1 Aphano Pilaatu khuruma ojaphiwa Yinsa. 2 Anajanka khuvaasha khaara ya miiwa khunwalisa mmwishwa. Na khunwalisa ajapi yookhuttuwa. 3 Ansuselaka amuuzaka yoori: “Mfwalume wa mayaahuuti, otulu!” Na khusala ampiya omaasho wawe.

4 Swaafu kiina Pilaatu khulankha khuwooza mayaahuuti yoori: “Moone! Miiyo kinuutiselani mweeyo yoori mwijuwe yoori miiyo akimoonaneeni hatha nlattu.” 5 Wakathi atiisiweeyo vaje awaliye khaara ya miiwa, na ajapi yookhuttuwa, Pilaatu khuwooza yoori: “Mmoone mwinyi otule, otu ari apha!”

6 Wakathi amooniyeevo Yinsa mahaakhimu a tiini na anamweekesela, khusala anyakula alupaka yoori: “Akhomeliwe! Akhomeliwe!” Ila Pilaatu khujipu yoori: “Mwinthuule mweeyo-ena mwankhomele, miiyo akinimoonana hatha nlattu.”

7 Yo khujipu yoori: “Fweeyo ninaaye kano, kano etthiipo enlupa yoori ooliwe maana onjilupeza yoori Mwaana wa Nluku.”

8 Paata ya osiila toowo, Pilaatu khutepa woova. 9 Khurutela nyuupa khuulu ya nsatoro, khumuuzela Yinsa yoori: “Weeyo owa vayi?” Ila Yinsa khuhinjipu. 10 Aphano, Pilaatu khumuuza yoori: “Khunikijipu? Khunjuwa yoori miiyo kinaaye owahi wa wuutaphula ama wuukhomela?”

11 Yinsa khunjipu yoori: “Weeyo khawaari wiiyana hatha owahi khwa miiyo, eriwaka khawenkhiwe otulu. Ti eto otule ootiseliyeeyo Miiyo ona paathuli ya twampi yooziti.”

12 Waaza wakathi otthuupule Pilaatu khusala atakha ontaphula Yinsa, ila mayaahuuti khusala anyakula araka: “Amana onlikha Mwinyi oto ojitatha, khuniiya swaahipu wa Seezari. Wakhula otule anjilupanaaye ofwalume oniiya muumani wa Seezari!”

13 Pilaatu noosiila toowo, khunsarulela Yinsa vaje, khwiikhala vakhukulu ya namaphuka puuro yaari wiitthiwaaye ‘Eshotthelo ya mawe’, khwa luuka ya meepereewu enriwa ‘Kabata’. 14 Yaari payina ya saasiitha, yaari Siikhu ya Ojilokotthela, maana yaari sumana ya njampo la Paashikowa.

Aphano Pilaatu khuwooza mayaahuuti araka: “Mwimoone, otu ari apha Mfwalume enu!”

15 Ila yo khusala anyakula araka: “Onsarulele oje! Onsarulele oje! Akhomeliwe!”

Pilaatu khuwoozela yoori: “Kinkhomele mfwalume enu?”

Mahaakhimu a tiini khujipu araka: “Khanina mfwalume fweeyo woohiiyi Seezari!”

16 Aphano Pilaatu khunthuula Yinsa khuwenkha anajanka yoori ankhomele, yo khunthuula.

17 Yinsa khusaruwa attikhiwe nsalapa awe, khusala alawaniwa puuro yaari wiitthiwaaye Kalavaariyu, khwa luuka ya meepereewu yaari wiitthiwa Kolokoota, 18 attaapho akhomeliweevo ye na atthu awiri, wakhula mmote mpavu mwawe, ye khwiiya vakatthi.

19 Pilaatu khwaatikha lipawu khuthomeya pontha wa nsalapa; aatikhiyevo yoori: “YINSA WA NAZAREETI, MFWALUME WA MAYAAHUUTI! 20 Mayaahuuti enkeene aasomiye lipawu ntthile, maana puuro etile Yinsa akhomeliweeyo yaari kharipu na va sitati, lipawu ntthile laatikhiwe luuka ya meepereewu, ya elatiinu na ekereeku. 21 Mahaakhimu a tiini aari omuuza Pilaatu yoori: “Ohaatikhe yoori: ‘Mfwalume wa Mayaahuuti’, waatikhe etile aalupiyeeyo yoori: ‘Miiyo ki Mfwalume wa mayaahuuti.”

22 Pilaatu khujipu yoori: “Etile kaatikhiyeeyo kaatikha.”

23 Anajanka paata ya onkhomela, khuthuula kuwo zawe, khwaawanya phantte nne yoori wakhula najanka apatthe phantte moote; na khuthuula ajapi yawe theenya. Ila ajapi yaari yoohisoniwi waaza vathi mpakha vatulu.

24 Yo khulupa yoori: “Nihivarule, ila neekese nasipu nimoone anttelaaye opattha.” Epo zaarettikhaniye yoori emarisele zawaatikhiwa ttakatthiifu enlupaaye yoori:

“Aawanya kuwo zaka, na khweekesa nasipu khwa ajapi yaka.

Na pi etthiipo anajanka aarettiyeezo.”

25 Kharipu ya vansalapa wa Yinsa aarivo mamaawe, na ttwiiye mamaawe, na Mariyamu muukha wa Kolopa, na Mariyamu Mataleena. 26 Yinsa noomoona mamaawe ari vamote na nakhiyoni otule wompheta wawe, khumuuza mamaawe yoori: “Muukha mwanawo oto,” 27 na khumuuza nakhiyoni awe yoori: “Omoone, mamaawo oto.” Waaza wakathi otthuupule, nakhiyoni otule khuretteya wiiya jaama.

28 Paata ya Yinsa woona yoori zooshi zintta omariseleya, khushankela yoori zirettikhane epi zaari olupaazo zawaatikhiwa ttakatthiifu yoori: “Lakikhola nnyottha!” 29 Yaarivo suupha aarimo viinyu yoonyuunya khuthuuliwa khunywisiwa etthiiwe va shiponja yoofukeleliwa va tteketthe ya hisoopo na khuweziwa mpakha omilomo wa Yinsa. 30 Yinsa wakathi anywiiyeevo maati apale oonyuunya khulupa yoori: “Zooshi zamariseliwa”, khwiinamisa eeshwa yawe khwinkhelela rooho yawe.

31 Yaari Siikhu ya Ojilokotthela na Saapatu eti yaari siikhu yootepa wiiya ttakatthiifu. Wiiya khaari otakha yoori mwiili wa Yinsa wiiye vansalapa mpakha Saapatu, mayaahuuti khunvekela Pilaatu yoori arume okakattiwa moolu otule akhomeliweeyo na olaziwavo vansalapa. 32 Khuta anajanka khukakatta moolu a ntthu otule wa waaza aakhomeliweeyo vamote na Yinsa elottelanaka khukakattiwa a otule nkina. 33 Ila noofiyeliwa Yinsa, khooniwa yoori ye aari woofwa, khuhikakattiwi moolu awe. 34 Ila najanka mmote khukuphula pavu ya Yinsa na nkokhi, nasaapiru khusala esaruwa taamu na maati. 35 Otule oniyeeyo vitthu zaya epo alawela oshaahiti, na oshaahiti awe pi wookhweele. Ye onjuwa yoori onlupa haakhi, na onlaza oshaahiti yoori na-mweyo mwikhupali. 36 Vitthu epo zarettikhana yoori emariseleye epile enlupaazo zawaatikhiwa ttakatthiifu yoori: “Hatha likhonkolo lawe limote khalinteela opwecheya,” 37 na nkhama theenya enlupaazo zawaatikhiwa phantte kiina yoori: “Yo anttela omoona othuuto anshomiyeeyo.”* Moone kithaapu ya Zakariiya 12.10

38 Paata ya toole Yuusufu wa sitati ya Arimateeya, khunvekela Pilaatu mwiili wa Yinsa. Yuusufu aari nakhiyoni wa Yinsa, ila wa sirini, maana aari owoova mayaahuuti. Pilaatu khwinkha ruhusa, na Yuusufu khulawa na khulazavo mwiili opule wa Yinsa. 39 Ye aaperekhiwe ti Nikoteemu, otule alawiyeeyo ottakhulana Yinsa osikhu. Nikoteemu aathuliye mafuttha oonukhela oophakanyaniwa ela yaari ofiyaaye etthu ya miphimo talaathiini na thaanu. 40 Khuthuula mwiili wa Yinsa, khuputaputela va joora yoottukuntteliwa ofu woonukhela, nkhama anrettaazo mayaahuuti va ozikha. 41 Vahali akhomeliwevo Yinsa waariwo woorotha, waariina khapuri pheeya, yoohizikhiwivo hatha ntthu. 42 Maana yaari osaleela ofiya Siikhu ya Ojilokotthela wa mayaahuuti, na khapuri yaari kharipu, khuzikhiwa attaapho.