1 Zinrettikhanaru vitthu zaya epo, Saawulu aarettiye ahilikhelelaka owaatuturucha na owaala maaswihaapa a Mbwana. Khulankha khulawa wa nttunkhulu a mahaakhimu a tiini, 2 khumvekela warakha yoori alawe mmamanyupa anthukumaniwaamo sitati ya Damashiku yoori amana awaasikanamo anamalottela a Yinsa, waaza alume mpakha aakha awaathuule awaalawane Yeruzaleemu awaatthe nkalapooso. 3 Khulankha khusala alotta tarikhi, asaleelaka ofiya Damashiku, khumpuwela nuuru yaalankha pinkuuni khusala yaara aphale aarivo, 4 Aphano ye khukwela vathi, khusiila huula yaari omuuzaaye yoori: “Saawulu, Saawulu mwaasa aya niini onikilupatthelaaye?”

5 Saawulu khuuzela yoori: “O paani weeyo, Mbwana?”

Ye khujipu araka: “Miiyo ki Yinsa, otule weeyo oninlupatthaaye. 6 Olankhe olawe nsitati ena anttelaaye owuuza weeyo etthu yooretta.”

7 Atthu aari olawanaaye vamote Saawulu khweemela ari oosuthuwa, khusiila huula khuhisala amoona hatha ntthu. 8 Saawulu khulankha vathi aphale akweliyeevo, afumulaka maasho khuhisala awahi woona hatha etthu, atthu khunkholela khunlawana mpakha Damashiku. 9 Khwiikhala siikhu ttatthu ari woohooni, woohiji etthu na woohinywi etthu.

10 Damashiku aarivo namalottela aari wiitthiwaaye Ananiiya. Mbwana khunkhuwela muulottha yoori: “Ananiiya!”

Khujipu yoori: “Lape, Mbwana.”

11 Mbwana khumuuza yoori: “Olawe owawe Yuuda, tarikhi enitthiwaaye Yookowa, omuuzelele ntthu mmote wa Tarusu aniitthiwaaye Saawulu. Otu aya entta olompa; 12 muulottha khumoona mwinyi aari wiitthiwaaye Ananiiya atiye anttheeliye makhono yoori arutele woona.”

13 Ananiiya khujipu yoori: “Mbwanaaka, kaaza raku osiila vitthu anrettazo mwinyi oto na vitthu zooshi zootakhala aniwaarettelaazo mattakatthiifu awo Yeruzaleemu. 14 Ye ata okhuno khwa ruhusa ya attunkhulu a tiini yoori ate awaakhole ooshi apale ansifwaaye nzina lawo.”

15 Ila Mbwana khumuuza Ananiiya yoori: “Olawe! Mwinyi oto tu waaka, yaana yaka ethawuliweeyo yoori ethuule nzina laka ewaalawanelaka makafiri na afwalume awe na vakatthi wa atthu a Ezirayeele. 16 Kinlawa koothoonyezeni nanna atthu anttelaazo ohoowa mwaasa wa nzina laka.” 17 Aphano, Ananiiya khulankha khulawa. N'oofiya khuvira nnyupa khunttheela makhono khumuuza yoori: “Ttwiiyaku Saawulu, Mbwana Yinsa, otule oopuweleliyeeyo ntarikhi ataaka ohali waari olankhaawo, akiperekha miiyo yoori orutele woona na wiiye wa wiitaala Rooho Ttakatthiifu.” 18 Nasaapiru vitthu nkhama mavalako khusaruwa mmaasho, khwaaza woona opheya. N'oolankha khulawa khoosiwa. 19 Wakathi ajiiyeevo etthu-yoojiwa, khurutelamo kuvu zawe.

Saawulu aavirisiye siikhu vattitthiiru aari na anamalottela sitati wa Damashiku. 20 Wakathi otthuupule khwaaza olaleya mmanyupa a Nnyizinku yoori Yinsa mwaana wa Nnyizinku. 21 Ooshi apale aari onsiilaaye khwiiya ootikinisiwa channu, khusala alupa yoori: “Khahiyo otthuutu nlume otule aari weekesakaaye owoola apale ooshi aari osifwaaye nzina la Yinsa? Khaatiye okhuno oteela owaathuula atthu nkhama anamafukiwa yoori awaalawane Yeruzaleemu wa attunkhulu a anamalokozela a tiini?” 22 Saawulu khusala avira ajilipisaka wakhula siikhu, mayaahuuti khusala amwaakanyerela yoori oniikhala Damashiku athoonyezaka yoori Yinsa ti Almasiihu.

23 Ziviriyeevo siikhu za waatta, mayaahuuti khusiilana ooshi aya wahati woomuula, 24 ila Saawulu khwiiya woojuwa shawuri zaya epile. Nthana na osikhu aari wiiya oothotolela milako za sitati etile yoori apatthe omuula. 25 Anakhiyoni awe khunthuula n'oosikhu khunwelisa khumwishushela onyuma khwa vahali wa pwejiweevo wa muuri.

26 Wakathi afiiyeevo Yeruzaleemu khutakha owaakusanya anakhiyoni a Yinsa, ila ooshi khusala amoova mwaasa woohinkhupali yoori khweele nakhiyoni. 27 Aphano Baranabe khuwaathuula maswihaapa khusala awooza yoori ntarikhi, Saawulu amoona Mbwana amuuziyeeyo nanna awahiyeezo olaleya hapari zooshapweya woominyalavo khwa nzina la Yinsa Damashiku. 28 Attaaphale, Saawulu khwiiya vamote na yo, khusala eettetta woohoovi Yeruzaleemu, alaleyaka woominyalavo khwa nzina la Mbwana. 29 Khusala attakhula na weelezana na mayaahuuti aari ottakhulaaye luuka ya ekereeku, ila apo aya aari otakha omuula. 30 Attwiize n'oojuwa mattakhuzi apale, khunthuula khunlawana nti wa Sezareeya khumpakhirisa yoori alawe nti wa Tarusu.

31 Siikhu zaya epo kereja yaari ya heeri nti wooshi wa Yudeya, Kalileya na wa Samariya. Atthu a waamini aari otepa okhomaala na Rooho Ttakatthiifu na waatta, khwa meekhazi oomoova Mbwana.

32 Pheeturu khusala eettetta wakhula phantte, khulawa owaathotola attakatthiifu apale aari wiikhalaaye Liida. 33 Otthuukhule khunsikana ntthu woorakala aari wiitthiwaaye Aneya eettiye orapalela nyaakha minaane. 34 Pheeturu khumuuza yoori: “Aneya, Yinsa Al-Masiihu ontta wuvonisa! Olankhe okhuje olili awo.” Ye khulanka nasaapiru. 35 Atthu ooshi apale aari wiikhalaaye Liisa na Sarona, n'oosiila khunkhupali Mbwana.

36 Yoopa aariwo nakhiyoni wankha aari wiitthiwaaye Tabita, khwa luuka ya ekereeku lina maana a Dooroka. Ye aari orettakaaye vitthu zooshapweya na winkha zimola. 37 Khumpattha olwele khufwa, mwiili awe khoosiwa khupwehiwa nnyupa ya korofwa yootulu. 38 Liida waattamaniye nti wa Yoopa. Wakathi asiiliyeevo anakhiyoni yooriwa Pheeturu ari nti wa Liida, khuwaaruma atthu awiri olawa omuuza yoori: “Ohirupaze ota okhuno niriiwo.”

39 Pheeturu khulawa vamote na yo, n'oofiya khuthuuliwa khulawaniwa nnyupa ya korofwa y'ootulu. Anakhwele ooshi khunzukulela khusala alila na anthoonyezaka ajapi na kuwo kiina Dooroka aattaliyeezo ari vamote na yo.

40 Pheeturu khuwooza ooshi osaruwa okatthi okhule, attaaphale khukokhora khusala alompa. Khulankha khulawa aphale aarivo muukha otule woofwa, khumuuza yoori: “Tabita, olankhe!” Ye khufunula maasho awe, khumoona Pheeturu khwiikhala. 41 Khunkholela khusala anlansa yoori eemele, aphano khuwaakhuwela anakhiyoni a anakhwele apale khuwenkha eettaka woona. 42 Vitthu epile khwiiya zoofuwiwa sitati yooshi ya Yoopa, atthu a waatta khunkhupali Mbwana. 43 Pheeturu eekhaliye nti wa Yoopa siikhu za waatta, owawe mwinyi mmote aari wiitthiwaaye Simawu aari waattalaaye shapala za nyama.