8
དམ༌པའེ༌ ཐུག༌ཉིད༌དི༌ ནང༌ང༌ མི༌ཚེ༌ ཕུད༌ཅེས༌།
8:1 ནེ༌ 17
1 ཏེ༌བོའེ༌ཕིའ༌ ཏ༌ མ༌ཤི༌ཀ༌ ཡེ༌ཤུའི༌ ཨིན༌ཁན༌གུན༌ལ༌ ཤི༌ཅེས༌སི༌ ཁྲིམས༌ཅད༌ མེད༌པ༌ ཨིན༌ནོག༌། 2 ཅིའ༌ཟེར༌ན༌ མ༌ཤི༌ཀ༌ ཡེ༌ཤུ༌ གྱུད༌ཏེ༌, མི༌ཚེ༌ སལ༌ཁན༌ནི༌ ཐུག༌ཉིད༌དི༌ ཁྱུད༌པོའེ༌ ཁྱོ༌ཞའ༌, ཤི༌ཅེས༌ ཆོགས༌ལ༌ ཁྲིད༌ཁན༌ནི༌ སྡིག༌པའེ༌ ཝང༌ནེ༌ ཐར༌ ཅུག༌ག༌ ཛདས༌། 3 ང༌དང༌གུན༌ནི༌ སྡིག༌པའེ༌ སྕོད༌པའེ༌, མོ༌ཟེས༌སི༌ ཁྲིམས༌པོ༌ ཤུགས༌མེད༌ ཅོས༌ པ༌སང༌, ཏེ༌བོའ༌ ང༌དང༌གུན༌ སྐྱོབ༌ མ༌ཉན༌ན༌ ཨིན༌ནོག༌, ཏེ༌བོའེ༌ཕིའ༌ ཁྲིམས༌ལ༌ ཅོ༌ མ༌ཉན༌ཁན༌བོ༌ དཀོན༌མཆོག༌གི༌ ཛདས༌། ང༌དང༌ སྡིག༌ཅན༌གུན༌ལ༌ ཡོད༌ཁན༌ ཙོགས༌ ཟུགས༌པོའེ༌ ནང༌ང༌ ཁོང༌ངི༌ ཁོང༌རང༌ངི༌ སྲས༌ ཇིག༌རྟེན༌ནི༌ཀ༌ ཀལ༌ལ༌ ཛད༌ཏེ༌ ང༌དང༌ངི༌ སྡིག༌པའེ༌ ཕིའ༌ ཆོད༌པ༌ ཕུལ༌ལ༌ ཛདས༌། ཏེ༌ཟུག༌ ཛད༌ཏེ༌ ཁོང༌ངི༌ ང༌དང༌གུན༌ནི༌ཀ༌ སྡིག༌པའེ༌ ཝང༌བོ༌ མེད༌ཁན༌ ཛདས༌། 4 ཁོང༌ངི༌ ཏེ༌བོ༌ ཅོའ༌ ཛད༌ཅེས༌སི༌ གྱུན༌ཚན༌ ནི༌, ཁྲིམས༌སི༌ འོས༌པའེ༌ སྒོས༌དོམ༌གུན༌, སྡིག༌པའེ༌ སྕོད༌པའེ༌ ནང༌ང༌ མི༌ཚེ༌ མ༌ཕུད༌ད༌, ཐུག༌ཉིད༌དི༌ ནང༌ང༌ མི༌ཚེ༌ ཕུད༌ཁན༌ ང༌དང༌གུན༌ནི༌ ནང༌ང༌, དྲན༌དྲའ༌ གྲུབ༌ཅེས༌པོ༌ ཨིན༌ནོག༌།
5 སྡིག༌པའེ༌ སྕོད༌པའེ༌ ཝང༌ངི༌ ཡོག༌ག༌ ལུས༌ཁན༌གུན༌ནི༌, ཏུས༌གྱུན༌ སྡིག༌པའེ༌ ལས༌ ཅོ༌ཨིན༌ སམ༌མ༌ནོག༌། ཨིན༌ནའང༌ དམ༌པའེ༌ ཐུག༌ཉིད༌དི༌ ཝང༌ངི༌ ཡོག༌ག༌ ཡོད༌ཁན༌གུན༌ནི༌, ཏུས༌གྱུན༌ ཐུག༌ཉིད༌ ཐུག༌ཉེས༌ཤིས༌སི༌ ལས༌ ཅོ༌ཨིན༌ སམ༌མ༌ནོག༌། 6 སྡིག༌ཅན༌ མི༌གུན༌ནི༌ སམ༌བ༌བོའེ༌, ཤི༌ཅེས༌ ཆོགས༌ལ༌ ཁྲིད༌ད༌ནོག༌། ཨིན༌ནའང༌ ཐུག༌ཉིད༌དི༌ ཝང༌ངི༌ ཡོག༌ག༌ ཡོད༌ཁན༌ནི༌ སམ༌བ༌བོའེ༌, མི༌ཚེ༌ དང༌ ཞི༌དེ༌ ཆོགས༌ལ༌ ཁྲིད༌ད༌ནོག༌། 7 སྡིག༌པའེ༌ སྕོད༌པའེ༌ ཏུས༌གྱུན༌ དཀོན༌མཆོག༌གི༌ གྱབ༌གལ༌ ཅོའ༌ནོག༌, ཅིའ༌ཟེར༌ན༌ ཏེ༌བོའེ༌ དཀོན༌མཆོག༌གི༌ ཁྲིམས༌ལ༌ ཁའ༌ མ༌ཉནས༌, ཡང༌ ཁའ༌ མ༌ནེ༌ མི༌ཉན༌། 8 ཏེན༌ན༌བོའེ༌ཕིའ༌ སྡིག༌པའེ༌ སྕོད༌པའེ༌ ཝང༌ངི༌ ཡོག༌ག༌ དུག༌ཁན༌གུན༌ནི༌, དཀོན༌མཆོག༌ ཐུག༌ཉེས༌ཅུག༌ མ༌ནེ༌ ཉན༌ན༌ མ༌ནོག༌།
9 གལ༌ཏེས༌ དཀོན༌མཆོག༌གི༌ ཐུག༌ཉིད༌ ཁྱོ༌ཞའེ༌ ནང༌ང༌ ཞུགས༌སད༌ན༌, ཁྱོ༌ཞ༌གུན༌ སྡིག༌པའེ༌ སྕོད༌པའེ༌ ཝང༌ངི༌ ཡོག༌ག༌ མེད༌པ༌, ཐུག༌ཉིད༌དི༌ ཝང༌ངི༌ ཡོག༌ག༌ ཡོད༌ཏེ༌ ཨིན༌ནོག༌། ཡང༌ སུ༌ཞིག༌གི༌ ནང༌ང༌ མ༌ཤི༌ཀའེ༌ ཐུག༌ཉིད༌ མེད༌, ཏེ༌ མི༌བོ༌ མ༌ཤི༌ཀའེ༌ མ༌ནོག༌། 10 མ༌ཤི༌ཀ༌ ཁྱོ༌ཞ༌གུན༌ནི༌ ནང༌ང༌ ཞུགས༌ས༌ནོག༌, སྡིག༌པའེ༌ ཞས༌ཏེ༌ ཁྱོ༌ཞའ༌ ཟུགས༌སི༌ ཐོག༌ནེ༌ ཤིའ༌ནོག༌ ཨིན༌ནའང༌, ཐུག༌ཉིད༌དི༌ ཁྱོ༌ཞའ༌ མི༌ཚེ༌ སལ༌ལ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ ཅོའ༌ ཛདས༌། 11 ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞང༌ཤུག༌ག༌ ཛད༌ཁན༌ནི༌ དཀོན༌མཆོག༌གི༌ ཐུག༌ཉིད༌ ཁྱོ༌ཞ༌གུན༌ནི༌ ནང༌ང༌ ནས༌ས༌ནོག༌། ཡང༌ ཀ༌ཟུག༌ དཀོན༌མཆོག༌གི༌ མ༌ཤི༌ཀ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞང༌ཤུག༌ག༌ ཛདས༌, ཁྱོ༌ཞའེ༌ ནང༌ང༌ ཡོད༌ཁན༌ནི༌ ཏེན༌ན༌ ཐུག༌ཉིད༌བོ༌ གྱུད༌ཏེ༌, ཁོང༌ངི༌, ཁྱོ༌ཞའེ༌ ཤི༌ཅེས༌ཅན༌ནི༌ ཟུགས༌པོའང༌ སྲོག༌ སལ༌ལ༌ ཛད༌ཨིན༌།
12 ཏེ༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ལ༌ སྡིག༌པའེ༌ སྕོད༌པའེ༌ ཅོས༌ ཟེར༌ཁན༌བོའ༌ ཁའ༌ཉན༌གོས༌ མེད༌པ༌ ཨིན༌ནོག༌། 13 གལ༌ཏེས༌ ཁྱོ༌ཞ༌གུན༌ནི༌ ཏེ༌བོའེ༌ ཟེར༌ཁན༌ ནང༌ཞིན༌ མི༌ཚེ༌ ཕུད༌ན༌, ཁྱོ༌ཞ༌གུན༌ ཤི༌ཨིན༌། ཨིན༌ནའང༌ གལ༌ཏེས༌ དམ༌པའེ༌ ཐུག༌ཉིད༌དི༌ ཁྱུད༌ གྱུད༌ཏེ༌ ཁྱོ༌ཞའེ༌ སྡིག༌པའེ༌ སྕོད༌པའེ༌ ལས༌གུན༌ ཤི༌ཅུག༌ན༌, ཁྱོ༌ཞ༌གུན༌ནི༌ དེན༌བའེ༌ མི༌ཚེ༌ * 8:13 དེན༌བའེ༌ མི༌ཚེ༌ ཏོན༌ ནི༌, དཀོན༌མཆོག༌ ཉམ༌པོ༌ བྲེལ༌ཡོད༌ཁན༌ དང༌ ཐའ༌མེད༌པའེ༌ མི༌ཚེ༌ གུན༌ ཨིན༌ནོག༌། ཕུད༌ད༌ནོག༌། 14 ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌དི༌ ཁྲིད༌ཁན༌གུན༌ དཀོན༌མཆོག༌གི༌ ཕྲུ༌གུ༌ ཨིན༌ནོག༌།
15 ཁྱོ༌ཞ༌གུན༌ལ༌ ཇིགས༌ཤེས༌སི༌ ཚེ༌ཡོག༌ གྱུར༌ཅུག༌ཁན༌ནི༌ ཐུག༌ཉིད༌བོ༌ ཐོབས༌ཏེ༌ མ༌ནོག༌། ཨིན༌ནའང༌ དཀོན༌མཆོག༌གི༌, ཕྲུ༌གུའི༌ ཚུལ༌ལ༌ སོས༌བུའ༌ ལེན༌ན༌ ཛད༌ཁན༌ནི༌ ཐུག༌ཉིད༌བོ༌ ཐོབས༌ཏེ༌ ཨིན༌ནོག༌། ཏ༌ ང༌དང༌གུན༌ནི༌ ཁོང༌ང༌ "ཨ༌བ༌! ཡབ༌ལེ༌!" བོད༌ཨིན༌། 16 དཀོན༌མཆོག༌གི༌ ཐུག༌ཉིད༌དི༌, ང༌ཏི༌ ཐུག༌ཉིད༌ ཉམ༌པོ༌ ང༌དང༌ དཀོན༌མཆོག༌གི༌ ཕྲུ༌གུ༌ ཨིན༌ཁན༌བོའེ༌ སྤང༌པོ༌ སལ༌ལ༌ནོག༌། 17 ཡང༌ ང༌དང༌གུན༌ ཁོང༌ངི༌ ཕྲུ༌གུ༌ ཨིན༌ པ༌སང༌, ཁོང༌ངི༌ ནོར༌སྐལ༌ ལེན༌ཁན༌ མ༌ཚད༌, མ༌ཤི༌ཀ༌ ཉམ༌པོ༌ དཀོན༌མཆོག༌གི༌ ཟིར༌རྗིད༌, ལེན༌ཁན༌བོའང༌ ཨིན༌ནོག༌། ཨིན༌ནའང༌ གལ༌ཏེས༌ ང༌དང༌གུན༌ ཁོང༌ངི༌ ཟིར༌རྗིད༌པོའེ༌ ནང༌ང༌ དྲེས༌སད༌ན༌, ཏེ༌ནེ༌ ང༌དང༌གུན༌ ཁོང༌ངི༌ རྡུག༌ངལ༌ལི༌ ནང༌ངའང༌ དྲེས༌གོས༌།
ཡོང༌ཅེས༌ཅན༌ནི༌ ཟིར༌རྗིད༌།
8:18 ནེ༌ 30
18 དག༌ས༌ ང༌དང༌གུན༌ལ༌ བྱུང༌ཁན༌ནི༌ རྡུག༌ངལ༌བོ༌, སྟིང༌ཞིན༌ ཁོང༌ངི༌ ང༌དང༌གུན༌ལ༌ སལ༌ཅེས༌ཅན༌ནི༌ ཟིར༌རྗིད༌ ཉམ༌པོ༌ ལྡུར༌ན༌, ཏེ༌ནེ༌ ཏེ༌ རྡུག༌ངལ༌བོ༌ ཅའང༌ མེད༌པ༌ ཨིན༌ནོག༌། 19 དཀོན༌མཆོག༌གི༌ ཛད༌ཁན༌ ཚང༌མ༌ † 8:19 ཡང༌ན༌ ནམ༌ཁའ༌, ཇིག༌རྟེན༌ དང༌, ཏེ༌ནང༌ང༌ ཡོད༌ཁན༌ ཚང༌མ༌ ཀ༌གུན༌ དཀོན༌མཆོག༌གི༌ ཛདས༌ , ཁོང༌ངི༌ དེན༌བའེ༌ ཕྲུ༌གུ༌གུན༌ སྔོན༌ ཅུག༌ག༌ ཛད༌ཅེས༌སི༌ ཏེ༌ ཞག༌པོའ༌, རིངས༌ཨིན༌ཞིག༌ སྲུངས༌ཏེ༌ ཨིན༌ནོག༌། 20 མི༌གུན༌ནི༌ ཕིའ༌ ཨིན༌ཁན༌ དཀོན༌མཆོག༌གི༌ ངན༌བོ༌, ཁོང༌ངི༌ ཞན༌ཡང༌ ཛད༌ཁན༌ ཚང༌མའེ༌ཀའང༌ ཕོག༌, ཀ༌བོ༌ ཏེ༌གུན༌ནི༌ དོད༌པ༌ མན༌པ༌ ཏེ༌གུན༌ ཛད༌ཁན༌ དཀོན༌མཆོག༌གི༌ ཐུག༌གོངས༌ ཨིན༌པིན༌། ཨིན༌ནའང༌ རེ༌ཝ༌ སྲན༌ཏྲེ༌ ཉམ༌པོ༌ 21 ཏེ༌ ཛད༌ཁན༌ ཚང༌མའེ༌ ཡོང༌ཅེས༌ཅན༌ནི༌ ཞག༌པོའ༌ སྲུངས༌, ནམ༌ ཏེ༌གུན༌ དཀོན༌མཆོག༌གི༌ ཕྲུ༌གུ༌གུན༌ ཉམ༌པོ༌, ཤི༌ཅེས༌ དང༌ རུལ༌ཅེས༌ མེད༌ཁན༌ནི༌, ཟིར༌རྗིད༌ཅན༌ནི༌ ཐར༌པའེ༌ ནང༌ང༌ ཛོམ༌ཨིན༌། 22 ང༌དང༌ང༌ གྱུས༌ཨིན༌ནོག༌, ཛད༌ཁན༌ ཚང༌མའ༌ དག༌ས༌ ཚོག༌པའང༌, ཕྲུ༌གུ༌ སྐྱེ༌ ཟ༌ནེ༌ སྐྱེ༌ཟེར༌ ཡོང༌ང༌ ཙོགས༌ལ༌ བར༌དོ༌ བྱུང༌ཨིན༌ ཨིན༌ནོག༌། 23 ཡང༌ དམ༌པའེ༌ ཐུག༌ཉིད༌ ཀ༌བོ༌ ཡོང༌ཅེས༌ཅན༌ནི༌ ཅིན༌ལབས༌ གང༌པོའེ༌ ཁག༌ཤིག༌ ཨིན༌, ཏེ༌བོ༌ ཐོབ༌ཁན༌ ང༌དང༌གུན༌ནིའང༌ བར༌དོ༌ ཁུར༌ཨིན༌ ཏེ༌ ཞག༌པོའ༌ རིངས༌ཨིན༌ སྲུང༌ང༌ནོག༌། ཡང༌ དཀོན༌མཆོག༌གི༌ སོས༌བུའ༌ ལེན༌ན༌ ཛད༌ཁན༌ནི༌ ཕྲུ༌གུ༌གུན༌ ཙོགས༌ལ༌, ཁོང༌ངི༌ ང༌དང༌ང༌ ཐོབ༌ཏང༌ གང༌པོ༌ སལ༌ཅེས༌, མ༌ཚད༌ ཟུགས༌པོ༌ སོ༌མ༌ཞིག༌གི༌ ཞལ༌ཆད༌ ཛད༌ཁན༌ནི༌ ཞག༌པོའེ༌ ཕིའ༌ རེ༌ཝ༌ སྲན༌ཏྲེ༌ ཉམ༌པོ༌ སྲུང༌ང༌ནོག༌། 24 ང༌དང༌གུན༌ སྐྱོབ༌བ༌ ཛད༌ ཟ༌ནེ༌, ང༌དང༌གུན༌ལ༌ ཏེ༌ རེ༌ཝ༌བོ༌ སལ༌ལ༌ ཛདས༌། ༼གལ༌ཏེས༌ རེ༌ཝ༌ བོར༌ཁན༌བོ༌ ང༌ཏི༌ ལག༌ག༌ ཡོད༌པིན༌ན༌, ཏེ༌ནེ༌ ང༌དང༌གུན༌ལ༌ ཏེ༌བོའེ༌ཕིའ༌ རེ༌ཝ༌ ཅོ༌གོས༌ མེད༌པ༌ ཨིན༌ནོག༌། 25 ཨིན༌ནའང༌ གལ༌ཏེས༌ ང༌དང༌གུན༌ནི༌ དག༌ས༌ ང༌ཏི༌ ལག༌ག༌ མེད༌ཁན༌བོའེ༌ རེ༌ཝ༌ ཅོའད༌ན༌, ང༌དང༌གུན༌ནི༌ ཏེ༌བོའ༌ ཟོད༌པ༌ དང༌ ལོ༌ཁྱེལ༌ ཉམ༌པོ༌ སྲུང༌གོས༌༽།
26 ཡང༌ ང༌དང༌གུན༌ནི༌ འུ༌ཐུགས༌སི༌ ནང༌ང༌, དམ༌པའེ༌ ཐུག༌ཉིད༌དི༌ ང༌དང༌གུན༌ལ༌ རོགས༌ ཅོའ༌ ཛད༌ད༌ནོག༌། སྤེར༌ན༌, དཀོན༌མཆོག༌གི༌ ཐུག༌གོངས༌ ནང༌ཞིན༌ ང༌དང༌ངི༌ མོས༌ལམ༌ ཀ༌ཟུག༌ཤིག༌ ཡོང༌གོ༌ཤེས༌པོ༌ ང༌དང༌གུན༌ལ༌ གྱུས༌ མེད༌པ༌ ཨིན༌ནོག༌། ཨིན༌ནའང༌ དམ༌པའེ༌ ཐུག༌ཉིད༌དི༌, ང༌དང༌གུན༌ནི༌ ཕིའ༌ སྙིང༌ཤུགས༌ ཉམ༌པོ༌ མོས༌ལམ༌ ཕུལ༌ལ༌ནོག༌, ཀ༌བོ༌ ང༌དང༌ང༌ ཚིགས༌ ཀོལ༌ཏེ༌ ཤད༌ མ༌ཉན༌ན༌ ཨིན༌ནོག༌། 27 ཡང༌ སྙིང༌ ཚང༌མ༌ ཁྱེན༌ན༌ ཛད༌ཁན༌ནི༌ ཡབ༌བི༌, ཐུག༌ཉིད༌དི༌ མོལ༌ཁན༌བོའང༌ ཁྱེན༌ན༌ ཛད༌ད༌ནོག༌། ཅིའ༌ཞུ༌ན༌ ཐུག༌ཉིད༌དི༌, དཀོན༌མཆོག༌ག༌ ང༌དང༌ ཏད༌པ༌ཅན༌གུན༌ནི༌ ཕིའ༌ ཁོང༌ངི༌ ཐུག༌གོངས༌ ནང༌ཞིན༌ལ༌ ཞུ༌ཝ༌ ཕུལ༌ལ༌ ཛད༌ད༌ནོག༌། 28 དཀོན༌མཆོག༌ག༌ ཅེས༌པ༌ ཅོ༌ཁན༌ དང༌ ཁོང༌ངི༌ གྱུན༌ཚན༌ གྲུབ༌ཅེས༌ལ༌ བོད༌ད༌ ཛད༌ཁན༌ ང༌དང༌གུན༌ནི༌ ཕན༌ཐོགས༌སི༌ ཕིའ༌, ཁོང༌ངི༌ ང༌དང༌གུན༌ནི༌ མི༌ཚེའེ༌ ནང༌ང༌ བྱུང༌ཁན༌ ཚང༌མ༌ ཀོལ༌ལ༌ ཛད༌ཅེས༌པོ༌, ང༌དང༌གུན༌ལ༌ གྱུས༌ཨིན༌ནོག༌། 29 དཀོན༌མཆོག༌གི༌ ཁོང༌རང༌ངི༌ མི༌གུན༌ གོ༌ཟུག༌ནེ༌ ཕར༌ལ༌ ཁྱེན༌ན༌ ཛད༌ཏེ༌ ཁོང༌གུན༌ལ༌ ཁོང༌རང༌ངི༌ སྲས༌ ཙོགས༌ གྱུར༌ཅེས༌ལ༌ ལྡམ༌མ༌ ཛདས༌། ཡང༌ ནང༌ཚངས༌ ཆེན༌མོའེ༌ ནང༌ང༌ ཁོང༌ངི༌ སྲས༌ གོ༌སྐྱེས༌པོ༌ གྱུར༌ཨིན༌། 30 ཡང༌ ལྡམ༌མ༌ ཛད༌ཁན༌གུན༌, ཁོང༌རང༌ ཡོད༌ས༌ བོད༌ད༌ ཛདས༌། ཡང༌ བོད༌ད༌ ཛད༌ཁན༌གུན༌, ཁོང༌རང༌ངི༌ སྐུན༌དུན༌ལ༌ དྲང༌པོའང༌ ཅོའ༌ ཛདས༌། ཡང༌ དྲང༌པོ༌ ཅོའ༌ ཛད༌ཁན༌གུན༌ ཉམ༌པོ༌ ཁོང༌རང༌ངི༌ ཟིར༌རྗིད༌བོའང༌ བགོའ༌ཛདས༌།
དཀོན༌མཆོག༌གི༌ ཅེས༌པ༌།
8:31 ནེ༌ 39
31 ཏེ༌ ཧ༌ལས༌ཤེས༌སི༌ ཅིན༌ལབས༌གུན༌ནི༌ སྐོར༌ལ༌ ཏ༌ ང༌དང༌གུན༌ནི༌ ཅི༌ ཟེར༌གོས༌? གལ༌ཏེས༌ དཀོན༌མཆོག༌ ང༌དང༌གུན༌ནི༌ ཆོགས༌ལ༌ ཨིན༌ན༌, ཏེ༌ནེ༌ ང༌དང༌གུན༌ནི༌ གྱབ༌གལ༌ལ༌ སུའ༌ གྱལ༌ ཐོབ༌ཨིན༌། 32 དཀོན༌མཆོག༌གི༌ ཁོང༌ངི༌ སྲས༌པོའང༌ མ༌ཕུད༌ད༌, ང༌དང༌ ཚང༌མའེ༌ ཏོན༌ལ༌ སལ༌ལ༌ ཛདས༌། ཏེ༌ནེ༌ ཅི༌ ཁོང༌ངི༌ ང༌དང༌གུན༌ལ༌ ཡང༌ སྒོས༌དོམ༌ ཚང༌མ༌ སལ༌ལ༌ མི༌ཛད༌ད༌? 33 དཀོན༌མཆོག༌གི༌ ལྡམ༌མ༌ ཛད༌ཁན༌ ང༌དང༌གུན༌ནི༌ གྱབ༌གལ༌ལ༌ སྐྱོན༌ སུའ༌ ཀལ༌ཉན༌ཨིན༌? དཀོན༌མཆོག༌གི༌ ང༌དང༌གུན༌ ཁོང༌རང༌ངི༌ སྐུན༌དུན༌ལ༌ དྲང༌པོ༌ ཅོའ༌ ཛདས༌། 34 ཏེ༌ནེ༌ སུའི༌ ང༌དང༌གུན༌ ཤི༌ཅེས༌ལ༌ འོས༌པའ༌ ཨིན༌ཁན༌བོའེ༌ ཁྲིམས༌ཅད༌ ཏང༌ཨིན༌? སུ༌ཞིག༌གིའང༌ མི༌ཏང༌, ཅིའ༌ཞུ༌ན༌ མ༌ཤི༌ཀ༌ ཡེ༌ཤུ༌ ང༌དང༌གུན༌ནི༌ ཏོན༌ལ༌ ཀྲོངས༌ཏེ༌, སོན༌ཏེའ༌ ཞངས༌ས༌ ཛདས༌། ཡང༌ ཁོང༌ངི༌ དཀོན༌མཆོག༌གི༌ ཆག༌ ཡས༌པའེ༌ རྩི༌ཝ༌ཅན༌ནི༌ ཞུགས༌ཁྲིས༌སི༌ཀ༌ ཞུགས༌ཏེ༌ ང༌དང༌གུན༌ནི༌ ཕིའ༌ མོས༌ལམ༌ ཕུལ༌ལ༌ནོག༌། 35 ཏེ༌ནེ༌ སུའི༌ ང༌དང༌གུན༌ མ༌ཤི༌ཀའེ༌ ཅེས༌པ༌ནེ༌ ཕེ༌ཉན༌ཨིན༌? ནགས༌, ཀགས༌པོ༌, རྡུག༌ངལ༌, མུ༌གེ༌, ལྗེར༌ཉལ༌, ཇིགས༌པ༌ ཡ༌, ར༌འི༌ ཀ༌ནེ༌ ཤི༌ཅེས༌། 36 དམ༌པའེ༌ སུང༌རབས༌སི༌ ནང༌ང༌ གྱལ༌པོ༌ དཱ༌བིད༌དི༌ མོལ༌ཏེ༌ ཨིན༌ནོག༌,
"ཉེ༌རང༌ངི༌ ཕིའ༌ ང༌ཞ༌གུན༌ ཞག༌ཏང༌ སད༌དུག༌།
ང༌ཞ༌གུན༌ ལུག༌ ཙོགས༌ལ༌ སྐྱེ༌ ཅད༌ཏེ༌ སད༌དུག༌། ‡ 8:36 སུང༌གུར༌རི༌ སྤེ༌ཆའེ༌ 44:22 "
37 མི༌ཉན༌, ང༌དང༌གུན༌ མ༌ཤི༌ཀའེ༌ ཅེས༌པ༌ནེ༌ མ༌ནེ༌ ཕེ༌མི༌ཉན༌། ང༌དང༌ང༌ ཅེས༌པ༌ ཛད༌ཁན༌ མ༌ཤི༌ཀ༌ གྱུད༌ཏེ༌, ཏེ༌ ཚང༌མའེ༌ ནང༌ང༌ ང༌དང༌གུན༌ གྱལ༌ཁའ༌ ཐོབ༌ཁན༌ནི༌ སང༌ ཀྲག༌ག༌ཞིག༌ ཨིན༌ནོག༌། 38 ང༌ ཏན༌ཏན༌ ལོ༌ཁྱེལ༌ རག༌, འི༌ ཝང༌གུན༌ནི༌ ང༌དང༌ དཀོན༌མཆོག༌གི༌ ཅེས༌པ༌ནེ༌ ཕེ༌མི༌ཉན༌: སྤེར༌ན༌, ཤི༌ཅེས༌ ཡ༌ མི༌ཚེའེ༌, ཕོ༌ཉ༌གུན༌ ཡ༌ རྡུད༌གུན༌ནི༌, འི༌ཏུས༌ ཡ༌ ཡོང༌ཅེས༌ཅན༌ནི༌ ཏུས༌སི༌, ཡ༌ ཉལ༌ཝའེ༌, 39 ནམ༌མི༌ ནང༌ང༌ ཡོད༌ཁན༌ ཡ༌ སའེ༌ ཡོག༌ག༌, ཏན༌ཏན༌ལ༌ དཀོན༌མཆོག༌གི༌ ཛད༌ཁན༌ ཚང༌མའེ༌ ནང༌ནེ༌ ཅིག༌གིའང༌ ང༌དང༌གུན༌ དཀོན༌མཆོག༌གི༌ ཅེས༌པ༌ནེ༌ ཕེ༌མི༌ཉན༌, ཀ༌བོ༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌།