A Munaur a Pas
ane
Jon
A warwara talapor nigo
A pas ne e Jon i tumusi. I tumusi tetek a hane, ika a galis a tena tastasmanla la nuki mang a hane i warwara larlar ana lotu, pa na natnatna i warwara larlar ana tena tortorotla. Ning i warwara o e tasna hane a hane ning, i warwara ana lotu ana ning a hanua masik.
Ana pas ne i atai la mang lar mang artalai sur la, pa lar tai alar la kusun a asasongo na tena asaerla.
A tinan ana Munaur a Buk ane Jon:
A kamkama buk ne (1-3)
A marmaris (4-6)
A tumarang ana tena asasongo (7-11)
A ararop na warwara (12-13)
1
1 Iau e Jon, a ningnigo, a tumtumus tetek u, a hane ning e God i aslang pas u, pa na natnatum, ning a mang kol sur mulo ana momolna. Pa bel ia ka, mila rop otleng ning mila tasman a momolna. 2 Mila mang sur mulo anasa ana momolna ning i laun ondala, pa ir kes tikin taum ondala.
3 A marmaris, a wakak a toltol pa a bal molmol miting ta e God a Tamandala pa e Iesu Karisito e Natnalik, ir kes taum ondala ning dala kes ana momolna pa dala mang artalai sur dala.
Dalar mang artalai sur dala
4 A gas kol ning a longori mang na natnatum la mur a momolna, arlar ana warkurai e Tamandala ka saran tari tetek dala. 5 Pa onone a nunung u, wan, sur dalar mang artalai sur dala. Bel a tumus ta tona warkurai tetek u. A warkurai ka ning dala longor tari nating ot. 6 A marmaris i manglarne: Dalar mur a warkurai ane God. Anuna warkurai, ning nating mulo ka longor tari, i manglarne, mulor laun ana marmaris.
Mulor tai alar mulo kusun a tena asasongola
7 A galis a tena asasongola ning la puai mang e Iesu Karisito bel i hanot a barsan momol, la ka han sarara te na rakrakan hanua. A ngas a taraila ning, la na tena asasongo, pa la na hiruala ane Karisito. 8 Mulor tai alar mulo sur gong mulo suah sen a utna ning mulo ka titol suri. Ika, mulor tur rakrakai sur mulor kibas pas anumulo na kidol a arlou. 9 La ning la han masik kusun a asasaerla ane Karisito pa bel la muri, e God bel i kes onla. Ika la rop ning la mur a asasaerla ne, a Tamandala pa e Natnalik dia kes onla. 10 Ning tik ir han tetek mulo anal asasaer ning bel i arlar ana asasaer o e Karisito, gong mulo gasgas pasi pa mulo ben kasi ana numulo na rumaila. 11 Ning tik ir gasgas pasi, i harnangai ana nuna na laulau a titol.
A ararop a warwara
12 A galis a utna ning ar tumusi tetek mulo, ika bel a mang sur ar tumtumus ana paka buk pa pen. Ika a nuki mang ar geren mulo, par awara mulo, sur a gasgas anundala ir itna kol.
13 Na natnat a tasimhane ning e God ka aslang pasi, la saran anunla marmaris tetek u.