Mbeɗe sáka kuni fie 2 Kɔrɛ̰teri 1

2 Kɔrɛ̰teri

Mbeɗe ndeke ɗi siɗike ká Pol ɗaa / ha̰ nzoɓ mbika lawri ká Kɔrɛ̰te

Ɓay ká se tul feri ká ɗo ɓil mbeɗe ni key

Mbeɗe ni key ká ɓa ndeke ɗi siɗike ká Pol ɗaa ha̰ nzoɓ mbika lawri ká Kɔrɛ̰te na kiɛ mii, sakra nzoɓ mbika lawri ɓáy Pol na, ɓay ɗo ɗi ŋgɔŋ ɗoŋ ɗoŋ. Nam varu ká Pol suo, ɓáy hṵrusuo káʼa ɗǒke ɓa nzoɓ ndáy nzaapeɗ na yɔklɔ nzoɓ mbika lawri ha̰ láa kḭ ya ɗo sakra ɓari. Ɓáy faa léke ɓayri na, i gbṵ́ke nzaa láa kḭ ya ká ɗo ha̰ zuɔ kḭ ɗo sakra nzoɓ mbika lawri ɓáy Pol nzoɓ ndáy nzaapeɗ na. Pol ɗaa mbeɗe ni key a ɓǎake sa̰w fe ká ɗaa ká ɓeri ɓǎake ɓay ŋgɔ-ŋgɔŋ ziŋ ri, rɔɔ a ɓǎake sa̰w fe ká ɗaa ha̰ ni súoke varu káʼa leke faake na. Ka ɓaa ɓay suoriya ɓe se tul zuɔ kḭ ɓe ɓáy ɓari, rɔɔ a koɗ ri ɓay haŋa ri mbṵ fe ɓay sɔ́kɔke nzoɓ mbika lawri ká i ɓa kṵkuri ká í kaw kuɗu zaɗ ká Zude na. Rɔɓay, ka ɓaa sa̰w fe ká se tul hṵrusuo káʼa ɗǒke ɓa nzoɓ ndáy nzaapeɗ na. Ka ɗo ɓáy faa ká ɓay ɗáa fe munu ɓa nzoɓ ndáy nzaapeɗ, ɓay ḭi lɛ, ɓa fe ká Ŋgɛrɛmbay kḭ sùo-ɛ ha̰ ni ɓay haŋa ni sɔ́ke nzoɓ mbika lawri ha ri ŋgɔ́ŋke ɓa pola pola.

Máa ɓayri ká ɗo ɓil-e

Zúɔ kḭ ká ɗo sakra Pol ɓáy nzoɓ mbika lawri: 1–7

Fe mbṵ ká ɓay tul nzoɓ mbika lawri ká kuɗu zaɗ ká Zude: 8–9

Pol ɓaa sa̰w hṵrusuo káʼa ɗǒke ɓa nzoɓ ndáy nzaapeɗ: 10–13

Soko ká Pol hii ha̰ nzoɓ mbika lawri ká Kɔrɛ̰te

1 Ɓi Pol, ká Ŋgɛrɛwṵru ha̰ mì ɓa nzoɓ ndáy nzaapeɗ Zezu *Krisi ɓáy law hiiya ɓe na, ɓúru yṵ-i Timote ɓuru ɗaa mbeɗe key na ha rì, ɓaarì nzoɓ mbika lawri ká ì mbṵ tul kḭ ká Kɔrɛ̰te, ɓáy nzoɓ taa Ŋgɛrɛwṵruri riw bele ká i kaw kuɗu zaɗ ká Akayi riw bele. 2 Ndaɗ ɓay haŋa law huoke ɓáy ɗɛkɛkɛ Bǎa naari Ŋgɛrɛwṵru, ɓáy Ŋgɛrɛmbay Zezu Krisi ka sáɗ ziŋ rì.

Pol ɗaa taambɔl ha̰ Ŋgɛrɛwṵru

3 Náa písiri Ŋgɛrɛwṵru, Bǎa Ŋgɛrɛmbay naari Zezu *Krisi, ɓe káʼa ɓa nzoɓ kɔ́kɔ nun síe nzoɓri, a ɓa Ŋgɛrɛwṵru nzoɓ huo law nzoɓ ká ɓil feri riw bele nda̰w na. 4 Ɓe na, ka huo law ɓuru ká ɓil kɔ́kɔ sɛkɛ feri riw bele ká ɓuru kɔ. Ɓe mini ze, ɓáy faa law ɓuru káʼa huo na, ɓuru hɔy kara, ɓuru maa ɓay húoke law nzoɓri ká i ɗo ɓil kɔ́kɔ sɛkɛ feri ɓoɗ ɓoɗ na. 5 Ze munu ká ɓuru kɔ sɛkɛ feri ŋgḭi ɓamba faa mbḭw munu ká Krisi kɔ na, Ŋgɛrɛwṵru huo law ɓuru ŋgḭi ɓamba faa mbḭw munu nda̰w ɓáy faa zúɔ ziŋ Krisi. 6 Lɛɛ, kɔ́kɔ sɛkɛ fe ká ɓuru kɔ na, ɗaa ha̰ ɓuru hǔoke law-rì a í zíŋke pam. A law ɓuru ká Ŋgɛrɛwṵru huo na, ɗaa ha̰ ɓuru hɔy kara ɓuru hǔoke law-rì, ɓo í íkike law-rì ká tul kɔ́kɔ sɛkɛ fe taa mbḭɛ ká ì kɔ na faa mbḭw munu ká ɓuru kɔ nda̰w. 7 Ɓe mini ze, ɓuru kɔ ta-taŋ ká ɓil law ɓuru mii, ɓaarì na ì kɔ na sɛkɛ fe hɔy kara, ì ɗoko tul mbika law ɓaarì, ɓay ḭi lɛ, munu ká ì kɔ sɛkɛ fe faa mbḭw munu ká ɓuru kɔ na, law ɓuru ká Ŋgɛrɛwṵru huo na, káʼa húo law-rì faa mbḭw munu káʼa ɗaa ziŋ ɓuru na nda̰w.

8 Yṵ-iri, kɔ́kɔ sɛkɛ fe ká tḭi tul ɓuru ká kuɗu zaɗ ká Azi na, ɓuru hii ɓay haŋa rì laa ta-taŋ. Ɓa ruy ká ŋgɔŋ ɓamba tasiri ze ziŋ ɓuru, a kal tul hṵrusuo ɓuru pavbaɗ. Law ɓuru sa̰a ha̰ ɓuru ker mii, ɓuru maa ɓay tḭ́i ká ɓil-e ɓay káw ɓáy kumnun mbǎa. 9 Ɓuru na ɓuru mgba mii, ɓa nam huɗ ɓuru kḭ ze maa. Lɛɛ, feke ku na ɗo munu ɓay haŋa ɓuru ɗáake law ɓuru ka te tul hṵrusuo ɓuru ya, roo lɛ, ɓay haŋa ɓuru ɗáake law ɓuru ɓo tul Ŋgɛrɛwṵru, nzoɓ tína nzoɓri saa luɔ huɗ ha ri kaw ɓáy kumnun. 10 Ɓa ɓe kḭ ze, ka ya̰a ɓuru saa ɓil huɗ, ze a ya̰aŋa ɓuru na rɔɓay. Ɓa tusuɛ kḭ, ɓuru ɗaa law ɓuru nzokɗo te tul-e, ɓúru ɓaa mii káʼa ya̰aŋa ɓuru munu ɓa pola na rɔɓay. 11 Ɓaarì sùo-rì hɔy kara, munu ká ì ɗaa nzaa ɓay kere í sɔ́ke ɓuru nda̰w na, Ŋgɛrɛwṵru a láa nzaa ɓay kere ɓaarì ɓáy taa ruɔ nzoɓri ká i ɗaa ɓay tul ɓuru, a sǎ̰mke fe zuɔ tul ɓuru, a ha̰ nzoɓri ŋgḭi ɓamba i ɗáake ni taambɔl ɓay tul ɓuru na.

Pol tina sa̰w ɓay varu ɓe káʼa suo

12 Ì kɔ, sa̰w ndáka giri sùo ɓuru na ze ɗo key: kér ɓay ɓuru kiɛ ɓuru ta-taŋ mii, simseɗ ɓuru ká sakra nzoɓri ká tusiri key, rɔɔ kakalke lɛ, ká sakra ɓaarì nzoɓ mbika lawri nda̰w na, ɓa simseɗ ká ɓuru se ɓáy faake nda̰w, rɔɔ ɓáy law pie ká uru saa luo Ŋgɛrɛwṵru nda̰w pi. Simseɗke ku na, ɓuru se ɓáy faa nun nzɛm nzoɓri ká tusiri key ya, roo lɛ, ɓáy faa law kere Ŋgɛrɛwṵru. 13-14 Tusuɛke lɛ, mbeɗe ká ɓuru ɗaa ha rì na, kér ɓay kḭ ɓoɗ mṵu ɗi ɓáy ha̰y ká ì kḭi, a ì laa ku na ya. Timbɛɗɛ key na, ì laa ɓayke riw ya ɓáy. Mì kɔ lɛ, ì láa ɓayke *taŋ kaɗ kaɗ ɓáy, ɓay haŋa ɓo nam ká Ŋgɛrɛmbay Zezu a yḭ́i a vi na, ì ndáka giri sùo-rì ɓay tul ɓuru munu ká ɓuru hɔy kara, ɓuru ndákake giri sùo ɓuru ɓay tul-rì nda̰w na.

15-16 Ɓi na, mì ɗaa law-i ɓo tul-rì, ɓe ze mí wáake varu ɓay séke luo-rì pola nda̰w rɔɔ, ɓay kál se kuɗu zaɗ ká Maseduwa̰n. Úru saa ɗi ku nda̰w rɔɔ, mì ker ɓay yḭ́i ɓáy faa tul-rì na rɔɓay. Ɓe munu rɔɔ, a ɓá fe sa̰mi ká ì zíŋ ndeke ɗi ba siɗike. A falɛ ku nda̰w rɔɔ, mì ker ɓay haŋa rì sɔ mì ɓáy faa varu ɓi ká mì séke ɓa kuɗu zaɗ ká Zude na. 17 A ku wa̰a, varu ká mì waa a mí se munu ká mì ɓaa ya ku na, mì waa ɓa baylu hɔy lɛ? Mase, feri ká mì waa ku na wa̰a, mì hii ɓay ɗáa fekeri ɓáy faa nun nzɛm nzoɓri hɔy, a ha̰ sùo ɓayri ká tḭi ká nzaa-i na, yḭ̀i a ɓa kúɗ ɓay nda̰w lɛ woo? 18 Ɓay ká mì ɓaa ha rì na, sùo ɓay ɓáy kúɗ ɓay zukri kḭ ká ɗi ya. Ŋgɛrɛwṵru ká ɗo tul ɓay ɓe na, ka ɓa nzoɓ ɓay nasi ɓi. 19 Ì kɔ, Zezu *Krisi Vu Ŋgɛrɛwṵru ká ɓúru Silas* ɓáy Timote, ɓuru ka-káa ɓay ɓe ha rì na, sùo ɓay ɓáy kúɗ ɓay zukri kḭ ká ɓil ɓay ɓe ya. Roo lɛ, ka ɓa nzoɓ ká sùo ɓay kḭ mbḭw hɔy ze ɗo nzi-ɛ ɓaŋguɔ. 20 Tusuɛke lɛ, feri riw bele ká Ŋgɛrɛwṵru waa na, ɓa Zezu Krisi kḭ ze ɗaa feke ɔ ŋgiɗ ɓáy zaɗɛ. Ɓe mini ze, zaɗka náa hiiri «Amɛm,» náa ɗáakeri riŋ ɗika ɓo tul Ŋgɛrɛwṵru lɛ, náa ɗáari ɓáy faa Zezu Krisi. 21 Nzoɓ ká ɗaa ha̰ náa zuɔri ziŋ kḭ ká ɓil Zezu Krisi na, ɓe ze ɓa Ŋgɛrɛwṵru. Ɓa ɓe na kḭ ze ka nan naari zuɔ ɓoɗ, 22 a te surum ɗo sùo naari ɓa nzoɓ taa ɓe nda̰w, rɔɔ a ha̰ Tem ɓe ya̰a ɓil law naari kpol kpol ɓay haŋa ɓo, náa kɔ́ri ta-taŋ mii, feri riw bele káʼa waa ɓay tul naari na, náa zíŋri ziŋ na kḭ.

23 Ɓi na, mì yḭ̀i mí se Kɔrɛ̰te ya, ɓay ḭi lɛ, mì hii ɓay haŋa law-rì ka sɛ rì ɓa pola pola ya. Ŋgɛrɛwṵru ze ɓa nzoɓ ɓay nasi ɓi; ze ɓo, mì kuɗ ɓa ɓay laa lɛ, ka ha̰ mì hu mak mak. 24 Ɓuru na, ɓay ká se tul mbika law ɓaarì na, ɓuru hii ɓay réke mbay ká tul-rì ya, ɓay ḭi lɛ, ì ɗo tul mbika law ɓaarì ŋgɔ-ŋgɔŋ. A roo lɛ, ɓuru zuɔ ziŋ rì mbḭw hɔy ká tul peɗke ɓay haŋa rì kaw ɓáy suoriya.

*1:19 1.19 Silas na, ɓáy nzaa gɛrɛk lɛ, i ɗi ni ɓa Silvin.