Mbeɗe sáka kuni fie Fe ká tina nun ha̰ Za̰a 2

Ɓay ká i ɓaa ha̰ nzoɓ mbika lawri ká Efɛz

1 Nzoɓke ku na ɓaa ha̰ mì mii: «Mu ɗaa ɓayri key na ka ɗo mbeɗe mú píeke ha̰ leɗ nzaapeɗ Ŋgɛrɛwṵru ká kaw tul nzoɓ mbika lawri ká i mbṵ tul kḭ ká Efɛz na mú ɓaa ha̰ ni ka ɓaa ha ri mii:

Nzoɓ ká mgba mbaymawri ɓa tɔnɔ say ɗo nduo hoɗo ɓe, a se sakra huu ndeleri ká i ɗaa sìi say ɓa tɔnɔ say ká i ɗaa ɓáy lari ká ndṵy zḭriri zḭriri na ɓaa mii: 2 “Fe ɗáa kere ɓaarì nzoɓ mbika lawri riw bele na, mì kɔ-kɔ. Sùo-rì ká ì ɗaa tuɗ, ɓáy sṵu law-rì na, mì kɔ nda̰w. Ɓaarì na, mì kɔ lɛ, ì iki law-rì ká tul nzoɓ law mgbɔ́rɔri ya; ì lie nzoɓri ká i ɗi sùo-ri ɓa nzoɓ ndáy nzaapeɗ Krisiri, roo lɛ, i ɓa nzoɓkeri ya, a í kɔ ri ɓa nzoɓ kúɗ ɓayri. 3 Ɓaarì na, ì sṵu law-rì ɓaŋguɔ, ze ì kɔ sɛkɛ fe ɓay tul-i hɔy kara law-rì sa̰a ya.

4 Roo lɛ, fe ká mì hii ɓayke ká fi luo-rì ya na ze ɗo key: ɓaarì na, ì hii mì í kɔ mì ɓa nzoɓ nun-rì munu ká ì ɗaa ɓáy tiika mbika law-rì ya. 5 Munu zu lɛ, ì kér se tul ɗol ɓaarì ká pola ká ì hǐike mì ɓamba na, í suo kér ɓay ɓaarì, í yḭ̀i í ɗaa munu ká ì ɗaa pola; ɓo munu ya lɛ, mì yḭ́i ɓay tḭ́i tul-rì, a mí naa huu ndele ɓaarì na ɓa fal*. 6 Ɓe nu ku hɔy kara, mì písi rì ká tul fe mbḭw: ì tuŋ fe ɗáa nzoɓri ká i se fal Nikola ŋgereŋ munu ká ɓi†.

7 Nzoɓ ká ɗo ɓáy suku láa ɓay na, ka laa ɓay ká Tem Ŋgɛrɛwṵru ɓaa ha̰ nzoɓ mbika lawri ká i mbṵ tul kḭ ɓáy zaɗ ɓoɗ ɓoɗ na! A nzoɓ ká haw yṵm na, puu káw ɓáy kumnun ɓaŋguɔ ká ɗo zaɗ káw ndaɗi ká luo Ŋgɛrɛwṵru na, mì pɔ́ŋ faa ha̰ ni sṵ lereke‡.”»

Ɓay ká i ɓaa ha̰ nzoɓ mbika lawri ká Isimirne

8 Nzoɓke ku na ɓaa ha̰ mì mii: «Mu ɗaa ɓayri key na ka ɗo mbeɗe mú píeke ha̰ leɗ nzaapeɗ Ŋgɛrɛwṵru ká kaw tul nzoɓ mbika lawri ká i mbṵ tul kḭ ká Isimirne, mú ɓaa ha̰ ni ka ɓaa ha ri mii:

Titire Nzoɓ ɓáy Ɔ́rɔ Ɓie Nzoɓ, ɓe káʼa hu a yḭ̀i a kaw ɓáy kumnun na ɓaa mii: 9 “Kɔ́kɔ sɛkɛ fe ɓaarì nzoɓ mbika lawri na, mì kɔ-kɔ. Kṵku ɓaarì na, mì kɔ-kɔ nda̰w§, roo lɛ, tusuɛke lɛ, ì ɓa nzoɓ feziŋari ká nun Ŋgɛrɛwṵru. Ɓay ka̰ayari ká Ziɓri ká i ɗi sùo-ri ɓa Ziɓ taa tusuɛkeri ɓaa se tul-rì na, mì la-laa. Ɓari nzoɓkeri ku na, i ɓa Ziɓ taa tusuɛkeri ya. Mbṵ kḭ ɓari na, ɗo ɓa zaɗ mbṵ́ kḭ Satan! 10 Fe sɛkɛ káʼa tḭ́i tul-rì na, ì ha̰ law-rì ka tɔ ká ɗi ya. Ì laa key: ŋgɛrɛtemndaya a ɗáa ha̰ nzoɓ tul ŋga̰ni ɓaarì fa̰a nzoɓ ha̰nɛri ká sakra ɓaarì zuɔ hul sal ɓay lie law-rì; lɛ, ì ɗoko ɓil kɔ́kɔ sɛkɛ fe nam duɔ*. Ì siŋ law-rì í ɗǒke tul ɓay ɓi kpṵru í huke, lɛ, mì haŋa rì káw ɓáy kumnun ɓaŋguɔ ɓa fe tunduo ɓaarì.

11 Nzoɓ ká ɗo ɓáy suku láa ɓay na, ka laa ɓay ká Tem Ŋgɛrɛwṵru ɓaa ha̰ nzoɓ mbika lawri ká i mbṵ tul kḭ ɓáy zaɗ ɓoɗ ɓoɗ na! A nzoɓ ká haw yṵm na, huɗ ndeke ɗi ba siɗike ti ɗika riŋ-ɛ mbǎa mgbaŋ.”»

Ɓay ká i ɓaa ha̰ nzoɓ mbika lawri ká Pɛrgam

12 Nzoɓke ku na ɓaa ha̰ mì mii: «Mu ɗaa ɓayri key na ka ɗo mbeɗe mú píeke ha̰ leɗ nzaapeɗ Ŋgɛrɛwṵru ká kaw tul nzoɓ mbika lawri ká i mbṵ tul kḭ ká Pɛrgam mú ɓaa ha̰ ni ka ɓaa ha ri mii:

Nzoɓ ká ɗo ɓáy maamii ká nzi-ɛ uo pɛlɛm pɛlɛm fi siɗi bele na ɓaa mii: 13 “Zaɗ ká ɓaarì nzoɓ mbika lawri ì ɗaa puo ká ɗi na, mì kɔ-kɔ; ɓa zaɗ ká *Satan kaw tul kariŋgaw mbay ká ɗi. Ɓe nu ku hɔy kara, ì mbuɔlɔ mì ɓaŋguɔ. Ze ɓáy sewke ká i mgba Antipas ká ɓa nzoɓ nasi ɓay ɓi taa tusuɛke, a í i ni ká puo ɓaarì ká Satan ɗaa puo ká ɗi na kara, ì pɔŋ mbika law ɓaarì ká tul-i ya.

14 Roo lɛ, fe ha̰nɛri ɗo fi luo-rì ɗi ku ká mì hii ɓayke ya: Nzoɓ ha̰nɛri ká sakra ɓaarì se fal fe fére *Balam. Ɓe na, ka kiɛ Mbay *Balak faa ká ɓay haŋa leɗ Izarayɛlri ɗaa feya̰a í sṵ náy ká i púoke fe ha̰ wṵruri, a í ɗaa nun pie†. 15 Nzoɓ ha̰nɛri ká luo-rì na, i se fal fe fére nzoɓ taa Nikolari faa mbḭw munu na nda̰w. 16 Munu zu lɛ, ì suo kér ɓay ɓaarì! Ɓo munu ya lɛ, mì tḭ́i tul-rì koɗ hɔy a mí ruu ziŋ nzoɓkeri ku na ɓáy maamii ká tḭi saa nzaa-i.

17 Nzoɓ ká ɗo ɓáy suku láa ɓay na, ka laa ɓay ká Tem Ŋgɛrɛwṵru ɓaa ha̰ nzoɓ mbika lawri ká i mbṵ tul kḭ ɓáy zaɗ ɓoɗ ɓoɗ na! A nzoɓ ká haw yṵm na, mì haŋa ni ŋgaw ká ɗo zaɗ muni ká i ɗi ɓa manne a mí ha̰ ni tisaw pie nda̰w‡. Ká tul tisawke ku na, i ɗaa riŋ fie ɗo ɗi ká nzoɓ mbḭw kɔ sa̰wke ya, ɓa ɓe huo-ɛ káʼa ya̰a riŋke na ze ka kɔ.”»

Ɓay ká i ɓaa ha̰ nzoɓ mbika lawri ká Tiyatir

18 Nzoɓke ku na ɓaa ha̰ mì mii: «Mu ɗaa ɓayri key na ka ɗo mbeɗe mú píeke ha̰ leɗ nzaapeɗ Ŋgɛrɛwṵru ká kaw tul nzoɓ mbika lawri ká i mbṵ tul kḭ ká Tiyatir mú ɓaa ha̰ ni ka ɓaa ha ri mii:

Vu Ŋgɛrɛwṵru, ɓe ká nun-ɛ sɛ huu kalu kalu munu ká rḭm huu, ká ɓal-ɛri ndṵy munu ká nzaw lari ká i ɗaa nduo huu rɔɔ í nzṵn ha̰ ni ndṵy na ɓaa mii: 19 “Fe ɗáa ɓaarì nzoɓ mbika lawri na mì kɔ-kɔ; mì kɔ mgbaka ini ɓaarì nda̰w, ɗoko tul ɓay ɓi nda̰w, peɗri ká ì ɗaa ha̰ mì nda̰w, rɔɔ ɓáy sṵu law-rì nda̰w pi. Mì kɔ lɛ, peɗ ɓaarì ká ì ɗaa timbɛɗɛ key na, kal taa ha̰y ká ì ɗaa ɓáy titire nam ká ì ɗáake law-rì ɓo tul-i na.

20 Roo lɛ, fe ká mì hii ɓayke ká luo-rì ya na ze ɗo key: Má̰y ká peɗ ɗáa ɓe ɗo munu ɓa Zezabɛl na, ì iki law-rì ká tul-e§ Má̰yke ku na, ɗi sùo-ɛ ɓa nzoɓ ya̰aŋa ɓay saa nzaa Ŋgɛrɛwṵru a ula nzoɓ peɗ ɓiri a kuɔ ri zuɔ fal-ɛ ɓáy faa fe fére ɓe ha ri ɗaa nun pie, a í sṵ náy ká i púoke fe ha̰ wṵruri. 21 Mì pɔŋ namri ha̰ ni ɓay haŋa ni ka yḭ̀i a suo kér ɓay ɓe ká tul feya̰a ɓeri, roo lɛ, ka hii ɓay pɔ́ŋ ɗáa nun pie ɓe na ya. 22 Ɓe mini ze, mì pɔ́ŋ ni ha̰ ni kɔ sɛkɛ fe ká tul ɗokro; a ɓari ká i ɗaa nun pie ziŋ ni na, zaɗka i yḭ̀i í suo kér ɓay ɓari, a í pɔŋ fe ɗáa ka̰aya ɓari na ya lɛ, mì haŋa ri kɔ sɛkɛ fe na nda̰w. 23 Vi-eri na, mì duku ri mburuk, ɓay haŋa nzoɓ mbika lawri ká i mbṵ tul kḭ ɓáy zaɗ ɓoɗ ɓoɗ riw bele na i kɔ́kɔ mii, ɓi na, mì ɓa nzoɓ bɛ́klɛ ɓil law nzoɓri ɓay kɔ́kɔ kér ɓay ɓari ɓáy fe ká law-ri hii. Nzoɓ ha̰a ha̰a ká sakra ɓaarì na, mì púo ni fe tunduo ɓe maa ɓáy peɗ ɗáa ɓe.

24 A ɓaarì nzoɓ mbika lawri ká Tiyatir ká ì se fal fe fére ndaya má̰y key ya, ká í ti rìi ɓil feri ká nzoɓkeri ɗi ɓa ‘kér ɓay *Satan ká ɗi ɓamba ká ɗo zaɗ muni’ ya na*, mì ɓaa ha rì ta-taŋ: Mì ti haŋa rì soɓa kḭ ya, 25 roo lɛ, fe ká ì ɗǒke na, ì mgba ŋgɔ-ŋgɔŋ kpṵru maa ɓáy nam ví ɓi.

26-28 A nzoɓ ká haw yṵm, a ɗaa fe ká mì hii kpṵru tḭi ɔ́rɔ ɓie nam na lɛ, mì haŋa ni hṵrusuo réke mbay munu ká ɓi kḭ mì ya̰a ká luo Bǎa. Kaʼa réke mbay ká tul nzoɓri ká sa̰w puo ɓari ɓoɗ ɓoɗ ɓáy hṵrusuo. Kaʼa ɓíɛ nzoɓ ndayari kpukɗu kpukɗu munu ká i ɓǐɛke pa̰y ká i mbuo zuɔ. Mì haŋa ni rùo tiɓie na nda̰w†. 29 Nzoɓ ká ɗo ɓáy suku láa ɓay na, ka laa ɓay ká Tem Ŋgɛrɛwṵru ɓaa ha̰ nzoɓ mbika lawri ká i mbṵ tul kḭ ɓáy zaɗ ɓoɗ ɓoɗ na!”»

*2:5 2.5 Zaɗka Krisi naa huu ndele ɓaarì ɓa fal na, kiɛ mii nzoɓ mbika lawri ká i mbṵ tul kḭ na i nda siri.

†2:6 2.6 Nzoɓri ká i se fal Nikola na peɗ ɗáa ɓari ɗo ɓáy zaɗɛ ya, ɓay ḭi lɛ, i pɔŋ sùo-ri ɓo ɓil fe ɗáa nun pieri a í puo wṵruri.

‡2:7 2.7 Ì kḭi Tiika sa̰w fe 2.9. Puu káw ɓáy kumnun ká ɓil mbeɗeke na, Ŋgɛrɛwṵru haa nzoɓri faa sṵŋa lereke. Roo lɛ, timbɛɗɛ ká ɓil mbeɗe ni key na, ka pɔŋ faa ɗo hɔy ro ha̰ nzoɓri sṵ.

§2:9 2.9 Ká ɓil sewke ku na, nzoɓ ha̰nɛri ɗaa hḭɛ í ker mii, zaɗka nzoɓ mbika lawri ruo Mbay Sezar ɓa Ŋgɛrɛwṵru ya na báyḭi lɛ, i fa̰a fe híe ɓari nda̰w, feri ká hul ɓari hɔy kara nda̰w, a í pɔŋ ri ɓa nzoɓ kṵkuri.

*2:10 2.10 Zaɗka i ɓaa ɓay se tul «nam duɔ» ká ɓil mbeɗe key na, kiɛ sa̰w síe ká Ŋgɛrɛwṵru kḭ mbi nzi-ɛ a ɗaa ɓo, ɓo ti kál bol nzi-ɛ ya.

†2:14 2.14 Ì kḭi Ruɔ ɓari 25.1-2, 31.15-16.

‡2:17 2.17 Manne na ɓa fe sṵm ká Ŋgɛrɛwṵru ha̰ leɗ Izarayɛlri sṵ ká ɓil law kɔr. (Tḭ́i kɛlɛ 16.14-21.) Ziɓri na i ker mii, zaɗka Krisi a vika na, kaʼa hɔ́l nzoɓri faa mbḭw munu na nda̰w. A tisaw pie na, nzoɓ ha̰nɛri ker mii, zaɗka i ɗaa ɓo nduo nzoɓ lɛ, ɓa faa ze i pɔŋ ha̰ nzoɓke se zaɗ fe sṵm suoriya Ŋgɛrɛwṵru, mase i ɗaa ɓo nduo nzoɓ ze ɓáy nam kúŋ sal ɓay laa lɛ, kiɛ mii, ɓay naa ká tul nzoɓke ro zu.

§2:20 2.20 Ì kḭi 1 Mbayri 16.31; 2 Mbayri 9.22. Zezabɛl na ɓa má̰y Mbay Akaɓ ká kuɔ wa̰ra ha̰ ni puo wṵruri.

*2:24 2.24 Ká zaɗ ni key na rii fe ká nzoɓ ha̰nɛri fere nzoɓri fe mii, ɓay háw yṵm ká tul ŋgɛrɛtemndaya na, ndaɗ ɓay ríi ɓil fe ka̰aya káʼa ɗaa na nda̰w rɔ!

†2:26-28 2.26-28 Rùo tiɓie na, kiɛ nzaaruo ká ɗo ɗi ya ɓay sil. Ɗo faa mbḭw munu nda̰w, nzoɓ ká ɗo ɓáy rùo tiɓie na, ze ka ɗo na sikɗa kɔ́kɔ sɛkɛ fe hɔy kara, ka kɔ mii, sɛkɛ fekeri na ɗo ɗi ya ɓay kál.