Hibru
Agau e nugau zebigeg
Yesus go koli Mesgai wag simai darena, wai 60 betei, 70 sul ula ebu mazicina, du tub agau go sikut weun. Du inug sikut go weun go ig i abiu. Zuda duailel sikut wai mareun. Duailel ag go Yesus en oiagab petak emenin, bo, ag uhu asiu oimai, agal getalan igul koli sesamorabun dabilemenin. Guzenina, agau gonug guzenai awareun, “Muz abu ebuan kasai ze go sesamoraimai, Uwait nug waugab alabun abu abai mareun. Bo, Uwait nug abu awau kalai meun dareu. Yesus go Uwait nugau nag pet, go noumina, gonugau eseu nug abu awau kalai meun. Abu go eiman ig petak, Uwait nug waugab siabun iboin. Abu awau go muz abu sul tam.” Zuda duailel abu awau go abiu mabun agau e sikut wai mareun dareu.
Agau e sesamorabun en ze
1:1-3 Du in nug agau e sikut weun gonug Zuda duailel ‘Amban’ awareun.
1:4–2:18 Uwait nugau tibur go wanimag banou tam. Kristus go wanib banou pet.
3:1–4:13 Moses zaug Zosua dual ag han dudu wanimag banou tam. Kristus go tutak du wanib banou pet.
4:14–7:28 Kristus go tutak Uwait ula dareu du banou pet wag dacaneu. Uwait ula dacanemen dudu ipal ag gonugau piu dacanem.
8:1–9:28 Uwait waugab siabun abu Yesus du gonug kalai meun go petak pet. Abu awau go muz abu sul tam.
10:1-39 Kristus nugau eseu go ziwas tutak sag Uwait moroun go petak naliupet pet. Dudu go agen ece ipal umkoskos oimai, ag Uwait gonugau ameg ebu naliu dabun Uwait muranem go abu tamacag.
11:1–12:29 Getalan duailel asiu ag Uwait en agal oiagab petak emen sul, ig han guzental igual oigeb petak ai dab.
13:1-25 Ig igul naliupet pet mai damun damun, aiu ses Yesus nug koli alamau.
1
Uwait nugau Ze go gonugau Nag nug aiganeu.
1 Getal Uwait nug gonugau ze doimai, awaranemen dudu awarina, go agen han igual ataniger awaranemen. Gonug igual ataniger igul beu beu eiman gonugau ze koli koli palauteun. 2 Bo, Yesus noumeun ziwas alai, ulis ig darem ebu, Uwait nugau Ze gonugau Nag nug aigai dareu. Ece unum e darem, go gonugau nag nugau ebeg ebu meun. Ece unum Uwait nugau ogusau nug ze mina, usaleun go Yesus nug ece unum usalareun. 3 Go Nag nug Uwait naliupet pet abai migei dareu. Ig nag go uligaimai, ig han Uwait uligem. Go Uwait sul. Uwait nugau ece unum zoi darem, go gonugau Nag nug gusig ze mina, suban dacanem. Uwait nugau Nag nug duailel unum isanareun, gonun, Uwait nug duailel go agal igul eg ebuan imarena, ag koli gonugau ameg ebu naliu usalemen. Guzenina, go Nag go Mesgai wag Uwait gusig al banou mui, gonugau ebeg naliu eiman hoboi daimai, ece unum gumaneu. Yesus nugau gusig go ulis Uwait nugau gusig sul dareu.
Uwait nugau Nag nug tibur unum zilareu.
4 Uwait nugau Nag go du sul zoun ziwas ebu, go wanib banou tamacag, Uwait nugau tibur agal piu dacaneun. Bo, ulis go Uwait dual em unum gumaneu. Em ebu, du tub nugau ug sul, du gonugau nag go wanib banou mui, gonugau salau dudu go wanimag banou tamacag. Guzenai igul sul, Uwait nugau Nag go wanib banou mui. Bo, tibur ag wanimag banou tam.
5 Go gonugau igul enai, Uwait nug gonugau tibur tub “Na izal nagwai, ulis iz nait memen usalem” guzenai i aureun. Ulis, Uwait nug gonugau nag aureun,
“Iz nait Memen. Iz duailel agal ameagab ebu guzenai ze mai, ‘Na izal duailel em ebu unum agal du banou damam.’ ” Buk Song 2:7
Uwait nug gonugau tibur tub guzenai i auraneu,
“Iz nait memen dai, na izal nagwai damam.” 2 Samuel 7:14
Bo, gonug ze go gonugau nag aureun. 6 Uwait nug gonugau nag kaman em e ebu palautaimai, ze tub koli guzenai aneun,
“Izal tibur unum agen gonugau wanib wag muramam.” Lo 32:43
7 Uwait nug gonugau tibur en, ze meun, “Ag wol ab al mui sul usalaimai, izal salau mai bitamamen, koli alamamen, ag guzenai guzenai damamen.” Buk Song 104:4 8 Bo, gonug gonugau nag guzenai aureun.
“O, Uwait, na, du banou sul, na em umkoskos gumanem. Na duailel suban gumaremen, ag igul naliu ipal maimai, tuguiai damam. 9 Na igul naliu en ounab nug siksikanem, na goagal igul eg en gasag maranem. Nait Uwait, go nait memen, gonug na ece unum gumarabun tapai mizeimai, na du banou pet ounab siksikai mui tapai mizeun. Na gusig banou mui, gonun, tibur mui duailel agal oiagab Uwait en petak emen go Mesgai wag ereg daremen go nait pinsal damam. Uwait nug nait wanim wag maimai, gonug nait ounab siksikanem go banou pet dabun tapai mamau, nait ounab siksikanem go sil nait zaunar agal oiagab siksikanemen go zilacaranem.” Buk Song 45:6-7
10 Koli Uwait nug gonugau nag guzenai aureun,
“O, Dubanou Ban, getal ece usaleun ziwas ebu, nagtal em e emes e mui nait eben siltal usalai memen. 11 Emes go, em mui unum eg waimai, mazicamam, bo, na i mazicamam. Na muzmuz awau damam. Emes go em mui tibur galau muzinan sul usalamamen. 12 Na ece go ninanemun biz sul egugwanem. Na muz tibur galau oi heimai, awau macanemen sul, na emes em mui awau usalai mamam. Bo, na muzmuz damam. Na ureg i usalamam, na muzmuz awau damam.” Buk Song 102:25-27
13 Uwait nug gonugau tibur tub guzenai i aureun,
“Na izal ebe naliu eiman hoboi damen, izan nait iwai zaunar zilacaraimai, nait aramab mizemina, nait pinsal damam.” Buk Song 110:1
14 Tam! Go gonugau tibur guzenai i awaraneun. Gonugau tibur go eru neneg? Go wes, Uwait nugau salau macanemen. Uwait nug go palautarena, goagen duailel go Uwait nug go dual musmus awau dabun tapai mareun isanaramamen.