1 ཏ༌ ཁྱོ༌ཞའེ༌ སྐུན༌དྲ༌གུན༌ལ༌ ཕུལ༌ཁན༌ནི༌ ཁར༌ཇིའི༌ སྐོར༌ལ༌ ཏྲི༌ཝ༌ ཏྲི༌ཁན༌བོའ༌, འོ༌ན༌ "ང༌དང༌ ཚང༌མ༌ལ༌ ཏེ༌བོའེ༌ སྐོར༌ལ༌ ཡོན༌ཏན༌ ཡོད༌ཏེ༌ ཨིན༌ནོག༌།" ཡོན༌ཏན༌ནི༌ ང༌དང༌གུན༌ལ༌ ཕོ༌སོ༌ ཚོར༌ ཅུག༌ག༌ནོག༌, ཨིན༌ནའང༌ ཆོས༌ཚོགས༌ ཤེད༌ཅན༌ ཆ༌ཅུག༌ཁན༌ ནི༌ ཅེས༌པ༌བོ༌ ཨིན༌ནོག༌། 2 "ང༌ ཅི༌ཚང༌མ༌ ཤེས༌སད༌" ཟེར༌ཁན༌གུན༌ལ༌ ངོས༌པོའ༌ ཏ༌རུང༌ མ༌མང༌པོ༌ ཤེས༌གོ༌ཤེས༌ ཡོད༌ཏེ༌ ཨིན༌ནོག༌། 3 ཨིན༌ནའང༌ དཀོན༌མཆོག༌ག༌ ཅེས༌པ༌ ཅོ༌ཁན༌གུན༌ ཉམ༌པོ༌ ཁོང༌ངི༌ བྲེལ༌ བོར༌ར༌ ཛད༌ཏེ༌ ཁྱེན༌ན༌ ཛད༌ད༌ནོག༌།

4 ཏ༌ སྐུན༌དྲ༌ ཆོད༌པ༌ ཕུལ༌ཁན༌ནི༌ ཁར༌ཇི༌ ཟའ༌ཅེས༌སི༌ སྐོར༌ལ༌ ཟེར༌ན༌, སྐུན༌དྲ༌གུན༌ ཅའང༌ མན༌ཁན༌ ཡང༌ དཀོན༌མཆོག༌ ཅིག༌ཅིག༌ ཞུགས༌ཏེ༌ ཡོད༌ཁན༌བོ༌ ང༌དང༌ ཚང༌མ༌ལ༌ གྱུས༌ཨིན༌ནོག༌། 5 ནམ༌ཁའ༌ ཡ༌ ཇིག༌རྟེན༌ནི༌ ནང༌ང༌, མང༌པོ༌ཞིག༌ག༌ དཀོན༌མཆོག༌ ཟེར༌ར༌ནོག༌, ༼ཏན༌ཏན༌ལ༌ མི༌ མང༌པོའེ༌ དཀོན༌མཆོག༌ དང༌ གཙོ༌བོ༌ མང༌པོ༌ཞིག༌ག༌ ཅོལ༌ལ༌ནོག༌༽། 6 ཨིན༌ནའང༌ ཅི༌ཚང༌མ༌ ཞང༌ང༌ ཛད༌ཁན༌ནི༌ ཡབ༌ དཀོན༌མཆོག༌ ཅིག༌ཙ༌ ཨིན༌ནོག༌, ཡང༌ ང༌དང༌གུན༌ནི༌ ཁོང༌ངི༌ ཕིའ༌ མི༌ཚེ༌ ཕུད༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌། ཡང༌ ཡེ༌ཤུ༌ མ༌ཤི༌ཀ༌ གཙོ༌བོ༌ ཅིག༌, ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཅོའ༌ ཛད༌ཁན༌ དང༌ ང༌དང༌གུན༌ལ༌ མི༌ཚེ༌ སལ༌ལ༌ ཛད༌ཁན༌བོའང༌ གྱུས༌ཨིན༌ནོག༌།

7 ཅི༌ཨིན༌ནའང༌ ཏད༌པ༌ཅན༌ ཁ༌ཅིག༌ག༌ ཏེ༌ ཚང༌མ༌ གྱུས༌ མེད༌པ༌ ཨིན༌ནོག༌། ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཏ༌རུང༌ངའང༌ སྐུན༌དྲ༌གུན༌ སོན༌ཏེའ༌ ཨིན༌ནོག༌ སམ༌དུག༌། ཏེན༌ན༌བོའེ༌ཕིའ༌ ཏེ༌གུན༌ནི༌ སེམས༌སི༌ ནང༌ང༌ སྐུན༌དྲ༌གུན༌ལ༌ ཕུལ༌ཁན༌ནི༌ ཟན༌ ཟའ༌ན༌, སྡིག༌པ༌ ཅོས༌ཏེ༌ ཨིན༌ སམ༌མ༌ནོག༌། 8 ཟན༌ནི༌ ང༌དང༌གུན༌ དཀོན༌མཆོག༌ ཉམ༌པོ༌ ཉེ༌མོ༌ གྱུར༌ ཅུག༌ག༌ མ༌ནོག༌། ང༌དང༌གུན༌ནི༌ ཟའ༌ནའང༌ ཡ༌ མ༌ཟན༌ནའང༌, དཀོན༌མཆོག༌གི༌ སྐུན༌དུན༌ལ༌ ཅའང༌ སྟོར༌ཅེས༌ ཡ༌ ཐོབ༌ཅེས༌ མེད༌ཀྱག༌། 9 ཨིན༌ནའང༌ ཁྱོ༌ཞ༌གུན༌ལ༌ ཏེ༌བོའེ༌ ནང༌ང༌ རང༌ཝང༌ ཡོད༌ཅེས༌པོའེ༌, ཁྱོ༌ཞ༌གུན༌ནི༌ ཏད༌པའེ༌ ནང༌ང༌ འུ༌ཐུགས༌ཅན༌ནི༌ སྤུན༌ཞིག༌ སྡིག༌པའེ༌ ནང༌ང༌ གྱེལ༌ མི༌ཅུག༌ཅེས༌ལ༌ ཤང༌ ཅོ༌ཤིག༌། 10 སྤེར༌ན༌, གལ༌ཏེས༌ ཁྱོ༌རང༌ ཡོན༌ཏན༌ཅན༌བོའེ༌ ཏེ༌ སྐུན༌དྲའེ༌ ཆོད༌ཁང༌ངི༌ ནང༌ནེ༌ ཟན༌ ཟའ༌ ཐོངས༌ཏེ༌, ཏད༌པ༌ འུ༌ཐུགས༌ཅན༌ནི༌ སྐུན༌དྲ༌ ཕུལ༌ཁན༌ནི༌ ཏེ༌ ཟན༌ ཟའ༌ཅེས༌ལ༌ ཧམ༌པ༌ སྐྱེ༌ཏེ༌ ཁོ༌རང༌ངི༌ སམ༌ཁན༌བོའེ༌ གྱབ༌གལ༌ ཅོས༌ཏེ༌ མ༌ནོག༌ག༌? 11 ཏེ༌ནེ༌ ཁྱོ༌ཞ༌གུན༌ནི༌ ལག༌ག༌ ཡོད༌ཁན༌ནི༌ ཡོན༌ཏན༌བོའེ༌, ཏེ༌ ཏད༌པ༌ འུ༌ཐུགས༌ཅན༌ སྤུན༌ནི༌ ཏད༌པ༌བོ༌ མེད༌ཁན༌ ཅོའ༌ནོག༌, ཀ༌བོའེ༌ ཕིའ༌ མ༌ཤི༌ཀ༌ ཀྲོངས༌ས༌ ཛདས༌། 12 ཏེ༌ཟུག༌ ཅོ༌ན༌, ཁྱོ༌ཞའེ༌ སྡིག༌པ༌ ཅོས༌ཏེ༌ ཨིན༌ནོག༌ སམ༌ཁན༌ནི༌ སྤུན༌བོའ༌ ཏེ༌བོ༌ ཅོ༌ཅེས༌ལ༌ སྤོས༌པ༌ ཏངས༌ཏེ༌, ཁྱོ༌ཞའེ༌ མ༌ཤི༌ཀའེ༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌། 13 ཏེ༌བོའེ༌ཕིའ༌ གལ༌ཏེས༌ ཤ༌ ཟའ༌ཅེས༌པོའེ༌, ངའེ༌ ང༌རང༌ངི༌ སྤུན༌ཞིག༌ག༌ སྡིག༌པ༌ ཅོ༌ཅུག༌གད༌ན༌, ཏེ༌ནེ༌ ངའེ༌ ཤི༌ཤི༌ ཚོག༌པ༌ལ༌ ཤ༌ མ༌ནེ༌ མི༌ཟ༌, ཅིའ༌ཟེར༌ན༌ ངའེ༌ ང༌རང༌ངི༌ སྤུན༌ཞིག༌ག༌ སྒག༌གྱབ༌ཅུག༌ཉིན༌ མེ༌རག༌།