1 Mbali weye kolondeka ufundize mbuli zozilondeka na mafundizo ya kweli. 2 Wafundize walala wa chilume kuwa wolondeka wawe na kulinganya na wawe na ugenzi unogile haulongozi ha wanhu na wawe na ubala, weme chigangamavu muna uhuwilo na ulondo na kufunya umoyo. 3 Iviya wafundize walala wa chike watende mbuli zinogile haulongozi ha Mulungu. Hawalondeka wawe wadelenya na sekewawe wanhu wa kukolwa. Mbali wolondeka kufundiza yanogile, 4 muladi wawafundize wandele kuwalonda walume zawo na wana wawo, 5 wawe na kulinganya na watende yanogile haulongozi ha Mulungu, wolondeka wasang'hane vinogile muna zikaye zawo na wawategeleze walume zawo, muladi Mbuli ya Mulungu sekeiligigwe.

6 Iviya uwazume wabwanga wawe wa kulinganya muna zimbuli zose. 7 Weye mwenyewo kolondeka uwe simwe muna zimbuli zose kwa kusang'hana yanogile. Kaidi mafundizo yayo, uyamhe na kuyahuwila. 8 Mbuli zako ziwe za kweli zilibule ubananzi, muladi hata wehi wako waja wokulema wapate chinyala kwaviya wezapuwa chochose chihile cha kulonga kusonhela cheye.

9 Uwafundize watumwa wawategeleze wenevale wawo na wawanogeze muna zimbuli zose. Wolondeka sekewaibishile nawo, 10 na sekewawabawile wenevale wawo. Mbali wailaguse kuwa wodaha kuwa wanoga na wokwaminika muladi wayahambe mafundizo ya Mulungu Mulopozi wetu kwa chila chiusang'hana.

11 Kwaviya unovu wa Mulungu ugubuligwa muladi ugale ulopozi kwa wanhu wose. 12 Unovu uwo wochifundiza chileke wihi na malondo yehile na chikale kwa kulinganya na chikale vinogile voilondeka na chikale kwa kumnogeza Mulungu muna ulusita luno, 13 ihawa chogozela zuwa diya da deng'ho kulu dochidilolela lusita vondaulawilile utunhizo wa Mulungu mkulu na Mulopozi Yesu Chilisito. 14 Yesu kailava mwenyewo kwa ichimu chetu kwa kuchikombola kulawa muna uwihi wose na kuwasafya wanhu wake yeye mwenyewo, kuwa na hamu ya kutenda yanogile. 15 Fundiza mbuli izo kwa kuwazuma wanhu na kuwabwakila kwa udaho wose. Sekeutogole munhu yoyose yakwehule.