Mokanda ŋwa Yoane ŋwa iɓale
Yoane
Maphɔɔ ma etatele
Moto owa koma mokanda mumu kamiɓangye na nkombo ya «Nkumu». Na maphɔɔ mawɔ yo mawɛninya oɓokye ɓaanosi ɓaakomele yo ɓaɓaka ɓamokumole. Atomaka mokanda mɛ oka Ingomba sɔnɔsɔ siɓangye yo: «Mwasi owa ɔlɔ Ŋwaphongo na ɓana ɓɛ» (Etee ya 1-2).
Kalenza ɓaanosi oɓokye ɓaphile ɓophɛlɛlu maphɔɔ ma phɛlɛ, ɓambe na ɓa na lozingo (1-6). Kaɓakyebisa oɓokye ɓɛ̀ɛ saɓenga mateya maa ɓɔɔlɛ (7-11). Phɔ ya isɔkya, kaimole imbanga saamokyɛ yo oka ɓɛ̀ɛ.
Nde ɓowakomaka yo o mokanda ŋwa ntuɓo, o mokanda mumu Yoane kaongye na ɓaanosi ɓasɔ oɓokye ɓaingole miyo, ɓambe na phila sakolo ianola.
Maphɔɔ mali o mokanda mumu mango mama:
- Etee ya 1-3: Maphɔɔ ma etatele
- Etee ya 4-11: Laakolo lozingo, na ikyebisa phɔ ya mateya maa ɓɔlɛ
- Etee ya 12-13: Maphɔɔ ma isɔkya
1
Iɓeya
1 Inga, nkumu ya ingomba sa Ŋwaphongo, nakomele mokanda mumu, iwɛ ŋwaŋwasi owa ɔlɔ Ŋwaphongo na ɓana ɓa wɛ,
ɓaazingye nga phɛlɛphɛlɛ
teli nga mampenza,
kasi na ɓato ɓasɔ ɓaali na zebi sa maphɔɔ ma phɛlɛ,
2 phɔ ya maphɔɔ ma phɛlɛ mali onte ya ɓanga
emba maa moɓa na ɓanga ɓoɓɛlɛ:
3 Lɛ oɓokye Ŋwaphongo Ango wa ɓanga na
Yesu Klisto, Ŋwana wa Tata, ɓalophɛ ngɔlu,
ɓalookye ngɔngɔ, ɓalophɛ na ɓose,
phɔ tobikye onte ya phɛlɛ ná lozingo.
4 Nasepesi na ɓoikye
iya wɛnɛ ɓana ɓa wɛ ɓatambule o nzela ya maphɔɔ malaa,
ndengye eyawɔ moɓeko ŋwaa zwa ɓanga na Tata.
5 Emba uŋwaŋwa eye, mama, naongye na wɛ
— siiekomele wawa moɓeko munyakune,
kasi ŋwaazwaka ɓanga tata o etatele —, oɓokye
tozingane ɓanga na ɓanga.
6 Kyeka ɓoli lozingo:
Totambule o nzela ya miɓeko mɛ.
Mɛna eli moɓeko ŋwa oka ɓɛ̀ɛ tata o etatele,
phɔ ya oɓokye otambule o nzela mɛ.
7 Phɔ ɓakosee ɓaikye ɓanyangwa o mokyisi.
Teɓaanole oɓokye Yesu Klisto aya na nzoto.
Yo mɔna, mokose na motɛmɛsi wa Klisto!
8 Nde kokyeɓe,
phɔ ɓɛ̀ɛ sabungya mbuma ya bitoma ɓa ɓɛ̀ɛ,
kasi ozwe eyaakolo mbano.
9 Moto musɔ okolɔɓo phunda o ɓoo
tambe ikala o mateya ma Klisto,
tali na Ŋwaphongo.
Okoikale o mateya,
iyo ali na ná Tata na ná Ŋwana.
10 Ɓo moto aesi oka ɓɛ̀ɛ
taikyi yaa na mateya mamana,
samoyamba
samba na munyangyela.
11 Owaamunyangyela
aanga o bitoma ɓa moto mɛ biiɓe.
12 Nali na maphɔɔ maikye ma iyekomela,
kasi siki zinga iyekomela na lokasa na maa ma mokanda.
Phɔ naumunya iyaa oka ɓɛ̀ɛ
na iyaa ewɔlɛ yango nga mampenza,
phɔ ɓanga ɓasɔ toɓe na nkyisa.
13 Ɓana ɓa nkanasa ya wɛ owa ɔlɔ ɓɛ, ɓaelɔngɔsi.