32
1 “Hulika weye ulanga, nizalonga,
hulika mbuli zonilonga, weye isi.
2 Mafundizo yangu yezalaga fana madondo ya mvula
mbuli zangu zilagale fana nhungwe,
fana nyiminyimi muna ivinhu vihandigwe,
fana mawaga muna mayani mabisi.
3 Nizadigong'onda zina da Mndewa Mulungu,
mweye mwizalonga, ‘Mulungu wetu ni mkulu!’
4 “Mndewa Mulungu ni luwe, sang'hano zake zigangamala
na kohumiza voilondeka,
Mulungu mwaminika yelibule ubananzi,
kotenda mbuli zinogile na zigoloke.
5 Mbali mweye hamwaminika bule kumwake,
mweye siyo wanage kaidi kwa ichimu cha wihi,
mweye ni welesi wihile na wagile.
6 Modahaze kumuliha ivo Mndewa Mulungu,
mweye wabozi na mwehuke?
Vino siyo Tati yenu yamulumbileni,
yoyamtendileni na kumgangamizani?
7 “Kumbukeni siku zifosile,
geseni miyaka ya nyelesi nyingi,
wauzeni tati zenu, nawo wezamwidikani,
wauzeni walala wenu, nawo wezamulongelani.
8 Mulungu yeli uchanyha ng'hani kawagolela wanhu uhazi.
Viyawagolele wanhu,
chila isi kaweng'ha mhaka zake
kwa kusondelela peta ya wana wa Isilaili,
9 mana uhazi wa Mndewa Mulungu ni wanhu wake.
Kaisagulila wanhu wa Yakobo wawe wake.
10 Kawafika kuna iisi ili kudibwilingu,
chuwala muhala chili na beho kulu.
Kawakaliza na kuwalola goya,
kawatenda fana mwana wa ziso jake.
11 Fana masumula yokaliza chisanja chake,
kuzumhazumha uchanyha ya makinda yake,
kotandaza mabawa yake muladi kuwamhilila,
na kuwapapa uchanyha ya mabawa yake.
12 Mndewa Mulungu muhala kowalongoza wanhu wake
bila kutazigwa na mulungu imwenga.
13 “Kawaleka watawale isi inuke,
na waja vinhu votile muna imigunda.
Kaweng'ha uki muna uluwe,
na mavuta kulawa muna uluwe ludala.
14 Kaweng'ha samuli na matombo ya wanyama,
mafuta ya mwanang'hondolo mulume,
mabumbila ya wanyama wa Bashani na luti.
Kaweng'ha uhemba unogile kufosa umwenga wose na divai inogile kufosa zose wang'wa.
15 Wanhu wa Isilaili* Chiebulaniya cholonga “Yeshuluni” zina dimwenga da Isilaili fambulo jake “yolonga ukweli.” wanona na kutowa mateka,
waneneha, wawa na matupe na wanogeza,
maabaho wamuleka Mulungu yawaumbile,
wamzeha luwe wa ukombola wawo.
16 Wamtenda Mndewa Mulungu yawone migongo kwa milungu yawo,
wamtenda yawone ludoko kwa sang'hano zawo zihile.
17 Watambikila maginyi yeli siyo milungu,
waihitila milungu hawaimanyile, milungu yoilawilile sambi,
ija wasaho zawo hawaidumbile.
18 Hamumgesile Luwe yoyamwing'hileni ugima,
mumzimiza Mulungu yoyamwelekeni.
19 “Mndewa Mulungu kawona mbuli ino na kawalema,
kwaviya kawawonela ludoko wanage wa chilume na wa chike.
20 Kalonga, ‘Sizawataza,’
maabaho nizawona chondachiwalawilile,
wanhu wawo weli na mizoyo midala na hawaminika.
21 Wanitenda niwone ludoko kwa nyang'hiti zawo,
noiwonela migongo milungu yawo,
milungu ili siyo milungu ya kweli.
Ivo nizawatenda wawawonele migongo waja weli siyo chinhu,
nizawatenda wehilwe kwa kusang'hanila zisi za wabozi.
22 Ludoko lwangu lwizakwaka fana moto
lwizasoma mbaka kuzimu,
na kulunguza chila chinhu muna iisi.
Iwizabananga isi na vose vili umo,
lwizalunguza vandusilo va milima.
23 “Nizawagalila magayo
na nizawatowa kwa misale yangu.
24 Wezadanganika kwa nzala na homa,
wezadanganika kwa mitamu,
nizagala wanyama weli na meno yasongoke
na mazoka weli na sumu wawalume.
25 Ng'hondo izagala zifa nyingi kunze ya zikaye,
wezakuwa na ludumbo muna zikaye,
wabwanga na wandele wezadanganika,
wana ving'hele hebu walala weli na uhenga, hawezakuwa wagima.
26 Nizawananga wawo,
ivo habule munhu yondayawakumbuke.
27 Mbali sizawaleka wehi wawo waigode kuwa wawahuma wanhu wangu,
niye Mndewa Mulungu nitenda mbuli zino zose.
28 “Isilaili ni isi ilibule nzewele,
wanhu wake wabule ubala muna imizoyo yawo.
29 One wawile na ubala wahavimanyile habali wahumigwa,
wahadahile kuvimanya uhelelo wawo wizakuwaze.
30 Munhu imwe kodahaze kuwahuma wanhu 1,000,
hebu wanhu waidi wodahaze kuwahuma wanhu 10,000,
mbali one Luwe wawo kawasa,
Mndewa Mulungu, Mulungu wawo kawaleka?
31 Mana luwe wawo halingile na nguvu fana Luwe wetu,
hata wehi wetu wavimanya.
32 Zabibu zawo zizalawa muna zizabibu za Sodoma na kulawa muna imigunda ya Gomola.
Zabibu zawo zina sumu na vipambo vawo vina usungu,
33 divai ilinga fana itendigwa na sumu za mazoka.
34 “Mndewa Mulungu kokumbuka chiya chiwatendile wehi
wawo,
kogozela lusita lufaya kuwatagusa.
35 Chisasi nizalihiza niye mwenyewo,
migulu yawo izateleza,
kwaviya siku yawo ya kudanganika yahabehi,
uhelelo wawo wa habehi.
36 Mndewa Mulungu kezawagombela wanhu wake
vondayawone kuwa nguvu zawo zimala.
Kezawawonela ubazi waja womsang'hanila,
vondayawone wabule nhazo.
37 Maabaho Mndewa Mulungu kezawauza wanhu wake,
‘Yakulihi milungu yenu,
miluwe yomuikimbilile kwa kukala goya?’
38 Yakulihi milungu idile nhambiko yenu
na kung'wa divai na zabibu za ving'waji?
Lelo inuke imtazeni!
39 “ ‘Niye niiyo Mulungu,
habule imwenga yalingile niye.
Nokoma na nolava ugima,
nolumiza na kuhonya,
na habule munhu yodaha kulema chonitenda.
40 Nogolosa mkono wangu kuulanga,
na kuilaha kwa ugima wangu wa siku zose
41 one nihanola zele jangu dimelemeta
na kugolosa mkono kulava nhaguso,
nizawalihiliza wehi wangu,
nizawatagusa wanhu wonihila.
42 Misale yangu nizaitenda ikolwe na damu,
na zele jangu dizawakoma wose wonilema niye.
Wezatapagala damu ya wanhu wakomigwe na watumwa na wehi weli na nyele nhali.’
43 “Mweye wanhu wa zisi wadeng'heleleni wanhu wa Mndewa Mulungu.
Mulungu kowatagusa wose wowakoma wanhu wake.
Kowalihilizila wehi wake
na kolekelela uhasanyi wa wanhu wake.”
44 Musa na Yoshua mwana wa Nuni weza haulongozi wa wanhu na walonga mbuli zose zili muna uwila uno, muladi wanhu wa Isilaili wauhulike.
Ndagilizi za uhelelo za Musa
45 Musa viyakomeleze kuwalongela Waisilaili wose mbuli zili muna uwila uno, 46 kawalongela, “Zikeni muna imizoyo yenu mbuli zose zonimulongeleni diyelo, muladi muwalagilize wanenu wasondelele chigangamavu mbuli zose za lagilizo dino. 47 Kwaviya malagilizo yano siyo mbuli muhala mbali ugima wenu. Zindilileni malagilizo yayo muladi mukale siku nyingi muna iisi ija yomuhita kuisola kuumwambu wa Yoludani.”
48 Siku iyo iyo Mndewa Mulungu kamulongela Musa, 49 “Kwela mulima uno wa Abalimu, mulima wa Nebo, uli kuna iisi ya Moabu, voilola na bululu da Yeliko, ukailole isi ya Kanaani yoniweng'ha Waisilaili waisole. 50 Kwizadanganikila kuna umulima uwo fana viyadanganike sekulu wako Haluni kuna umulima wa Holi, 51 kwaviya mweye wose waidi mukala hamunihuwila haulongozi ha Waisilaili. Vimukalile muna yamazi ya Meliba, habehi na bululu da Kadeshi, kuna ichuwala cha Sini, muleka kulagusa kwela kwangu hagati ya Waisilaili. 52 Kwizaiwona isi ili kuulongozi wako, mbali hwizakwingila muna iisi iyo yoniweng'ha Waisilaili.”