1 Nago Sapati kanale Yisasiene agaiaene tokaeya nemaiya anagaaene nago atili hoya amunopi neuya anagaamoya nago atilia kaleya atafaiya nae. 2 Nenageya nagoa Falasia vayala anile mainaleti ageteya mage huya hae “Sapati kanama katilemalenaya yana naa higetama ani kavala nehae?” huya hae. 3 Hageno Yisasia mage huno hie “Tamakaya Tevitiene avagi huya umainaya vayaene amakatemainaya yafena hapalitama ohavinafio? 4 Amakategeno Tevitia Anumaya Koti nopi hai faleno ageana ‘Afa vayamoya onesageya mono nopi kava vayamoya amakaiamige negahae.’ huya katilemalenaya maya Anumaya Koti aulagale malenaya kaihame alino neneno avagi huya emainaya vayala amamine. Tamakaya ani kea hapalitama ohavinafio?” huno hie. 5 Yisasia mage huno hie “Nagaya ikapinagati emainoa kanoa vayamo natenea kanomona Sapati kana kava yagaimainoe.” huno hie.

6 Nago Sapati yupa Yisasia mono nopi haino mono ke hamanepaigeno nago kanoa tamaga aya avayu hulavimainea kanoa anile maine. 7 Mainegeya nagoa kahegi kema havilinaya anagaene Falasia vayaene Yisasia havi kavama hisiafene huya ati neayeya “Yisasia Sapati kanale ani kali kanoa alino kanale hutesifi huotesifi?” huya Yisasina amata huya mainae. 8 Mainageno Yisasia ani vayamoyama haviya amaku amakesa ago haviteno ayama avayu hulavimainea kanomofe mage huno hapaiye “Hetika vayamogami amunoamifi me hetio.” huno higeno hetino anile me hetimaine. 9 Me hetimainegeno Yisasia amata huya maiya vayafe mage huno hie “Tamahavinegoe Sapati yupahe mono kemoa naane ke nehie? Sapati yupa veane ali hilato humatesifi alino haviya humategahie ifi Sapati yupa veanea amavaleno avina me mategahafi ifi veala tavata hamaegahie?” huno hamavige.

10 Hamavigeteno mukia vayamogami amaulagafi ageno ute ete nehuno kali kanomofe mage huno hapaiye “Kayana aipi huo.” higeno aipi hiana ayamoa ago kanale hute. 11 Hutegeya amata huya maiya vayamoya tusiya huya amaipa kafa heteteya “Yisasina na kava hutesune.” huya humainae.

12 Nago yupa Yisasia Nefatega nunamu huno havigegahe agoyafi haino ani kegela Anumaya Kotitega ke huno havige havige nehigeno kola ali halemaine. 13 Kola alino halegeno agaienema tokaeya nemaiya anagaamofe ke higeya ageno ani anagapiti tuelufua (12) anaga hapalimateteno “Nagai kema nehavigena hunelamatoa anagala Aposolo anaga maiho.” huna hapalinelamatoe. 14-15 Anima agaiene tokaeya nemaiya anagaamogami amakia Saimonie kanomo agia Yisasia Pitae huno malene. Pitana aganaamoa Etalue, Yemesie Yonie Filipie Patolomayue Matiue, Tomasie, Yemesia Alafiusi nafane Saimonina hamoamoe nago agia Selotie. 16 Yutasia Yemesi nafane, Yutasi Isakaliotia haenaga ani kanomoa Yisasina agesi huno kame hutesia kanoe.

17-18 Yisasia agaienema tokaeya nemaiya anagaaene tavino otufi hetimainegeya nagoa kasagoya agai kema nehaviya veanea Yutiatiene Yelusalemutiene hage limo agegayalega tole kumatalana Taiyaene Saitonitiene kasagoya vea elitalu huya agai kea nehaviya “Kalitia alino kanale hulatesie.” huya emainageno Yisasia Kefo Avamuyaga veamogami amakupiti amanati neataleno alino kanale humatene. 19 Tokiyaamoa efalote higeno mukia veanea alino kanale humategeya mukia veamoya ageteya augafale avate hugahe hae.

20 Yisasia agesaga huno agaiene tokaeya nemaiya anagaamogamina neamakeno mage huno hie “Mukia yatamima omalenaya veanemogatama Anumaya Kotia tamakaila kava yagai nelamatea yafe musena hiho. 21 Tamakaila menia tamakama nelea veamogatama haenagaa nesageno tamamu hisiafe musena hiho. Menia tamakaya avi neataya veanemogatama haenagaa kigi hisayafe musena hiho. 22 Ikapinagati emainoa kanoa vayamo natenea nafanemonima nakave nemalayafe veanemoya amaipa kafa helamateya ‘Aluale maiho.’ hulamateya kamuge vailamateya ‘Otahaiya kagi hane.’ huya hisagetamahena tamakaya ani kanafina afaa muse hutama maiho. 23 Aniama hulamatenaya veanemogamina amakinagomoya nayona Anumaya Koti amaune vayamogamina ania huya humatenayane. Aniama hisaya kanafina haenagaa ikapinaga umainetama anonaa kasagoya ya alisayafe tamaipa kanale hutama muse hiho.

24 Avonio mukia yatamima hanea veanemogatama tamakaya kaye ho. Tamaipa kanale hisia yana hai ali mainae. 25 Avonio tamakaya menia mukia yama nelamamuma nehaya veamogatama tamakaya kaye ho. Haenagaa tusia lamakategahie. Avonio menia kigima hutama nemaiya veanemogatama kaye ho. Haenagaa tamahau nelagitama avia ategahae. 26 Avonio veamoya ‘Ala vaya mainae.’ huya tamaki alisaga nehisaya anagala kaye ho. Aniama humainaya veanemogamina amakinagomoya nayona ania huya havigeage amaune vayamogami amaki alisaga humainayane.”

27 “Nagai kema havisaya veamogatama ‘Kame veanetamimofena tamahau tamayamopafi tamahaino. Amaipa kafama henelamataya veanemogamina kanale kava humateho.’ 28 ‘Anumaya Kotia ali haviya hugatesie.’ huya nehaya veamogamife ‘Kanale ya amamio.’ huka Anumayamotega ke huka havigo. Hu haviya hunegatesaya veanemogamifena ‘Amaya huo.’ huka Anumayamotega havigo. 29 Nago kanomoma kagalamesalema kaikolisigekahena ‘Nago kaiyaga nagalamesaleene naikolio.’ hisanageno kaikolisie. Nago kanomoma ala yasi siotakama musufama alisigekahena nago siotakaa afaa kaufila ohuo. 30 Nago kanomoma ‘Nago yakahema namio.’ hisigekahena afaa hagayu huka amio. Kagai yama alimainesia kanomofena ‘Eteka namio.’ huka tokiya kea hu oato. 31 Veaneyagahe ‘Ma kava hulatesae.’ hutama hisaya kavala ani kavakeya alu veanea humateho.

32 Veamoya hamau amayamopafi tamakaifena nehamainagetamahena tamakaya ania hutama amakaifena tamahaisia yana afa yanagi anonaa oaligahae. Kefo yama nehaya veanemoya ania huya amahau amayamopafima amahaiya veafena nehamaiye. 33 Kanale kavama hulamataya veanemogamina ania hutama kanale ya humatesayana ani yana afa yanagitama anonaa oaligahae. Kefo yama nehaya veanemoya ania kavala nehae. 34 ‘Eteno namigahie.’ hutama hutetama amisaya veala yoka amisayana afa yanagitama anonaa oaligahae. Kefo yama nehaya veamoya nagoke augafa ya alisayafe kefo yama nehaya veaneamimona yoka neamamiye. 35 Anumaya Kotia kefo veanemoyaene agaifena musema nohaya veanemogamifeene kayone huneamatea yafe tamakaya ani kava hutama kame veanetamihena tamahau tamayamopafi nelamahaisigetama kanale kavakeya humateho. ‘Anonaa nago yana oaligahune.’ hutama hamaisia yana amamiho. Naama hisayana haenagaa Anumaya Kotia kasagoya anonaa tamamisigetama ala Anumaya Koti kana hutama nafaneyagaa maigahae. 36 Nelamafama hauma huneamatea kavala ania hutama tamahauna humateho.”

37 “Nelamafufena ‘Naa maa hana kano mainane.’ hu oateho. Aniama ohisagenoa Anumaya Kotia tamakaifena ‘Havi kava haya veane mainae.’ huno hu otamategahie. Nelamafugamina kaiyekema hu oamatesayana Anumaya Kotia tamakaila kaiyekea hu otamategahie. Haviya hulamatenesia kanomona aigeatetama kefo yamaa ataleteho. Ania hisagenoa Anumaya Kotia kefo yatamia aigetamateno atalelamategahie. 38 Nelamafugamima amamisaya kavala Anumaya Kotia ania huno lamamigahie. Tamakaila kutamifina aye talako huno havatesia kava huno ku ailamategahie. Ma mopalema nelamafugamima humatesaya kavala Anumaya Kotia tamakaila ani kava hulamategahie.” huno humaine.

39 Nago avame kea mage huno hie “Nagoma aulaga asu humainesia kanomoa nago aulaga asu humainesia nefaluna avaleno kanale vaiyesaafi? Aao avalenoma vaiyesiana tolemogania komufi asaga hulavigae. 40 Nago sugulufi mainesia nafanemoa huveli kanoamona oagaseneanagino mukia huvenelia yamaa havilama hulineno huvelimainea kano kana huno maigahie”

41 Tagaya tagaiti taguafima hanea yana ageteta alu veanehena “Havi veane mainae.” huta hisuna yafe Yisasia mage huno hie “Naa higeka negafu aulagafina osia havi yana hanegeka neagananagi kagaikaa kaulagafina nagola muki yosalapagefa hanegeka ‘Omale.’ huka nehane? 42 Naa higeka negafufena ‘Kaulagafitila havi yana alitalegahue.’ huka hananagi kagaika kaulagafina nagola muki yosalapagefa hanegeka ‘Omalene.’ huka nehane? Kaguafinaga hanea yana agelama ohuneka kavayaleti havige huka vagala kano maineka kagaikaa kaulagafitila muki yosalapagefa alitaleteka negafu aulagafina kanale neageka osia havi yana alitalegane.” huno hie.

43 “Kanale yosamoa havi yosalaga noayegi havi yosamoa kanale yosalaga noaye. 44 Noayegi veamoya yosalaga ageteya kanale yosalaga hanesigeyahena ‘Kanale yosa hane.’ huya hugahae. Avetanafa yosaletila kaimona hataga ohugahae. Avetanafa nofitetila fulutu alaga avayu huya notagiye. 45 Fatago huya mainaya veamoya kanale amaku amakesa havilineya kanale kavala nehayanagi kefo ya nehaya veamoya havi amaku amakesa havilineya havi kavakeya nehae. Veamoya amaku amakesafinaga havateteno aivalilavimainea kea amavayafiti hu falote nehae.”

46 “Nagaifena afa kava nehune hutama ‘Anumayatimogae, Anumayatimogae.’ hutama nehayanagi tamahapauva kea ali hipoya nohae. 47 Nagoa veamoya nagaite neeya nagai ke havige havige huya ali hipoya nehaya veamogamina maa augafa veane mainae huna tamaveligahue. 48 Nago kanomoa noma kigahena ayaaya komu kafiteno yafana anifinaga maleteno u posia ani komufinaga yafa agotofule maleteno aye talako huno nona kimalegeno timoa tusia li hogino ani note eanagi tokiyaage no kimaleneafe anima hogino ea timoa alino lagape aioatalene.

49 Ali lagape aioatalenegi nagoa veamoya nagai ke haviteya ali hipoya nohaya veamoya maa veane mainae. Nago kanomoa noma kiana amega komu kafiteno fulu fulu posi ayeno nona kimalenegeno timoa hogino ani note eana aupaa ani nomaa ali lagape aino mopafi atalegeno tusiya huno haviya hulavimaine.”