Efesas
Nga Girigiringa ala Pol Fana Siosi Lo'oo 'i Efesas
Efesas nga fanua ba'ita na gule'e lefu 'i Eisia. Tala'ina lo'oo, goru fa'alata nga gule'e lefu lo'oo 'ania 'i Teki. La Pol 'e leka 'i Efesas na nga ruana ma nga oruna lekanga aana fana feelana nga Kwairiinga Le'a lo'oo. Agasia Wane ni Kwairiinga 18:19-21; 19. Ngaia 'e aga mala ngaia 'e giria nga buka lo'oo alata ngaia 'e to'oru 'ubulana lokafu 'i Rom.
La Pol ngaia 'e giria nga buka lo'oo fana boonilana ta'a na God fana 'agila su'a le'a na kwaimaanga na God 'e ba'ita iiki, ma gila ka su'a la'u na nga fadafadanga ne'e nana'i firi fana ta'a te'efou. Nga buka lo'oo gila dalo'ia na rua gule'e 'ola.
Na gule'e buka 1-3, la Pol 'e kwaifa'ananau suria la God 'e faa'afua taunga'inga aana 'ania la Kraes ne'e ba'ita fafia 'ola te'efou. Ma tofuna la Kraes na'a God 'e fa'amooria ta'a 'i Jiu ma ta'a na gila 'ame Jiu, ma ngaia ka ladoga 'ania te'e noni 'ola momola na God.
Na gule'e buka 4-6, la Pol ngaia 'e fa'afolaasia nga ladoladonga na ta'a na God. Ma ngaia ka iiria na ta'a na God 'agila abulo 'ani odo gani mai gani, fana 'agila to'oru oguogu. Ma ngaia ka iiria la'u faga 'agila to'oru fana funurilana la Saetan.
Ni 'ola taringa'i 'ubulana buka lo'oo:
God 'e fa'amooria ta'a 'i Jiu ma ta'a na gila 'ame Jiu, ma ngaia ka ladoga 'ania te'e noni 'ola momola (1:1—3:21)
Mooringa fooru suria la Kraes (4:1—6:24)
1
1 Nau la Pol lo'oo, ku giri no'o kau famooru. Nau nga Wane ni Kwairiinga ala Jisas Kraes suria nga kwaisiriinga na God.
Nau ku kwatea kau nga girigiringa lo'oo famooru nga ta'a na God na'a mooru to'oru 'ubulana fanua ba'ita 'i Efesas, ma moru ka leka suria la Jisas Kraes na'a moru lado fe'enia 'e sui no'o.
2 Nau ku fo'a fana God nga Mama'a adauru, ma nga Alafa la Jisas Kraes 'ani kwatea kwailaeta'afiinga ma aloalonga famooru.
God 'e agea 'ola 'e le'a fadauru
3 Goru baatafea God nga Mama'a na Alafa adauru la Jisas Kraes. Suria God ngaia 'e nanamate'eni 'adauru 'ania kwatelana 'ola 'e le'a te'efou 'i langi fana boonilana mango'e 'ola adauru tofuna nga ladoladonga adauru fe'enia la Jisas Kraes. 4 'I na'o na God 'e launge'enia nga fanua lo'oo 'i wado, ngaia 'e firi 'adauru te'efou no'o fana nga ta'a aana suria nga ladonga adauru fe'enia la Kraes. Ngaia 'e agea 'ino'ona ai fana 'agoru odo te'efou ma 'agoru ka 'ame to'o na te'efuta rianga 'i maana. 5 Tofuna kwaimaanga na God, ngaia 'e fadaa 'ua no'o mai 'i na'o fadauru ni wela aana 'ania la Jisas Kraes. God 'e agea 'ilo'oo suria nga kwaisiriinga aana, ma ngaia ka malale'a fe'enia. 6 Lo'oo, goru baatafea God suria ngaia 'e kwate tago na nga kwailaeta'afiinga ba'ita aana fadauru tofuna Wela aana na ngaia 'e kwaimaa fana.
7-8 La Kraes 'e fori 'adauru 'ania 'abuna, ma God ka 'olafanataa no'o na rianga adauru tofuna ladoladonga adauru fe'enia la Kraes. Nga kwailaeta'afiinga na God 'e kwatea fadauru 'e ba'ita 'e iiki. Suria nga funi'oonga ma nga su'a'olanga aana ne'e ba'ita, 9 God 'e faate'enia fadauru nga fadafadanga aana na ngaia 'ame faata'i folaa mai ai fana ta'a mai na'o. God 'e agea nga 'ola lo'oo suria kwaisiriinga aana ma tofuna 'ola la Kraes 'e agea. 10 Nga fadafadanga lo'oori ne'e 'ilo'oo: Na alata ngaia 'e firia, ngaia te'e ogua ni 'ola te'efou na ngaia 'e launge'enia mai langi mai lo'oo fofona fanua lo'oo 'i wado, fana la Kraes 'ani ba'ita fafiga te'efou.
11 Ni 'ola te'efou na'a God 'e agea, ngaia 'e agea suria nga manatalana ma nga kwaisiriinga aana. Ma suria nga kwaisiriinga na God na ngaia 'e arua 'ua no'o mai, ngaia 'e firi 'adauru fana ta'a aana na ladoladonga adauru fe'enia la Kraes. 12 Ngaia 'e agea 'ino'ona fana 'i meeru nga ta'a 'i Jiu na meeru ta'a na'ona'o na meru fito'o ala Kraes, na'a meru baatafea God ne'e ba'ita 'e iiki.
13 Ngaia 'e 'ilo'oo la'u mola famooru nga ta'a na moru 'ame Jiu. Tofuna alata na'a moru longoa nga alafuunga kwala'imori lo'oo, nga Kwairiinga Le'a lo'oo na ngaia 'e fa'amoori 'amooru, ma moru ka lau no'o fana ta'a na God. Moru fito'o ala Kraes, ma God te'e kwatea Anoe 'ola Abu famooru fana 'ani faate'enia na mooru ta'a aana, 'ilaka'u ngaia 'e fataarunga'i 'ua no'o mai fai. 14 Ma tofuna nga Anoe 'ola Abu 'e to'oru 'i 'ubulana nga moori ladauru, ngaia ne'e faate'enia na'a tagoru ngaria ni 'ola te'efou na God ngaia 'e fataarunga'i ai fana ta'a aana. Ma dauru tagoru ngaria ni 'ola lo'oo alata God 'ani rubea adauru 'agoru to'oru firi na arubengaa. Goru tafea God ne'e ba'ita 'e iiki!
La Pol 'e fo'a fana nga ta'a 'i Efesas
15 Ngaia na'a 'ita na alata nau ku longoa nga tagoto'onga amooru na Alafa la Jisas, ma nga kwaimaanga amooru fana ta'a na God te'efou, 16 nau ku baatafea God famooru na alata te'efou na 'inau ku fo'a famooru. 17 Nau ku fo'asia God ne'e to'o na kwangakwanga'anga 'e iiki. Ngaia na God na Alafa adauru la Jisas Kraes. Nau ku soea fana 'ani kwatea nga Anoe 'ola Abu famooru fana 'amoru to'o na funi'oonga, ma moru ka aga su'a ala God, fana 'amooru su'a le'a aana. 18 Nau ku fo'a la'u mola fana God 'ani 'ulasia manata lamooru fana 'amooru su'a suria ni 'ola le'a na ngaia 'e to'o ai famooru. 'Amoru su'a le'a ai na mooru tamoru to'o na ni 'ola lo'oori, tofuna ngaia 'e soe 'amooru fana 'amoru lau no'o fana wela aana. Ma 'inau ku fo'a la'u mola fana 'amooru su'aai nga nanamanga ba'ita na ngaia 'e fataarunga'i fana 'ani kwatea fana ta'a aana. 19 Mai nau ku fo'a fana 'amooru su'a la'u na nga tegelangaa ba'ita na God 'e taunga'i ai fadauru nga ta'a na goru tagoto'o. Ma nga tegelangaa lo'oori 'e to'oto'o fe'enia tegelangaa na'a 20 God 'e taunga'i 'ania na alata laka'u ngaia 'e tata'ea la Jisas Kraes fa'asia nga maenga ma ka fa'ato'orufia na gula le'a aana 'i langi. 21 Ma 'i langi, la Jisas Kraes 'e ba'ita fafia nga enselo ma anoe 'ola te'efou. Ma nga latana la Kraes ka ba'ita riufia nga ta'a te'efou na alata lo'oo, ma nga alata na 'ani nigi la'u mola mai. 22 God 'e arua ta'ina 'ola te'efou 'ani to'oru 'i olofana tegelangaa ala Kraes, ma ka arua la Kraes 'ani ba'ita fafia siosi 'ilaka'u ngaia 'e ba'ita fafia 'ola te'efou. 23 Lo'oo, dauru nga ta'a na goru fito'o aana, goru 'ilaka'u no'o labena la Kraes. Ma goru ka fongu 'ania la Kraes, wane ne'e fa'afongua 'ola te'efou.