Simo elaa ya Yesu Klisto eya imolaka
Yoane
Maphɔɔ ma etatele
O nte ya Masimo masɔ Maalaa mane, eyaka Yoane yakyɛsɛnɛ na ɓoikye na eyaka Matie, Malako na Luka. Yakokana na maaka ɓɛ́ɛ nde na simo ya minyɔkɔ ma Yesu (Yoane 18-19), na ná ndambo ya maphɔɔ maayɔkɔ.
Mokanda ŋwa Yoane moli na bitee binɛnɛ biɓale:
Yoane 1-12: Imbɛlɛ sa Yesu saɓokokakye (kyeka o 2.4)
- Yoane 1.1-18: Maloɓa ma etatele. Yesu ali Iloɓa sa Ŋwaphongo saabutwa moto; yo ayelela ɓato moo na ɓomɔ
- Yoane 1.19-51: Yesu atati imomola na ɓato ɓɛ, Yoane Moɓatise, Andele, Petelo, Filipe, na Natanaele
- Yoane 2.1–12.36: Etoma ya Yesu. Yesu avani na ɓato ndengye na ndengye, emba akyela na bilekyesako sambo: Ɓolonga pha Kana; mwana wa mokonzi, etuku; Yesu azeye ɓato nkoto itano; atambusi o ikolo sa maa; abikye moto owa phɔlɔ miyo, akundosi Lazalo
- Yoane 12.37-50: Yesu awɛni oɓokye ɓato ɓalɛ imoanola
Yoane 13-21: Waakoka «Imbɛlɛ sa Yesu»
Yoane 13-16: Mateya ma Yesu ma suka
Yoane 17: Iɓondɛsi sa Yesu siinɛnɛ
Yoane 18-21: Minyɔkɔ na ikundwa sa Yesu. Yesu amiwɛninye oka ɓaekosi sambo
Yoane akomaka Simo Elaa «phɔɔ ɓɛ̀ɛ oanole oɓokye Yesu ali Masiya Ŋwana wa Ŋwaphongo. Bo ɓɛ̀ɛ oanosi ɓomɔɔ, yo amokyela oɓokye ozwe ɓomɔɔ phaa ɓoɓɛlɛ» (20.30-31).
1
Etatele
1 O etatele Iloɓa aɓaka,
Iloɓa aɓaka oka Ŋwaphongo, Iloɓa aɓaka Ŋwaphongo.
2 O etatele aɓaka oka Ŋwaphongo.
3 Mbolo isɔ yakyelama nde nɛ,
ɓo sɛɛ phe ekpele yɔnɔyɔ nde teyakyelama.
4 Isɔ yaakyelama nɛ ili na ɓomɔɔ, emba ɓomɔɔ phaɓaka moo ŋwa ɓato.
5 Moo muungyɛngyɛ onte ya enzɔmbi,
emba enzɔmbi teikyi koka imozimya.
6 Yaɓaka moto mɔnɔmɔ, owatomaka Ŋwaphongo: Nkombo yɛ yaɓaka Yoane.
7 Iyo aesi iya ɓa nzoka, phɔ awɔlɛ moo, phɔ ya oɓokye ɓato ɓasɔ ɓaanole phɔ yɛ.
8 Iyo mampenza taikaka ɓa moo, kasi ayakaka ya wɔ nde phɔ ya moo.
9 Iloɓa aɓaka nde ŋwaakolo munyɛlɛ ŋwaya o mokyisi, ŋwaangyɛngyɛlɛ moto munsɔ.
10 Aɓaka o mokyisi,
mokyisi ŋwakyelama nde nɛ,
kasi mokyisi teŋwaika moeɓa.
11 Aesi o mokyisi nwɛ mampenza,
kasi ɓato ɓɛ́ɛ teɓaikyi moyamba.
12 Kasi oka ɓaamoyambi, ɓaanosi na nkombo yɛ, aɓaphɛ ɓokonzi pha ibutwa ɓana ɓa Ŋwaphongo.
13 Ɓɛ́ɛ teɓaika ɓotama na malongo, na ná phowa ya nzoto, na ná phowa ya moto, kasi na Ŋwaphongo.
14 Iloɓa amibuye moto
ambi ya zala onte ya ɓanga
emba towɛni nkyɛmɔ yɛ.
Nkyɛmɔ mɛ eli oɓokye, Ŋwana nde mɔnɔmɔ, owatonda na ngɔlu na ná phɛlɛ yauta na Tata.
15 Yoane aaŋwanaka, amba imola phɔ yɛ yokye: «Kyeka owa wɔkɔ nga oɓokye: O sima ya nga, kyeye moto mɔnɔmɔ ookondekye, phɔ aɓaka o ɓoo pha nga.»
16 Phɔ nde nɛ owa isɔ, ɓanga ɓasɔ tozwa ngɔlu o ikolo sa ngɔlu.
17 Ɓo Moɓeko ŋwambyamaka o maɓɔkɔ ma Mose, ngɔlu na phɛlɛ yaya na Yesu Klisto.
18 Moto mɔnɔmɔ taikawɛnɛ Ŋwaphongo; kasi Ŋwana nde yo mɔnɔmɔ ooli Ŋwaphongo, yo ooli onte ya Tata, aloteya yo.
Yoane aimosi phɔ ya Yesu
19 Kyeka munɔkɔ ŋwa Yoane imbɛlɛ saɓa yo o Yelusalɛmɛ, waamotomela Ɓayuda ɓanganga ɓa Ŋwaphongo na ɓalewi phɔ ya imotuna motuna oɓokye: «Wɛ oli nza?» 20 Taika zita, amba wɔ yokye: «Nga sili Klisto.» 21 Emba ɓamba motuna ɓɛkye: «Wɛ oli nza? Oli Eliya?» Amba buya yokye: «Nga sili Eliya». «Oli Moimosi?» Amba buya yokye: «Phe». 22 Emba ɓamba wɔ nɛ ɓɛkye: «Wɛ ombi ɓa nza? Phɔ tokyɛ imola ɓalotomakyi! Kowɔ ɓo phɔ ya wɛ mampenza?» 23 Amba ya wɔ yokye: «Nali ŋwɛsi ŋwa moto okoaŋwane o obokye oɓokye: “Ɓɔngya nzela ya Nkolo!”» Ɓo wawɔ moimosi Izaya. 24 Nzuka ɓato ɓatomaka ɓɛ́ɛ ɓaɓaka Ɓafalisayi. 25 Ɓamba kula nde motuna ɓɛkye: «Ɓo toɓee Klisto, naa Eliya, naa Moimosi, phɔ ya'ye koɓatisa?» 26 Yoane amba ɓabuyisa yokye: «Nga, naɓatisa na maa. Onte ya ɓɛ̀ɛ, moto mɔnɔmɔ ali, ɓɛ̀ɛ toomoeɓe. 27 Kaye o sima ya nga, sikokyi na iyingola simbi ya bikoto ɓɛ.» 28 Maphɔɔ masɔ mamana malekanaka o Ɓetani o mokukulu moyɔkɔ ŋwa Yaladɛnɛ, waaɓaka Yoane kaɓatisa.
Yesu, Ŋwana wa mpate wa Ŋwaphongo
29 Ɓo yana, aesi ya wɛnɛ Yesu kaye bili yo, amba wɔ yokye: «Kyeka Ŋwana wa mpate wa Ŋwaphongo okomanya masumu ma ɓato. 30 Eli nde phɔ yɛ nawɔkɔ oɓokye: “O sima ya nga moto ookoye kandekye, phɔ aɓaka o ɓoo pha nga.” 31 Nga mampenza, simoeɓe, kasi nde phɔ ya imiwɛninya sɛɛ oka Isalayɛlɛ, yango mɛna naesi iyaɓatisa na maa.» 32 Yoane amba wɔ yokye: «Nawɛnɛkyɛ Ɓolɔɓɔ ɓoute o ikolo ndokolo inkotoŋwenya, ɓoesi yakyɛ tɛmɛ o ikolo sɛɛ. 33 Emba nga siikaka nweɓa, kasi owantoma iɓatisa na maa, eli yo o wa wɔ na nga oɓokye: “Owa mowɛnɛ wɛ Ɓolɔɓɔ ɓoute ɓokyɛ tɛmɛ o ikolo sɛ, eli yo o wa moɓatisa na Ɓolɔɓɔ Ɓosantu.” 34 Emba nga, nambo wɛnɛ, na wɔ ngakye, iyo ali Ŋwana wa Ŋwaphongo.»
Ɓaekosi ɓa Yesu ɓaa ɓoo
35 Ɓo yana, Yoane akulaka ɓa o elele mɛ, yo na ɓaekosi ɓɛ́ɛ ɓaɓale. 36 Waawɛnɛ yo Yesu katambule, amba wɔ yokye: «Kyeka Ŋwana wa mpate wa Ŋwaphongo!» 37 Wamooka ɓaekosi ɓaɓale kawɔ ɓaɓona, ɓamba ɓenga Yesu. 38 Yesu amba ya miekpinya, waawɛnɛ yo oɓokye ɓamoɓengye, amba wɔ na ɓɛ́ɛ yokye: «Ɓɛ̀ɛ kolukye'ye?» Ɓamba buya ɓɛkye: «Labi — kyelukye iwɔ ɓokye Moteye —, koɓe bi?» 39 Amba wɔɔ na ɓɛ́ɛ yokye: «Yaka wamowɛnɛ.» Emba ɓamba ya kyɛndɛ, ɓamba ya kyɛ wɛnɛ elele ekye ɓe yo, emba ɓamba ya zala nɛ mokɔlɔ mɛ. Yaɓaka phɛnɛphɛ ngonga ya iko.
40 Andele, ŋwana nyango na Simo Petelo, aɓaka mɔnɔmɔ na ɓaɓale ɓaokaka Yoane na ɓaɓengaka Yesu. 41 O ɓoo pha ɓato ɓasɔ, amba kyɛ zwa ŋwana nyango Simo, amba wɔ nɛ yokye: «Towɛni Masiya.» — Kyelukye iwɔ ɓokye Klisto. 42 Amba yakyɛ nɛ oka Yesu. Wamolembetela yo, Yesu yokye: «Oli Simo, ŋwana wa Yoane, ɓamoeɓanga Sefasi.» — Kyelukye iwɔ ɓokye «Petelo».
43 Ɓo yana, Yesu aesi kyɛndɛ o Galileya. Amba yakyɛ zwa Filipe amba wɔ nɛ yokye: «Imbengye!» 44 Filipe aɓaka moto wa Ɓetesaida, mokyisi ŋwa Andele na Petelo. 45 Filipe amba yakyɛ vana na Natanayɛlɛ, amba wɔ nɛ yokye: «Towɛni owakoma ɓɛ́ɛ maphɔɔ mɛ o buku pha miɓeko ma Mose na ɓaimosi: Eli Yesu, ŋwana wa Zozefu owa Nazalɛtɛ». 46 Natanayɛlɛ amba wɔ yokye: «O Nazalɛtɛ wakokyi itɔkɔlɔ lowɔ lolaa?» Filipe amba wɔ yokye: «Yaka ya kyekye.» 47 Yesu amba ya kyeka Natanayɛlɛ okoye bili yo, amba wɔ na ɓato ɓaaɓaka nɛ phɔ yɛ yokye: «Kyeka owakolo moto wa Isalayɛlɛ ootoli na ɓɔlɛ». 48 Natanayɛlɛ amba motuna yokye: «Konzeɓe bi?» Emba Yesu amba mobuyisa yokye: «Waaɓa Filipe saɓoeɓangakye, waaɓa wɛ o se ya ŋwete ŋwa fige, naewɛnɛkyɛ.» 49 Natanayɛlɛ amba buya yokye: «Labi, oli Ŋwana wa Ŋwaphongo, oli mokonzi ŋwa Isalayɛlɛ.» 50 Yesu amba mobuyisa yokye: «Oanosi nde phɔ nawɔ na wɛ oɓokye naewɛnɛkyɛ o se ya ŋwete ŋwa fige. Wamowɛnɛ maphɔɔ maikye malekyi ɓonɛnɛ ileka lolo.» 51 Emba amba kula wɔ yokye: «Phɛlɛ phɛlɛ nawɔ na ɓɛ̀ɛ, wamowɛnɛ ikolo siingo, emba ɓanze ɓa Ŋwaphongo ɓabaa ɓaute o ikolo sa Ŋwana wa Moto.»