1 Nggwa ang ola ngwäyänü Ngwaalu na ngwäyänü ndi Yicu Kirictu gwanni gwa ji gwila gomon geꞌte ndi pïcï ngwüjü yelenya ngwanni ngwumidu na ngwanni ngwayu komon gidi geꞌte yelenya yüngün, 2 ndi ari nga ondaci ngwüjü ngwujaꞌri ngwanni ngwujaw, nga je jici mama kaji ganni gijaw na kaji ganni gaꞌti jaw. Raꞌtu ngwüjü nga je girinya nga je ojemeye nono määtä gwe liguri gwulleny na enggaci gwe gwanni gwujaw. 3 Ndi ari gomon ga ji gila ngwüjï ngwaꞌti ngwa ämnï ngwujaꞌri ngwanni ngwïndï kayalu. Ngwa be manni gwäꞌränï ngworta nono ngwonyadu ngwanni ngwaru ngwe yigor yegen, aar je ondaci ngwujaꞌri ngwanni ngwämïꞌrädï ngwänänü ngwegen. 4 Ngindenga lima gwüꞌrübäjï ngwuy ngwänï ngwegen ndi ꞌdingini ngwujaꞌri ngwanni ngwuru ꞌdidanu, lima je lütülütü gwuru ꞌtur dudiyi. 5 A be nga, ꞌritu giꞌra gunga giyiꞌral ꞌdar, nga orꞌtemaji gïdïrbänü, nga ape yiiru yidi dooꞌra denggaca ngwüjü ngwujaꞌri ngwanni ngwujaw, nga ꞌdïꞌrï yiiru ye yunga ꞌdar.

6 Ndi ari midi gwüny gwuru nono diꞌrica dïbäläjärälü dani mïꞌrïnï nono, 4.6 Bïlïpï 2.17; Adad 15.1–5 a gaji gima ila gadi yiꞌrany yüny. 7 Äny gwuma ape yongra yanni yijaw, gwuma obani nggwuma ïcï ndi dokati, nggwuma määtädä ämnïng Ngwaalu. 8 A be gweneno gilo lïdünïcïny guꞌru ge gïgïꞌtïjäär nyi gidi giꞌriba gidi yeleny gidi dünälü gadi aar nyi Kirictu gwuru Deleny dïdünälü giki gomon nggäꞌdï. Äny gwäꞌtüdï jücü aar be ru ꞌto ꞌdar lanni gilo lïdünïcä ꞌtädïngälü gwüngün yigor ye yegen.

9 Unda ngwäy gwulleny nyi ïlïjä puprang, 10 ndi ari Dimaj, gwuma ämnï dïdlä ndee gwuminy gatani gwuma ele Täjlänükï. Kiraj gwuma ele Galatiya na Tïtüj, gwuma ele ngwaalu ngwani Dalmatiya. 4.10 Külüjï 4.14; Bïlïmün 1.24 11 Luka gwuru jücü ngwuju nyi gwe gweneno. Millidana ndi Murkuj nga apana. Nginde gwujaw ngwuny gendaci guy giyiiru. 4.11 Yiiru 15.37–39; Külüjï 4.10 12 Nggwuma ükäjï Tiyakujing kündär gani Abijuj. 4.12 Yiiru 20.4; Külüjï 4.7–8 13 Ma ang ila, apana direda didi gennala danni dïgätïjänïny Karbujing kündär gani Truwaj nga apana yitab yüny, gwece gwece yanni yiru ngwurna. 14 Dijindala dani Älïjïkändär gwärrïjïny yiꞌral yaꞌti jaw aꞌtur, gwa Deleny reraji gwani ape gwüngün. 15 Arngana ngindeng ꞌto gwani ligoꞌro lunga, nggwo gwïnïjä ngwujaꞌralu ngwege gwulleny.

16 Gomon nggoo yïrnü anni pïcäär nyi yelenya, äny gwuru gwuruca ligoꞌro lüny jücü. Dïjï dere daꞌtiny de dünü aar nyi ruci. Aar nyi be gatanalu ꞌdar jücü aar ele. Nggwotaci Ngwaalingalu ndi ari aaꞌti ling je ïꞌräcï ngwujaꞌri ngwee ngwegen. 17 A be Deleny ru düdünïny de aar nyi ojemeye nono, aar nyi gäbïcï nyi ätï yiima nyi ondaci ngwüjü ngwuru Garany ngwujaꞌri ngwe ku ngwanni ngwujaw. Ngwaalu ngwügätäjïny yiꞌrany nono dïjü dïgätäjäär diira ngwulem. 18 A Deleny diny gätäjï giyiꞌral ꞌdar yanni yiki, gwuny gu etadi ꞌdi gwunyi ülätïyï giyelenyanu yüngün yidi gerala. A näjï ru gwüngün gwurꞌtal. Yiru gu.

19 Aganna Bärjïkïlläng na Äkïllä na gubu gidi Onejebroj. 20 Arictuj gwuma jalu kündär gani Küründüj. Nggwuma gatana Trubimujing gwümä ngenone kündär gani Milatuj. 4.20 Yiiru 19.22; 20.4 21 Unda ngwäy nga ila gwerre gwerre digo daꞌtina ïndï. Ngweengga ngwani Yubulij, na Puduj, na Lïnü, na diweengga diru gera dani Kilawudiya, na ngweengga ꞌdar, ngwaganna. 22 A Deleny ji gïlïgïꞌrïm lunga. Ara je gu yïmïꞌrü ji.