2
Niniba kala kapusi
1 Wo Niniba, ka, bogwa leimaiyaisi kam kwabilia!
E matausina bibutugigaiyaimi bogwa biviloubusisi.
Kuyamataisi kalila valu!
Kuiyausaisi kaduwala!
Kukwatubaiasasi paila kabilia!
2 (Ka, Guyau makateki bikatububulivau kala guyugwayu Isireli, makawala kala gigisa omitibogwa igau tilaula gala bikodidaimisi valu.)
3 E kam tilaula la tokabilia leiyosisi si vayoula kaibubweyani
deli kasi kwama migitinidesi wala kala vau bweyani.
Matausina eikulokwalumasi paila bisuvisi ikabiliasi!
E si waga kaibibiu eivivivila makawala kova!
Deli si wosa isitotusi wala!
4 Makaisina waga kaibibiu eisisakauluvivilasi wala olopola keda,
e bititowaisi wala, bititomaisi olopola valu.
Makaisina bigibalapulasi makawala kaitapa,
e si kaisakaula kala gigibula makawala kavikavila.
5 Matausina kumatoula ilagaisi biga,
mitaga deli wala si silubeibeu ivaloulasi ilokaiasi.
Matausina tilaula, ikolubeigogunasi ilosi wa kali
ivitauwaisi makavina vayoula paila kasi taboda matausina tokodidaimisi kali.
6 E kalapisila makwaisina katitaikinela waya ikodidaimisi ikapogega;
e ligisa makwaina ivakasau kabokokola sainela.
7 Giyouvila iyosisi ilauwaisi okatupipi
e la towotetila komwaidosi ivalamsi,
kaigasi makawala bubuna kaigasi,
deli iwawaiyasi vitakosi deli si ninamwau.
8 Makawala yelu, Niniba tomotala komwaidona isakaulasi.
Mitaga tilaula ikawotasi kawasi,
“Tauwau kutoulisi! Kutoulisi!”
Mitaga gala taitala itovila.
9 Ka valu mavilouna ivakasewoki wala veiguwa.
Kukwayaisi siliba!
Kukwayaisi goula!
10 Valu Niniba bogwa leikodidaimisi,
mavilouna bogwa eivilouwokuva deli eiviloububu!
Tomotala ninasi bogwa eiyomami deli kasi kokola;
kwaitutusi itatatuvasi, e si peula bogwa leiwokuva;
migisi bogwa eivadegila.
11 E ambaisa mavilouna vilouveka
mavilouna omitibogwa makawala laiyoni kasi lagi?
Baisa goli laiyoni nagugugwadi eikabubunasi,
e laiyoni namwala deli navivila iyebwailisi biloulasi baisa
paila baisa leivigakaisi litusia si kabokwala.
12 Ka, laiyoni minana bogwa eikamati kala tau,
bogwa eitagigai eimai
paila minana navivila deli litula bikamsi.
Minana ivakasau kala lagi metoya viliona.
13 E Guyau Topeuligaga ikaibiga kawala, “Ka, yeigu kami tilaula! Yeigu bagabu komwaidona mi waga kaibibiu, mi tokabilia bikatumataisi okabilia deli bakau komwaidona guguwa makwaisina lokukwauwaisi metoya tomota ituwoli. Deli gala tuvaila tomota bilagaisi kaigasi mi touwata.”