Salmo 65
65
Pan-iyamanan Di Ipogaw En Diyos Begew Sin Bindisyona
1 Apo Diyos, ed Zion lebbeng na ay dayawen mis sik-a
ya tongpalen mi din inkari mi en sik-a,
2 am-in ay ipogaw et omasag-en dan sik-a,
tan sik-a di manongsongbat sin kararag da.
3 Nadagsenan kami sin basbasol mi,
ngem sik-a di mamakawan en dakami.
4 Nagasat din pinilim ay mantee sin Timplo ay beey mo.
Mapnek kamin to sin bindisyon ay idawat mo
ay gan-ganasen mi sin nasantoan ay beey mo.
5 Sik-a ay Diyos ay mangisalakan en dakami,
nalinteg ya nakaskasdaaw di iyat mo ay manongbat sin kararag mi.
Isonga sik-a di pantalkan di ipogaw sin intiro ay daga,
olay mo kaaddawian ay ili di kad-an da.
6 Palalo tet-ewa san panakabalin mo,
tan insaad mo din kadontodontog babaen sin bikas mo.
7 Maipaginek mo abe din agodood di dalloyon
ya mapatalnam din golo sin nanasyon.
8 Din ipogaw sin solin di daga et masdaaw ya emegyat da
sin nakaskasdaaw ay sinyal ay en ka ipaila.
Gapo sin amagem et manragsak da ay mankanta,
manipod sin belaan di agew enggana sin diposana.
9 Ay-ayowanam nan daga,
sibsibogam ya pasigedem din lota na.
Mapno din ginawang si danom ay mapon sik-a,
insaganam din daga et pagabayem di maimola.
10 Paodanam din naalado ay payew ta masingpa,
sibogam din lota ta lomokay da,
et bindisyonam ta somiged di maimola.
11 Ad-ado di apit gapo sin bindisyon mo.
Amin ay emeyam, ad-adoy bindisyon ay idawat mo.
12 Ad-adoy logam sin panpastolan,
din bilbilig et kaman dan maragsakan.
13 Sin pastolan, ad-ado di karnero,
sin tanap, pag bakakew di matamang mo,
isonga manbogaw ya mankanta da
begew si peteg ay ragsak da.