3
ཡེ༌ཤུ༌ ནི༌ མོ༌ཟེས༌སི༌ སང༌ ཐོའ༌ ཨིན༌ནོག༌།
3:1 ནེ༌ 6
1 ཏེ༌བོའེ༌ཕིའ༌ དམ༌པ༌ སྤུན༌གུན༌, དཀོན༌མཆོག༌གི༌ གྱལ༌སྲིད༌དི༌ ནང༌ང༌ བོད༌ད༌ ཛད༌ཁན༌ནི༌ ཕྲོ༌པ༌གུན༌, སྲན༌ཏྲེ༌ སྣང༌ང༌ ཏངས༌ཏེ༌ ཡེ༌ཤུའི༌ སྐོར༌ལ༌ སམ༌བ༌ ཏོང༌ཤིག༌། ཁོང༌ དཀོན༌མཆོག༌གི༌ ལོན༌ཁྱོང༌ང༌ ཛད༌ཁན༌ དང༌ བླ༌མ༌ ཆེན༌མོ༌ ཨིན༌ཁན༌ ཏད༌པའེ༌ སྤང༌པོ༌ ང༌ཞའེ༌ ཏངས༌ཏེ༌ ཨིན༌། 2 ཡང༌ ཁོང༌ ནི༌, ཁོང༌ ལྡམ༌མ༌ ཛད༌ཁན༌ནི༌ དཀོན༌མཆོག༌ག༌ ཨིད༌ཤེས༌ཅན༌ ཨིན༌ནོག༌, ཀ༌ཟུག༌གི༌ དཀོན༌མཆོག༌གི༌ མི༌གུན༌ལ༌ ཞབ༌སྟོག༌ ཞུ༌ཅེས༌སི༌ ནང༌ང༌ ལུང༌སྟོན༌པ༌ མོ༌ཟེས༌ ཨིད༌ཤེས༌ཅན༌ཞིག༌ ཡོད༌པིན༌།
3 ཡེ༌ཤུའ༌ མོ༌ཟེས༌སི༌ སང༌ མང༌ང༌ སྤལ༌ ཐོབ༌གོ༌ཤེས༌སི༌ འོས༌པ༌ ཨིན༌ནོག༌, ཀ༌ཟུག༌གི༌ ཁང༌པ༌ རྩིག༌ཁན༌ནི༌ མི༌བོའ༌, ཁང༌པའེ༌ སང༌ མང༌ང༌ རྩི༌ཝའེ༌ འོས༌པ༌ ཡོད༌། 4 ཁང༌པ༌ ཚང༌མ༌, སུ༌ནའང༌ སུ༌ཞིག༌གི༌ རྩིགས༌ཏེ༌ ཨིན༌ནོག༌, ཨིན༌ནའང༌ ཅི༌ཚང༌མ༌ རྩིག༌ག༌ ཛད༌ཁན༌བོ༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌། 5 ཏ༌ མོ༌ཟེས༌ ནི༌, དཀོན༌མཆོག༌གི༌ མི༌གུན༌ལ༌ ཞབ༌སྟོག༌པ༌ ཨིད༌ཤེས༌ཅན༌ཞིག༌ ཨིན༌པིན༌། ཁོང༌ངི༌ ཞབ༌སྟོག༌པོ༌ ནི༌, ཡོང༌ཅེས༌ཅན༌ནི༌ ཏུས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཅེས༌ཅན༌ནི༌ སྤེ༌བོ༌, ནག༌ཤའེ༌ ཚུལ༌ལ༌ ཨིན༌པིན༌། 6 ཨིན༌ནའང༌ མ༌ཤི༌ཀ༌ དཀོན༌མཆོག༌གི༌ སྲས༌ ཨིན༌ པ༌སང༌, ཁོང༌ དཀོན༌མཆོག༌གི༌ ཁང༌པ༌ གང༌པོའེ༌ ཁག༌ཁུར༌བོ༌ ཞུགས༌ཏེ༌ ཨིན༌ནོག༌། ཡང༌ གལ༌ཏེས༌ ང༌དང༌གུན༌ནི༌ སྤོས༌པ༌ དང༌ མ༌ཤི༌ཀའེ༌ ནང༌ང༌ རེ༌ཝ༌ གུན༌ སྟན༌པོ༌ བོར༌ན༌, ཏེ༌ནེ༌ ང༌དང༌གུན༌ དཀོན༌མཆོག༌གི༌ ཁང༌པ༌བོ༌ ཨིན༌ནོག༌།
ཏད༌པ༌ མི༌ཕང༌ཅེས༌ལ༌ སྤང༌ པུདས༌།
3:7 ནེ༌ 19
7 ཏེན༌ན༌བོའེ༌ཕིའ༌ དམ༌པའེ༌ ཐུག༌ཉིད༌དི༌ མོལས༌,
"དི༌རིང༌ ཁྱོ༌ཞ༌གུན༌ལ༌ ཁོང༌ངི༌ སུང༌སྐད༌པོ༌ ཚོར༌ ཟ༌ནེ༌,
8 ཁྱོ༌ཞ༌གུན༌ནི༌ སྙིང༌ སྐྱོང༌པོ༌ གྱུར༌ མ༌ཅུག༌ཤིག༌,
ཀ༌ཟུག༌གི༌ ཨིས༌ར༌ཨེལ༌པ༌གུན༌ནི༌ རི༌སྟོང༌ངི༌ ནང༌ང༌ ངའེ༌ ཟོད༌པའ༌
ཚོད༌ ལྟས༌ཏེ༌ ངའ༌ ངོ༌ལོག༌ ཅོ༌ ཟ༌ནེ༌ ཅོས༌,
9 ཞན༌ ལོ༌ ཞིབ༌ཅུ༌, ཁྱོ༌ཞའེ༌ ཕ༌མེས༌པོ༌གུན༌ནི༌ ངའེ༌ ལྟས༌གུན༌
ཐོངས༌ཏེའང༌ ཁོང༌གུན༌ནི༌ ངའེ༌ ཟོད༌པའེ༌ ཚོད༌ ལྟས༌།
10 ཏེན༌ན༌བོའེ༌ཕིའ༌ ང༌ ཏེ༌གུན༌ནི༌ཀ༌ སྲོ༌ ཡོངས༌ ཡང༌ ངའེ༌ ཟེར༌པིན༌
"ཁོང༌གུན༌ནི༌ སྙིང༌ ཏུས༌གྱུན༌ ངའེ༌ ཀ༌ནེ༌ གྱུར༌ཏེ༌ ཐག༌རིང༌ང༌ ཆ༌རུག༌།
ངའེ༌ ཅོ༌ཅེས༌ལ༌ ཟེར༌ཁན༌གུན༌ ཁོང༌གུན༌ནི༌ ཅོའ༌ མི༌རུག༌།
11 ང༌ སྲོ༌ ཡོངས༌ཏེ༌ ནའ༌ ཁུར༌ཏེ༌ ཟེར༌པིན༌ "ངའེ༌ ངལ༌ཚོ༌སའེ༌
ནས༌སའེ༌ ནང༌ང༌ ཁོང༌གུན༌ མ༌ནེ༌ ཡོང༌ མི༌ཉན༌།"* 3:11 སུང༌གུར༌རི༌ སྤེ༌ཆའེ༌ 95:7 ནེ༌ 11
12 ཅེས༌པའེ༌ སྤུན༌གུན༌, ཁྱོ༌ཞ༌རང༌ངི༌ སྙིང༌གུན༌ ངན༌པ༌ དང༌ ཏད༌པ༌ མེད༌ཁན༌ མི༌གྱུར༌ཅེས༌ལ༌ ཤང༌ ཅོ༌ཤིག༌, ཀ༌བོའེ༌ ཞས༌ཏེ༌ ཁྱོ༌ཞ༌གུན༌ སོན༌པོ༌ དཀོན༌མཆོག༌ནེ༌ ཐག༌རིང༌ང༌ ཁྱེར༌ར༌ནོག༌། 13 ཨིན༌ནའང༌ ཁྱོ༌ཞའ༌ ཅིག༌གའང༌ སྡིག༌པའེ༌ གོབ༌སྐོར༌རི༌ ནང༌ང༌ སོང༌ཏེ༌ དཀོན༌མཆོག༌གི༌ གྱབ༌གལ༌ལ༌ སྙིང༌གུན༌ སྐྱོང༌པོ༌ མི༌གྱུར༌ཅེས༌ལ༌, ཁྱོ༌ཞའེ༌ ཞག༌ཏང༌, ཅིག༌ དང༌ ཅིག༌ག༌ སྤོས༌པ༌ ཏང༌གོས༌, ཐོ༌རེ༌ ཕིའ༌ སྲུངས༌ཏེ༌ མི༌དུག༌ དི༌རིང༌རང༌ ཅོས༌། 14 ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ ཀ༌ཟུག༌ གོ༌མ༌ ང༌དང༌ངི༌ ཏད༌པ༌བོ༌ དཀོན༌མཆོག༌གི༌ ནང༌ང༌ སྟན༌པོ༌ ཡོད༌ད༌ ཙོགས༌ལ༌, གལ༌ཏེས༌ ང༌དང༌ ཐའ༌མའེ༌ ཏུས༌ ཚོག༌པ༌ ཨིད༌ཤེས༌ཅན༌ ལུས༌ན༌, ཏེ༌ནེ༌ ང༌དང༌གུན༌ནའང༌ མ༌ཤི༌ཀའེ༌ ནོར༌སྐལ༌བོ༌ བགོས༌ཏེ༌ ཐོབ༌ཨིན༌། 15 དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
"དི༌རིང༌, ཁྱོ༌ཞ༌གུན༌ལ༌ ཁོང༌ངི༌ སུང༌སྐད༌པོ༌ ཚོར༌ ཟ༌ནེ༌,
ཁྱོ༌ཞ༌གུན༌ནི༌ སྙིང༌ སྐྱོང༌པོ༌ གྱུར༌ མ༌ཅུག༌ཤིག༌,
ཀ༌ཟུག༌གི༌ ཨིས༌ར༌ཨེལ༌པ༌གུན༌ནི༌ ངོ༌ལོག༌ ཅོ༌ ཟ༌ནེ༌ ཅོས༌།"† 3:15 སུང༌གུར༌རི༌ སྤེ༌ཆའེ༌ 95:7,8
16 ཏ༌ དཀོན༌མཆོག༌གི༌ སུང༌སྐད༌པོ༌ ཚོར༌ཏེའང༌ ཁོང༌ང༌ ངོ༌ལོག༌ ཅོ༌ཁན༌གུན༌ སུ༌ ཨིན༌ནོག༌? ཅི༌! ཏེ༌གུན༌ མོ༌ཟེས༌སི༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཁྱོང༌ཁན༌ ཚང༌མ༌ མ༌ནོག༌ག༌? 17 ཡང༌ ལོ༌ ཞིབ༌ཅུ༌ དཀོན༌མཆོག༌ག༌ ཐུགས༌སྲོ༌ ཞངས༌ཤུག༌ཁན༌གུན༌ སུ༌ ཨིན༌ནོག༌? ཅི༌! ཏེ༌ མི༌གུན༌ སྡིག༌པ༌ ཅོ༌ཁན༌གུན༌ ཡང༌ ཏེ༌གུན༌ནི༌ རོ༌ རི༌སྟོང༌ངི༌ ནང༌ང༌ ལུས༌ཁན༌གུན༌ མ༌ནོག༌ག༌? 18 ཡང༌ དཀོན༌མཆོག༌གི༌ ཏེ༌གུན༌ ཁོང༌ངི༌ ངལ༌ཚོ༌སའེ༌ ནས༌སའེ༌ ནང༌ང༌ མ༌ནེ༌ ཞུགས༌ མི༌ཉན༌ མོལ༌ཏེ༌ ནའ༌ ཁུར༌ར༌ ཛད༌ ཟ༌ནེ༌, སུ༌ ཉམ༌པོ༌ ཞལ༌ཏ༌ སལ༌ལ༌ ཛད༌ཏེ༌ ཨིན༌ནོག༌? ཅི༌ ཏེ༌ མི༌གུན༌ ཁོང༌ངི༌ ཁའ༌ མ༌ཉན༌ཁན༌གུན༌ མ༌ནོག༌ག༌? 19 ཏེ༌བོའེ༌ཕིའ༌ ང༌དང༌གུན༌ནི༌ ཐོང༌ང༌ནོག༌, ཁོང༌གུན༌ནི༌ ཏད༌པ༌ མི༌ཅོ༌ཅེས༌པོའེ༌ ཞས༌ཏེ༌, ཁོང༌གུན༌ ངལ༌ཚོ༌སའེ༌ ནས༌སའེ༌ ནང༌ང༌ ཞུགས༌ མ༌ཉན༌ན༌ ཨིན༌པིན༌།