30
[Psalm lal David, In Onkakinyuk ke Kisaiyuk Tempul]
Sie Pre In Sang Kulo
1 Nga kaksakin kom, LEUM GOD, mweyen kom moliyula
Ac tia lela tuh mwet lokoalok luk in aksruksrukyeyu.
2 Ke nga tung ac pang nu sum, LEUM GOD luk,
Kom akkeyeyula.
3 Kom sruokyuwi liki misa.
Nga tufokfokla nu in luf loallana,* luf loallana: infulan mwet misa, liye Psa 6:5
A kom folokinyume nu ke moul.
4 On ac kaksakin LEUM GOD,
Kowos mwet sulela lal!
Esam ma El su Mutallana El oru,
Ac sang kulo nu sel.
5 Mulat lal oan ke kitin pacl na,
A wo lal oan ma pahtpat.
Sahp ac oasr tung ke fong,
Tusruktu, engan fah sikyak ke lotutang.
6 Nga pula inse misla, ac fahk nu sik sifacna,
“Nga fah tiana kutangyukla.”
7 LEUM GOD, kom arulana wo nu sik,
Kom tuh karinginyume oana sie pot ku fineol uh.
Na tok kom wikinkomla likiyu,
Oru nga sangeng.
8 Nga tuh pang nu sum, LEUM GOD;
Nga siyuk ke kasru lom, ac fahk:
9 “Nga fin misa, ac mea nu sum?
Nga fin som nu inkulyuk, mea ac wo nu sum kac?
Ya mwet misa elos ku in kaksakin kom?
Ya elos ac ku in fahkak ke lupan wo lom?
10 Lohngyu, LEUM GOD, ac pakomutuk!
LEUM GOD, kasreyu!”
11 Kom ekulla asor luk nu ke engan ac onsrosro.
Kom usla supwar likiyu
Ac rauniyula ke engan.
12 Ke ma inge nga fah tiana misla in kaksakin kom;
Nga fah yuk on in kaksak nu sum.
LEUM GOD, kom God luk;
Nga fah sot kulo nu sum ma pahtpat.