1 Nago Sapati yupa YisasiꞋa Falasia vayate kava humainea kanomo nopi kave mo nenegeꞋya nagoꞋa Falasia vayaꞋmoꞋya Yisasina ageꞋya mainae. 2 Mainageno nagola augafa halegimai kanoa, faligahe nehia kanoa, anile maine. 3 Mainegeno YisasiꞋa ani kanoa ageteno ani nopi mainaya Falasia vayaꞋene kahegi kema havilinaya vayaꞋene mage huno hamavige “Sapati kanafina kaliꞋamia alino kanale hutesia yana kanale yapi havi yane? Tamakai mono kemoꞋa naꞋane nehie?” huno hamavige. 4 HamavigegeꞋya ani vayaꞋmoꞋya nagola osi ke kanoꞋa ohuꞋya afaꞋa mainageno YisasiꞋa ani kali kanoa atafa hulineno kaliꞋa alino kanale huteteno atalegeno umaine.

5 Vigeno YisasiꞋa mage huno hamavige “Hana kanomoga Sapati kanafima nafaꞋnekafi pulumakafi komufima tavi-mainesigetama ‘Sapati yupae.’ hutama anifinaga atalesafi ifi aupaꞋa amavayu hugahae?” huno hamavige. 6 HamavigegeꞋya mukiꞋa vayaꞋmoya kenonaꞋa kea ohuꞋya mainae.

7 “KaveꞋma me neho.” huno ke higeꞋya emainaya vayaꞋmoꞋya “Ala kanomo nemaiya siale emaisune.” huꞋyama nehaya kavala YisasiꞋa ageteno ani kavaꞋma nehaya yafena mage huno hamapaiye. 8-9 “Nago kanomoꞋa kagaifema ‘Ala imuleꞋma eno.’ huno kema hinageka vinukahena ala kanomo nemaiya sialela uomaiyo. Havigu anile mainesanageno nago kanoa kagaseno mainesia ala kanomofe ke hinagenoꞋma emainesigeno kava kanomoꞋa kagaifena mage me hugahie ‘He-tio. Ala kanomo sialelagi kagaya omaiyo.’ huno hugatesigeka kagaye nehinageka akavelaga mo maigane.

10 Nago kanomoꞋma kagaifema ‘Ala kave meno.’ huno kema hinageka vinukahena osi kanomo mainesile mo maiyo. Mopale mainesanageno kagaifema ke humainesia kanomoꞋa megagesiana hinagenoꞋa mage huno hugahie ‘Nenafugae malela omaika neꞋataleka ala kanomo siale haisaga humaika maiyo.’ huno hugategahie. Ani kema hisigeꞋya mukiꞋa anile mainesaya veaꞋmoꞋya kagai kagi alisaga hugahae. 11 NagoꞋa veaꞋmoꞋya ‘Ala vaya mainonanagita tagia alisaga hugahune.’ huꞋya hisagenoꞋa Anumaya KotiꞋa ‘Afa vaya mainae.’ huno humategahigi nagoꞋa veaꞋmoꞋya ‘Tagia omale veaꞋne mainone.’ huꞋya hisagenoꞋa Anumaya KotiꞋa ani veaꞋmogami amakia alisaga hugahie.” huno hie.

12 “Kavela me neho.” huno ke humainea kanomofe YisasiꞋa mage huno hie “Ala imuma kigahena mukiꞋa kameta negafuꞋene kafukaganaꞋene kagaika nofi vayaꞋene moneꞋamima hanesia veaꞋneheke ‘Kave me nesae.’ huka kea hu oꞋamato. HaenagaꞋa kagaife ‘Kave meno.’ huꞋya hisagekama mo nesanana anonakaꞋa hai ali-mainane. 13-14 Hai ali-mainanagi ala imuma kigahena maꞋa veafe kea huo moneꞋamima omale veaꞋnegi amaugafa haviya humai veaꞋnegi amaiya haviya humai veaꞋnegi amaulaga asu humai veaꞋnegi huka ke hisanageno Anumaya KotiꞋa muse yana kamigahie. Ani veaꞋmoꞋya anonaꞋa kavekale kamisaya amakula omalenea yafe kagaya muse hisanageno fatago humainaya veaꞋnema fali-mainesafiti hetisaya kanafina Anumaya KotiꞋa agaiꞋa anonakaꞋa kamisigeka muse hugane.”

15 Nago kanomoꞋa YisasiꞋene maineno kave neneno Yisasi kea haviteno mage hie “NagoꞋa veaꞋmoꞋya Anumaya Koti kava yagaisia kumate haiꞋya maineꞋya kavela neneꞋya tusiꞋa muse hugahae.” huno hie. 16 Higeno YisasiꞋa mage huno hapaiye “Nago kanomoꞋa ala imu kigahe mukiꞋa veaꞋneyaga ‘Meneho.’ huno ke humaine. 17 Ke humateteno imua ago kimaleteno aliꞋya kanoꞋamona hutegeno viaꞋyamo kema humatenea veaꞋnehe ‘Tamakaya eho. MukiꞋa nesaya yana ago talo tala humalene.’ huno hamapai-maine. 18 HamapaigeꞋya ani mukiꞋa veala nagoke nagokeꞋmoꞋya mage hae ‘Tagaya oꞋugahune.’ huꞋya hae. Hageno nagoke kanomoꞋa mage hie ‘Nagola hoya yaufa miya humalenoanagiꞋna mogegahe nehue. Museka nehugi nagaya oꞋugahue.’ huno hie. 19 Higeno nago kanomoꞋa mage hie ‘Nagaya teniꞋa (10) aliꞋya alisia pulumaka miya humaleneꞋna nehuanagiꞋna kanale aliꞋya neꞋalifi agegahe neꞋue. Museka nehugi nagaya oꞋugahue.’ huno hie. 20 Higeno nago kanomoꞋa mage huno hie ‘Menia nagaya yaufa aꞋniꞋa alitenoanagiꞋna museka nehugi nagaya oꞋugahue.’ huno hie.

21 Nage hageno eteno ani aliꞋya kanomoꞋa kava kanomona mo hapaigeno ani kava kanomona aipamoꞋa haviya higeno aliꞋya kanoꞋamofe mage huno hapaiye ‘Kagaya aupaꞋa eteka uka kumate mainaya veaꞋnegi moneꞋamiꞋa omale veaꞋnegi aiya haviya humai veaꞋnegi aulaga asu humai veaꞋnegi aumiꞋya haviya humai veaꞋnegi amavaleka eno.’ huno hie. 22 Higeno ani aliꞋya kanomoꞋa ani kava huteno eteno mage huno kava kanomona me hapaiye ‘Kagai kavaya ali hipoꞋya huanagi nagoꞋa siale maisaya yana afaꞋa hanegeno nokaꞋafina hiyala ohune.’ huno hie. 23 Higeno ala kanomoꞋa aliꞋya kanoꞋahena mage huno hapaiye ‘Kagaya kumala neꞋataleka ala katega neꞋuka tala agegayalega nemaiya veaꞋnea ke huka amavayu huka amavaleka noniꞋafina memategeꞋya hiya hiho. 24 Nagaya kahanepauve hagoteꞋna kema nehugeꞋyama omenaya veaꞋnea mukiꞋamoꞋya menia kavela meliꞋya onegahae.’ huno hie.” huno hamapaiye.

25 KasagoꞋya veaꞋmoꞋya YisasiꞋene neꞋvageno maiyahae huno hamapaiye “NagoꞋa veaꞋmoꞋya nagai nakaveꞋma egahena nefaꞋene itaꞋamoꞋene aꞋamoꞋene nafaꞋneꞋamoꞋene nepuꞋamoꞋene asaꞋamoꞋene aganaꞋamofeꞋenena ‘Afa vaya mainagi YisasiꞋa tamakase-mainea yafe naguꞋa aminoa kano mainoe.’ huno ohisia kanomoꞋa nagai kea havino akave omale kano maine. 26 ‘KanaleꞋya huꞋna maisua nahaimula afa ya hanegi YisasiꞋa agasemai kanogiꞋna naguꞋa aminoe.’ huno ohisia kanomoꞋa nagai kea havino aꞋkave omale kano maine. 27 Nagaila nagatama aisigeꞋna falisua yafema nago kanomoꞋa ‘Ani kava hugahue.’ huno agaiꞋa yafaga yosa kofino nakave visia agesa ohavisia kanomoꞋa nagai kea havino aꞋkave omale kano maine.

28 Tamakaipiti nago kanomoga ‘Ala nokefa kigahue.’ kagesa havinukahena hagoteka ‘Ani noniꞋa kiꞋna avaya ayesua moneꞋnia hanefi?’ huka kagesa havi havi hugane. ‘MukiꞋa kisua monea hane.’ huteka ani nona aepa heka kigane. 29-30 Hagotekama naꞋa ohinuka aepa heka amalagu aiteka posia ayesanageno monekaꞋa haꞋno hisigeka ani no kika avaya ayesana amukoka omalesigeꞋya mukiꞋa agesaya veaꞋmoꞋya kigika hugateꞋya ‘Ma kanomoꞋa nona aepa heno kianagi ani nona hivi huno ki haꞋno hisia amukoꞋa omalene.’ huꞋya hugahae.

31 Nagi nagola sauve kanomoꞋa ‘Nago sauve kanoenema aepa heꞋna tu hugahue.’ huno agesama havinunofena hagoteno mage huno agesa havisie ‘Nagaya teni tauseniꞋa (10,000) ati vayaꞋnia mainagi nago sauve kanomoꞋa tueti tauseniꞋa (20,000) ati vayaꞋa mainayanagiꞋna tuma hisua himamuꞋnia haneo?’ huno agesa havigahie. 32 Agesa haviteno ‘AꞋao tuma hisua himamuꞋnia omalene.’ hunoꞋma hinunofena agaiꞋene tuma hisaya vayaꞋmoꞋya ayaꞋayate mainesageno nagoꞋa vayala humateno mage huno hugahie ‘Mage hutama mo havigeho ‘HanaꞋa hutaꞋa taꞋaipa ali falu hutaꞋa maisuꞋe.’ hutama mo havigeho.’ huno hamapaisigeꞋya mo havigegahae. 33 Mo havigegahagi tamakaipitila nagoꞋa veaꞋmoꞋya mukiꞋa yaꞋamima amakaveꞋno hu oꞋatesayana nagai kea ohavi veaꞋne maigahae.”

34 Tamakaya havilinae solea kanale ya haneanagi hagama nehia yamaꞋa haꞋnoma hisigetama hanaꞋa hutama hagama nehia yamaꞋa ali falote hugahae? 35 Hagama nehia yamaꞋa omalesiana afa ya hanegi afumo aifaene aliꞋya ituyaꞋene hoyafi malesayana afovaꞋage ohugahigi veaꞋmoꞋya afaꞋa hagaꞋyu hutalegahae. Tamakesama hanesiana havilama hutama haviho.