1 Nagaya Polonae Yisasi Kalaisi aliya kanoa mainena Aposolo mainogeno Anumaya Kotia mukia vayapiti “Alu aotage kano maineka nagaila kanale mono kenia huhaleka hamapaiyo.” huno hunatene.

2 Ani kanale mono kea Anumaya Kotia nayona “Kamigahue.” huno hulokiya vaigeya agai aune vayamoya huhaleya Anumaya Kotina alu aotage autamaafi kae-malenayane. 3 Ani kanale kea agaia Nafanemofe humaine. Ani Nafanemoa velafa maisiafe Teviti nofi vayapiti falote humaine. 4 Falote huteno fali-mainefiti Anumaya Kotia tokiyaaleti aliheti-maineafe Alu Aotage Avamumoa “Ma kanoa tokiyaa hanegeno Anumaya Kotina Nafanea maine. Yisasi Kalaisia Anumayatimo maine.” 5 Mainegeya agai agima alisaga hisayafe mukia kotega veamoya Yisasife haviya amakupi maleya amametiti huya agai kema ali hipoya hisayafe Anumaya Kotia Yisasi ayapitila kayone yana namiteno “Aposolo kano maiyo.” huno hunatene. 6 Hunatenegi mukia kumate veanene tamakaiene Lomu mainaya veanene Yisasi Kalaisi anaga maisayafe ago hapali-lamatene.

7 Anumaya Kotia hau ayamopafi haigeno hapali-lamategetama alu aotage veanea Lomua mainae. Anumaya Kotia, Nelafaene Yisasi Kalaisia, Anumayatimoene kayone hisaya yaene tamaipa falu lamahaisia yaene tamamisae.

8 Hagotena ma yafe tamahapaigahue. Mukia ma mopale veamoya tamakaifena “Yisasife haviya amakupi maleya amametiti humainaya veane mainae.” huya lamakaifena hagena havimainoa yafena aluya huna lamakaifena Yisasi Kalaisi hulatenea yateti Anumaya Kotinimotega musena nehue. 9 Anumaya Koti aliyama aluana naya mukiki huna agaia Nafanemo hulatenea yafe kanale mono kea hamanepaugeno Anumaya Kotia nage-maineanagina mukia kanafina nunamu huna tamakai tamakia ayena havinegoe. 10 Notamakoafe menima tamakaitega visuafene huna havinegoe “Kagaika visua yafema kahainageka kana valinato.” huna havinegoe. 11 Tamakuamoa tokiyaage huno maisia tokiya, Alu Aotage Avamumoa tamaminegi nagoa tokiyaene alisayafe tamaya hisue huna tamakaima tamakesua yafena tusiya huno nenahaiye. 12 Mage nehue “Yisasife havitama lamakupi maletama tamametiti nehaya yatamimoa nagaila naya hisigena nagaya ania huna nagupima malenoa yanimoa tamakaila tamaya hisie.” huna nehue.

13 Nafunaganagatama ma yafe haviho nagayama Yuta veane omainaya veapina Yisasifena kanale mono kea hamapaugeya aliya amakupi malageno alagaa ayeno falote humainea kavala tamakaipi “Ania hisue.” huna mukia kanalela tamakaitega ugahe nehuanagi nagoa yamo kania maleno tilegena ounoe. 14-15 Anumaya Kotia aliya aligena mukia veamogamina kanale huya nemaiya veanene, afa veanene, avoma nehapaliya veanene, avoma nohapaliya veanene “Yisasifena kanale mono kea hamapaiyo.” huno hunateneafene huna tamakaitega, Lomu mainaya veate, me lamahapaisuafe naguamoa henelie.

16 Yisasi kanale mono kehena nagayea nohue. Ani kefi Anumaya Kotina kasagoya tokiya yamaa hanegeya mukia ani kema haviya amakupi maleya amametiti humainaya veamogamina Anumaya Kotia amaku amamena aligatigahie. Yuta anagala hagoteno amaku amamena aligatiteno haenaga Yuta veane omainaya veamogamina aligatigahie. 17 Ani kemoa mage huno tavenelie Yisasife haviya amakupi maleya amametiti humainaya veamoya kefo yana humainayanagi Anumaya Koti aulagafina fatago veane mainae. Ani yafena Anumaya Koti autamafina mage huno humaineane

18 Mukia veamoya Anumaya Kotina amakaveno hutaya kava huya kefo yama hayafe kelamage kemona falaki-malenageno Anumaya Kotia ikapinagati haima vaiya yamaa lavenelie. 19 Anumaya Kotia mukia veamogami amakusafinaga agaifema havisaya yana ago amaveli-maine. 20 Anumaya Kotia ma mopama talo humalenea kanaleti aepa heno talo humalenea yateti agaila oagesuna alu aotage auava yamaaene agola maige maige hisuna tokiyaaene amaveligeya agelama huya age-mainayanagi “Noagona yafe nehane.” huya hisaya kanaamia omaleneafe Anumaya Kotia anonaamia amamigahie.

21 Amakaya Anumaya Kotina agemaineyagi agia alisaga nehuya “Kanale yana tamine.” huya agaila musena hu oateya afa amaku amakesale maineya aneginagi haya amaku amakesamoa hani yapi mainae. 22 Maineya “Kanale tagu tagesaene veane mainone.” huya nehayanagi aneginagi huya mainae. 23 Maineya agola maige maige tokiya hale yamaa hanea Anumaya Koti agia alisaga ohuya amakaveno huteteya aiyahae huya faligahe humainaya vefi, namafi, kala yagafi, osifavefi, amamena amayateti talo huya maleneya ani yate “Anumayati maine.” huya amakia alisaga humainae.

24 Naa kava maiya haya yafe Anumaya Kotia amatalegeya amaku amakesafinaga age hamaye huya havigu havagu amakesamo amavayu higeya kefo yamaage tokaeya nehuya amakaiami amaugafa ali haviya humainae. 25 Anumaya Koti kelamage kea amakaveno huteteya havigeage ke nehaviya Anumaya Kotima talo humalenea yate “Anumayati maine.” huya muse-kase nehuya amakia alisaga humainagi ani yayagama talo humalenea Anumaya Kotina amakaveno hutenae. Mukia yupa agola Anumaya Koti agia alisaga hisuna kano maine. Tamage.

26 Anumayamona amakaveno hutaya yafe Anumaya Kotia amatalegeya tusi amakaye hisifa kava huya age hamaye haya kavala humainae. Aneamimoya anauamimoyaene humo kavala neataleya amafaluyaene havi kavayaga humainae. 27 Nehageya vemoyaenena aamienama humo kavala neamataleya amaipafiti atamoa hetigeya nagoa ve amafaluyaene amaugafa age hamaye huya amakaye hisifa kavala humainayafe anonaamia amakaiami amaugafale alimainae.

28 “Anumaya Kotia afa kano maineanagita agaifena ohavigahune.” huya haya yateti Anumaya Kotia amatalegeya kefo amaku amakesa haviya ase ohu kavala humainae. 29 Mukia kefo yana alu kava alu kavala humainae. Moli huliteya nehuya kumai he yane. Alu vayamogami yate age hamaye hu yane. Vayaamihe hu-haviya humate yane. Alu kanomo hia kavafe age hamaye nehaya yane. Vaya hamaeya falimate yane. Vayaamimoyaene tusi ke nevaiya yane. Havigeage savale kavale. Vayaamimofe “Naa kava nehae.” huya huatifi mafi nehae. 30 Vaya amakia alihaviya nehae. Anumaya Kotina kame huneatae. Veganokano huya halakae halakau ke nehuya amakaiami amaugafa aliya haiteya amakaiami amaki alisaga humainae. Haegafa kefo kavala aliya falote nehuya itaafoamimo kea hefalanegiye. 31 Aneginagi nehuya “Naa hugahune.” huya haya kea neatalae. Nagoamogamifena amahau amayamopafina ohamaigeya hamauna hu noamatae. 32 Anumaya Kotia “Naa yama nehaya veala anonaamia amamisugeya aliteya agola faligahae.” huno humainea kea ani veamoya havilineyagi ani kefo yana maiya nehuya naa yamaagelomagi kefo yama haya veamogami amakia alisaga nehuya kefo yama haya yafena muse hu neamatae.