1 క్రీస్తు వెట కూడిఃతి మనిఙ్, మీ బత్కుదు దయ్‌రం మనాద్‌ గదె? క్రీస్తు మిఙి ప్రేమిసిని ప్రేమదాన్‌ మిఙి నిపాతి కల్గిత మనాద్‌గదె? దేవుణు ఆత్మ వెట మిఙి సమందం మనాద్‌ గదె? క్రీస్తు మీ వందిఙ్‌ పాణం నొత మనాన్‌గదె? 2 ఆహె మహిఙ, మీరు ఉండ్రె లెకెండ్‌ ఒడ్ఃబిజి, ఒరెన్‌ మరి ఒరెన్‌ వన్నిఙ్‌ ప్రేమిసి, ఉండ్రె మన్సుదాన్, ఉండ్రె ఉదెసమ్‌దాన్‌ మంజి, నా సర్‌ద పూర్తి కిదు. 3 సొంత ఇస్టం వందిఙ్‌ ఆఏండ, కితి దని వందిఙ్‌ నాను కిత ఇజి పొఙె ఆఏండ, ఇనికబా కిదెఙ్ గాని, మహికార్‌ నఙి ఇంక పెరికార్‌ ఇజి ఒడిఃబిజి, తగిజి మండ్రెఙ్. 4 మీ లొఇ విజిదెరెబా, మీ సొంత పణిఙె తొఎండ, మహి వరిఙ్‌ సాయం కిదెఙ్‌బా సుడ్ఃదెఙ్‌ వలె. 5 క్రీస్తుయేసుఙ్‌ మహి యా మన్సునె మిఙిబా మండ్రెఙ్‌.

6 వాండ్రు ఎస్తివలెబా దేవుణు ననికాన్‌ ఆతిఙ్‌బా, దేవుణు వెట సమానం ఆతికాన్‌ ఇజి, అయా అక్కు మండ్రెఙ్‌ వలె ఇజి పటుతల కిఎతాన్. 7 గాని వాండ్రు వన్ని మన్సుదాన్, అయాక విజు డిస్తాండ్రె, ఒరెన్‌ పణి కిని వన్ని లెకెండ్‌ ఒడ్ఃబిజి, లోకు ఆతాన్. 8 వాండ్రు ఒరెన్‌ లోకు ఆతండ్రె, వన్నిఙ్‌ వాండ్రె తగె ఆతాన్. వాండ్రు దేవుణుదిఙ్‌ లొఙితాండ్రె, సాదెఙ్‌బా వన్నిఙ్‌ వాండ్రె ఒపజెపె ఆతాన్. గొప్ప సిగుదాన్‌ కూడిఃతి మని సిలువాదు సాని సావు సాదెఙ్‌బా వన్నిఙ్‌ వాండ్రె ఒపజెపె ఆతాన్. 9 అందెఙె దేవుణు వన్నిఙ్‌ గొప్ప పెరికాన్‌ కితాండ్రె, మహి విజు పెర్కు ముస్కు గొప్ప పేరు సితాన్.

10-11 దేవుణు యా లెకెండ్‌సితాన్. ఎందనిఙ్‌ ఇహిఙ, పరలోకమ్‌దు మనికెఙ్‌ విజు, బూమి ముస్కు మనికెఙ్‌ విజు సాతికార్‌ని మరి తోర్‌ఇకెఙ్‌ విజు యేసు పేరుదు ముణుకుఙ్‌ ఊర్‌జి మాడిఃస్తెఙ్. విజు యేసుక్రీస్తు ప్రబు ఇజి వరి వెయ్‌దాన్‌ ఒప్పుకొండెఙ్. అయ లెకెండ్‌ బుబ్బ ఆతి దేవుణుదిఙ్‌ గొప్ప గనం సీజినార్.

12 అందెఙె నాను ప్రేమిసినికిదెరా, దేవుణు రక్సిస్తి లోకుర్‌ కిదెఙ్‌ తగ్ని పణిఙ్, మీ లొఇ ఒరెన్‌ ఒరెన్‌ తియెల్‌దాన్‌ వణుకుదాన్‌ కిదెఙ్‌ నండొ కస్టపడిఃదెఙ్. ఎస్తివలెబా, మీరు నా మాట వెంజి లొఙితిదెర్. నాను మీ వెట మనివలెనె ఆఏండ, మీ వెట ఏలు సిలివలె, మరి ఒదె అయాక కిదెఙ్ ‌కస్టబాడిఃదు. 13 మీరు అయాక కిదెఙ్‌ అట్నిదెర్. ఎందనిఙ్‌ ఇహిఙ, దేవుణుదిఙ్‌ ఇస్టం కితి పణిఙ్, కిదెఙ్‌ ఇజి మీ లొఇ ఆస పుటిస్నికాన్‌ దేవుణునె. అయాక కిదెఙ్‌ సాయం కినికాన్‌బా దేవుణునె.

14-15 మీరు విజు పణిఙ్, ఒరెన్‌ వన్నిఙ్‌ మొరొ ఆఏండ, జటిఙ్‌ ఆఏండ కిదెఙ్. ఎందనిఙ్‌ ఇహిఙ, మీరు మూర్కమ్‌ది వరి నడిఃమి, సెఇవరి నడిఃమి బత్కినివలె, నిందెఙ్‌ సిల్లెండ, పాపం సిల్లెండ, ఇని తపు సిలి దేవుణు కొడొఃర్‌ ఇజి తోరె ఆదెఙ్. మీరు నని వరి నడిఃమి మంజి, బత్కు సీని మాట మీరు నెస్‌పిస్నివలె, ఆగాసమ్‌దు సుక్కెఙ్‌ ఎలాగ జాయి సీజినానో, అయా లెకెండ్‌ మీరుబా మనిదెర్. 16 మీరు యా లెకెండ్‌ మహిఙ, క్రీస్తు వాని దినమ్‌దు నాను గెలస్తి వన్నిలెకెండ్‌ సర్‌ద ఆదెఙ్‌ అట్న. ఎందనిఙ్‌ ఇహిఙ, నాను మీ నడిఃమి కస్ట బాడిఃజి కితి పణి, ఎందనిఙ్‌ పణిదిఙ్‌ రెఎండ ఆఎతాద్‌ ఇజి మీ బత్కు రుజుప్‌ కినాద్. 17 మీరు సువార్త నమ్మిత్తివలె, మీ బత్కు దేవుణుదిఙ్‌ సితిదెర్. ఒరెన్‌ పుజెరి, దేవుణుదిఙ్‌ పూజ సీనివలె, పూజ సీని దని ముస్కు ద్రాక్స పట్కు రసం వాక్తి లెకెండ్, రోమ అతికారిఙు నఙి సప్తిఙ, నా నల మీ పూజ ముస్కు వాక్ని లెకెండ్‌ ఆనాద్. అయ లెకెండ్‌ జర్గితిఙ, నాను సర్‌ద ఆజిన. మీ విజెరె వెట సర్‌ద ఆజిన. 18 అయాలెకెండ్‌ మీరు విజిదెరెబా నా వెట నండొ సర్‌ద ఆదు.

19 తిమోతిఙ్‌ మీ డగ్రు బేగి పోక్తెఙ్‌ ప్రబు ఆతి యేసు నఙి తప్‌ఎండ సాయం కినాన్‌ ఇజి నాను ఆస ఆజిన. వాండ్రు నా వందిఙ్‌ వెహ్సి, మిఙి సర్‌ద కిబిస్నాన్. అయ లెకెండ్‌ వాండ్రు మర్‌జి వాజి మీ వందిఙ్‌ వెహ్తిఙ, నాను సర్‌ద ఆన. అందెఙె తిమోతిఙ్‌ మీ డగ్రు బేగి పోక్సిన. 20 మీరు నెగ్రెండ మండ్రెఙ్‌ ఇజి నిజం ఆస ఆజినికాన్‌ వీండ్రె. మీ వందిఙ్‌ వినిఙ్‌ మని ఆస ననికాన్‌ మరి ఎయెన్‌బా నా డగ్రు సిలెన్. 21 మహికార్‌ విజెరె, వరిఙ్‌ ఇస్టం ఆతి సొంత పణిఙె సుడ్ఃజినార్. గాని యేసు క్రీస్తుఙ్‌ ఇస్టం ఆతికెఙ్‌ తొఎర్. 22 గాని, తిమోతి నమ్మకమ్‌దాన్‌ ప్రబుఙ్‌ సేవ కిజి నెగ్గికాన్‌ ఇజి రుజుప్‌ కితిక మీరు నెస్నిదెర్. అప్పొసి వెట మరిసి ఎలాగ కూడ్జి పణి కినాండ్రొ, అయాలెకెండ్‌ సువార్త నండొ లోకుర్‌ విని వందిఙ్‌ నా వెట కూడ్జి సాటిస్తాన్. 23 అందెఙె, ఇబ్బె నఙి జర్గిదెఙ్‌ మనిక ఎలాగ జర్గినాద్‌ ఇజి నెస్తిఙ, వెటనె నాను వినిఙ్‌ మీ డగ్రు పోక్తెఙ్‌ ఇజి నాను ఆస ఆజిన. 24 నానుబా బేగి మీ డగ్రు వాదెఙ్‌ ప్రబు నఙి తప్‌ఎండ సాయం కినాన్‌ ఇజి నాను నమ్మిజిన.

25 ఎపప్రొదితుఙ్‌ మీ డగ్రు మర్‌జి పోక్తెఙ్‌ వలె ఇజి నాను బాగ ఎత్తు కిజిన. వాండ్రు నా తంబెరి ననికాన్. నా వెట జత కూడ్ఃజి పణి కినికాన్. క్రీస్తు వందిఙ్‌ నా వెట కూడ్ఃజి నండొ కస్టబాడిఃజినాన్. నఙి అవ్‌సరం మనివలె తోడుః మంజి సాయం కిదెఙ్‌ మీరు నా డగ్రు పోక్తికాన్. 26 నాను వన్నిఙ్‌ మీ డగ్రు మర్‌జి పోక్సిన. ఎందనిఙ్‌ ఇహిఙ, వాండ్రు మిఙి విజెరిఙ్‌ నండొ ఎత్తు కిజినాన్. వన్నిఙ్‌ జబ్బు వాతాద్‌ ఇని మాట మీరు విహిదెర్‌ ఇజి నెస్తాండ్రె, మీరు వెహిదెర్‌ ఇజి నండొ బాద ఆజినాన్. 27 నిజమె, వాండ్రు నండొ కస్టం అర్సి సావు బత్కు ఆతాన్. గాని దేవుణు వన్ని ముస్కు కనికారం తోరిస్తాన్. వన్నిఙె ఆఏండ, నా ముస్కు బా కనికారం తోరిస్తాన్. వన్ని జబ్బు వందిఙ్‌ దుకం ఆతి దని ముస్కు వన్ని సావు వందిఙ్‌బా దుకం ఆఏండ మంజిని వందిఙ్‌ నా ముస్కు కనికారం తోరిస్తాన్. వన్నిఙ్‌ నెగెణ్‌ కితాన్‌ 28 అందెఙె, మీరు వన్నిఙ్‌ మరి సుడ్ఃజి సర్‌ద ఆని వందిఙ్, నఙి మని దుకం తకు ఆని వందిఙ్‌ గజి బిజి పోక్తెఙ్‌ ఇజి ఒదె ఆస ఆజిన. 29-30 అందెఙె, ప్రబు వెట కూడిఃతి మని వినిఙ్‌ నండొ సర్‌దదాన్‌ డగ్రు కిదు. వాండ్రు క్రీస్తుఙ్‌ సేవ కిని వందిఙ్‌ సావు బత్కు ఆతాన్. మీరు నా వందిఙ్‌ కిదెఙ్‌ అట్‌ఇతి సాయం కిదెఙ్, వాండ్రు వన్ని పాణం సీదెఙ్‌బా గుసె ఆఏండ కితాన్. అందెఙె వినిఙ్‌ గవ్‌రం సీదు. విని నని వరిఙ్‌బా గవ్‌రం సీదు.