BÚKÙ TÀ TƗ́DHƗ́//RU YÌZO DHƗ ÀDHYA 2 YÒWÁNƗ̀ 1

Wárágà Yòwánɨ̀ dré tɨsɨ̀le dhɨ nɨ rì

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà Yòwánɨ̀ dré tɨsɨ̀le dhɨ nɨ rì ꞌɨ. Akódhɨ adré tɨsɨ̀á «Tòkó Gìká dré zɨ̀le dhɨ dré akódhɨ nɨ ànzɨ ɨ́be» (1:1). À adré kisùá dhɨ, kòdhɨ adré lèá tàle dhɨ, adré tɨsɨ̀á Èkèlézyà àlo dhɨ dré móndyá lá dhɨ ɨ́be. Wárágà tsà kònɨ̀dhɨ léna dhɨ, Yòwánɨ̀ adré móndyá kaꞌìbhá dhɨ kɨ kodzó, ɨ̀ kàdréró ru le àyɨ kòfalésè, ɨ̀ndɨ̀ ɨ̀ kàdréró àyɨ kɨ lɨkɨ́ tà tadhábhá kɨnzò sè dhɨ kɨ tà sè. Ɨ̀ kàdré kpà dhya ángùdhi adrélépi tà twá tadhá Krísto àdhya rúsè dhɨ nɨ ga.

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Yòwánɨ̀ nɨ mòdo fèma (1:1-3)

2) Atsima tà bàti na ɨ̀ndɨ̀ lèle na dhɨ (1:4-6)

3) Tà tadhábhá kɨnzò sè dhɨ ɨ (1:7-11)

3) Kúlí kùdù (1:12-13)

Yòwánɨ̀ nɨ mòdo fèma

1 Ma, bhàgo, má adré wárágà kònɨ̀dhɨ nɨ tɨsɨ̀ àmɨ, Tòkó Gìká dré zɨ̀le dhɨ dré ámɨ ànzɨ ɨ́be.* Má adré àmɨ kɨ le tà bàti na. Ngbà ꞌí ma ꞌɨ ko, móndyá títí tà bàti nibhá dhɨ ɨ̀ adré kókpà àmɨ kɨ le tò. 2 Tàko ko, tà bàti nda adré adrélé àma léna, ɨ̀ndɨ̀ a nɨ adré àma ɨ́be kóná vésè kólyá.

3 Gìká àma kɨ Atá ɨ akódhɨ nɨ Mvá Yésu Krísto be dhɨ ɨ̀ kòbhà àyɨ kɨ togó tanɨ àma rú, ɨ̀ kòbhà àma kɨ kɨzà, ɨ̀ndɨ̀ ɨ̀ kàfè tà kɨ̀drɨ́kɨ̀drɨ àma dré tà bàti na ɨ̀ndɨ̀ lèle na!

Atsima tà bàti na ɨ̀ndɨ̀ lèle na dhɨ

4 Má lenzé tá lavúlé, má dré ámɨ ànzɨ àruka kɨ kisúlé adréràꞌa atsílé tà bàti na, ngóró Gìká Atá dré tá tàle mà kòꞌo dhɨ tɨ́nɨ dhɨ sè. 5 Dɨ nyànomvá dhɨ, mɨ, Tòkó má dré lèle tò nɨ, má adré tòlɨ́ tɨ́dhɨ́ ro dhɨ nɨ tɨsɨ̀ mɨ́ dré ko. Be ró dhɨ, má adré tòlɨ́ mà dré adrézó ába kɨdhólé kɨdhoma lésè dhɨ nɨ tɨsɨ̀ kòdhya. Má adré ámɨ ti lizí, mà kàdréró ru le àma kòfalésè. 6 À adré lèle nda nɨ no tà kònɨ̀dhɨ sè: Mà kàdré atsílé ngóró Gìká nɨ tòlɨ́ dré adrélé tàle dhɨ tɨ́nɨ. Ngóró mɨ̀ dré yìle kɨdhólé kɨdhoma lésè dhɨ tɨ́nɨ dhɨ, tòlɨ́ nda kònɨ̀dhɨ ꞌɨ: Mɨ̀ kàdré atsílé lèle na.

Tà tadhábhá kɨnzò sè dhɨ ɨ

7 Móndɨ́ bǐ adrébhá móndɨ́ kɨ lɨtɨ́ dhɨ ɨ̀ apfò ayɨ́lé bvò wä́yi ꞌásè. Àyɨ nda ɨ̀ adré kaꞌìá ko tàle dhɨ, Yésu Krísto atsá bvò kònɨ̀dhɨ ꞌá móndɨ́ ro dhɨ. Dhya ángùdhi adrélépi tà ta làsú be kònɨ̀nɨ dhɨ, móndɨ́ kɨ lɨtɨ́lépi ꞌɨ, ɨ̀ndɨ̀ Krísto nɨ kàrɨbhá ꞌɨ. 8 Mɨ̀ kàdré dɨ àmɨ kɨ lɨkɨ́, mɨ̀ kòtayɨ́ró tà mà dré àzí ꞌòzo ásà dhɨ lapálé ko, be ró dhɨ, mɨ̀ kòkisúró làgɨ́ múrúngú kɨtswálépi àmɨ dré dhɨ be dhɨ bvó.

9 Dhya ángùdhi adrélépi ràle drìdrì gò adrélé tròle tà Krísto dré tadhálé dhɨ ɨ rú ko dhɨ, akódhɨ nda Gìká àko ɨ́ léna. Dɨ, dhya ángùdhi adrélépi tròle tà Krísto dré tadhálé nda ɨ rú dhɨ, akódhɨ nda Gìká Atá ɨ́be, ɨ̀ndɨ̀ Gìká nɨ Mváagó ɨ́be ɨ́ léna. 10 Dhya àlo kòtsa àmɨ véna adrélé tà twá tadhá tà kòdhɨ ɨ rúsè dhɨ, mɨ̀ kòkaꞌì akódhɨ nda dòle àmɨ kɨ dzó na ko. Mɨ̀ kòfè ndɨ̀ndɨ̀ mòdo akódhɨ dré ko. 11 Tàko ko, dhya ángùdhi adrélépi mòdo fe drá dhɨ, ɨ̀ adré ru amú akódhɨ be tà kònzɨ dré adrélé ꞌòle nda ɨ na.

Yòwánɨ̀ nɨ kúlí kùdù

12 Ma dhu rè tà ɨ́be bǐ tàle àmɨ dré. Dɨ, má lè mána tà nda kɨ tɨsɨ̀le wárágà sè ɨ̀ndɨ̀ wárágà sú sè ko. Be ró dhɨ, má adré mì bha tsàzo àmɨ véna, mà kòkɨtswáró tà ta ti sè, mà kòlenzéró túmä́ní àmɨ ɨ́be kɨtswálé títí.

13 Ámɨ Amvúpi Gìká dré zɨ̀le dhɨ nɨ ànzɨ ɨ̀ fè mòdo mɨ́ dré.†

*1:1 1:1 À adré kisùá dhɨ, kúlí «Tòkó Gìká dré zɨ̀le dhɨ ànzɨ nɨ ɨ́be» kònɨ ɨ̀ adré lèá tàle dhɨ, «Èkèlézyà àlo móndyá lá dhɨ ɨ́be dhɨ ɨ».

†1:13 1:13 À adré kisùá dhɨ, kúlí «ámɨ Amvúpi Gìká dré zɨ̀le dhɨ nɨ ànzɨ ɨ» kònɨ ɨ̀ adré lèá tàle dhɨ, «móndyá Èkèlézyà Yòwánɨ̀ véna dhɨ lé dhɨ ɨ».