BÚKÙ TÀ TƗ́DHƗ́//RU YÌZO DHƗ ÀDHYA 2 TÈSÀLÒNÍKÈBHÁ Ɨ 1

Wárágà Pólò dré tɨsɨ̀le Tèsàlòníkèbhá ɨ dré dhɨ nɨ rì

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà Pólò dré tɨsɨ̀le móndyá kaꞌìbhá Tèsàlòníkè na dhɨ ɨ dré dhɨ nɨ rì ꞌɨ. Wárágà kònɨ̀dhɨ léna dhɨ, akódhɨ adré àwoyà ta Gìká dré Tèsàlòníkèbhá kɨ tà kaꞌìkaꞌì nɨ tà sè ɨ̀ndɨ̀ àyɨ kɨ lèle sè, tágba à dré adrézó àyɨ kɨ mì pfo lavúlé gò, ɨ̀ dré adrézó kɨzà nya dhɨ. Adré kpà gòle Yésu nɨ agòma nɨ tà tadhá àyɨ dré, ngóró dré tá tadhálé àyɨ dré áyɨ wárágà nɨ àlo léna dhɨ tɨ́nɨ. Tàko, móndɨ́ àruka ɨ̀ adré tá tàá àyɨ dré kɨnzò sè dhɨ, kìtú Yésu dré dra agòzo dhɨ atsá dre. Dɨ Pólò adré àyɨ kɨ lotó, adrézó tàá àyɨ dré dhɨ, lè móndɨ́ zyandre dhɨ ɨ̀ kòlɨgɨ́ rè zyà Gìká rú gò, agó drìkònzɨ líyí ro dhɨ dré apfòzo ꞌíká gò, Yésu kàgòró ndò. Adré dɨ àyɨ kɨ kodzó, ɨ̀ kàdréró àyɨ kɨ totó tätä, adrélé tròle tà dré tadhálé àyɨ dré dhɨ ɨ rú.

Adré kpà àyɨ kɨ kodzó, ɨ̀ kòtayɨ́ró àyɨ adrélé tòbvo ró ko. Be ró dhɨ, ɨ̀ kàdré àzí ꞌo ngóró dré tá ꞌòle àyɨ kòfalé dhɨ tɨ́nɨ, ɨ̀ndɨ̀ ɨ̀ kòtayɨ́ àyɨ adrélé landèle tà dóro ꞌòma sè ko.

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Mòdo fèma (1:1-2)

2) Àwoyà fèma Tèsàlòníkèbhá kɨ tà kaꞌìkaꞌì nɨ tà sè dhɨ (1:3-12)

3) Tà tadhálé Yésu nɨ agòma nɨ tà dri dhɨ (2:1-17)

4) Tà zìma Gìká tí dhɨ, ɨ̀ndɨ̀ àzí ꞌòma (3:1-15)

5) Mòdo kùdù (3:16-18)

Mòdo fèma

1 Ma, Pólò, túmä́ní Sílà ɨ́be ɨ̀ndɨ̀ Tìmòtéyò be dhɨ ɨ, mà adré wárágà kònɨ̀dhɨ nɨ tɨsɨ̀ Èkèlézyà Tèsàlòníkè na dhɨ dré, àmɨ adrébhá Gìká àma kɨ Atá àdhya ró ɨ̀ndɨ̀ Mírì Yésu Krísto àdhya ró dhɨ ɨ dré. 2 Gìká àma kɨ Atá ɨ Mírì Yésu Krísto be dhɨ ɨ̀ kòbhà àyɨ kɨ togó tanɨ àmɨ rú, ɨ̀ndɨ̀ ɨ̀ kòfè tà kɨ̀drɨ́kɨ̀drɨ àmɨ dré!

Tèsàlòníkèbhá kɨ tà kaꞌìkaꞌì, ɨ̀ndɨ̀ tàbvó Gìká dré dra tàle gyǎgya lókyá kùdù sè dhɨ

3 Àma kɨ adrúpi ɨ, lè mà kàdré ngbú àwoyà ta Gìká dré àmɨ kɨ tà sè. Tà nda kòdhɨ gyǎgya, tàko ko, mɨ̀ adré Gìká nɨ kaꞌì togó wä́yi sè adrézó lɨ̀le ába drìdrì. Àmɨ títí, mɨ̀ adré kpà ru le àmɨ kòfalésè adrézó lɨ̀le ába drìdrì. 4 Tà nda sè dhɨ, mà adré àmɨ kɨ tà ta drì be kuru Èkèlézyà Gìká àdhya ɨ kòfalésè. Mà adré tàá àyɨ dré dhɨ, mɨ̀ adré Gìká nɨ kaꞌì, adrézó togó tsɨ, tágba à dré adrézó àmɨ kɨ mì pfo lavúlé gò, mɨ̀ dré adrézó kɨzà nya dhɨ.

5 Tà nda kòdhɨ ɨ̀ adré tadhá dhɨ, Gìká adré tàbvó ta gyǎgya. Tàko ko, kɨzà mɨ̀ dré adrélé nyàle kòdhɨ ɨ sè dhɨ, Gìká nɨ àmɨ kɨ ꞌo kɨtswálé áyɨ Òpɨ̀ mɨ̀ dré adrézó kɨzà nya ásà dhɨ sè. 6 Tà bàti ró dhɨ, Gìká gyǎgya. A nɨ kɨzà logó móndyá adrébhá kɨzà fe àmɨ dré dhɨ ɨ dré gò, 7 tà kɨ̀drɨ́kɨ̀drɨ afèzo àma adrébhá kɨzà nya túmä́ní àmɨ ɨ́be dhɨ ɨ dré. A nɨ ꞌòá kònɨ̀nɨ lókyá Mírì Yésu dré dra agázó bhù lésè áyɨ ángéló rìnyi ró dhɨ ɨ́be dhɨ tú. 8 Akódhɨ nda nɨ alɨ̀ àtsɨ́ adrélépi kòle dhɨ na, kɨtswálé tà ŋo móndyá Gìká nɨ nibhá ko dhɨ ɨ dri, ɨ̀ndɨ̀ móndyá àma kɨ Mírì Yésu nɨ Rúbí Tanɨ gabhá ꞌòle dhɨ ɨ dri. 9 À nɨ tà ŋo àyɨ nda ɨ dri gyǎgya, àyɨ kɨ tupfúzó todràle kóná vésè kólyá, ɨ̀ kàdréró vwàvwà ro Mírì rúsè, ɨ̀ndɨ̀ akódhɨ nɨ rìnyí mìlanzìlanzì ro dhɨ rúsè. 10 Tà nda nɨ ru ꞌo kìtú Mírì dré dra agòzo kɨtswálé mìlanzìlanzì kisú lɨndrɨ̀ be móndyá lólo títí áyɨ kaꞌìbhá dhɨ ɨ vélésè dhɨ tú. Àmɨ ró dhɨ, mɨ̀ nɨ adré kókpà àyɨ nda ɨ kòfalé, mɨ̀ dré kúlí mà dré longólé àmɨ dré dhɨ kɨ kaꞌìle dhɨ sè.

11 Tà nda sè dhɨ, mà adré tà zi àma kɨ Gìká tí àmɨ dré landè àko ró, kòꞌoró àmɨ kɨtswálé tà ɨ́ dré àmɨ kɨ azízó ásà dhɨ sè, ɨ̀ndɨ̀ kòꞌoró tà dóro títí mɨ̀ dré adrélé lèle ꞌòle àmɨ kɨ tà kaꞌìkaꞌì sè dhɨ ɨ kɨtswálé títí áyɨ rìnyí sè. 12 Mà adré zìá kònɨ̀nɨ, àma kɨ Mírì Yésu kòkisúró mìlanzìlanzì àmɨ kɨ tà sè, ɨ̀ndɨ̀ mɨ̀ kòkisúró kpà mìlanzìlanzì akódhɨ léna, àma kɨ Gìká ɨ Mírì Yésu Krísto be dhɨ kɨ togó tanɨ bhàle àmɨ rú dhɨ sè.