Paul Nunda Reta Amboda, Corinth Embokena Gefusira, Amo Eviri.
Paul nunda reta gitida Corinth embokena gembudo, Efesas ghedo ira, Frovensi Masedonia aminda irise ghaeko eni dadabetiri, avose, ghaeko 56 ainda jokáda, Paul nu reta evia gefusira. Evetu genembo mendeni nunda reta gitida gefusira, ainda geka a benunu ningido amingusera aindae, nu ivuga use aiyakoe sisira. Ainda amboda, Corinth embo nange Jerusalem da ekaresia+ sonembaetera ainda emboro ava, Paul ijugusira. Tano use, evetu genembo mendeni Corinth aminda, Paul da geka imboe usera aindae, nu dubo mema etiri ghoghora sisira.
Paul Nunda Reta Amboda Corinth Embokena Gefusira, Ainda Mendo Mendo Mo Eviri.
1:1-11 Paul natofo ategi use, geka tuturo usira.
1:12–7:16 Paul dengoro induduse, Asisi Kakara da jebuga ainda geka mendeni mendeni sisira.
8:1–9:15 Paul, moni dabade fitido Jerusalem embo sonembaoro dae sedo, gembudo sisira.
10:1–13:10 Nunda geka ningido tumondaoro dae sedo, Paul nunda irari, a Bajari Iesu nu nange aghi usira, aindae osa sisira.
13:11-14 Paul geka se tano usira.
1
1 Arie, nanda nano namendi! Na Paul, Iesu Keriso da aghi kato aono dae sedo, God nunda uju ava use, na gategusira. Na namondeda namendi Timothy ghae, ne ategi beká ava erera. Ne reighi Corinth aminda God da natofo edo ireva, a God da natofo isambu Frovensi Akeia aminda ireva ava, namane nangae ne ategi beká ava erera. Yari budo givu!
2 Namondeda God Afa a Bajari Iesu Keriso, nengae sonemba a dubo jama mutoro baove!
1:3-11 God Nu Namondeda Sonemba Katori.
3 Namondeda Bajari Iesu Keriso da God a nunda Afakena, aiyakoe sise irarera. Afa resena emo, nu joka ari katori. Sonemba isambu numokena ghe foa gheraira. Ava sedo, numokena aiyakoe sise irarera. 4 Nu namondeda dara a dubo vevera ainda jokáda, namonde sonembuse dubo jama muturaira. Nu amingeraira da tuka eni mo: namonde nunda sonemba budo, evetu genembo mendeni ava sonembuse dubo jama mutaeteri. Evetu genembo mendenikena dara sirorarira, o dubo mema itatamarera ava sonembuse, dubo jama mutaeteri. Amo, namonde sonemba God kena budo tamo feghari, sonemba daba aimi, natofo mendeni sonembarera. 5 Avori, namonde Keriso da natofo edo, mema a bouvu Keriso fufuse itatamusira ava, namonde barago fufuse itatameraera. Kau daba aminga ava, Keriso da natofo use, namonde sonemba God kena ruruse irera. 6-7 Avori, namane mema a bouvu fufuse itatameraera amo, nene sonemba a dubo jama baovo dae sedo, amingeraera. O God namane sonembuse, dubo jama muturaira amo, nu jo namane vanembo sonembari dae sedo amingae eraira. Nu, nembarago sonemba baovo dae sedo, amingeraira. Namane mema a bouvu fufuse itatameraera ava, nembarago sonemba ruruse, namanenda bouvu fufuse, fakina edo durumugaovo dae sedo, God sonemba a dubo jama muturaira. Namane kasama erera, kau ne namanenda bouvu a mema fufuse ireva aminga ava, namane sonemba rea God kena buraera, ne kau daba ava ruruse ireva. Ava kasama use, tumonderera, ne fakina edo fetareva. 8 Geka evia kasama aovo dae resera. Namane nangaekena dara a dubo mema Frovensi Asia aminda siroretiri tafusera, ava kasama aovo dae resena. Dara amo teria beká ava siroretiri gido, namane, “Avose, ambarera, jebugari da goroto eni tefori,” ava kotiseri. 9 Namane ambariá kotiseri. Avata amo, namanenda evevadae sirorusira. Ainda beká mo: namane tuturo edo, totofo namanenda kasama a fakina ava ighagha edo, God da fakina avanembo tumonduse iriari. God resena eimi, nune seari evetu genembo ambarida ghe jebugeraera. Nunda fakina ava tumondaoro dae sedo, bouvu a mema teria beká ava, namane nangaekena sirorusira. 10 Namane nangae sandi daoro ambaetera avata numoá tumondero, nune sonembetiri namane jejebuguseri, a nune sekago sonembari jebugarera. A kotugo, nu amboda namane sonembuse irarira, ava tumonduse gigiterera. 11 Amo, nu namane nangae nange sonembaetira aindae, banunguse irovo, nu namane sonembarira. God nu, nenda benunu digari namanendae seraeva, ava ningido, namane sonembururari jebugaoro gido, evetu genembo digari beka fainghedo nundae aiyakoe sarera!
1:12–2:4 Paul Nemokena Jo Yae Ireira, Ainda Susu Mo Eviri.
12 Namane nangae roera dabako eindae ivuga use, totofo sakai sise irera, amo eviri. God sonemburureari, namane dubo jokáda itatameraera, namane enda eminda irise a deinghuse, ari bekáda bekáda use a geka bekáda bekáda sise irá gheraera. A namane nemokena irise kau daba ava edo ghuseri. Amo, jo evetu genembo da dubo kotariimi aeri. Amo, namane God da sonembaimi edo ghuseri. 13-14 Oroko, ne rea tege kasama aovo inono aetira, avanembo nemokena eregefera. Oroko nenda kasama kitakori. Avata na ne tumonduse erekotena, amboda ne namane kasama e gogoghombareva. Oroko ne namane garigo garigo ereva. Avata, na gigiterena, Bajari Iesu da Sifo aminda, ne namanendae ivuga use sakai sareva. Kau namane nendae sise ivuga use sakai sarera aminga ava, ne namanendae ivuga use sakai sareva.
15 Na geka ava kote gogoghombuse, na giti emboroda deinghudo ise, ya nemokena buvari dae kotiseni. Umbu etoto naká, nemokena ya teredo, esimbugari mutono budo ivuga aovo dae kotiseni. 16 Umbu etoto naká resena da tuka mo eviri. Na Frovensi Masedonia aminda ise, ya tere nemo gari dae kotiseni. A kotugo, beine jovereghe foa Frovensi Judia aminda sembi yari dae use, na sekago aminda teredo, nenda sonemba budo ya Judia buvaetena, ava kotiseni. 17 Na aminge kotisena avata, na jo yae irena. Avata erá aindae sedo, eminge seove, “Paul nu dubo bunedo umbu eni ‘Ai, yarena,’ sedo, amboda ‘Tefo, irarena,’ resira.” ava erá seove! Evetu genembo fisi da uju use irera aimi, ne amingeraera. Avata na jo avavaga ae eraena. 18 God geka beká seraira, ainda javoda nemokena resena, na sifo ghousa evia, rea ari dae koteraena ava, nane eraena. Ava sedo, na susudae fefetuseni. 19 Ne kasama ereva: namane Silas a, Timothy de dabade nemokena era, God da Mandi Iesu Keriso da Bino, ava vironu siseri. Iesu resena emo, nu jo gofari iraeri. Nunda geka mo, geka beká vanembori. Ava sedo, nunda beka gajari amo, jo ighagha ae arira, nu isambu ava arira. 20 A kotugo, God da beka gajari namonde evetu genembokena futusira amo, isambu Iesu da tamonda isagha etiri beká usira. Aindae sedo, namonde Iesu de dabade tatedo, God tumonde bainghuse eminge seraera, “Arie, God! Duro nimokena irare! Ai, bekári!+”
21 God nu tofo namonde aghi edo, nunda fakina mutiri namonde Keriso da natofo edo irera. God nu tofo mandi evia ijugiri, kasama edo itatamudo refera: namonde Keriso da jebuga anakora budo irera. 22 A kotugo, nu namonde nunda tofodae rurusira, ava ijugari dae sedo, nunda tano namondeda tamonda fitiri sefusira. Tano resena emo, nunda Asisidae resena. Nunda esimbugari a jebuga namonde amboda barera, ava kasama aoro dae sedo, nunda Asisi Kakara namondekena mutiri ruruseri.
23 Avori, na God da dombuda, eminge resena. Na giti javi e nemokena yari dae useni. Avata dodo fefetusena ainda beká mo eviri. Erama nenda irari sembae ava gido, geka fakara seóno mema eove dae sise, na reighi Corinth aminda jo yae useni. 24 Na kasama erena: ne geka beká tumonde gogoghombereva. Ava sedo, ne rejo ava tumondaeteva aindae, na jo gembae erena. Na reta evia eregefena ainda susu mo: ne totofo ivuga aovo dae sedo eregefena.