44
[Psalm lun Tulik natul Korah]
Sie Pre In Siyuk Ke Karinginyuk Sin God
1 O God, kut tuh lohng ke insresr sifacna
Ma mwet matu lasr elos fahk nu sesr
Ke orekma yohk su kom oru nu selos in pacl lalos
Ke pacl loeloes somla:
2 Ke kom sifacna lusla mwet koluk liki facl selos
Ac oakiya mwet lom in acn selos;
Ac ke kom kai pac mutunfacl saya
Ac oru tuh mutunfacl lom in kapkapak.
3 Mwet lom elos tia sruokya acn inge ke cutlass natulos,
Elos tia kutangla ke ku lalos sifacna,
A ke ku lulap lom,
Ac ke kom welulos.
Ma inge akkalemye lah kom lungse elos.
4 Kom tokosra luk ac God luk;
Kom sang kutangla nu sin mwet lom,
5 Ac ke ku lom kut kutangla mwet lokoalok lasr.
6 Nga tia lulalfongi ke mwe pisr nutik
Ku ke cutlass nutik in moliyula.
7 A kom pa molikutla liki mwet lokoalok lasr
Ac kutangulosla su srungakut.
8 Kut ac fah kaksakin kom pacl e nukewa
Ac sot kulo nu sum nwe tok ma pahtpat.
9 Tuh pa inge kom siskutla ac lela tuh in kutangyukla kut;
Kom tia sifil wi mwet mweun lasr fahsr nu ke mweun.
10 Kom tuh oru kut kaingkin mwet lokoalok lasr,
Na elos eisla ma lasr tuh in ma lalos.
11 Ac kom lela tuh in anwuki kut oana sheep;
Kom akfahsryekutelik in facl sin mwetsac.
12 Kom kukakunla mwet lom ke moul na srik
Oana elos in ma na pilasr.
13 Ke mwet tulan lasr liye ma kom oru nu sesr inge,
Elos aksruksrukye kut ac isrun kut.
14 Kom orekut in mwe tafunkas inmasrlon mutanfahl uh;
Ac mwet uh usruk sifalos kacsr in aksruksrukye kut.
15 Akpusiselyeyuk nga pacl nukewa;
Ac arulana yohk mwekin luk
16 Ke nga lohng pusren aksruksruk ac kas in akkoluk
Lun mwet lokoalok luk, su srungayu.
17 Ma inge nukewa sikyak nu sesr
Kut finne tiana mulkinkomla
Ku kunausla wulela su kom oakiya inmasrlosr ac kom.
18 Kut tiana pilesrekomla;
Kut tiana seakos ma sap lom.
19 Ne ouinge kom filikuti inmasrlon kosro lemnak;
Ac kom siskutla in nien lohsr matoltol.
20 Kut funu tui ac tila alu nu sin God lasr
A kut alu nu sin god saya,
21 Kom lukun konauk tari,
Mweyen kom etu na pwaye nunak lukma lasr.
22 Tuh ke sripom, kutu sesr anwuki len nukewa;
Orek kut oana sheep su kokola nu ke misa. Rom 8:36
23 O Leum, ngutalik! Efu kom ku motul?
Tukakek! Nikmet siskutla nwe tok!
24 Efu kom ku wikla liki kut?
Nikmet mulkunla keok ac ongoiya lasr!
25 Kut itungyuki nu fin fohk uh;
Kut kutangyukla oan infohk uh.
26 Fahsru ac kasrekut!
Molikutla ke lungse kawil lom!