2
ཆོགས༌རིས༌སི༌ གྱབ༌གལ༌ལ༌ ལྡམ༌ཞག༌།
2:1 ནེ༌ 13
1 ངའེ༌ སྤུན༌གུན༌, གལ༌ཏེས༌ ཁྱོ༌ཞ༌གུན༌ནི༌ ཆོག༌རིས༌ ཅོའད༌ན༌, ཁྱོ༌ཞའེ༌ ང༌དང༌གུན༌ནི༌ ཟིར༌རྗིད༌ཅན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ ཟེར༌ཏེ༌ ཀ༌ཟུག༌གི༌ ཟེར༌ ཐུབ༌ཨིན༌།
2 སྤེར༌ན༌ མི༌ཞིག༌ སེར༌རི༌ སེར༌དུབ༌ ཏགས༌ཏེ༌ རིན༌ཅན༌ ཀོས༌ལག༌ གོན༌ཏེ༌, ཡང༌ མི༌ ཉལ༌བ༌ཅན༌ཞིག༌ སྙིང༌པ༌ ཀོས༌ལག༌ ཆད༌ཁན༌ གོན༌ཏེ༌ ཁྱོ༌ཞ༌གུན༌ནི༌ ཆོས༌ཚོགས༌སི༌ ནང༌ང༌ ཡོང༌ན༌, 3 ཁྱོ༌ཞ༌གུན༌ནི༌ མི༌ ཆུག༌པོ༌བོའ༌ མིག༌སལ༌ལི༌ སྣང༌ང༌ ཏངས༌ཏེ༌ ཁོའ༌, "ཇུ༌ཇུ༌ འི༌ རྩི༌ཝ༌ཅན༌ནི༌ ནས༌སའེ༌ཀ༌ ཞུགས༌ས༌ ཛད༌", ཨིན༌ནའང༌ མི༌ ཉལ༌བ༌ཅན༌བོའ༌, "ཁྱོ༌རང༌ འ༌ཀ༌ ལངས༌ཏེ༌ དུག༌" ཡ༌ "ངའེ༌ རྐང༌པའེ༌ དུན༌ལ༌ སའེ༌ཀ༌ དུག༌" ཟེར༌ན༌, 4 ཏེ༌ནེ༌ ཅི༌ འི༌ ཆོགས༌རིས༌པོའེ༌, ཁྱོ༌ཞའ༌ ཁྱོ༌ཞ༌རང༌ངི༌ དོད༌པ༌ ངན༌པ༌གུན༌ནི༌ ཁྲིད༌ཏེ༌ མ༌ནོག༌ག༌?
5 ངའེ༌ ཅེས༌པའེ༌ སྤུན༌གུན༌ ཉོན༌ཤིག༌, ཅི༌ དཀོན༌མཆོག༌གི༌ འི༌ ཇིག༌རྟེན༌ནི༌ ནང༌ང༌ ཉལ༌བ༌ཅན༌གུན༌ ཏད༌པའེ༌ ནང༌ང༌ ཆུག༌པོ༌ གྱུར༌ཅེས༌སི༌ ཕིའ༌ ལྡམ༌མ༌ ཛད༌ཏེ༌ མ༌ནོག༌ག༌? ཡང༌ ཁོང༌གུན༌ལ༌ དཀོན༌མཆོག༌གི༌ གྱལ༌སྲིད༌པོ༌ མི༌ཐོབ༌བ༌, ཀ༌བོ༌ དཀོན༌མཆོག༌གི༌ ཁོང༌ང༌ ཅེས༌པ༌ ཅོ༌ཁན༌གུན༌ལ༌ སལ༌ཅེས༌ལ༌ ཞལ༌ཆད༌ ཛད༌ཏེ༌ ཨིན༌? 6 ཨིན༌ནའང༌ ཁྱོ༌ཞ༌གུན༌ནི༌ ཉལ༌བ༌ཅན༌གུན༌ལ༌ རྩི༌ཝ༌ མ༌ཅོའ༌ ཨིན༌ནོག༌། ཅི༌ ཁྱོ༌ཞ༌གུན༌ལ༌ གོབ༌ནོན༌ ཏངས༌ཏེ༌ ཁྲིམས༌ཁུང༌ང༌ ཁྱེར༌ཁན༌གུན༌, ཏེ༌ ཆུག༌པོ༌གུན༌ མན༌ན༌? 7 ཅི༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཚན༌ ཟང༌པོའ༌ ངན༌པ༌ ཟེར༌ཁན༌ ཏེན༌ན༌གུན༌ མན༌ན༌?
8 གལ༌ཏེས༌ ཁྱོ༌ཞ༌གུན༌ནི༌ དམ༌པའེ༌ སུང༌རབས༌སི༌ ནང༌ང༌ ཡོད༌ཁན༌ནི༌ གྱལ༌ཁྲིམས༌ "རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌" མོལ༌ཁན༌བོའ༌ དེན༌བའ༌ ཁའ༌ཉན༌ན༌, ཏེ༌ནེ༌ ཁྱོ༌ཞ༌གུན༌ནི༌ དྲང༌པོ༌ ཅོས༌ཏེ༌ ཨིན༌ནོག༌། * 2:8 ཁྲིམས༌སི༌ སྤེ༌ཆ༌ ཏང༌པོའེ༌ 19:18 9 ཨིན༌ནའང༌ གལ༌ཏེས༌ ཁྱོ༌ཞ༌གུན༌ནི༌ ཆོགས༌ ཅོ༌ན༌ སྡིག༌པ༌ ཅོས༌ཏེ༌, ཁྱོ༌ཞའ༌ དཀོན༌མཆོག༌གི༌ ཁྲིམས༌པོ༌ ཅག༌ཅེས༌ལ༌ ནོངས༌ཅན༌ ཨིན༌ནོག༌།
10 མི༌ཞིག༌གི༌ ཁྲིམས༌ ཅིག༌ཅིག༌ ཅགས༌ཏེ༌ ཞན༌ཚང༌མ༌ ཁའ༌ ཉན༌ནའང༌ ཁོའེ༌ དཀོན༌མཆོག༌གི༌ ཁྲིམས༌ ཚང༌མ༌ ཅག༌ཁན༌ དང༌ཙོགས༌ ཨིན༌ནོག༌། 11 སྤེར༌ན༌ དཀོན༌མཆོག༌གི༌ མོལ༌ཏེ༌ ཨིན༌ནོག༌ "ཞན༌མའེ༌ ཞིད༌མད༌ཞིག༌ ཉམ༌པོ༌ ལུས༌བྲེལ༌ མ༌ཅོ༌"† 2:11 ཨི༌ཇིབ༌ནེ༌ བིངས༌ཏེ༌ ཆའ༌ཁན༌ནི༌ སྤེ༌ཆའེ༌ 20:14; ཁྲིམས༌སི༌ སྤེ༌ཆ༌ ཉིས༌པའེ༌ 5:18 ཡང༌ "མི༌ མ༌སད༌"‡ 2:11 ཨི༌ཇིབ༌ནེ༌ བིངས༌ཏེ༌ ཆའ༌ཁན༌ནི༌ སྤེ༌ཆའེ༌ 20:13; ཁྲིམས༌སི༌ སྤེ༌ཆ༌ ཉིས༌པའེ༌ 5:17 གལ༌ཏེས༌ ཁྱོ༌རང༌ངི༌ ཞན༌མའེ༌ ཞིད༌མད༌ ཉམ༌པོ༌ ལུས༌བྲེལ༌ ཅོའ༌ མེད༌གྲོ༌, ཨིན༌ནའང༌ མི༌ཞིག༌ སད༌ན༌, ཏེ༌ནེ༌ དཀོན༌མཆོག༌གི༌ ཁྲིམས༌ ཅགས༌ཏེ༌ ཁྱོ༌རང༌ ནོངས༌ཅན༌ གྱུར༌ཏེ༌ ཨིན༌ནོག༌།
12 ཏེ༌ནེ༌ ཟེར༌ཁན༌ ཡ༌ ཅོ༌ཁན༌གུན༌ལ༌ རང༌ཝང༌ སལ༌ཁན༌ནི༌ ཁྲིམས༌པོའེ༌ ཁྱོ༌ཞའ༌ ཁྲིམས༌ཅད༌ ཏང༌ཅེས༌པོ༌ ཨིད༌ཏུ༌ ཅོ༌ཤིག༌། 13 སྙིང༌རྗེ༌ མ༌ལྟན༌ཁན༌ནི༌ མི༌གུན༌ལ༌ སྙིང༌རྗེ༌ མི༌ཐོབ༌། ཨིན༌ནའང༌ གལ༌ཏེས༌ ཁྱོ༌ཞ༌གུན༌ནི༌ ཞན༌མ༌གུན༌ལ༌ སྙིང༌རྗེ༌ ལྟན༌ཏེ༌ ཡོད༌ན༌, དཀོན༌མཆོག༌གི༌ ཁྱོ༌ཞ༌གུན༌ལའང༌, ཁྲིམས༌ཅད༌དི༌ ཞག༌ག༌ སྙིང༌རྗེ༌ ལྟན༌ན༌ ཛད༌ཨིན༌།
ལག༌ལེན༌ མེད༌ཁན༌ནི༌ ཏད༌པ༌བོ༌ ཏོན༌མེད༌ ཨིན༌ནོག༌།
2:14 ནེ༌ 26
14 ངའེ༌ སྤུན༌གུན༌, གལ༌ཏེས༌ ཁྱོ༌ཞའེ༌ ཟེར༌ན༌ ངའེ༌ ཏད༌པ༌ ཅོའད༌ ཨིན༌ནའང༌ ཏེ༌བོ༌ ལག༌ལེན༌ནི༌ ནང༌ང༌ ཁྱོང༌ང༌ མེད༌ན༌, ཅི༌ ཕན༌ཐོགས༌? ཅི༌ ཏེ༌ཙོགས༌སི༌ ཏད༌པའེ༌ ཁྱོ༌ཞ༌གུན༌ སྐྱོབ༌ཨིན༌ན༌? མི༌སྐྱོབ༌། 15 སྤེར༌ན༌ ཁྱོ༌ཞ༌གུན༌ནི༌ ཟ༌རྒྱུ༌ ཡ༌ གོན༌རྒྱུ༌ མེད༌ཁན༌ནི༌ སྤུན༌ ཡ༌ སྤུན༌མོ༌ཞིག༌ ཐོངས༌ཏེ༌, 16 ཁྱོ༌ཞའ༌ ཅིག༌གི༌ ཁོའ༌ ཟེར༌ཨིན༌, "ཇུ༌ཧེ༌ དྲོན༌མོ༌ ཅོས༌ཏེ༌ གྲང༌གྲང༌ ཟོས༌ཏེ༌ ཁམ༌ཟང༌ ཞི༌དེ༌ ཉམ༌པོ༌ ཞུགས༌", ཨིན༌ནའང༌ ཁོའ༌ ཟ༌རྒྱུ༌ ཡ༌ གོན༌རྒྱུ༌ མ༌ཏང༌ན༌, ཁྱོ༌རང༌ངི༌ ཁོའེ༌ ཕིའ༌ ཅི༌ ཟང༌པོ༌ ཅོས༌ཏེ༌ ཨིན༌?
17 ཏེན༌ན༌ ཙོགས༌ལ༌ ལག༌ལེན༌ མེད༌ཁན༌ནི༌ ཏད༌པ༌ ཅིག༌པོ༌ ཤི༌ཏེ༌ ཨིན༌ནོག༌།
18 ཏ༌ ཁ༌ཅིག༌གི༌ འི༌ ལབ༌ཞའེ༌ གྱབ༌གལ༌ ཅོས༌ཏེ༌ ཟེར༌སྲིད༌ཅེས༌ ཨིན༌ནོག༌, "མི༌ ཁ༌ཅིག༌ག༌ ཏད༌པ༌ ཡང༌ ཁ༌ཅིག༌ག༌ ལས༌ ཟང༌པོ༌ ཅོ༌ཅེས༌པོ༌ ཡོད༌ཀྱག༌།" ཨིན༌ནའང༌ ངའེ༌ ཟེར༌ཨིན༌, "གལ༌ཏེས༌ ཁྱོ༌རང༌ངི༌ ལག༌ལེན༌ མ༌ཅོ༌ན༌, ཀ༌ཟུག༌གི༌ ཁྱོ༌རང༌ང༌ ཏད༌པ༌ ཡོད༌ཁན༌བོ༌ ངའ༌ ལྟན༌ ཐུབ༌ཨིན༌? ང༌རང༌ངི༌ ལག༌ལེན༌ གྱུད༌ཏེ༌ ངའེ༌ ཏད༌པ༌བོ༌ ཁྱོ༌རང༌ང༌ ལྟན༌ཨིན༌།"
19 ཁྱོ༌རང༌ངི༌ ཟེར༌ཨིན༌, ཁྱོ༌རང༌ང༌ ཏད༌པ༌ ཡོད༌, ཅིའ༌ཟེར༌ན༌ དཀོན༌མཆོག༌ ཅིག༌ ཞུགས༌ཏེ༌ ཨིན༌ཁན༌བོ༌ ཁྱོ༌རང༌ངི༌ ཨིད༌ཤེས༌ ཅོའ༌ནོག༌། གྱལ༌ལ༌ རག༌! རྡུད༌གུན༌ནིའང༌, ཏེ༌བོའ༌ ཏད༌པ༌ ཅོའ༌ནོག༌ ཡང༌ ཁོང༌ང༌ ཇིགས༌ཏེ༌ དར༌ར༌ནོག༌། 20 ཁྱོ༌རང༌ ཙམ༌ཤིག༌གི༌ སམ༌བ༌ མེད༌ཁན༌ཞིག༌ ཨིན༌། ཅི༌ ལག༌ལེན༌ མ༌ཅོ༌ཁན༌ནི༌ ཏད༌པ༌ ཕན༌མི༌ཐོགས༌ ཨིན༌ཁན༌བོ༌ ཁྱོ༌རང༌ང༌ ཐོང༌ང༌ མི༌དུག༌ག༌?
21 ང༌དང༌གུན༌ནི༌ ཕ༌མེས༌པོ༌ ཨབ༌ར༌ཧམ༌མ༌, དཀོན༌མཆོག༌གི༌ ཁོ༌རང༌ངི༌ ཏད༌པ༌ ལག༌ལེན༌ནི༌ ནང༌ང༌ ཁྱོང༌ཅེས༌པོའེ༌ མི༌ དྲང༌པོ༌ཞིག༌ ཐེའ༌ མ༌ཛད༌ས༌, ནམ༌ ཁོའེ༌ ཁོ༌རང༌ངི༌ བུ༌ཚ༌ ཨི༌སཱག༌ ཆོད༌ཁྲི༌ཀ༌ ཆོད༌པ༌ ཕུལ༌ཀྱིས༌ ཡོད༌པིན༌? 22 ཅི༌ ཏད༌པ༌ དང༌ ལག༌ལེན༌ གུན༌ནི༌ ཉམ༌པོ༌ ལས༌ ཅོ༌ཅེས༌པོ༌ ཨབ༌ར༌ཧམ༌ གྱུད༌ཏེ༌, ཁྱོ༌ཞའེ༌ མ༌ཐོང༌ང༌? ཁོའེ༌ ལག༌ལེན༌བོའེ༌, ཁོའེ༌ ཏད༌པ༌བོ༌ དྲན༌དྲ༌ གྲུབ༌ཅུགས༌ཏེ༌ ཨིན༌ནོག༌། 23 དམ༌པའེ༌ སུང༌རབས༌སི༌ ནང༌ང༌ "ཨབ༌ར༌ཧམ༌མི༌ དཀོན༌མཆོག༌གི༌ཀ༌ ཨིད༌ཤེས༌ ཅོས༌པ༌, ཁོང༌ངི༌ ཁོའ༌ མི༌ དྲང༌པོ༌ཞིག༌ ཐེའ༌ ཛདས༌"§ 2:23 གོ༌ཟུག༌ ཟེར༌ཁན༌ནི༌ སྤེ༌ཆའེ༌ 15:6 མོལ༌ཁན༌ ནང༌ཞིན༌ལ༌ བྱུངས༌ཏེ༌ ཨིན༌ནོག༌, མ༌ཚད༌ ཁོའ༌ དཀོན༌མཆོག༌གི༌ ཛ༌འོའང༌ ཞུའད༌པིན༌། 24 ཁྱོ༌ཞའེ༌ ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཏད༌པ༌ ཅིག༌པོ༌ མན༌པ༌, ཏད༌པ༌ དང༌ ལག༌ལེན༌ ཉིས༌ཀོ༌ གྱུད༌ཏེ༌ དྲང༌པོ༌ ཐེའ༌ཛད༌ཅེས༌པོ༌ མ༌ཐོང༌ང༌?
25 ཏེན༌ན༌ ཙོགས༌ལ༌ ཟུགས༌ཙོང༌མ༌ ར༌ཧབ༌ ཟེར༌ཁན༌བོའང༌, ཁོ༌རང༌ངི༌ ལག༌ལེན༌གུན༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཐེའ༌ མ༌ཛདས༌ས༌, ནམ༌ ཁོའེ༌ ཨིས༌ར༌ཨེལ༌ལི༌ མག༌མི༌ ཉིས༌ཀོ༌ ཁོང༌ངི༌ གྲ༌འོ༌གུན༌ནི༌ ཀ༌ནེ༌ སྦས༌ཏེ༌ ཞན༌ཡང༌ ལམ༌ སོ༌སོ༌ཞིག༌ནེ༌ ཁམ༌ཟང༌ ལམ༌ཅུགས༌། 26 འུགས༌ མེད༌ཁན༌ནི༌ ཟུགས༌པོ༌ ཤི༌ཏེ༌ ཨིན༌ཁན༌ ཙོགས༌ལ༌ ལག༌ལེན༌ མེད༌ཁན༌ནི༌ ཏད༌པ༌བོའང༌, ཤི༌ཁན༌ ཙོགས༌ ཨིན༌ནོག༌།