1 A mang sur mulor tasmani mang a titol rakrakai sur mulo pa a tarai Laodisia, pa la rop otleng ning bel mila arsongo pas. 2 A toli larning sur ir arakrakai anunla lalaun, pa lar kes na marmaris taum, sur lar bukus ana tnan tastasman rop, sur lar tasman a utna ane God, ning nating i kes mumun, esaning e Karisito ot. 3 A tastasman rop pa a wakak a nuknuk rop la arlar ana wakak a gongonla, pa la kes mumun o e Karisito.

4 A atongi larne tetek mulo, sur gong tik i asongo mulo an al namnamin na warwara. 5 A momolna, a kes masik kusun mulo ana palaok, ika ana inguk a kes taum ot o mulo, pa a gas ning a oroi mang mulo warkurai tostos anumulo na lalaun pa mulo tur rakrakai ana numulo na tortorot o e Karisito.

6 Mulo ka kibas pas e Karisito Iesu sur ir Leklek ana lalaun anumulo, i maining i wakak ning mulor laun onoi. 7 Anumulo lalaun ir suah a wakir o e Iesu sur ir gomo, pa mulor tur saot onoi. Mulor tur rakrakai ana tortorot larning di ka asaer tar mulo onoi, pa mulor bukus ana atong wakak tetek e God.

8 Mulor tai alar mulo, sur gong tik ir dot akes mulo ana tastasman anuna tarai ka, a asasaerla oros ka, pa a asasongo ka. A tastasman ning i hanot ka miting na asaerla ana tumtubunla nating pa miting na ingun laulaula mite na rakrakan hanua, pa bel ta e Karisito.

9 Anasa a lalaun rop ane God i kes ot o e Karisito ting na palaona. 10 Pa ana lalaun anumulo ting o e Karisito, mulo otleng mulo bukus ana lalaun rop. I ot i leklek tana ingunla rop ning la tong akes a rakrakai pa ingunla rop ning la tong akes a rakrakai sur lar warkurai. 11 O e Karisito, i kot talilis mulo, ika bel a ngas a kot talilis ning a tarai la toli ana kunla. A kot talilis ning e Karisito i toli mange, ka kepsen tar a lalaun turai. 12 Ning di baptais mulo, di por mulo taum o e Karisito. Pa mulo kamtur ulak taum onoi, anasa mulo tortorot ana rakrakai e God, esaning i akamtur ulak pas e Karisito kusun a minat.

13 Lanigo a ingumulo i mat, anasa mulo tol a toltol laulaula, pa belot di kepsen tar a lalaun turai anumulo. Ika onone, e God ka alaun pas mulo taum o e Karisito. I ka kepsen tar anundala na toltol laulaula rop. 14 Dala sira tabun longor ana Warkuraila ane Moses, pa a artitiu i kibas dala. Ika e God i kepsen tar a artitiu, ning i sai ahati saot na rakai kutus. 15 E God ka kepsen tar a rakrakai ana ingunla ning la tong akes a rakrakai pa a ingunla ning la tong akes a rakrakai sur lar warkurai. Pa saot na rakai kutus, i ame la namatana taraila rop, anasa i asangani mang ka tolsot pas la.

16 I maining gong mulo noren tar tik sur ir tiu mulo mang bel mulo tolsot pas a warkuraila ana asaning mulo ieni pa mulor gangi, o ana asaning mulo toli ana tnan pukakiar a lotu, o ana kalang ning i hanot kamna, o ana Pukakiar Sabat. 17 A warkuraila ne la arlar ka ana manar a utna ning ir hanot lamur. Ika a utna momol, e Karisito. 18 Ning tik i asasongo mang i anatarna pasi ana nuna ngas a lotu, pa i lotu tetek a angelola, pa i sira warwara ana tatatai ning i oroi, gong mulo noren tari sur ir tiu mulo. Anasa a ngas a barsan ning i rakan aleklek orosi ka ana nuknukna, ning i bukus taum ana lalaun turai. 19 I ka takutus kusun e Karisito, i ning a pukul a tarai a lotu, pa dala a palaona. E Karisito i arakrakai a didiah palaona sur lar nangan artalai la pa lar kes taum, arlar ana lolosla ning la tungtugus taum. Pa a kidol a palaona i gomo, larning e God i mang suri.

20 Ning mulo ka mat taum o e Karisito, mulo ka langolango kusun a asasaerla anun a ingun laulaula mite na rakrakan hanua. Sur asa ning mulo laun ulak ka larning mulo mite na rakrakan hanua pa mulo mur a warkuraila mite? 21 A warkuraila manglarne, “Gong mulo tongi! Gong mulo ieni! Gong mulo tuk tari!” 22 A warkuraila ne i warwara ana ututnala ning dala titol pas onoi, pa lamur bel la to pas ta utna, anasa a warkuraila ne pa asasaerla ne la hanot ka miting na tarai. 23 A momolna, a warkuraila ne a tarai la nuki mang ir arakrakai la ana nunla lotu, pa la anatarna pas la, pa la alaulau a palaonla, ika bel i nangan la. A warkuraila ne, la tatatai larning la hanot tagun a wakak a tastasman, ika bel la tolsot pasi sur lar sairas a lalaun turai.