1 Efesusi mono note mainaya veate kava kanohena mage huka kao nagaya tamaga nayapina sevenia (7) kanefi atafa hulinena sevenia (7) kanileta yafateti talo humalenaya lamumo amunopi ute ete nehua kanomona mani kea tamahanepauve. 2 Nagaya tamakai auava yatamia ago age-mainoe. Tusia kasageke-voke hutama aliyama nealiya yafeene mailava hutama tokiyaagema hutama nemaiya yaenena ago age-mainoe. Kefo yama nehaya veafena “Havigegeyama nehaya yamo otahaiya vayala mainayanagita tamakai kea ohavigahune.” hutama nehae. Nehageya ani vayamoya havige huya “Tagayaenena Aposolo vaya mainone.” huya nehayanagi tamakaya keamia ago havitama fako hutama haviyana “Havigegeya maiya nehaya vaya mainae.” hutama nehae. 3 Tamakaya nagai nagima alilinageya ali haviyama hulamatayanagi kasalola otamahaenegi lokiya vaitama mainaya yafena ago tamake-mainoe. 4 Naa nehayanagi nagoa kavala havi kava nehae. Hagotetama nagai kea havitama lamakupi maletama tamakua kanaleya hutama namitetamagi menia ani yana ago neataletama ali hataga huligeno osi nehie. 5 Nayoma tamahau tamayamopafi tamahau-mainea yafena tamakesa havi havi hiho. Menia ago neataletama asaga hulavi-mainagi tamakua aiyahae hutama nagoene ehema humainaya kavala etetama hiho. Tamakuama aiyahae ohisagena nagaya esuaamona lamutamia melina atalegahue. 6 Atalegahugi tamakaya nagola kanale auava yana ago hagena age-mainoe. Tamakaya Nikolasi mono kema nehaviya amaugafa age hamayema nehaya yafena tusia lamaipa kafa he neamatae. Nagayaenena aniama nehaya kavaamihena naipa kafa he neamatoe.

7 Nagi tamakesama hanesimogatama Avamumoma Yisasi kema haviya melitaluma nehaya veamogamifema hia kea haviho. “Nagoa veamoya Sataniene tuma huya agasesayana Anumayamo kumate ikapinaga hanea yosa, agola maige maige hisaya hamaimu amamisia yosamo alaga ‘Neho.’ huna amamisugeya negahae.” huno humaine.

8 Simena mono note mainaya veate kava kanohena mage huka kao nagaya uhagotena maitena haenagalafana mainoe. Fali-mainofitila ago etena hetina mainoe. 9 Tamakaya kana yapi mainetama mukia yatamia omale veane mainayanagi Anumaya Kotia kanale yana ago tamamigena nagaya ago age-mainoe. Nagoa veamoya “Tagaya Yuta veane mainone.” huya nehayanagi Yuta veanea omainagi Satani anaga maineya huhaviya hu-lamataya yana nagaya ago age-mainoe. 10 Tamakata aisia yana aligahayanagi kolia ohiho. Haviho Satania aye lamavataga hisigeya nagoa veamogatamina nofila hulamategahae. Tenia (10) kanafi ani kana yaene tamakata aisia yaenena aligahayanagi havitama lamakupi malenaya yana atafa hu-linetama falisagena ani yateti kanale miyana anonatamia maige maige hisaya tamahaimula tamamigahue.

11 Nagi tamakesama hanesimogatama Avamumoma mono note mainaya veamogamifema hia kea haviho. “Satanienema tuma hutama agasesaya veamogatama tole yupama etetama falisaya yamoa, hani yapima tegelege nehia atafina visaya yamoa, ali haviya hu otamategahie huna nehue.”

12 Ma kemoa Pegamumu mono note mainaya veate kava kanohena mage huka kao tole kaiyaga avenene nehia naepe kayona alilinoa kanomona mage huna nehue. 13 Tamakaya Satanima mainea siamo hanea kumate mainagena ago tamake-mainoe. Ani kumate mainayanagi nagai nagia atafa hulitama tokiyaage hulinageno nago kanoa, Atipasia, tamakaiene maineanagino kolia ohunegi mukia kanafina efi efi huno Yisasi kea huhaleno nehigeya atafa huya ani kumate hayageno fali-maineanagi ani kanafienena tamakaya nagia atafa hulinetama nagaifena havitama tamakupi malenaya yana oatalenae. 14 Oatalenagi nagoa kefo yana nehageno naipamoa haviyana nehie. Tamakai amunopina nagoa veamoya Palamuma humainea kea atafa huya akave nemalae. Nayona Palamua Isaleli veamoya asaga hu lavisae huno Palakina mage huno hapai-maine “Mage huka hamapaiyo ‘Amayateti talo humalenaya afa yafe ‘Anumayati maine.’ hutama amiya kavela nenetama kumai kavala hiho.’ huka amaipa ayesana kea hamapaiyo.” huno humaineane. 15 Naa hianagi tamakaipitila nagoamoya Nikolasima hia mono kemona akave nemalae. Ani kemoa Palamuma hia avamete humainea ke. 16 Ani kefo yafena tamakua aiyahae hutama nagoene ohisaya tamakesa haviho. Aiyahae ohisagena nagaya osi kana kanoa maitena tamakaitela esuaamona navayafima hanea avenene naepe kayoteti amakaienena tua hugahue.

17 Nagi tamakesama hanesimogatama Avamumoa mono notema nevaya veamogamifema hia kea haviho. Satanienema tuma huya agase-mainesaya veamogamina falakino hanea kavela, manae huya nehaya kavela neamamina nagola efeage yafatela hamaote hamaote haegafa amakima kae-malenoa yafana amamisugeya nagoa veamoya ani amakiyaga oagegahagi agaia yafama alisimoa agaiage agegahie.

18 Taiyataila maineya mono notema nevaya veate kava kanohena mage huka kao nagaya Anumaya Koti nafanemonia naulagamoa ata nefemo hia kava humainegeno naiyamoa haesa yafamo vagayo vagayo hia kava humainegena tokiyaage huna heti-mainoa kanomona mani kea nehugi kao. 19 Nagaya tamakai auava yatamia ago age-mainoe. Nagaifena tamahau tamayamopafi nelamahaigetama havitama tamametiti hutetama nagai aliyama aliyana mailava hutama tokiyaage humainagena tamake-mainoe. Menima nehaya yamoa hagotetama humainaya yamona ago agasetama kanale kava nehae. 20 Nehayanagi nagoa kefo yama nehagenoa naipamoa haviya nehie. Nago amo agia Yesepelie mage huno humaine “Nagaya Anumayamo aune a mainoe.” huno havigea nagai aliya veamogamina ayemavataga huno mage nehie “Kumai yana nehutama amayateti talo humalenaya afa anumayamoma amiya kavela neho.” huno humaine. 21 Higena nagaya ani amofena “Kumai yakahena kagua aiyahae huka nagoene ohisana kagesa havio.” huna agava mauvanagi agua aiyahae nohie. 22 Aiyahae nohiafe nagaya tusia agata aisia kalia neamina ani aenema kumaima nehaya veanene kefo yaamihema amakaye huya amakuama aiyahae ohisagenahena tusia kana yana amamigahue. 23 Neamamina ani amo kema akave nemalaya veamogamina hamaesugeya faligahae. Falisageya mukia Anumaya Koti anagamoya ageteya nagaya veamogami amaku amakesa tamagelegatima huna fako nehua kano mainoa yafena havigahae. Mukia veamogatama nehaya kavala agetena agoma humainaya yateti anonatamia tamamite lamamite hugahue.

24 Hugahugi nagoa Taiyataila mainaya veamogatama ani amo kea akave omaletama Satani kema falakino hanea kema ohavinaya veamogatama nagoa kahegi kea tamahaopaigahue. 25 Tamahaopaigahugi mukiama atafa hulinaya kea atafa hutama tokiyaage hu-linetama maime maime nevigena nagaya etena ano. 26 Sataniene tuma huya agaseya nagai kema akave maleme maleme haisaya veamogamina nagaya tokiyania amamisugeya mukia veatela kava yagaigahae. 27 Nenafaa tokiya namigena kavama neyagauva tokiyania ania huna tamamisugetama tokiyaage hutama kava yagaigahae. Veamoya mopa susufanelema aiko neligeno aposino yagi-yagipe nelavia avamete kava huya yagaigahae. 28 Kava yagai-mainesagena natema evayi nehia kanefimoa tusiya huno aivasa huno hale yamaene kanefila tamamigahue.

29 Nagi tamakesama hanesimoga-tama Avamumoa mono note nevaya veamogamifema hia kea haviho.