila onagegahaema.’ hia kumala hanamaalegafiga hanegeno nehie? Agaya Kaliki kotega Yuta vayamogatina tataleya umainaya kotega umaineno Kaliki vea hu-mave-li hamaveli hugahe nehifi? 36 Agayama hia kea ‘Tamakaya nagaila natiyegetesayana onagegahae. Visua kumatela ougahae.’ hunoma hia kemo aepaa naane huno nehie?” huya hae.
Yisasia ofalita maige maige hisuna tife hu-maine.
37 Imu kime haiya mogi hanoma haya kana tusia ala kanae. Ani kanale Yisasia he-tino ala kefiti mage hu-maine “Nagoa veama tifema amakesia veala nagaite eya tina me neho. 38 Nagoa veamoya nagaife haviya amakupi maleya amametitia hisayana Anumaya Koti autamafina ani veamofe mage hu-maineane
‘Ofali tina kasagoya timo aguafina hava-te-maineno vali-lavino tavigahie.’ huno hu-maineane.” huno nehie.
39 Yisasia anima hia kea “Alu Aotage Avamuamofe hu-maine.” Ani Alu Aotage Avamula Yisasifema haviya amakupi malesaya vaya amamite amamite hugahe nehie. Ani kema hia kanafina Yisasia yaufa ikapinaga ohainea yafe Alu Aotage Avamuamoa yaufa omenegeno hu-maine.
Veamoya agaifena tolefi ali fako hu-mainae.
40 Nagoa alitalu hu-mainaya veamoya ani kea haviteya mage hae “Tamage-lafa huno mani kanoa Anumaya Koti aune kano emaine.” huya hae. 41 Hageya nagoa veamoya “Anumaya Kotia taugafa ali-gatigahe hu-tenea kano maine.” nehageya nagoa veamoya “Anumaya Kotia taugafa ali-gatigahe hu-tenea kanomoa Kalilitila falote ohugahie. 42 Anumaya Koti autamafina mage huno kae-maleneane
‘Anumaya Kotia taugafa ali-gatigahema hu-tenea kanoa Tevitina aginagomo egahie. Tevitima Petelehemu nemaiya kumate ategahie.’ huno kae-maleneane.” huya nehae.
43 Ani veamoya agaifena tolefi ali fako huya alu ke alu ke nehae. 44 Hageya nagoamoya “Agaila atafa hiho.” huya hayanagi nago kanomoa augafalela atafa ohune.
Mono note kava vayamoya Yisasifena haviya amametiti nohae.
45 Ati vayala eteya mono note kava vayateene Falasia vayateene vageya mage huya hamavigae “Naa higetama avaletama nomae?” huya hae. 46 Hageya ati vayamoya mage huya hae “Yisasima hia kea nayona nago kanomoa ania augafa kea ohigeta ohavinona yafe avaleta nomone.” huya hae. 47 Hageya Falasia vayamoya mage hae “Tamakaienena ago aye-lamavataga hu-mainefi? 48 Ifi nagoa kava vayapi Falasia vayapi ‘Yisasifena haviya amakupi maleya amameti hu-mainae.’ huya haya kea havimainafi? 49 Aao kava vayala ania ohunagi kahegi kema ohaviyama alitaluma hu nemaiya veamogamina Anumaya Kotia hai vai-ma-teno haniki-mainesia yapina hu-mategahie.” huya hae. 50-51 Hageno Nikotimasia nayoma Yisasitema emainea kanomoa amakaipi maineanagino mage hie “Tagai mono kemoa mage huno hie ‘Hagotetama nofima hu-tesaya kanomona ‘Naa maa humainoe.’ huno hisia kea havitetama kefo kavama hu-mainesia kanomona nofila huteho.’ huno hu-maineane.” huno nehie. 52 Nehigeya “Kagaya kagaienena Kaliliti kano mainapi? Anumaya Koti ke kae-malenaya kefina hapalika havilama huteka kagaienena havio Kaliliti nagola aune kano omegahie.” huno hu-maineane huya nehae. 53 Nehageya mukia veamoya atagu-feya ataleya kumaamilega ute ete hu-mainae.