1 Omwanzo wa hapari zooshapweya za Yinsa Al-Masiihu, Mwaana wa Nluku. 2 Yaatikhiwa khwa ohupiri wa napiyu Ezaaya yoori: “Moone, kinlawa kamperekhe omaasho wawo karumeya aka, yoori atthenkeze tarikhi yawo; 3 huula enkhuwa enyakulaka n'yaara yoori: ‘Mwitthenkeze tarikhi ya Mbwana na mookolele miphiitelo zawe. 4 Aapuwiye Yaahaya namoosa n'yaara, khusala atafusiri monkoni wa woosiwa na othupwiya khwa nswammaha wa twampi. 5 Atthu ooshi a nti wa Yudeya na apale a Yeruzaleemu aari ovira ataaka na otukhuru twampi zaya na yo aari wiiya a woosiwa khwa ye mmuttho Yorotaani. 6 Kuwo aari owalaazo Yaahaya zaari za shapala za enkamiiya. Ye aarina nzako awe wa shapala na aari ojaka mapalaka na asali ya ntthuttu.

7 Atafusiraka aari ori: “Paata ya miiyo onta otule ariina oowahi zayita miiyo, oto akinsuhi ofukula mikhoyi za jampali zawe. 8 Miiyo kiniwoosani na maati, ila ye onttela owoosani na Rooho Ttakatthiifu.

9 Wakathi otthuupule, khuta Yinsa wa Nazareeti ya Kalileya khoosiwa ti Yaahaya mmuttho wa Yorotaani. 10 Nasaapiru, eettaka ovuuwa mmaati, khoona pinku efukuwiye na Rooho Ttakatthiifu yeettaka omwiishukhela nkhama jiwa. 11 Aphano khuta huula pinkuuni elupaka yoori: “Weeyo o mwanaka wa wuupheta, na wookituvela channu.” 12 Nasaapiru, Rooho Ttakatthiifu khunthuula khunlawana n'yaara. 13 Nttumpho eekhaliyeemo siikhu arupayiini, eettaka ozayiniwa ti Epiliisi. Ye aari vakatthi wa nyama za ntthuttu, ila malayikha aari ovira anrumeyelaka Yinsa.

14 Paata ya Yaahaya ofukeliwa, Yinsa khulankha khusala alawa Kalileya, alaleyaka hapari zooshapweya za Nluku, 15 alupaka yoori: “Wakathi wafiya, na ofwalume wa Nluku ori kharipu; mwithupwiye na mwikhupali hapari zooshapweya.”

16 Eettaka olawa alottaka shiini ya ntthatta la Kalileya, khuwoona attwi awiri Simawu na Antere, eeselelaka matthavi aya mpahari, mwaasa yoori aari anamajiya. 17 Yinsa khuwooza yoori: “Mwikilotte, kintta wuurettani wiiya anamajiya a atthu.” 18 Aphano nasaapiru khulikha matthavi aya khusala anlotta. 19 Eettaka olawa etthiipile, khumoona Yaakhumpa, mwaana wa Zepeteewu na ttwiiye Yaahaya ari mmwaatiya alazelaka matthavi aya. 20 Khuwaakhuwela, nasaapiru khunlikha papaaya mmwaatiya vamote na anakhaazi awe khusala anlotta Yinsa.

21 Paata ya toole, khulawa Kafwaranaawu. Noofiya saapatu khulawa osomisa nsinakooka. 22 Khusala awaatuvela masomi awe, maana aari owaasomisa nkhama ntthu wawiiyana ofwalume na woohiiyi nkhama anamanozela a kano. 23 Aphano khuta nsinakooka mphule nlume aashinttiweeyo ti sheethwani. Ye khusala akhuwa araka: 24 “Onnitakhelani fweeyo, Yinsa wa Nazareeti? Wata yoori onitapanye? Kajuwa yoori weeyo o Ttakatthiifu wa Nluku!” 25 Ila Yinsa khunmaruwela araka: “Onyamale, oleemo mmwiili wa mwinyi otu!” 26 Aphano sheethwani khuntatha ntthu otule woohusutivo khusaruwa mmwiili mwawe eettaka onyakula. 27 Atthu ooshi khwiiya ooshanka mpakha khufiyelela wuuzelana atthaaporu yoori: “Niini epi zaya? Masomi mapheya antanaaye ofwalume! Mpakha onruma masheethwani yo khunshututela!” 28 Hapari epile monkoni wa ye khumwazeyela nasaapiru nti wooshi wa Kalileya.

29 Wakathi aliiyeemo nsinakooka, khulawa na Yaakhumpa na Yaahaya owawe Simawu na Antere. 30 Nkhwewe Simawu eettiye orapalela voolili, yaari onlwaaza hooma, nasaapiru khuuziwa Yinsa. 31 Aphano ye khumwaattama, khunkhola nkhono khunlansa, nasaapiru hooma khumwiisha, khwaaza owaarumeyela. 32 Weettelaka oripa, paata ya otupweela njuwa, atthu khuwaathuula alwele ooshi na anamasheethwani khumweettisela Yinsa. 33 Atthu ooshi a nsitati mphule khukusanyeya vanlako wa nyuupa ethiitile, 34 ye khuwaavonisa awaatta aari ohoochiwaaye pi marati a wakhula nanna. Theenya khwiikara masheethwani awaatta. Ye khaari olikha masheethwani apale ottakhula, maana yo aari onjuwa paani Yinsa.

35 Supuyeene, nalelo ohinache saana, Yinsa khulankha khusaruwa khulawa puuro yawiitthaaleyavo ohali aari olompaawo. 36 Simawu na ashirikhaawe khulawa omweekesa. 37 Nonsikana, khumuuza yoori: “Atthu ooshi antta oweekesa weeyo!” 38 Yinsa khuwaajipu yoori: “Nlaweni ohali okinoko, miti naattamananiyeeyo, yoori kilawe kalaleye, maana tithiito miiyo kiteeliyeeyo.” 39 Aphano ye khweettetta Kalileya yooshi eettaka otafusiri nsinakooka na wiikara masheethwani. 40 Namaharaja mmote khumwaattama na khunkokhorela khunvekela yoori: “Amana otakha onwahi okitwaharesha!” 41 Yinsa ari wawiitaala huruma, khookola nkhono awe khunsapa na khulupa yoori: “Kintakha. Wiiye wootwahareshiwa!” 42 Nasaapiru maaharaja apale khwiiya omwiisha na ye khwiiya wootwahareshiwa. 43 Elottelanaka Yinsa khuwaaleeza na awaaleezaka woomaruwavo, 44 aphano Yinsa khumuuza yoori: “Ohimuuze hatha ntthu, ila olawe, wanvekele haakhimu yoori awoone nkhama wavona, arette twaha etile Munsa arumiyeeyo yoori wiiye oshaahiti. 45 Ila mwinyi otule khusala alawa na khwaaza olaleya vitthu epile na omwaza hapari. Mwaasa wa vitthu epile, Yinsa khuhisala awahi theenya weetta nsitati, ila khwiikhala othetekele puuro yawiitthaaleyavo. Khusala ata atthu wakhula phantte oteela okutthanana Yinsa.