1 Nagaya Yonina agogeno Anumaya Koti Sipi sipi nafanea Saiyoni agoyale hetino mainegeya kasagoya veamoya vani hataleti foti fo tausenia (144,000) veamoya agaienena ani agoyale hetiya mainae. Ani veamogami hamanilela Sipi sipi nafanemo agiene agaia Nefa agiene kae-malenae. 2 Nagaya ikapinagati kanale age aiya agea havugeno ti anamoma asaga hu-lavino nelavino agema neaiya kava huno neaino monagemoma hia kava higena havimainogeno kasagoya veamoya gitama neaigeno agema neaiya kava higena havimainoe. 3 Havugeya ani veamoya Anumaya Kotima mainea siamo auleene foa (4) hamaimuene anagamo-gami amauleene kava vayamo-gami amauleene hetiya maineya haya yagamea nagoa veamoya ohavinaya yagamea, haegafa yagame humainae. Ani yagame haya veanea ma mopafi mainageno Anumaya Kotia amaku amamema aligati-mainea veala vani hataleti foti fo tausenia (144,000) veamoya amakaiamige ani yagame havimainae. 4 Ani veamoya anea amavayu huya ofaeyageno amakuamoa oniyaagela ohigeno Sipi sipi nafanemoa vai neyageya ani veaamoya akavela vai neayaye. Anumaya Koti Sipi sipi nafanemoa faliteno kefo yaamimo aigagimatenea yapiti miya humateteno ma mopafi veamogami amunopiti hagoteno amaugafa aligati-mainegeno Anumaya Kotiteene Sipi sipi nafanemoteene amavaleno amate-maineane. 5 Amategeya ani veamoya havige ohu vealagiya nagoa kefoamia omaleneane.

6 Nagaya agoana nago ensole kanomoa ikamo amunote haleno vai neayeno agola hanege hanege huno nehanea kanale mono kea alino mukia ma mopafi mainaya veamogamina alu kote alu kote veanene, alu make lu make neaiya veanene, alu maugafa lu maugafa kalimainea veanene hamapaisia yafe vai neaye. 7 Vai-yeno ala kegefafiti mage huno hie “Anumaya Kotia veamogami alino kaiyekema humatesia kanamoa ago falote hu-mainegi tamakaya koli nehutama Anumaya Koti agia alisaga hiho. Anumaya Kotia ikaene mopaene hageliene mopafitima kapai nehagea tiene agaia talo hu-malegetama agai agia alisaga hiho.” huno humaine.

8 Hume hume nevigeno akavelega nago ensole kanomoa neeno mage huno humaine “Ala kumala Papiloni kumala tusiya huya ago aliya tagape aitalae. Papiloni veamoya mukia kotega veafena mage huya humainae ‘Tagayama huna kava hutama kumai yana hagaage huno havili kana humainegi afaa neho.’ huya hageya ani kumai yana maiya humainae.”

9-10 Ani lole ensole kanolamogani anakavela nago ensole kanomoa neeno ala kegefafiti mage huno hie “Nagoa veamoya kefo afai afuene amayateti avave-name huya talo hu-malenaya ameenema agima alisagama nehuya ‘Ani kanomo agia nayatelo nahanilelo agia aigamaelato.’ huyama hu-mainaya veamogamina Anumaya Kotia haima nevaiya yana aligahae. Anumaya Koti aipamoa haviya hinageno hai vaimateno ata nelenageno atuage huno havili kana higeno takino amamisigeya ani veamoya ani havilina negahae. Nesayana alu aotage ensole veamogami amauleene Sipi sipi nafanemo auleene himanaage ata nelea yafayaga hanea atafi mainesageno amaleno asagalisigeya tusiya huya amakata aigahie. 11 Mukia kanafina ani amakatama aige aige hisia atamo halinamoa taga ohugahianagino agola haige haige huno haigahie. Haigeya ani veamoya kefo afai afuleene amayateti avame-name huya talo hu-malenaya amemaaene agia alisaga nehuyama ani kanomo agima amaugafale hanesia veamoya mukia kanafina agola kegeene felugaene amaugafa amakata aige aige hinageya hano ohugahie.” huno humaine.

12 Havisayana tamakaya Yisasina tamakuama aminaya veamogatama Yisasife havitama tamakupi malenaya kea atafa hu-linetama Anumaya Koti kahegi kema akave maletama mailokiya vaitama maiho.

13 Nagaya Yonina ikapinagati nago kea havugeno mage huno hie “Kagaya kea maa huka kao mukia Anumayamoene ailokaeya nemaiya veamoya menima aepa heya falisaya veamoya tusia muse hugahae.” huno humaine. Higeno Alu Aotage Avamumoa mage hie “E, aliya ali-mainaya yana neataleya maifalu hisageya kanale kavama hu-mainaya yamoa amakaiene ugahae.” huno humaine.

14 Nagaya agogeno nago efeage siatela nago vemoa ikapinagati emainea kanoa vayamo atenea kano avamete hia kanoa siate maineno anute kava vayamogami tumano kula, kanileta yafateti talo humale tumano kula vaiteno ayapina avenene huno fagagi-mainea naepe kayona ali-line. 15 Ali-linegeno nago ensole kanomoa Anumaya Koti nopiti hati-lavino neeno ani siatema maiya kanohena ala kegefafiti mage huno hapaiye “Mukia ma mopafi kavemoa afule-mainegeno ani kave alisuna kana haneanagika kagayama ali-linana naepe fagagi humainea naepe kayotetila nesatema humainea kavela alio.” huno hie. 16 Higeno siatema maiya kanomoa fagagi-mainea naepe kayotetila mukia ma mopafima afule-mainea kavela hataga humaine.

17 Nehigeno nago ensole kanomoa ikapinaga hanea mono nopiti hati-lavino elaviaamo agaienena ania huno tusia kayona fagagino avenene huno naepe kayona ali-lino emaine.

18 Neegeno nago ensole kanoa atalema kava nehia kanogino afuma heya negaeyaya folamole maineleti neataleno emaine. Eaamo fagagino avenenea naepe kayoma ali-lia kanomofena ala kegefafiti mage huno hie “Mukia mopafi nofi alagayagamoa ago afule-maineafe kagaya ani naepe kayokaa alika ani nofi alagayaga mo hataga huka halaya huo.” huno humaine. 19 Higeno ani ensole kanomoa naepe kayomaa ali-lino ape huno mukia mopafima hanea nofi alagayaga hataga huno helafi-lino viaamo veamoya amaiyaletima aye lata-pageno timaamoma nelavia yafa yopa, Anumaya Kotia kefo yafena tusiya huno aipa kafa huteno kefo yama nehaya veamogamina anonaamima amamisia ala yafa yopafi mo malene. 20 Mo malegeno ala kumamona malaga ani nofi alagama aye lata-pegenoa anima aye latapea kolamoa tusiya huno lavino lavino laviaamo timoa hogino veamogami amayonalema nehaiya avamete huno hogino ayaaya kotega tali hataleti (300) kilomita tavigena age-mainoe.