1 ཏད༌པ༌ ནི༌, རེ༌ཝ༌ ཅོ༌ཁན༌བོ༌ དྲན༌དྲའ༌ གྲུབ༌ཅེས༌སི༌ ལོ༌ཁྱེལ༌ ཡོད༌ཅེས༌པོ༌ ཨིན༌ནོག༌། ཡང༌ ཏེ༌བོའེ༌ ང༌དང༌ང༌ མ༌ཐོང༌ཁན༌གུན༌ དེན༌བ༌ ཨིན༌ཁན༌བོ༌ ཏན༌ཏན༌ ཅོའ༌ནོག༌། 2 ཏེན༌ན༌ ཏད༌པ༌བོ༌ གྱུད༌ཏེ༌, ང༌དང༌ངི༌ ཕ༌མེས༌པོ༌གུན༌ལ༌ དཀོན༌མཆོག༌གི༌ ཆོགས༌སྐྱོར༌ ཐོབ༌།

3 ཛམ༌བུ༌ལིང༌ གང༌པོ༌ དཀོན༌མཆོག༌གི༌ བཀའ༌ ནང༌ཞིན༌ལ༌ ཆགས༌, དག༌ས༌ ང༌དང༌གུན༌ལ༌ ཐོང༌ཨིན༌ ཡོད༌ཁན༌ནི༌ ཛམ༌བུ༌ལིང༌བོ༌, སྔུན༌ལ༌ ཡོད༌ཁན༌ རིག༌གི༌ ཀ༌ནེ༌ མ༌ཞངས༌ཁན༌བོ༌, ང༌དང༌གུན༌ནི༌ ཏད༌པ༌ ཅོ༌ཅེས༌པོ༌ གྱུད༌ཏེ༌ ཧ༌གོའ༌ནོག༌།

4 ཏད༌པ༌ ཡོད༌ཅེས༌པོའེ༌, ཨ༌བེལ༌ལི༌ དཀོན༌མཆོག༌ག༌ ཁོ༌རང༌ངི༌ ཨ༌ཅོ༌ ཀ༌ཡིན༌ནི༌ སང༌ ཆོད༌པ༌ མང༌ང༌ གྱལ༌ལ༌ ཕུལས༌། ཏེན༌ན༌བོའེ༌ ཞས༌ཏེ༌ ཨ༌བེལ༌ལི༌ ཆོད༌པ༌གུན༌ལ༌ ཆོགས༌སྐྱོར༌ ཛད༌ཏེ༌ དཀོན༌མཆོག༌གི༌ ཁོའ༌ མི༌ དྲང༌པོ༌ ཐེའ༌ ཛདས༌། ཨ༌བེལ༌ མ༌ ཏུས༌ མང༌པོའེ༌ སྔུན༌ལ༌ ཤི༌ཏེ༌ མེད༌ནའང༌, ཁོའེ༌ ཏད༌པ༌བོ༌ ང༌དང༌གུན༌ནི༌ ཕིའ༌ ཏ༌རུང༌ངའང༌ སྤེ༌ཞིག༌ ཨིན༌ནོག༌།

5 ཏད༌པ༌ ཡོད༌ཅེས༌པོའེ༌, ཧ༌ནོག༌ * 11:5 ཡང༌ན༌ ཨེ༌ནོག༌ ཟེར༌ཁན༌ནི༌ མི༌བོ༌ ཟེར༌ཁན༌ནི༌ བུ༌ཚ༌བོ༌ ཤི༌ མ༌ཤིའ༌, ནམ༌ཁའ༌ ཁྱེར༌ར༌ ཛདས༌- "ཁོ༌ ཇིག༌རྟེན༌ནི༌ ནང༌ང༌ མ༌ཐོབ༌ ཅིའ༌ཟེར༌ན༌ དཀོན༌མཆོག༌གི༌ ཁོ༌ ཁྱེར༌ར༌ ཛདས༌ † 11:5 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 5:24 ", ནམ༌ཁའ༌ ཁྱེར༌རི༌ སང༌ སྔུན༌ལ༌ ཁོའ༌ དཀོན༌མཆོག༌ ཐུགས༌ཐད༌ཅུག༌ག༌ ཛད༌ཁན༌ནི༌ མི༌ཞིག༌ ཐེའད༌པིན༌། 6 ཡང༌ ཏད༌པ༌ མེད༌པ༌ དཀོན༌མཆོག༌ ཐུགས༌ཐད༌ ཅུག༌ཉན༌ན༌ མ༌ནོག༌། ཁོང༌ ཡོད༌ས༌ ཡོང༌ཉིན༌ ཡོད༌ཁན༌གུན༌ནི༌, དཀོན༌མཆོག༌ ཞུགས༌ཏེ༌ ཡོད༌ཁན༌ དང༌ སྙིང༌ནེ༌ ཙལ༌ཁན༌གུན༌ལ༌ སོལ༌རས༌ སལ༌ཅེས༌པོའ༌ ཏད༌པ༌ ཅོ༌གོས༌།

7 ཏད༌པ༌ ཡོད༌ཅེས༌པོའེ༌, ནོ༌ཨཱའེ༌ ཁོ༌རང༌ངི༌ ནང༌ཚངས༌གུན༌ ཆུ༌ལོག༌ནེ༌ སྐྱོབ༌ཅེས༌སི༌ ཕིའ༌ གྲུ༌ཟིང༌ ཆེན༌མོ༌ཞིག༌ རྩིགས༌། ཁོའེ༌ ཡོང༌ཅེས༌ཅན༌ནི༌ ཇིགས༌པ༌གུན༌ནི༌ སྐོར༌ལ༌ སྤང༌པུད༌ད༌ ཛད༌ཁན༌ནི༌ དཀོན༌མཆོག༌གི༌ ཁའ༌ཉནས༌། ཏད༌པའེ༌ ཞས༌ཏེ༌ ནོ༌ཨཱའེ༌ གྲུ༌ཟིང༌ངི༌ ནང༌ང༌ མ༌ཞོན༌ཁན༌ནི༌ ཇིག༌རྟེན༌པ༌གུན༌ནི༌ཀ༌ དཀོན༌མཆོག༌གི༌ ཁྲིམས༌ཅད༌ ཁྱོངས༌། ཡང༌ ཏད༌པ༌ གྱུད༌ཏེ༌, དཀོན༌མཆོག༌གི༌ ནོ༌ཨཱ༌ མི༌ དྲང༌པོ༌ཞིག༌ ཐེའ༌ ཛདས༌།

8 ཏད༌པ༌ ཡོད༌ཅེས༌པོའེ༌, ཨབ༌ར༌ཧམ༌མི༌ དཀོན༌མཆོག༌གི༌ ཁའ༌ཉནས༌, ནམ༌ དཀོན༌མཆོག༌གི༌ ཁོའ༌ རང༌ངི༌ ཕ༌ཡུལ༌ ཕངས༌ཏེ༌, ཁོང༌ངི༌ ཁོའ༌ ནོར༌སྐལ༌ལ༌ སལ༌ལ༌ ཛད༌ཅེས༌སི༌ ཏེ༌ ཡུལ༌བོའ༌ སོང༌ མོལས༌, ཡང༌ ཀ༌རུ༌ ཆ༌ཅེས༌པོ༌ གྱུས༌མེད༌ཏེའང༌ ཁོ༌ སོང༌། 9 ཏད༌པ༌ ཡོད༌ཅེས༌པོའེ༌ ཨབ༌ར༌ཧམ༌, ཞལ༌ཆད༌ ཛད༌ཁན༌ནི༌ ཡུལ༌བོའ༌ ལེབ༌བ༌ཅིག༌, ཞན༌ཡུལ༌ལི༌ མི༌ ཙོགས༌ལ༌ ཁོ༌ ཀུར༌རི༌ ནང༌ང༌ དུགས༌། ཏེན༌ན༌ ཙོགས༌ ཨི༌སཱག༌ དང༌ ཡ༌ཀོབ༌བིའང༌ ཅོས༌, ཀ༌གུན༌ལ༌ ཏེན༌ན༌ ཞལ༌ཆད༌པོ༌ ནོར༌སྐལ༌ལ༌ ཐོབ༌ཏེ༌ ཨིན༌ནོག༌། 10 ཨབ༌ར༌ཧམ༌མི༌ ལོ༌ཁྱེལ༌ ཉམ༌པོ༌ ཏུས༌གྱུན༌ ལུས༌ཤེས༌ཅན༌ནི༌ མག༌ལྡན༌ ཡོད༌ཁན༌ནི༌ གྱལ༌ས༌, དཀོན༌མཆོག༌གི༌ ཁོང༌རང༌ངི༌ ཐབས༌ ནང༌ཞིན༌ རྩིག༌ག༌ ཛད༌ཁན༌བོ༌ ཐོབ༌ཅེས༌ལ༌ ལྟའད༌པིན༌།

11 ཏད༌པ༌ ཡོད༌ཅེས༌པོའེ༌, ཨབ༌ར༌ཧམ༌, མ༌རྒད༌པོ༌ སོང༌ཏེ༌ ཡང༌ སཱ༌ར༌ མ༌ནེ༌ ཕྲུ༌གུ༌ མ༌ཇོར༌ར༌ ཨིན༌ཏེའང༌, དཀོན༌མཆོག༌གི༌ ཨབ༌ར༌ཧམ༌ ཨ༌བ༌ གྱུར༌ ཅུག༌ག༌ ཛདས༌, ཅིའ༌ཟེར༌ན༌ ཁོའེ༌ ཞལ༌ཆད༌ ཛད༌ཁན༌ནི༌ དཀོན༌མཆོག༌ ཨིད༌ཤེས༌ཅན༌ ཞུགས༌ཏེ༌ ཨིན༌ཁན༌བོ༌ ཐེས༌། 12 སོང༌པ༌སང༌ ཨབ༌ར༌ཧམ༌ རྒད༌པོ༌ ཤི༌ཅེས༌སི༌ ཉེ༌མོའ༌ ལེབས༌ཏེའང༌, ཁོའེ༌ པུར༌གྱུད༌གུན༌ ནམ༌མི༌ སྐར༌མ༌ ཙོགས༌ལ༌ མང༌པོ༌ དང༌ གྱ༌ཚོའེ༌ ཐའ༌མའེ༌ པེ༌མ༌ ཙོགས༌ རྩི༌ མི༌ཉན༌ཅེས༌ ཕེལ༌།

13 ཤི༌ཅེས༌སི༌ ཞག༌ ཚག༌པའང༌, ཏེ༌ མི༌ཚང༌མའེ༌ དཀོན༌མཆོག༌གི༌ ཞལ༌ཆད༌ ཛད༌ཁན༌བོའེ༌ ནང༌ང༌ ཏད༌པ༌ ཅོའད༌པིན༌། ཁོང༌གུན༌ལ༌ ཏེ༌ ཞལ༌ཆད༌ ཛད༌ཁན༌བོ༌ མ༌ཐོབ༌བ༌ ཨིན༌ནའང༌ ཁོང༌གུན༌ནི༌ ཏེ༌བོ༌ ཐག༌རིང༌ཞིག༌ནེ༌ ཐོང༌ཏེ༌ གའ༌སུས༌ ཞུས༌། ཡང༌ ཁོང༌རང༌གུན༌ལ༌ འི༌ ཇིག༌རྟེན༌ནི༌ཀ༌ ཞན༌མའེ༌ ཡུལ༌ལི༌མི༌ དང༌ རེ༌བོ༌པ༌ གུན༌ ཟེར༌རད༌པིན༌། 14 ཏེ༌ཟུག༌ ཟེར༌ཁན༌གུན༌ནི༌, ཁོ༌རང༌གུན༌ནི༌ ཨིན༌ ཟེར༌ཉན༌ཅེས༌ཅན༌ནི༌ ཡུལ༌ཞིག༌ ཙལ༌ལ༌ནོག༌། 15 གལ༌ཏེས༌ ཁོང༌གུན༌ནི༌ ཕངས༌ཏེ༌ ཡོངས༌ཁན༌ནི༌ ཕ༌ཡུལ༌བོ༌ སམ༌མད༌པིན༌ན༌, ཏེ༌ནེ༌ ཁོང༌གུན༌ལ༌ ལོགས༌ཏེ༌ ཆ༌ཅེས༌སི༌ སྐབས༌ ཐོབ༌ཏེ༌ ཡོད༌གྲོ༌། 16 ཨིན༌ནའང༌ ཁོང༌གུན༌ནི༌ མང༌ང༌ གྱལ༌ལ༌ ཡུལ༌ཞིག༌གི༌ ཕིའ༌ དོད༌པ༌ ཅོའད༌པིན༌, ནམ༌ཁའེ༌ ནང༌ང༌ ཡོད༌ཁན༌བོའ༌། ཏེན༌ན༌བོའེ༌ཕིའ༌ དཀོན༌མཆོག༌, ཁོང༌གུན༌ནི༌ དཀོན༌མཆོག༌ ཞུ༌ཅེས༌ལ༌, ཁྲེལ༌ལ༌ མ༌ཛད༌, མ༌ཚད༌ ཁོང༌ངི༌ ཁོང༌གུན༌ནི༌ ཕིའ༌ གྱལ༌ས༌ཞིག༌གའང༌ རྩིག༌ག༌ ཛདས༌།

17 ཏད༌པ༌ ཡོད༌ཅེས༌པོའེ༌, དཀོན༌མཆོག༌གི༌ ཨབ༌ར༌ཧམ༌མ༌ ཚོད༌ལྟའ༌ ཛད༌ ཟ༌ནེ༌, ཁོའེ༌ ཨི༌སཱག༌གའང༌ སྲོག༌གི༌ ཆོད༌པ༌ ཕུལས༌། དཀོན༌མཆོག༌གི༌ ཞལ༌ཆད༌ ཐོབ༌ཁན༌ནི༌ ཨབ༌ར༌ཧམ༌, ཁོ༌རང༌ངི༌ བུ༌ཚའ༌ ཅིག༌ཅིག༌པོའང༌ སྲོག༌གི༌ ཆོད༌པ༌ ཕུལ༌ཅེས༌ལ༌ གྲལ༌གྲིག༌ ཡོད༌པིན༌། 18 ཞན༌ དཀོན༌མཆོག༌གི༌ ཁོའ༌ མོལ༌ལ༌ ཛད༌ནའང༌, "ཨི༌སཱག༌ གྱུད༌ཏེ༌ ཁྱོ༌རང༌ངི༌ པུར༌གྱུད༌གུན༌ ཕེལ༌ཨིན༌། ‡ 11:18 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 21:12 " 19 ཨབ༌ར༌ཧམ༌མི༌ སམ༌, ཨི༌སཱག༌ ཤི༌ནའང༌ དཀོན༌མཆོག༌གི༌ ཁོ༌ ཡང༌སྐྱར༌ སོན༌ཏེའ༌ ལང༌ང༌ ཛད༌ཉན༌ཨིན༌། ཡང༌ ལྟས༌ཏེ༌ ཁྱེར༌ན༌ ཏེ༌བོ༌ བྱུང༌, ཨབ༌ར༌ཧམ༌མ༌ ཁོ༌རང༌ངི༌ བུ༌ཚ༌ ཤི༌ཏེ༌ སྟིང༌ནེ༌ ལོགས༌ཏེ༌ ཐོབ༌ཁན༌ ཙོགས༌ ཨིན༌ནོག༌།

20 ཏད༌པ༌ ཡོད༌ཅེས༌པོའེ༌, ཨི༌སཱག༌གི༌ ཁོ༌རང༌ངི༌ བུ༌ཚ༌ ཡ༌ཀོབ༌ དང༌ ཨི༌སུ༌ ཉིས༌ཀོའ༌ ཁོང༌གུན༌ནི༌ ཡོང༌ཅེས༌ཅན༌ནི༌ ཏུས༌སི༌ ཕིའ༌ ཅིན༌ལབས༌ སལས༌།

21 ཏད༌པ༌ ཡོད༌ཅེས༌པོའེ༌, ཡ༌ཀོབ༌ ཤི༌ ཟ༌ནེ༌, ཁོའེ༌ ཡོ༌སེབ༌བི༌ ཕྲུ༌གུ༌ ཉིས༌ཀོའ༌ ཅིན༌ལབས༌ སལས༌, ཡང༌ ཁོ༌ རྒད༌པོ༌ ཆ༌ནའང༌ ཁོ༌རང༌ངི༌ གྲུལ༌ཅེས༌སི༌ བེར༌ཀ༌ སྟེན༌ཏེ༌ དཀོན༌མཆོག༌ག༌ ཅོལས༌།

22 ཏད༌པ༌ ཡོད༌ཅེས༌པོའེ༌, ཡོ༌སེབ༌ ཤི༌ཨིན༌ ཡོད༌དི༌ ཏུས༌ལ༌, ཁོའེ༌ ཨིས༌ར༌ཨེལ༌པ༌གུན༌ ཨི༌ཇིབ༌བི༌ ཡུལ༌ནེ༌ བིངས༌ཏེ༌ ཆ༌ཅེས༌སི༌ སྐོར༌ལ༌ ཟེརས༌། ཡང༌ ཁོང༌གུན༌ ཆ༌ ཟ༌ནེ༌ ཁོའེ༌ རུས༌པ༌གུན༌ ཉམ༌པོ༌ ཁྱེར༌ཅེས༌སི༌ ལབ༌ཞའ༌ ཏངས༌།

23 ཏད༌པ༌ ཡོད༌ཅེས༌པོའེ༌, མོ༌ཟེས༌སི༌ ཕ༌མ༌གུན༌ནི༌ ཁོ༌ སྐྱེས༌ཏེ༌ སྟིང༌ནེ༌ ཟླ༌ཝ༌ སུམ༌ ཚག༌པ༌ སྦས༌ཏེ༌ བོརས༌, ཅིའ༌ཟེར༌ན༌ ཁོའེ༌ ཕ༌མ༌གུན༌ནི༌ ཁོ༌ ཞན༌ ཕྲུ༌གུ༌གུན༌ནི༌ སང༌ ཁྱད༌པར༌ཅན༌ཞིག༌ ཐོང༌། ཡང༌ ཨི༌ཇིབ༌བི༌ གྱལ༌པོའེ༌ ཁའ༌ མི༌ཉན༌ཅེས༌ལ༌ ཁོང༌གུན༌ མ༌ཇིགས༌།

24 ཏད༌པ༌ ཡོད༌ཅེས༌པོའེ༌, མོ༌ཟེས༌ ལྡན༌ཏེ༌ སྟིང༌ནེ༌ ཁོའེ༌ ཁོ༌རང༌ང༌ གྱལ༌པོ༌ ཕེ༌རོའེ༌ ཚ༌འོ༌ ཟེར༌ མ༌ཅུགས༌། 25 ཏུས༌ ཉུ༌ངུན༌ཞིག༌, སྡིག༌པའེ༌ སྐྱིད༌པོ༌གུན༌ནི༌ ནང༌ང༌ ཐད༌པོ༌ ཅོའེ༌ སང༌ ཨིས༌ར༌ཨེལ༌པ༌གུན༌ ཉམ༌པོ༌ ནགས༌བར༌དོ༌ ཁུར༌ཅེས༌པོ༌ མོ༌ཟེས༌སི༌ ལྡམས༌། 26 མོ༌ཟེས༌སི༌ ཨི༌ཇིབ༌བི༌ གྱུར༌ནོར༌གུན༌ནི༌ སང༌ མ༌ཤི༌ཀའེ༌ ཏོན༌ལ༌ རྡུག༌ངལ༌ ཉོང༌ཅེས༌པོ༌ མང༌ང༌ རིན༌ཅན༌ ཨིན༌ཁན༌བོ༌ ཧ༌གོ༌, ཅིའ༌ཟེར༌ན༌ ཁོའེ༌ ཐོབ༌ཅེས༌ཅན༌ནི༌ ཏེ༌ ཀྲག༌པོ༌ སོལ༌རས༌པོའ༌ ལྟའད༌པིན༌། 27 ཏད༌པ༌ ཡོད༌ཅེས༌པོའེ༌, གྱལ༌པོའེ༌ སྲོའ༌ མ༌ཇིགས༌ས༌, ཁོ༌ ཨི༌ཇིབ༌བི༌ ཡུལ༌ ཕངས༌ཏེ༌ སོང༌། ཁོའེ༌ སྙིང༌རུས༌ ཉམ༌པོ༌ ཏེ༌གུན༌ ཅོས༌ཏེ༌ ཨིན༌པིན༌, ཅིའ༌ཟེར༌ན༌ ཁོའེ༌ ཁོ༌རང༌ངི༌ མིག༌པོ༌ མ༌ཐོང༌ཁན༌ དཀོན༌མཆོག༌ ཆོགས༌ལ༌ བོརས༌། 28 ཏད༌པ༌ ཡོད༌ཅེས༌པོའེ༌, གོ༌མ༌ སྐྱེ༌ཁན༌ནི༌ བུ༌ཚ༌གུན༌ སད༌ད༌ལ༌ ཡོང༌ཁན༌ནི༌ ཕོ༌ཉའེ༌ ཀ༌ནེ༌ སྐྱོབ༌ཅེས༌སི༌ ཕིའ༌, མོ༌ཟེས༌སི༌ ཨིས༌ར༌ཨེལ༌པ༌གུན༌ལ༌ པེ༌སག༌གི༌ ཏུས༌ རྩི༌ཅེས༌ དང༌ ལུ༌གུའི༌ ཁྲག༌གུན༌ སྒོའེ༌སྟག༌གི༌ཀ༌ སྐུ༌ཅེས༌ལ༌ བཀའ༌ ཏངས༌།

29 ཏད༌པ༌ ཡོད༌ཅེས༌པོའེ༌, ཨིས༌ར༌ཨེལ༌པ༌གུན༌ ཚོ༌ མར༌པོའེ༌ ཞུང༌ནེ༌ ས༌ཀྱད༌ སྐམ༌པོ༌ གྱུད༌ཏེ༌ གྲུལས༌། ཨིན༌ནའང༌ ཨི༌ཇིབ༌པ༌གུན༌ནི༌ ཁོང༌གུན༌ནི༌ གྱབ༌ནེ༌ ཡོང༌ཅེས༌སི༌ རྩོན༌གྲུས༌ ཅོའ༌ཅིག༌, ཁོང༌གུན༌ ཆུའི༌ ནང༌ང༌ ནུབ༌ཏེ༌ ཤི༌།

30 ཏད༌པ༌ ཡོད༌ཅེས༌པོའེ༌, ཨིས༌ར༌ཨེལ༌པ༌གུན༌ དཀོན༌མཆོག༌གི༌ ཁའ༌ཉན༌ཏེ༌, ཡེ༌རི༌ཀོའེ༌ གྲོང༌ཁྱེར༌ལ༌ ཞག༌པོ༌ རྡུན༌ སྐོར༌ར༌ ཏངས༌པ༌, གྲོང༌ཁྱེར༌ལ༌ སྐོར༌ཏེ༌ ཡོད༌ཁན༌ནི༌ རྩིག༌པ༌བོ༌ ཞིག༌།

31 ཏད༌པ༌ ཡོད༌ཅེས༌པོའེ༌, ཟུགས༌ཙོང༌མ༌ ར༌ཧབ༌, ཁའ༌ མ༌ཉན༌ཁན༌ ཁོའེ༌ གྲོང༌ཁྱེར༌པ༌གུན༌ ཉམ༌པོ༌ ཤི༌ མ༌ཤི༌, ཅིའ༌ཟེར༌ན༌ ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ ཨིབས༌ཏེ༌ ཡོང༌ཁན༌ནི༌ ཨིས༌ར༌ཨེལ༌པ༌ ཉིས༌ཀོའ༌ གའ༌སུས༌ ཞུས༌།

32 ཏ༌རུང༌ ཙམ༌ཤིག༌ མང༌པོ༌ ངའ༌ ཟེར༌གོས༌? གི༌དི༌འོན༌, བ༌རག༌, སམ༌སོན༌, ཡེཕ༌ཐའ༌, དཱ༌བིད༌, ཤ༌མུ༌ཨེལ༌ དང༌, ལུང༌སྟོན༌པ༌གུན༌ནི༌ སྐོར༌ལ༌ ཤད༌ཅེས༌སི༌ ཏུས༌ ངའ༌ མེད༌། 33 ཀ༌གུན༌ནི༌ ཏད༌པ༌ ཡོད༌ཅེས༌པོའེ༌, གྱལ༌ཁབ༌གུན༌ ངའ༌ཡོག༌ག༌ ཁྱོངས༌, དྲང༌པོའེ༌ ཐག༌ཅད༌གུན༌ ཏངས༌, ཞལ༌ཆད༌ ཛད༌ཁན༌གུན༌ ཐོབ༌, དཀོན༌མཆོག༌གི༌ སིང༌གེའེ༌ ཁ༌གུན༌ ཀག༌ག༌ ཛདས༌, 34 མེ༌ ཀྲག༌པོ༌ བར༌ཁན༌ནི༌ ནང༌ནེ༌ ཐར༌, ར༌འི༌ ཉམ༌པོ༌ ཤི༌ཅེས༌ནེ༌ ཐར༌, འུ༌ཐུགས༌ ཡོད༌ཁན༌གུན༌ ཤེད༌ཅན༌ གྱུར༌ ཡང༌ མག༌གི༌ ནང༌ང༌ ཤེད༌ཅན༌ གྱུར༌ཏེ༌ གྲ༌འོའེ༌ མག༌མི༌གུན༌ ཤོར༌ཅུགས༌, 35 བུ༌མོ༌གུན༌ལ༌ ཁོང༌རང༌གུན༌ནི༌ ཅེས༌པ༌ ཤི༌ཁན༌གུན༌ སོན༌ཏེའ༌ ལངས༌ཏེ༌ ཐོབ༌, ཞན༌གུན༌ལ༌ ནགས༌ སྲན༌ཏྲེ༌ ཐོང༌, ཏེ༌ཀ༌ནེ༌ ཐར༌ཅེས༌ལ༌ ཁོང༌གུན༌ནི༌ དཀོན༌མཆོག༌ མ༌ཕངས༌། ཁོང༌གུན༌ནི༌ ཤི༌ཏེ༌ སོན༌ཏེའ༌ ལངས༌ཏེ༌ སྟིང༌ནེ༌, མི༌ཚེ༌ གྱལ༌ལ༌ཞིག༌ ཐོབ༌ཅེས༌པོའེ༌ ནང༌ང༌ རེ༌ཝ༌ བོར༌རད༌པིན༌།

36 ཞན༌གུན༌ལ༌ ཁྲེལ༌བ༌ ཅོས༌ཏེ༌ རྟལ༌ལྕག༌ མང༌པོ༌ ཕོག༌, ཡང༌ ཞན༌གུན༌ལ༌ ལྕག༌ཐག༌ ཏགས༌ཏེ༌ ཙོན༌ཁང༌ངི༌ ནང༌ང༌ ཀགས༌། 37 ཁ༌ཅིག༌ག༌ རྡོའ༌ གྱབས༌ཏེ༌ སདས༌, ཁ༌ཅིག༌གི༌ ཟུགས༌པོ༌ ཁག༌ཉིས༌སི༌ ནང༌ང༌ ཤགས༌, ཞན༌གུན༌ ར༌འི༌ ཉམ༌པོ༌ སདས༌, ཁ༌ཅིག༌ག༌ གོན༌རྒྱུ༌ ཅའང༌ མེད༌པ༌, ལུག༌ དང༌ ར༌མའེ༌ པགས༌པ༌གུན༌ གོན༌ཏེ༌ གྲུལས༌། ཁོང༌གུན༌ལ༌ ཡོད༌ཁན༌ནི༌ རང༌ཝང༌བོ༌ ཀོགས༌ཏེ༌ མི༌འོས༌པ༌ ཅོའད༌པིན༌། 38 ཇིག༌རྟེན༌པ༌གུན༌ལ༌ ཏེ༌ ཏད༌པ༌ཅན༌གུན༌ ཉམ༌པོ༌ མི༌ཚེ༌ ཕུད༌ཅེས༌སི༌ འོས༌པ༌ མེད༌པ༌ ཨིན༌ནོག༌། ཏེ༌ ཏད༌པ༌ཅན༌གུན༌ནི༌ ནང༌ནེ༌ ཁ༌ཅིག༌ ཐང༌སྟོང༌ དང༌ རི༌ གུན༌ལ༌ ཁོར༌ཨིན༌ དུགས༌, ཁ༌ཅིག༌ གྲག༌ཕུགས༌ དང༌ ས༌དོང༌ གུན༌ནི༌ ནང༌ང༌ ཨིབ༌ཨིན༌ཞིག༌ དུགས༌།

39 ཞན༌ ཁོང༌ ཚང༌མ༌ལ༌ ཏད༌པ༌ ཡོད༌ཅེས༌པོའེ༌ དཀོན༌མཆོག༌གི༌ སྟོད༌པ༌ ཐོབ༌ནའང༌, ཏེ༌གུན༌ནི༌ ཕྲོ༌ནེ༌ ཅིག༌གའང༌ ཞལ༌ཆད༌ ཛད༌ཁན༌ ཚང༌མ༌ མ༌ཐོབ༌། 40 དཀོན༌མཆོག༌གི༌ ཐུགས༌སམ༌མི༌ ནང༌ང༌, ང༌དང༌ ཚང༌མའེ༌ ཕིའ༌ མང༌ང༌ གྱལ༌ལ༌ སམ༌བ༌ཞིག༌ ཡོད༌ པ༌སང༌, ཏེ༌ ཏད༌པ༌ཅན༌གུན༌ལའང༌ ང༌དང༌ ཉམ༌པོ༌ མ༌ནེ༌ ཕུན༌སུམ༌ཚོགས༌པ༌ ཅོའ༌ མི༌ཛད༌།