ꞌTäälü gwanni gwenggacaar Yuwanang
ꞌTäälü
Änï kitabanu
Gitab nggee gullu dooꞌra dükäjäär dani Yuwana gwüllïjïng ngwïkïrïjïnä giyiꞌdoonga yiru kwoꞌra täꞌrïl yanni yïmätïng je. (Giyiꞌraany 2–3), nginde gwüllïjä giꞌdonga geꞌte geꞌte ngwujaꞌri ngwuje girinya ndi ari aar joꞌrenyana ndi ke gwegen ngwuje orꞌtemaji ndi aar jalu liru ngwïnäd ngwuru yigor yeꞌte pu Ngwaalu ꞌdi manari lübïnäär jälü. Ngwujaꞌri ngwanni ngwujalu ngwondaja gwani engga gwudi yiima yidi Ngwaalu na näjï gwanni gwänggädïng. Ndi engga gwudi Ngwaalu nggwee, Ngwaalu ngwüꞌtäjä gündälü güngün gwani yiꞌral ꞌdar yanni yiki yanni yiju gïdïdlä a nginde inggidi awa Kirictu gwadi obeda yiꞌralu yanni yiki ngwobalu ngwüjï ngwe ngwanni ngwübïdï ꞌdidanung gwüngün gora ge. Ngwaalu ngwa be medaji dïdläyü ndee ngwa geꞌte dïdläyü danni diyang danni da gu nginde na ngwüjï ꞌdar ngwanni ngwämnäcä ji gwüpäng gwurꞌtal.
Yajang yidi ngwujaꞌri
1. Yïjïr yidi Yuwana (1.1–8)
2. Engga gwani Deleny dimidu (1.9–20)
3. Ngwujaꞌri ngwudi Yiꞌdoonga kwoꞌra täꞌrïl (2.1—3.22)
4. Enggga gwudi äpïjï Ngwaalinga yiiru kerala (4.1–11)
5. Gitab ngwulge ngwe kwoꞌra täꞌrïl (5.1—6.17)
6. Äpïjï Ngwaalinga yiiru ngwuduꞌri ngwudi yeleny (7.1–17)
7. Yiil kwoꞌra täꞌrïl (8.1—11.19)
8. Dägïꞌrïꞌdïr na yomeꞌreny (12.1—13.18)
9. Engga gwudi obalu na etadi gwudi Ngwaalu (14.1—15.8)
10. Yiny kwoꞌra täꞌrïl yidi güündä gidi Ngwaalu (16.1–21)
11. A güwän gidi dämïnï (17.1—20.10)
12. Obalu gwudi gwodaningt (20.11–15)
13. Kerala gwanni gwuyang na dïyäng danni diyang (21.1–8)
14. Üräjälïm gwanni gwuyang (21.9—22.5)
15. Kirictu gito gwadi oꞌra (22.6–21)
1
Gwerre gwerre
1 ꞌTäälü gwuru nggwee gwudi Yicu Kirictu gwanni gwätädï Ngwaalu ngwenggaci ngwïnädä ngwüngün yiꞌral yanni giyo gito yadi ji. A je Yicu ꞌtäcï dïnädälü düngün dani Yuwana gïꞌrr ge güngün ganni gükäjïng. 2 Yima je Yuwana inggidi ꞌdar yanni yänggädïng je. No ngwujaꞌri ngwuru ngwee ngwudi Ngwaalu aar ru inggidi gwanni gwaru gwe Yicu Kirictu. 3 Gwa aar onjaci gwanni gwa uli ngwujaꞌri ngwudi yïjïr giyee na la aar je onjaci lanni la ꞌdingini na lanni la ärrï yiꞌral yanni giyo gïyïjïränü giyee. Ndi ari gaji gima ja gito ndi yiꞌral giyee ji.
Aganni yiꞌdonga yidi Ngwaalu
4 Ngwujaꞌri ngwee ngwïndï ꞌdünggüny äny gwani Yuwana, ngwükäcï nje ngwïkïrïjïnä giyiꞌdoonga kwoꞌra täꞌrïl (7) yidi ngwaalu ngwani Ajiya.
Ara je gu yïmïꞌrü na adatalu gwudi Ngwaalu ji nginde gwanni nggwo 1.4 Gwuruj 3.14 na gwanni gwuju na gwanni gwa ji gwila. Na ngwügïꞌrïm kwoꞌra täꞌrïl (7) ngwanni ngwo ngwüdünäcä diduꞌralu düngün didi yeleny 5 na ndi Yicu Kirictu gwanni gwinggidu ligor leꞌte pu gwanni gwuru giꞌra ndi ꞌdïꞌrï giyiꞌranyanu gwuru deleny didi ngwelenyinga ngwudi dïyängälü.
Nginde gwanni gwati nje ämnï a gwuminje üꞌrälü ndi ke gwege yïn ye yüngün, 6 gwuminje ruji yeleny na ngwurꞌdal nunnu ar äpïjï Ngwaalinga yiiru ngwuru Papa gwüngün. Gwuru näjï ngwuru yiima yidi gwurꞌtaling. 1.6 Gwuruj 19.6; 1 Butruj 2.5,9 Yiru gu.
7 Geꞌtar ngwäyälü! Ndi ari Yicu nggwo gwadi ꞌtädälü gïyïbäꞌrälä,
a gwa ngwüjï ꞌdar engga,
ꞌdi ꞌto ngwüjï ngwanni ngwudugu giiri ge,
na ngwüjï ꞌdar gïdïyängälü ngwa runi gwani nginde. 1.7 Jäkärïyä 12.10
No ya gu ru! Yiru gu.
8 Deleny diru Ngwaalu daru nu, “Äny gwuru gwanni gwuru giꞌra nyi ru gwanni gwuru gora. Nginde gwuru gwanni nggwo na gwanni gwuju na gwanni gwa ji gwila, nginde gwanni gwuru yiima giyiꞌral ꞌdar.”
Gwanni gwuru nono Gïjï gidi Dïjï dümnä
9 Äny gwuru diweengga dalu dani Yuwana gwacajida le gïdïrbänü ngaa le acajidi giyelenyanu na ndi määtä yiguri na orꞌtemaji gwani Yicu. Äny gwuju ngwaalu giyaanu ngwani Bitumij ndi ondaci ngwüjü ngwujaꞌri ngwudi Ngwaalu nyi inggidi Yicu gwe. 10 Komon gidi Deleny, a nyi Lïgïꞌrïm lidi Ngwaalu aw nono nyi ꞌdingini giluꞌranu dula dipa gärnänü nono yal yidi giil, 11 aar nyi ci, “Yanni yänggädä je, ullu je kitabanu nga je ükäcï yiꞌdonga giyee kwoꞌra täꞌrïl (7), Abijuj, Jämïrnä, Bargamuj, Tiyatira, Jarduj, Bïlädïlïbïyä na Lädükïyä.”
12 Nyi be gwurlalu ndi ombaji nyi engga yärü gwuru gwondaciny. Anni miny gwurlalu nyi engga yudina yidi ngwamba kwoꞌra täꞌrïl yiru dab 13 gidiliganu didi yudin nyi gu engga dïjü diju gu diru “nono gïjï gidi dïjï dümnä.” 1.13 Daniyal 7.13 Digenna direda dola düllälü ꞌdi ngwobani giyoralu yüngün nyi engga lägüwä liru dab lïmïlïdïnä konggemala güngün. 14 Ngwäꞌrü kiꞌra güngün ngwuru nono ngwola ngwubidu aar bidi nono ngwäbïꞌrä. Na ngwäy ngwüngün ngwïtänü nger nger nono lïgä. 15 Ngwari yora yüngün nggäm nggäm nono buta gwügwällär lïgä le na yal yüngün ari nono yaw yonyadu yüllü därä. 16 Gwümäätädï yuurrumu kwoꞌra täꞌrïl (7) gaama ge güngün a galal ꞌtüdä ngwulemanu ngwüngün gätï yïnï giyimere ꞌdün. Ngwuru ngwäyänü ngwüngün nono lingen lïtänü.
17 Anni miny engga nyi ïꞌdï giyoranu yüngün nono dïjï dayu. Aar nyi gu geꞌte guyala güngün giru gaama ngwari, “Aaꞌti yedeny ya ang eny. Äny gwuru gwanni gwuru giꞌra nyi ru gwanni gwuru gora. 18 Äny gwuru gwanni gwumidu, äny gwayu gwele a be gweneno äny nggwo gwumidu miding gwudi gwurꞌtaling. Na äny gwuru gwümätï mubita gwudi längïr lidi yiꞌrany na del didi yiꞌrany.
19 Yäy gu no, yanni yänggädä je ulla je, yanni giyo gweneno na yanni ya ji gweere. 20 Yujimidi yidi yuurrum kwoꞌra täꞌrïl (7) yanni yänggädä je kaama güny na yudin yiru dab yidi ngwamba kwoꞌra täꞌrïl yani no, yuurrum kwoꞌra täꞌrïl (7) yani ngwooꞌra ngwudi yiꞌdoonga yidi Ngwaalu kwoꞌra täꞌrïl (7), na yudin yiru dab yidi ngwamba kwoꞌra täꞌrïl (7) yani yiꞌdoonga yidi Ngwaalu kwoꞌra täꞌrïl (7).”